തൃശ്ശൂര്: പീച്ചി പോലീസ് സ്റ്റേഷനിൽ 2023-ൽ നടന്ന മർദനത്തിൻ്റെ ദൃശ്യങ്ങൾ പുറത്തുവന്നു.
പട്ടിക്കാട് ലാലീസ് ഫുഡ് ആന്ഡ് ഫണ് ഹോട്ടല് ഉടമ കെ.പി. ഔസേപ്പാണ് ഒന്നരവര്ഷത്തെ നിയമപോരാട്ടത്തിനൊടുവില് ലഭിച്ച മര്ദനത്തിൻ്റെ ദൃശ്യങ്ങള് ആണ് മാധ്യമങ്ങൾക്ക് നൽകിയത്. കുറ്റക്കാരായ പോലീസുകാര്ക്കെതിരേയുള്ള നടപടിക്കായി ഇപ്പോഴും നിയമപോരാട്ടം നടത്തുകയാണ് അദ്ദേഹം.
കുന്നംകുളം പോലീസ് സ്റ്റേഷനില്വെച്ച് യൂത്ത് കോണ്ഗ്രസ് നേതാവിനെ ക്രൂരമായി മര്ദിക്കുന്ന ദൃശ്യങ്ങള് കണ്ടതിൻ്റെ ഞെട്ടൽ മാറും മുൻപേ ആണ് മറ്റൊരു സംഭവത്തിൻ്റെ വീഡിയോദൃശ്യങ്ങളും പുറത്ത് വരുന്നത്.
2023 മേയ് 24-നാണ് കെ.പി. ഔസേപ്പ്, മകന് പോള് ജോസഫ്, ഹോട്ടല് ജീവനക്കാര് എന്നിവരെ പീച്ചി പോലീസ് സ്റ്റേഷനില് അപമാനിക്കുകയും മര്ദിക്കുകയുംചെയ്തത്. ഹോട്ടലിലെ ഭക്ഷണത്തെച്ചൊല്ലിയുണ്ടായ തര്ക്കത്തെത്തുടര്ന്നാണ് ഇവരെ സ്റ്റേഷനിലേക്ക് വിളിപ്പിച്ചത്. പീച്ചി എസ്ഐ ആയിരുന്ന പി.എം. രതീഷിന്റെ നേതൃത്വത്തിലായിരുന്നു മര്ദനം.
മര്ദനദൃശ്യത്തിനുവേണ്ടി വിവരാവകാശനിയമപ്രകാരമുള്ള അപേക്ഷ പോലീസ് നിരന്തരം തള്ളി. മാവോവാദിഭീഷണിയും സ്ത്രീസുരക്ഷയുമെല്ലാം ഇതിനുള്ള കാരണമായി നിരത്തി.
മനുഷ്യാവകാശകമ്മിഷന് ഇടപെട്ടതിനുശേഷമാണ് ദൃശ്യങ്ങള് നല്കാന് പോലീസ് തയ്യാറായത്. എസ്ഐയെക്കൂടി പ്രതിചേര്ക്കാന് ഔസേപ്പ് ഹൈക്കോടതിയെ സമീപിച്ചിട്ടുണ്ട്.
കുന്നംകുളത്ത് യൂത്ത് കോൺഗ്രസ് നേതാവ് സുജിത്തിനെ പോലീസുകാർ ക്രൂരമായി മർദിച്ചതിൻ്റെ സിസിടിവി ദൃശ്യങ്ങൾ കഴിഞ്ഞദിവസമാണ് പുറത്തുവന്നത്. ഇതിനുപിന്നാലെ സംഭവത്തിൽ ഉൾപ്പെട്ട പോലീസുകാരെ ശനിയാഴ്ച സർവീസിൽനിന്നും സസ്പെൻഡ് ചെയ്തിരുന്നു.
