മുംബൈ: സമരങ്ങളിൽ പങ്കെടുക്കുന്നതിന്റെ പേരിൽ മാത്രം പുതിയ തലമുറയെ (ജെൻ സി) രാജ്യവിരുദ്ധരായി ചിത്രീകരിക്കരുതെന്ന് ആർഎസ്എസ് തലവൻ മോഹൻ ഭഗവത്.
യുവജന സമ്മേളനത്തിൽ സംസാരിക്കവെയാണ് പ്രതിഷേധങ്ങൾ ആശയരൂപീകരണത്തിന് സഹായിക്കുന്ന പ്രധാന മാർഗ്ഗമാണെന്ന് അദ്ദേഹം വ്യക്തമാക്കിയത്.ഡൽഹിയിലെ ജന്തർമന്ദിർ മൈതാനത്ത് കോക്കറോച്ച് ജനതാ പാർടി നടത്തിയ പ്രക്ഷോഭത്തെ പരാമർശിക്കുകയായിരുന്നു മോഹൻ ഭഗവത്.
യുവജന സമരങ്ങളിൽ പങ്കെടുക്കുന്ന പ്രക്ഷോഭകരെ ‘ദേശവിരുദ്ധർ’ എന്ന് വിളിക്കുന്ന പ്രവണതയോട് തനിക്ക് യോജിപ്പില്ലെന്നും അദ്ദേഹം പറഞ്ഞു. ജനറേഷൻ സി പ്രക്ഷോഭങ്ങളിൽ ഏർപ്പെട്ടാൽ അവർ രാജ്യവിരുദ്ധരാകുന്നില്ലെന്നും അവർ നമ്മുടെ സ്വന്തം ആളുകളും അടുത്ത തലമുറയുമാണെന്നും അദ്ദേഹം കൂട്ടിച്ചേർത്തു.
അവരുമായി ആശയവിനിമയം നടത്താൻ പരസ്പര ബഹുമാനവും ആത്മബന്ധവും ആവശ്യമാണ്. എങ്കിൽ മാത്രമേ അവരുടെ ആശങ്കകൾ മനസ്സിലാക്കാനും നമ്മുടെ വീക്ഷണം അവർക്ക് മുന്നിൽ അവതരിപ്പിക്കാനും സാധിക്കൂ.
ഇന്നത്തെ ചെറുപ്പക്കാരായ ജെൻ സി, ജെൻ ആൽഫ തലമുറകൾ നിലവിലുള്ള തലമുറയേക്കാൾ കൂടുതൽ സത്യസന്ധരാണെന്നാണ് തന്റെ വിശ്വാസമെന്ന് അദ്ദേഹം പറഞ്ഞു. ദേശസ്നേഹത്തിൻ്റെയും സേവനത്തിന്റെയും സത്യസന്ധമായ ആഹ്വാനങ്ങൾ അവരിൽ സ്വാധീനം ചെലുത്തുന്നുണ്ട്.
വിശ്വസിക്കാൻ ഒരു തലമുറയെ തിരഞ്ഞെടുക്കേണ്ടി വന്നാൽ താൻ ജെൻ സിയെ തിരഞ്ഞെടുക്കുമെന്നും അദ്ദേഹം കൂട്ടിച്ചേർത്തു.വിദ്യാഭ്യാസ സമ്പ്രദായത്തിൽ വലിയ മാറ്റങ്ങൾ വരുത്തേണ്ടതുണ്ടെന്നും നിലവിലെ കുട്ടികളുടെ പരാതികൾ ന്യായമാണെന്നും അദ്ദേഹം ചൂണ്ടിക്കാട്ടി. മുൻ തലമുറകൾ മുതിർന്നവർ പറയുന്നത് ചോദ്യം ചെയ്യാതെ സ്വീകരിച്ചിരുന്നുവെങ്കിൽ, ഇന്നത്തെ തലമുറ ഓരോ കാര്യത്തിനും യുക്തിസഹമായ ഉത്തരങ്ങളാണ് ആഗ്രഹിക്കുന്നത്.
ജനാധിപത്യത്തിൽ പ്രതിഷേധങ്ങൾ അനിവാര്യമാണെന്നും ഭിന്നതകൾ സൃഷ്ടിക്കാനല്ല, മറിച്ച് സമവായത്തിലെത്താനാണ് സമരങ്ങൾ നടക്കേണ്ടതെന്നും മോഹൻ ഭഗവത് അഭിപ്രായപ്പെട്ടു. ഭരണഘടന രൂപീകരിച്ചവരുടെ കാഴ്ചപ്പാടുകളും ഡോ.ബി.ആർ. അംബേദ്കറുടെ പ്രസംഗങ്ങളും ഇതിലേക്ക് വിരൽചൂണ്ടുന്നുണ്ട്. നിലവിലുള്ള സമ്പദായത്തിലെ പിഴവുകൾ തിരുത്താനാണ് യുവാക്കൾ ശബ്ദമുയർത്തുന്നത് എന്ന് തിരിച്ചറിഞ്ഞ് അതിനനുസരിച്ചുള്ള നടപടികൾ സ്വീകരിക്കുകയാണ് വേണ്ടതെന്നും അദ്ദേഹം വ്യക്തമാക്കി.
