ന്യൂയോർക്ക്: ഇന്ത്യയിലെ ശതകോടീശ്വരനായ വ്യവസായി ഗൗതം അദാനിക്കെതിരായ ക്രിമിനൽ കുറ്റങ്ങൾ അമേരിക്കയിലെ കോടതി തള്ളി. എന്നാൽ വഞ്ചനയും കൈക്കൂലിയും ആരോപിക്കപ്പെട്ട ഈ കേസ് ഉപേക്ഷിക്കാനുള്ള നീതിന്യായ വകുപ്പിന്റെ തീരുമാനം ആശങ്കയുണ്ടാക്കുന്നതാണെന്ന് ജില്ലാ ജഡ്ജി നിക്കോളാസ് ഗരോഫിസ് നിരീക്ഷിച്ചു,
ബ്രൂക്ലിൻ ആസ്ഥാനമായുള്ള ജില്ലാ കോടതിയാണ് കേസ് തള്ളിക്കളയാനുള്ള സർക്കാർ പ്രോസിക്യൂട്ടർമാരുടെ അസാധാരണമായ അഭ്യർത്ഥന അംഗീകരിച്ചത്.
കേസ് പിൻവലിക്കാനുള്ള കാരണങ്ങൾ അദ്ദേഹം ആരാഞ്ഞു. 2024 നവംബറിൽ അമേരിക്കയിൽ 10 ബില്യൺ ഡോളർ നിക്ഷേപിക്കാമെന്ന് അദാനി നൽകിയ വാഗ്ദാനമാണോ കുറ്റങ്ങൾ ഒഴിവാക്കാൻ കാരണമെന്നും അദ്ദേഹം അന്വേഷിച്ചു.
പ്രസിഡന്റ് ഡൊണാൾഡ് ട്രംപിൻ്റെ രണ്ടാമൂഴ ഭരണ കാലത്ത്, ശ്രദ്ധേയമായ ഒരു ക്രിമിനൽ കേസ് പ്രോസിക്യൂട്ടർമാർ ഒഴിവാക്കാൻ ശ്രമിച്ചതിന്റെ ഏറ്റവും പുതിയ ഉദാഹരണമാണിത്. നിക്ഷേപ വാഗ്ദാനമല്ല കേസ് പിൻവലിക്കാൻ നീതിന്യായ വകുപ്പിനെ പ്രേരിപ്പിച്ചതെന്ന കാര്യത്തിൽ തനിക്ക് തൃപ്തിയുണ്ടെന്ന് അദാനിക്കെതിരായ കേസ് തള്ളിക്കൊണ്ട് ജഡ്ജി വ്യക്തമാക്കി. ഇത്തരം തീരുമാനങ്ങളെ വിലയിരുത്തുന്നതിൽ ജഡ്ജിമാർക്ക് പരിമിതികളുണ്ടെന്നും അദ്ദേഹം സമ്മതിച്ചു.
എങ്കിലും ഈ കേസ് അന്വേഷിച്ച പ്രോസിക്യൂട്ടർമാരുടെയും ഉദ്യോഗസ്ഥരുടെയും അഭിപ്രായം തേടാതെ, അദാനിയുടെ അഭിഭാഷകരുമായി സഹകരിച്ച് കേസ് തള്ളാൻ തീരുമാനിച്ച പ്രിൻസിപ്പൽ അസോസിയേറ്റ് ഡെപ്യൂട്ടി അറ്റോർണി ജനറൽ ട്രെൻ്റ് മക്കോർട്ടറെ അദ്ദേഹം കടുത്ത ഭാഷയിൽ വിമർശിച്ചു.
കേസ് പിൻവലിക്കാനുള്ള തീരുമാനത്തിലെ ക്രമക്കേടുകൾ ആശങ്കാജനകമാണെന്ന് ഗരോഫിസ് എഴുതി. വിവിധ ഓഫീസുകളിലെ നിരവധി ഉദ്യോഗസ്ഥരുടെ അഭിപ്രായങ്ങൾ തള്ളിക്കളഞ്ഞ് മക്കോർട്ടർ സ്വന്തം തീരുമാനം നടപ്പിലാക്കുകയാണ് ചെയ്തതെന്നും അദ്ദേഹം കുറ്റപ്പെടുത്തി.
എന്നാൽ ജൂലൈ നാലിന് സമർപ്പിച്ച രേഖകളിൽ മക്കോർട്ടർ ഇക്കാര്യം വിശദീകരിച്ചിട്ടുണ്ടെന്ന് നീതിന്യായ വകുപ്പ് വക്താവ് ചൂണ്ടിക്കാട്ടി. പ്രതിഭാഗം അഭിഭാഷകരുമായും മറ്റ് ഉദ്യോഗസ്ഥരുമായും സംസാരിച്ച ശേഷവും, സ്വന്തം നിലയിൽ നടത്തിയ പഠനങ്ങൾക്ക് ശേഷവുമാണ് കേസ് ഒഴിവാക്കാൻ തീരുമാനിച്ചതെന്നാണ് അദ്ദേഹം പറഞ്ഞിരുന്നത്.
