മലയാളത്തിന്റെ ഹൃദയമുരളിയിലൊഴുകി വന്ന സംവിധായകൻ …

1988-ൽ വൻവിജയം നേടിയ  സത്യൻ അന്തിക്കാട് സംവിധാനം ചെയ്ത , “പൊന്മുട്ടയിടുന്ന താറാവ് ” എന്ന ചിത്രം പ്രേക്ഷകർ  മറന്നിട്ടുണ്ടാവില്ലെന്ന് കരുതട്ടെ … ചിത്രത്തിലെ ഓരോ രംഗവും പിന്നീട്

ഓർത്തോർത്തു ചിരിക്കാനുതകുന്ന ഒരു സുന്ദരകലാസൃഷ്ടിയായിരുന്നു ഈ സിനിമ …

ചിത്രത്തിന് സംവിധായകൻ ആദ്യം നിശ്ചയിച്ച പേര് “പൊൻമുട്ടയിടുന്ന തട്ടാൻ ” എന്നായിരുന്നുവത്രെ !

തങ്ങളുടെ കുലത്തൊഴിലിനെ  അപമാനിക്കുകയാണോ എന്ന സംശയത്താൽ ഈ ചിത്രത്തിനെതിരെ  ചിലർ അന്ന് പ്രതിഷേധമുയർത്തി …. അവസാനം മൂഷികസ്ത്രീ വീണ്ടും മൂഷികസ്ത്രീയായി എന്നുപറഞ്ഞപോലെ  പൊന്മുട്ടയിടുന്ന താറാവിലേക്ക് തന്നെ ചിത്രത്തിന് മടങ്ങിയെത്തേണ്ടിവന്നു ….

അന്ന് സത്യൻഅന്തിക്കാട് നടത്തിയ ഒരു പത്രസമ്മേളനത്തിൽ പറഞ്ഞത് “ഇനി താറാവുകളൊക്കെ  പ്രതിഷേധവുമായി വരാതിരുന്നാൽ നന്നായിരുന്നു ” എന്നാണ് …

കുറിക്കുകൊള്ളുന്ന ഈ നർമ്മബോധമാണ് സത്യൻ അന്തിക്കാട് എന്ന ചലച്ചിത്രസംവിധായകന്റെ തുറുപ്പുചീട്ട് …

തൃശ്ശൂർ ജില്ലയിലെ അന്തിക്കാട് എന്ന ഗ്രാമം കള്ളുചെത്തിലൂടേയും കമ്മ്യൂണിസ്റ്റ് സമരങ്ങളിലൂടേയുമാണ് വാർത്തകളിൽ എന്നും നിറഞ്ഞു നിന്നിരുന്നത്.

എന്നാൽ “സത്യൻ അന്തിക്കാട് ” എന്ന സംവിധായകനിലൂടെ ഈ  കർഷക ഗ്രാമത്തിന് കിട്ടിയ പ്രശസ്തി വളരെയേറെയായിരുന്നു…1975-ൽ  ഡോക്ടർ ബാലകൃഷ്ണന്റെ സംവിധാനസഹായിയായി ചെന്നൈയിലെത്തിയ സത്യൻ അന്തിക്കാട് ഗാനരചനാരംഗത്താണ് ആദ്യം ശ്രദ്ധകേന്ദ്രീകരിച്ചത്. അക്കാലത്ത് അദ്ദേഹം എഴുതിയ ഏതാനും ഗാനങ്ങൾ വളരെ പ്രശസ്തി നേടിയെടുക്കുകയുണ്ടായി …..

https://youtu.be/-YrYR3eWJXo?t=14

തുടങ്ങിയ സത്യൻ അന്തിക്കാട്  രചന നിർവ്വഹിച്ച ഗാനങ്ങൾ ആകാശവാണിയിൽ എന്നും കേൾക്കാമായിരുന്നു.

എന്നാൽ സത്യൻ അന്തിക്കാട് പിന്നീട് ഗാനരചനരംഗത്ത് നിന്നും പിന്മാറി സംവിധാനരംഗത്ത് ഏറെ ശ്രദ്ധ പതിപ്പിക്കുകയാണുണ്ടായത് . “കുറുക്കന്റെ  കല്യാണം” ആയിരുന്നു ആദ്യ ചിത്രം .

അതിനു ശേഷം 52 ഹിറ്റ്ചിത്രങ്ങളാണ്  ഇദ്ദേഹം സംവിധാനം ചെയ്തത് ….. നാട്ടിൻപുറത്തെ നന്മകളുടെ നേർക്കാഴ്ചകൾ കാണണമെങ്കിൽ സത്യൻ അന്തിക്കാടിന്റെ ചിത്രങ്ങൾ പരതിയാൽമതി. …

പലരും വിദേശങ്ങളിൽ  പോയി കോടിക്കണക്കിന് രൂപ ചിലവിട്ട് വൻ ബഡ്ജറ്റിൽ സിനിമകൾ നിർമ്മിക്കുമ്പോൾ സത്യേട്ടന്റെ  ചിത്രങ്ങൾ ഒരു ഗ്രാമത്തിന്റെ നിഷ്ക്കളങ്കകാഴ്ചകളിൽ ഒതുങ്ങി നിൽക്കും. നിർമ്മാതാവിന് ഒരിക്കലും നഷ്ടം ഉണ്ടാകാത്തതായിരുന്നു സത്യൻ അന്തിക്കാടിന്റെ ചിത്രങ്ങൾ .

