വധശിക്ഷ കാക്കുന്ന കൊടുംകുറ്റവാളികൾ നാല്പതായി

കൊച്ചി : സംസ്ഥാനത്തെ ജയിലുകളിൽ വധശിക്ഷ കാത്തുകഴിയുന്നവരുടെ എണ്ണം നാല്പതായി ഉയർന്നു.ഏറ്റവും ഒടുവിലായി പാലക്കാട് അഡീഷണൽ ജില്ലാ സെഷൻസ് കോടതിയാണ് നെന്മാറ ഇരട്ടക്കൊലപാതക കേസിൽ കൊടുംകുറ്റവാളി ചെന്താമരയ്ക്ക് വധശിക്ഷ വിധിച്ചത്.

അപൂർവ്വങ്ങളിൽ അപൂർവ്വമായ കേസായി പരിഗണിച്ചാണ് കോടതിയുടെ ഈ സുപ്രധാന വിധി. എന്നാൽ കേരളത്തിൽ ഒരു വധശിക്ഷ നടപ്പിലാക്കിയിട്ട് മൂന്ന് പതിറ്റാണ്ടിലേറെയായി എന്നതാണ് യഥാർത്ഥ ചരിത്രം. ഏറ്റവും അവസാനമായി 1991-ൽ കണ്ണൂർ സെൻട്രൽ ജയിലിൽ വെച്ച് റിപ്പർ ചന്ദ്രനെയാണ് കേരളത്തിൽ തൂക്കിലേറ്റിയത്.

അതിനുശേഷം നിരവധി പേർക്ക് കീഴ്ക്കോടതികളും ഹൈക്കോടതിയും വധശിക്ഷ വിധിച്ചിട്ടുണ്ടെങ്കിലും അതൊന്നും ഇതുവരെ നടപ്പിലാക്കപ്പെട്ടിട്ടില്ല. ഇപ്പോൾ വധശിക്ഷയ്ക്ക് വിധിക്കപ്പെട്ടിട്ടുള്ള ചെന്താമരയുടെ കേസ് കേരള സമൂഹത്തിൽ വലിയ ഞെട്ടലുണ്ടാക്കിയ ഒന്നാണ്. ഒരു മനുഷ്യന് ചെയ്യാൻ കഴിയുന്ന ഏറ്റവും വലിയ ക്രൂരതകളിലൊന്നാണ് ഈ കേസിൽ അരങ്ങേറിയത്.

2025 ജനുവരി ഇരുപത്തേഴിനാണ് പോത്തുണ്ടി ബോയൻ നഗർ സ്വദേശിയായ സുധാകരനെയും അമ്മ ലക്ഷ്മിയെയും ചെന്താമര അതിക്രൂരമായി കൊലപ്പെടുത്തിയത്. സംശയവും കടുത്ത മദ്യപാനവും കാരണം ഭാര്യയും മക്കളും ചെന്താമരയെ ഉപേക്ഷിച്ചു പോയിരുന്നു. ഇതിന് കാരണം സുധാകരൻ്റെ കുടുംബമാണെന്ന അന്ധമായ വിശ്വാസവും വൈരാഗ്യവുമാണ് കൊലപാതകത്തിലേക്ക് നയിച്ചത്.

ചെന്താമര

നേരത്തെ സജിത എന്ന യുവതിയെ കൊലപ്പെടുത്തിയ കേസിൽ ജീവപര്യന്തം തടവുശിക്ഷ അനുഭവിച്ചു വരികയായിരുന്ന ചെന്താമര, ജാമ്യവ്യവസ്ഥകൾ നഗ്നമായി ലംഘിച്ചുകൊണ്ടാണ് ഈ ഇരട്ടക്കൊലപാതകം നടത്തിയത്. പ്രതിക്ക് യാതൊരുവിധ മാനസാന്തരത്തിനും സാധ്യതയില്ലെന്നും, സമൂഹത്തിന് ഇയാൾ വലിയൊരു ഭീഷണിയാണെന്നും വിലയിരുത്തിയ കോടതി, ഇരുപത് ലക്ഷം രൂപ പിഴയും വിധിച്ചിട്ടുണ്ട്.

