ന്യൂഡല്ഹി: ബിഹാറില് വോട്ടര് പട്ടികയില് നിന്ന് ഒഴിവാക്കപ്പെട്ടവരുടെ വിശദാംശങ്ങള് സമര്പ്പിക്കാന് തെരഞ്ഞെടുപ്പ് കമ്മിഷനോട് സുപ്രിം കോടതി നിര്ദ്ദേശിച്ചു. ഒക്ടോബര് 9നകം വിവരങ്ങള് കൈമാറണമെന്നാണ് നിര്ദേശം.
വോട്ടര് പട്ടിക സുതാര്യമല്ലെന്ന് ആരോപിച്ച് തെരഞ്ഞെടുപ്പ് കമ്മിഷനെതിരെ കോണ്ഗ്രസ് രംഗത്ത് വന്നിട്ടുണ്ട് . പൗരന്മാര് അല്ലാത്ത എത്ര പേരെ വോട്ടര് പട്ടികയില് നിന്നും നീക്കം ചെയ്തിട്ടുണ്ടെന്ന് കൃത്യമായി കമ്മിഷന് വ്യക്തമാക്കിയിട്ടില്ലെന്ന് കോണ്ഗ്രസ് നേതാവ് ജയ്റാം രമേശ് ആരോപിച്ചു.
നവംബര് 6നും 11നും ബീഹാര് നിയമസഭാ തെരഞ്ഞെടുപ്പിനുള്ള ഷെഡ്യൂള് തെരഞ്ഞെടുപ്പ് കമ്മീഷന് പ്രഖ്യാപിച്ചതിനു പിന്നാലെയാണ് സുപ്രിം കോടതിയുടെ നിര്ദേശം. വോട്ടര് പട്ടിക പരിഷ്കരണവുമായി ബന്ധപ്പെട്ട കേസാണ് സുപ്രിം കോടതിയുടെ പരിഗണനയിലുള്ളത്. കേസ് വീണ്ടും ഒക്ടോബര് 9നു പരിഗണിക്കാനായി മാറ്റി.
എന്നാല് വോട്ടര്മാര്ക്ക് ആര്ക്കും പരാതിയില്ലെന്നും ഡല്ഹിയിലെ രാഷ്ട്രീയ നേതാക്കള്ക്കും സര്ക്കാരിതര സംഘടനകള്ക്കുമാണ് പ്രശ്നമുള്ളതെന്നും തെരഞ്ഞെടുപ്പ് കമ്മിഷന് സുപ്രീം കോടതിയില് പറഞ്ഞു.
പട്ടികയില് നിന്ന് ഒഴിവാക്കപ്പെട്ടവര് ഇതുവരെ ഈ വിഷയത്തില് ഒരു പരാതിയുമായി എത്തിയിട്ടില്ലെന്നത് കോടതി പരിഗണിക്കണമെന്നാണ് തെരഞ്ഞെടുപ്പ് കമ്മിഷന് ആവശ്യപ്പെടുന്നത്.