“കോടതിയുടെ തീരുമാനത്തെ വിനയത്തോടെയും ജുഡീഷ്യൽ പ്രക്രിയയോടുള്ള അങ്ങേയറ്റത്തെ ബഹുമാനത്തോടെയും സ്വാഗതം ചെയ്യുന്നു,” എന്ന് ഗൗതം അദാനി എക്സിൽ കുറിച്ചു.
കേസ് തള്ളിയതുകൊണ്ട് താൻ നീതിന്യായ വകുപ്പിൻ്റെ തീരുമാനത്തോട് പൂർണ്ണമായി യോജിക്കുന്നുവെന്നോ, ഈ കേസിനെക്കുറിച്ച് തനിക്ക് പ്രത്യേക അഭിപ്രായമുണ്ടെന്നോ വ്യാഖ്യാനിക്കരുതെന്ന് ജഡ്ജി വ്യക്തമാക്കി. മറ്റ് പ്രതികൾക്കെതിരായ കുറ്റങ്ങളും ഒഴിവാക്കണമോ എന്ന് തീരുമാനിക്കാൻ കൂടുതൽ വിവരങ്ങൾ നൽകാൻ അദ്ദേഹം നീതിന്യായ വകുപ്പിനോട് ആവശ്യപ്പെട്ടു.
സൗരോർജ്ജ നിലയം സ്ഥാപിക്കാൻ അനുമതി ലഭിക്കുന്നതിനായി ഇന്ത്യയിലെ സർക്കാർ ഉദ്യോഗസ്ഥർക്ക് കൈക്കൂലി നൽകാൻ ശ്രമിച്ചുവെന്നാണ് അദാനിക്കെതിരെ 2024-ൽ ചുമത്തിയ പ്രധാന കുറ്റം. അഴിമതി വിരുദ്ധ നയങ്ങളെക്കുറിച്ച് തെറ്റായ വിവരങ്ങൾ നൽകി അമേരിക്കൻ നിക്ഷേപകരെ തെറ്റിദ്ധരിപ്പിച്ചുവെന്നും ആരോപണമുണ്ടായിരുന്നു.
എന്നാൽ അദാനി ഗ്രൂപ്പ് ഈ ആരോപണങ്ങൾ തുടർച്ചയായി നിഷേധിച്ചുപോന്നു. ഈ ആരോപണങ്ങൾക്ക് മറുപടി നൽകാൻ അദാനി ഇതുവരെ അമേരിക്കയിലെ കോടതിയിൽ നേരിട്ട് ഹാജരായിട്ടില്ല.
ജൂലൈ 4-ന് സമർപ്പിച്ച രേഖകളിൽ മക്കോർട്ടർ ഈ കേസിനെക്കുറിച്ച് ചില കാര്യങ്ങൾ വ്യക്തമാക്കിയിരുന്നു. ഇത് പ്രധാനമായും വിദേശത്ത് നടന്ന സംഭവമാണെന്നും, കോടതിയിൽ തെളിയിക്കാൻ ബുദ്ധിമുട്ടുള്ളതാണെന്നും, തങ്ങളുടെ നിലവിലെ മുൻഗണനകളുമായി ഇത് ഒത്തുപോകുന്നില്ലെന്നും അദ്ദേഹം പറഞ്ഞു.
അതേസമയം,അമേരിക്കയിലെ സെക്യൂരിറ്റീസ് – എക്സ്ചേഞ്ച് കമ്മീഷൻ കൊണ്ടുവന്ന മറ്റൊരു സിവിൽ കേസിൽ ഗൗതം അദാനി 6 ദശലക്ഷം ഡോളറും അദ്ദേഹത്തിന്റെ അനന്തരവൻ സാഗർ അദാനി 12 ദശലക്ഷം ഡോളറും പിഴയടക്കാൻ തയ്യാറായിട്ടുണ്ട്. ഇതിനുപുറമെ, അമേരിക്കൻ ട്രഷറി വകുപ്പിന് 275 ദശലക്ഷം ഡോളർ നൽകാനും അദാനി എൻ്റർപ്രൈസസ് ലിമിറ്റഡ് സമ്മതിച്ചിട്ടുണ്ട്.