പിഴത്തുക കൊല്ലപ്പെട്ട സുധാകരന്റെ മക്കൾക്ക് നൽകണമെന്നും, അതിന് സാധിച്ചില്ലെങ്കിൽ സർക്കാർ സഹായം നൽകണമെന്നുമാണ് വിധി. പിഴ അടച്ചില്ലെങ്കിൽ പ്രതി മൂന്ന് വർഷം അധിക തടവ് അനുഭവിക്കേണ്ടി വരും. എൺപത്തിയൊന്ന് സാക്ഷികളുള്ള ഈ കേസിൽ നാൽപ്പത്തിയാറ് പേരുടെ മൊഴികളാണ് കോടതി പ്രധാനമായും പരിഗണിച്ചത്. കുറ്റകൃത്യത്തിന് ശേഷം യാതൊരു കുറ്റബോധവും പ്രതിക്കില്ലായിരുന്നുവെന്നത് ശിക്ഷയുടെ കാഠിന്യം വർദ്ധിപ്പിച്ചു.

നീതിന്യായ വ്യവസ്ഥയിൽ ‘അപൂർവ്വങ്ങളിൽ അപൂർവ്വമായ’ കുറ്റകൃത്യങ്ങൾക്ക് മാത്രമാണ് വധശിക്ഷ നൽകുന്നത്. ഒരു സെഷൻസ് കോടതി വധശിക്ഷ വിധിച്ചാലും അത് അന്തിമമല്ല. ശിക്ഷ നടപ്പിലാക്കുന്നതിന് മുൻപായി നിരവധി നിയമ കടമ്പകൾ കടക്കേണ്ടതുണ്ട്. കീഴ്ക്കോടതിയുടെ വിധി ഹൈക്കോടതിയുടെ ഡിവിഷൻ ബെഞ്ച് ശരിവെച്ചാൽ മാത്രമേ തുടർനടപടികളിലേക്ക് കടക്കാനാകൂ. ഹൈക്കോടതി വിധി ശരിവെച്ചാലും പ്രതിക്ക് സുപ്രീം കോടതിയെ സമീപിക്കാനുള്ള അവകാശമുണ്ട്.

അവിടെ അപ്പീൽ ഹർജിയും, പുനഃപരിശോധനാ ഹർജിയും, തിരുത്തൽ ഹർജിയും നൽകാം. ഇതെല്ലാം തള്ളപ്പെട്ടാൽ, ഭരണഘടനയുടെ ആർട്ടിക്കിൾ എഴുപത്തിരണ്ട് പ്രകാരം രാഷ്ട്രപതിക്ക് ദയാഹർജി നൽകാം. ദയാഹർജിയും നിരസിക്കപ്പെട്ടാൽ മാത്രമേ ഒരു പ്രതിയെ തൂക്കിലേറ്റാൻ നിയമം അനുവദിക്കുന്നുള്ളൂ.

പാറശ്ശാല ഷാരോൺ വധക്കേസിലെ ഒന്നാം പ്രതി ഗ്രീഷ്മയ്ക്ക് വിധിച്ച വധശിക്ഷ ഉൾപ്പെടെ നിരവധി കേസുകൾ ഇപ്പോൾ ഹൈക്കോടതിയുടെ പരിഗണനയിലുണ്ട്. ഈ നിയമനടപടികൾ പൂർത്തിയാകാൻ പലപ്പോഴും ദശാബ്ദങ്ങൾ തന്നെ വേണ്ടിവരാറുണ്ട്. ഈ കാലയളവിൽ കടുത്ത ഏകാന്തതയിലാണ് വധശിക്ഷ കാത്തുകഴിയുന്ന തടവുകാർ ജീവിക്കുന്നത്.

കേരളത്തിൽ വധശിക്ഷയുടെ ചരിത്രം പരിശോധിച്ചാൽ ഇതുവരെ ഇരുപത്തിയാറ് പേരെയാണ് തൂക്കിക്കൊന്നിട്ടുള്ളത്. സംസ്ഥാന രൂപീകരണത്തിന് ശേഷം 1958-ലാണ് ആദ്യമായി ഒരു വധശിക്ഷ നടപ്പാക്കുന്നത്. പിന്നീട് 1960 മുതൽ 1963 വരെയുള്ള കാലഘട്ടത്തിൽ അഞ്ച് പേരെയും, 1967 മുതൽ 1972 വരെയുള്ള സമയത്ത് മൂന്ന് പേരെയും തൂക്കിലേറ്റി. പിന്നീട് 1991-ൽ പതിനാല് പേരെ ചുറ്റിക കൊണ്ട് തലയ്ക്കടിച്ച് കൊലപ്പെടുത്തിയ റിപ്പർ ചന്ദ്രനെയാണ് അവസാനമായി തൂക്കുമരത്തിലേറ്റിയത്.

