ടെഹ്റാൻ: അമേരിക്ക ഉപരോധം അവസാനിപ്പിക്കാത്തതിനെ തുടർന്ന്,ലബനനിലെ വെടിനിര്ത്തലിന് പിന്നാലെ തുറന്ന ഹോര്മൂസ് കടലിടുക്ക് വീണ്ടും അടച്ച് ഇറാന്.
ഹോര്മൂസ് തുറന്നതായി പ്രഖ്യാപിച്ചിട്ടും ഉപരോധം അവസാനിപ്പിക്കാത്ത നടപടി ചൂണ്ടിക്കാട്ടിയാണ് കടലിടുക്ക് അടയ്ക്കുന്നതെന്ന് ഇറാന് സൈന്യം അറിയിച്ചു. ഉപരോധം അവസാനിപ്പിക്കും വരെ കടലിടുക്ക് അടച്ചിടുമെന്നാണ് പ്രഖ്യാപനം.
വെടിനിര്ത്തല് അവസാനിക്കുന്നതു വരെ ഹോര്മുസ് കടലിടുക്ക് തുറന്നു കിടക്കുമെന്നായിരുന്നു ഇറാന് കഴിഞ്ഞ ദിവസം പ്രഖ്യാപിച്ചത്. ഇസ്രയേല്- ലെബനന് താത്കാലിക വെടിനിര്ത്തലിന്റെ പത്ത് ദിവസമാണ് ഹോര്മുസ് പൂര്ണമായും തുറന്നു കിടക്കുകയെന്നും ഇറാന് വ്യക്തമാക്കിയിരുന്നു.
ഇത്രയും ദിവസം ഹോര്മുസ് തുറന്നു കിടക്കുമെന്നു ഇറാന് വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. വെടിനിര്ത്തല് അവസാനിക്കുന്നതു വരെ എല്ലാ വാണിജ്യ കപ്പലുകള്ക്കും യാത്ര ചെയ്യാമെന്നും അദ്ദേഹം എക്സ് പോസ്റ്റിലൂടെ അറിയിച്ചു.
ഇതിന് പിന്നാലെ, പ്രതികരിച്ച പ്രസിഡണ്ട് ഡോണള്ഡ് ട്രംപ് മേഖലയിലെ ഉപരോധം തുടരുമെന്ന് പ്രഖ്യാപിക്കുകയായിരുന്നു. ഇറാനുമായി സമാധാന കരാറിലെത്തും വരെ ഹോര്മുസില് നാവിക ഉപരോധം തുടരുമെന്നാണ് അദ്ദേഹത്തിൻ്റെ നിലപാട്.
ഇറാനുമായി മിക്ക കാര്യങ്ങളിലും ധാരണയിലെത്തിയതിനാല് കുറഞ്ഞ സമയം മാത്രമേ ഉപരോധം തുടരേണ്ടിവരൂവെന്നും ട്രംപ് പറഞ്ഞു. എന്നാല്, ഹോര്മുസ് തുറന്നിട്ടും നാവിക ഉപരോധം തുടരുന്നത് വെടിനിര്ത്തല് ലംഘനമാണെന്ന് ഇറാന് പ്രതികരിക്കുകയും ചെയ്തിരുന്നു.