അമേരിക്കയിൽ പണം നിക്ഷേപിക്കാമെന്ന അദാനിയുടെ വാഗ്ദാനമാണ് കേസ് തള്ളാൻ കാരണമെന്ന മാധ്യമ വാർത്തകളെ മക്കോർട്ടർ രേഖകളിൽ നിഷേധിച്ചു. എന്നാൽ ജൂലൈ 15-ന് കോടതിയിൽ നൽകിയ സത്യവാങ്മൂലത്തിൽ, അമേരിക്കയിൽ 10 ബില്യൺ ഡോളർ നിക്ഷേപിക്കാമെന്ന് താൻ മുൻപ് വാഗ്ദാനം നൽകിയിരുന്നതായി അദാനി സമ്മതിച്ചു. ഈ വാഗ്ദാനം കേസ് ഒത്തുതീർപ്പാക്കുന്നതിൻ്റെ ഭാഗമായേക്കാമെന്ന് തൻ്റെ അഭിഭാഷകർ നീതിന്യായ വകുപ്പുമായുള്ള കൂടിക്കാഴ്ചകളിൽ പറഞ്ഞിരുന്നതായും അദ്ദേഹം വ്യക്തമാക്കി.
അദാനിയുടെ അഭിഭാഷകനായ റോബർട്ട് ജിയുഫ്രയും ജൂലൈ 15-ന് ഇക്കാര്യം കോടതിയെ അറിയിച്ചിരുന്നു. കേസ് പരിഹരിക്കുന്നതിന്റെ ഭാഗമായി അദാനിയുടെ നിക്ഷേപ വാഗ്ദാനം പാലിക്കാൻ അദാനി ഗ്രൂപ്പ് തയ്യാറാണെന്ന് അവർ നീതിന്യായ വകുപ്പിനോട് പറഞ്ഞിരുന്നു. പണം നൽകി ഈ കൈക്കൂലി കേസ് ഒത്തുതീർപ്പാക്കാൻ ജിയുഫ്ര നടത്തിയ ആവർത്തിച്ചുള്ള ശ്രമങ്ങളുടെ ശരിതെറ്റുകളെക്കുറിച്ച് താൻ അഭിപ്രായം പറയുന്നില്ലെന്ന് ജഡ്ജി ഗരോഫിസ് എഴുതി. ഇത്തരം വാഗ്ദാനങ്ങൾ നിയമവാഴ്ചയെയും തുല്യനീതിയെയും എങ്ങനെ ബാധിക്കുന്നുവെന്ന് പൊതുജനങ്ങൾ തീരുമാനിക്കട്ടെയെന്നും അദ്ദേഹം പറഞ്ഞു.
അഹമ്മദാബാദ് ആസ്ഥാനമായി പ്രവർത്തിക്കുന്ന ഇന്ത്യയിലെ ഏറ്റവും വലിയ ബഹുരാഷ്ട്ര വ്യവസായ ശൃംഖലകളിലൊന്നാണ് അദാനി ഗ്രൂപ്പ്. 1988-ൽ ഗൗതം അദാനിയാണ് ഈ സ്ഥാപനം ആരംഭിച്ചത്. തുടക്കത്തിൽ ഒരു ചെറിയ വ്യാപാര സ്ഥാപനമായിരുന്ന ഇത് പിന്നീട് ഊർജ്ജം, തുറമുഖങ്ങൾ, വിമാനത്താവളങ്ങൾ, ഖനനം, അടിസ്ഥാന സൗകര്യ വികസനം, സിമൻ്റ്, ഹരിത ഊർജ്ജം തുടങ്ങി ഒട്ടേറെ മേഖലകളിലേക്ക് വ്യാപിപ്പിച്ചു.
ഇന്ത്യയിലെ ഏറ്റവും വലിയ സ്വകാര്യ തുറമുഖമായ ഗുജറാത്തിലെ മുന്ദ്ര പോർട്ട് ഉൾപ്പെടെ പ്രധാന വാണിജ്യ കേന്ദ്രങ്ങൾ നിയന്ത്രിക്കുന്നത് അദാനി ഗ്രൂപ്പാണ്. തിരുവനന്തപുരം ഉൾപ്പെടെ ഇന്ത്യയിലെ പല പ്രധാന വിമാനത്താവളങ്ങളുടെയും നടത്തിപ്പ് ചുമതലയും ഈ കമ്പനിക്കാണ്. ഹരിത ഊർജ്ജ മേഖലയിൽ ലോകത്തെ തന്നെ ഏറ്റവും വലിയ നിക്ഷേപങ്ങളിലൊന്നാണ് കമ്പനി ഇപ്പോൾ നടത്തിക്കൊണ്ടിരിക്കുന്നത്. ലോകമെമ്പാടും ആയിരക്കണക്കിന് ആളുകൾക്ക് തൊഴിൽ നൽകുന്ന, ഇന്ത്യയുടെ സാമ്പത്തിക രംഗത്ത് വലിയ സ്വാധീനമുള്ള വമ്പൻ വ്യവസായ ഗ്രൂപ്പാണിത്.