പാറശ്ശാല ഷാരോൺ വധക്കേസിലെ ഒന്നാം പ്രതി ഗ്രീഷ്മ

കണ്ണൂർ സെൻട്രൽ ജയിലിൽ വെച്ചായിരുന്നു ഈ വധശിക്ഷ നടപ്പിലാക്കിയത്. കേരളത്തിൽ ഏറ്റവും കൂടുതൽ വധശിക്ഷകൾ നടപ്പിലാക്കിയിട്ടുള്ളതും കണ്ണൂർ സെൻട്രൽ ജയിലിലാണ്. നിലവിൽ കണ്ണൂർ സെൻട്രൽ ജയിലിൽ രണ്ട് തൂക്കുമരങ്ങളും, തിരുവനന്തപുരം പൂജപ്പുര സെൻട്രൽ ജയിലിൽ ഒരു തൂക്കുമരവും മാത്രമാണുള്ളത്. വധശിക്ഷകൾ അപൂർവ്വമായതോടെ ഈ തൂക്കുമരങ്ങൾ വർഷങ്ങളായി ഉപയോഗശൂന്യമായി കിടക്കുകയാണ്. പൂജപ്പുര ജയിലിലെ തൂക്കുമരം ഒരു ചരിത്രസ്മാരകമായി സംരക്ഷിക്കണമെന്ന ആവശ്യവും ഇടക്കാലത്ത് ഉയർന്നിരുന്നു.

ഇന്ത്യയിൽ വധശിക്ഷ നടപ്പിലാക്കുന്നത് കഴുമരത്തിൽ തൂക്കിയാണ്. മരണം ഉറപ്പാക്കുന്നതുവരെ കഴുത്തിൽ കുരുക്കിട്ട് തൂക്കിയിടുക എന്നതാണ് രീതി. വളരെ കൃത്യവും സൂക്ഷ്മവുമായ മാനദണ്ഡങ്ങളിലൂടെയാണ് ജയിൽ മാന്വൽ പ്രകാരം ഈ പ്രക്രിയ നടപ്പിലാക്കുന്നത്. വധശിക്ഷയ്ക്കുള്ള അന്തിമ വാറണ്ട് ലഭിച്ചു കഴിഞ്ഞാൽ പ്രതിയുടെ ഭാരവും ഉയരവും കൃത്യമായി അളക്കുന്നു.

ഇതിന് സമാനമായ ഭാരമുള്ള മണൽച്ചാക്കുകൾ ഉപയോഗിച്ച് തൂക്കുമരത്തിൽ ഒരു ഡമ്മി പരീക്ഷണം നടത്തും. കയറിന്റെ ബലവും കഴുമരത്തിന്റെ തകരാറുകളും പരിശോധിക്കാനാണിത്. ബീഹാറിലെ ബക്സാർ ജയിലിൽ നിന്ന് പ്രത്യേകമായി തയ്യാറാക്കുന്ന മനില കയറുകളാണ് സാധാരണയായി ഇതിനായി ഉപയോഗിക്കുന്നത്. പ്രതിയുടെ ഭാരത്തിനനുസരിച്ചാണ് കുരുക്ക് താഴേക്ക് പതിക്കേണ്ട ദൂരം നിശ്ചയിക്കുന്നത്. ഒറ്റയടിക്ക് കഴുത്തിലെ സുഷുമ്നാ നാഡി അറ്റ് മരണം സംഭവിക്കുന്ന തരത്തിലാണ് ഈ ദൂരം കണക്കാക്കുന്നത്.