നമ്മൾ ജീവിതയാത്രയിൽ എവിടെയെല്ലാമോ കണ്ടു മറന്ന മുഖങ്ങളെല്ലാം സത്യൻ അന്തിക്കാടിന്റെ ചിത്രങ്ങളിലൂടെ പുനർജനിക്കുന്നത് പലപ്പോഴും അതിശയത്തോടെ കണ്ടിരുന്നിട്ടുണ്ട്…

 മലയാളത്തിൽ വി കെ എൻ എന്ന ഹാസ്യ ചക്രവർത്തിയുടെ ഒരു കഥ ചലച്ചിത്രമാക്കിയതിന്റെ ക്രെഡിറ്റും സത്യനു മാത്രം സ്വന്തം …

 സന്ദേശം, വരവേൽപ്പ് തുടങ്ങിയ ചിത്രങ്ങളിലൂടെ ഈ സംവിധായകൻ കേരള മനസ്സാക്ഷിയുടെ നേരെ ഉയർത്തിയ സാമൂഹിക വിമർശനങ്ങളുടെ  മൂർച്ച ഇന്നും ഒട്ടും കുറഞ്ഞിട്ടില്ല……

സത്യന്റെ  ഗ്രാമീണചിത്രങ്ങൾ പോലെ തന്നെ സത്യൻ ചിത്രത്തിലെ ഗാനങ്ങളും ഗ്രാമീണ പശ്ചാത്തലം ഉള്ളവരായിരിക്കും.

“തങ്കത്തോണി തെൻ മലയോരം കണ്ടേ ….. (ചിത്രം മഴവിൽക്കാവടി –  രചന കൈതപ്രം – സംഗീതം ജോൺസൺ – ആലാപനം ചിത്ര.)

“ആദ്യമായ് കണ്ട നാൾ പാതി വിരിഞ്ഞു നിൻ മുഖം … ( ചിത്രം തൂവൽക്കൊട്ടാരം – രചന കൈതപ്രം – സംഗീതം ജോൺസൺ – ആലാപനം യേശുദാസ് , ചിത്ര )

https://youtu.be/1ZrgbQCbcPw?t=13

https://youtu.be/oFgxX5aCu74?t=7

തുടങ്ങി നൂറുകണക്കിന് ഗാനങ്ങളാണ് സത്യൻ അന്തിക്കാട് ചിത്രങ്ങളിൽ സംഗീതപ്രേമികളെ ആനന്ദസാഗരത്തിൽ ആറാടിച്ചു കൊണ്ട് വെള്ളിത്തിരയിൽ മിന്നിമറഞ്ഞത്…

1955 ജനുവരി 3-നു ജനിച്ച സത്യൻഅന്തിക്കാടിന്റെ ജന്മദിനമാണ് നാളെ …..ഇതിനുമുമ്പ് പലയിടത്തും എഴുതിയിട്ടുള്ളതാണ് …

” പാട്ടോർമ്മകൾ @ 365 ”  കോവിഡിന്റെ ആരംഭകാലത്ത് വെറും നേരമ്പോക്കിനായി മാത്രം എഴുതിത്തുടങ്ങിയ ഒരു

ലേഖനപരമ്പരയാണ്.

സംഗീത പ്രേമികളായ   പ്രിയപ്പെട്ട വായനക്കാരാണ് പാട്ടോർമ്മകളെ  പല പല വാട്സപ്പ് ഗ്രൂപ്പുകളിലേക്ക് ഷെയർ ചെയ്ത് ഒരു വൻ വിജയമാക്കി മാറ്റിയത് …..

ഏതാനും മാസങ്ങൾക്ക് മുൻപ് കോഴിക്കോട്ടെ ലിപി പബ്ളിക്കേഷൻസ് ” പാട്ടോർമ്മകൾ @ 365 ” പുസ്തകരൂപത്തിൽ പുറത്തിറക്കുകയുണ്ടായി ….. മലയാളത്തിന്റെ പ്രിയ സംവിധായകൻ സത്യൻ അന്തിക്കാട് ഈ പുസ്തകത്തിന്റെ പ്രകാശനം നിർവ്വഹിച്ചത് ജീവിതത്തിലെ ഒരു മഹാഭാഗ്യമായി കരുതുന്നു…അദ്ദേഹത്തോടുള്ള നന്ദിയും കടപ്പാടും രേഖപ്പെടുത്തുന്നതിനോടൊപ്പം

മലയാള സിനിമയിലെ നിത്യവസന്തമായ ഈ സംവിധായക പ്രതിഭയ്ക്ക് നിറഞ്ഞമനസ്സോടെ പിറന്നാളാശംസകൾ നേരുകയാണ് …..

—————————————————————————————-