ശിക്ഷ നടപ്പാക്കുന്ന ദിവസം അതിരാവിലെ പ്രതിയെ കുളിപ്പിച്ച് പുതിയ വസ്ത്രങ്ങൾ ധരിപ്പിച്ച് കഴുമരത്തിനടുത്തേക്ക് കൊണ്ടുവരുന്നു. മജിസ്ട്രേറ്റ്, ജയിൽ സൂപ്രണ്ട്, മെഡിക്കൽ ഓഫീസർ എന്നിവരുടെ സാന്നിധ്യത്തിലാണ് ശിക്ഷ നടപ്പാക്കുക. പ്രതിയുടെ മുഖം കറുത്ത തുണികൊണ്ട് മൂടുകയും കയർ കഴുത്തിൽ കുരുക്കുകയും ചെയ്യുന്നു. ജയിൽ സൂപ്രണ്ടിന്‍റെ സിഗ്നൽ ലഭിക്കുന്നതോടെ ആരാച്ചാർ ലിവർ വലിക്കുകയും പ്രതി താഴേക്ക് പതിക്കുകയും ചെയ്യുന്നു. അര മണിക്കൂറിന് ശേഷം മെഡിക്കൽ ഓഫീസർ മരണം സ്ഥിരീകരിക്കുന്നതോടെയാണ് നടപടിക്രമങ്ങൾ പൂർത്തിയാകുന്നത്.

വധശിക്ഷ നടപ്പാക്കുന്ന ആരാച്ചാർമാരെക്കുറിച്ചുള്ള ചരിത്രവും വളരെ കൗതുകകരമാണ്. തിരുവിതാംകൂറിന്‍റെ രാജഭരണകാലം മുതൽക്കേ കേരളത്തിൽ ആരാച്ചാർമാർക്ക് പ്രത്യേക പദവിയും അധികാരങ്ങളും ഉണ്ടായിരുന്നു. അനിഴം തിരുനാൾ മാർത്താണ്ഡവർമ്മയുടെ കാലഘട്ടത്തിലെ മതിലകം രേഖകളിൽ മുതൽ ഇവരെക്കുറിച്ചുള്ള പരാമർശങ്ങളുണ്ട്.

അക്കാലത്ത് വട്ടിയൂർക്കാവിലും ചാലയിലുമായിരുന്നു പ്രധാനമായും ആരാച്ചാർമാർ താമസിച്ചിരുന്നത്. ഇതൊരു പാരമ്പര്യ തൊഴിലായി കൊണ്ടുനടന്നിരുന്ന കുടുംബങ്ങളുണ്ടായിരുന്നു. എന്നാൽ ആധുനിക കാലത്ത് ആരാച്ചാർ എന്നൊരു സ്ഥിരം തസ്തിക ജയിലുകളിൽ ഇല്ല. വധശിക്ഷ നടപ്പിലാക്കേണ്ടി വരുമ്പോൾ പ്രത്യേകമായി ആളുകളെ കണ്ടെത്തുകയാണ് പതിവ്.

ലക്ഷക്കണക്കിന് രൂപ പ്രതിഫലം നൽകിയാണ് പലപ്പോഴും അന്യസംസ്ഥാനങ്ങളിൽ നിന്നുൾപ്പെടെ ഇത്തരം ആളുകളെ കൊണ്ടുവരുന്നത്. വളരെ കടുത്ത മാനസിക സമ്മർദ്ദമുണ്ടാക്കുന്ന ഒരു ജോലിയായതിനാൽ ഇതിനായി ആളുകളെ ലഭിക്കുക എന്നത് ഇന്ന് ജയിൽ വകുപ്പിന് വലിയൊരു വെല്ലുവിളിയാണ്. ആരാച്ചാരാകാൻ താല്പര്യം പ്രകടിപ്പിച്ച് നിരവധി പേർ കത്തുകൾ അയക്കാറുണ്ടെങ്കിലും, യഥാർത്ഥത്തിൽ ശിക്ഷ നടപ്പാക്കേണ്ടി വരുമ്പോൾ പലരും പിന്മാറുകയാണ് പതിവ്.

നിയമപുസ്തകങ്ങളിൽ വധശിക്ഷ നിലനിൽക്കുന്ന കാലത്തോളം, നെന്മാറയിലെ ചെന്താമരയെപ്പോലെയുള്ള കൊടുംകുറ്റവാളികൾക്ക് മുന്നിൽ തൂക്കുകയർ ഒരു അനിവാര്യമായ നിയമനടപടിയായി തുടരും.