സമാധാന ചർച്ചകൾക്ക് സാധ്യത മങ്ങുന്നു; ഇന്ത്യ ആശങ്കയിൽ

ന്യൂഡൽഹി : പശ്ചിമേഷ്യയിൽ യുദ്ധം അതിന്‍റെ എട്ടാം ദിവസത്തിലേക്ക് കടക്കുമ്പോൾ ഇന്ത്യയെ സംബന്ധിച്ചിടത്തോളം വലിയ പ്രതിസന്ധി രൂപപ്പെടുന്നു.

ലക്ഷക്കണക്കിന് ഇന്ത്യക്കാരാണ് ഗൾഫ് രാജ്യങ്ങളിൽ ജോലി ചെയ്യുന്നത്. യുദ്ധം കൂടുതൽ രാജ്യങ്ങളിലേക്ക് വ്യാപിക്കുന്നത് ഇവരുടെ സുരക്ഷയെ ബാധിക്കുമെന്ന ആശങ്ക ശക്തമാണ്.

കൂടാതെ, ഇറാനുമായും ഇസ്രായേലുമായും നല്ല ബന്ധം പുലർത്തുന്ന ഇന്ത്യക്ക് ഈ വിഷയത്തിൽ ഒരു സന്തുലിത നിലപാട് സ്വീകരിക്കുക എന്നത് വലിയ വെല്ലുവിളിയാണ്. പശ്ചിമേഷ്യയിലെ സംഘർഷം തുടരുന്നത് ഇന്ധന ഇറക്കുമതിയെയും ആഗോള വിപണിയെയും ദോഷകരമായി ബാധിക്കും.

യുദ്ധമുഖത്തെ പുതിയ സാഹചര്യങ്ങൾ സൂചിപ്പിക്കുന്നത് വരും ദിവസങ്ങളിൽ സംഘർഷം ഇനിയും വർദ്ധിക്കുമെന്നും മേഖലയുടെ ഭൂപടം തന്നെ മാറ്റിമറിച്ചേക്കാവുന്ന വലിയ മാറ്റങ്ങൾക്ക് ഇത് കാരണമാകുമെന്നുമാണ്.

പശ്ചിമേഷ്യ അതീവ ഗുരുതരമായ സാഹചര്യത്തിലൂടെയാണ് കടന്നുപോകുന്നത്. ഇസ്രായേലും അമേരിക്കയും ഇറാനിലെ തന്ത്രപ്രധാനമായ സൈനിക കേന്ദ്രങ്ങൾ ലക്ഷ്യമിട്ട് വ്യോമാക്രമണം ശക്തമാക്കിയിരിക്കുകയാണ്. ശനിയാഴ്ച പുലർച്ചെ മുതൽ ടെഹ്‌റാനിലെ പ്രധാന വിമാനത്താവളത്തിന് നേരെയും ഇറാൻ്റെ വ്യോമസേനാ താവളങ്ങൾക്ക് നേരെയും ഇസ്രായേൽ കനത്ത ആക്രമണം നടത്തി. ഏതാണ്ട് 80-ഓളം യുദ്ധവിമാനങ്ങൾ പങ്കെടുത്ത ഒരു വൻ സൈനിക നീക്കമാണ് ഇസ്രായേൽ നടത്തിയത്.

ഇറാൻ പരമോന്നത നേതാവ് ആയത്തുള്ള അലി ഖമേനിയുടെ മരണത്തിന് പിന്നാലെ ആരംഭിച്ച ഈ സംഘർഷം ഇപ്പോൾ ഇറാനും ഇസ്രായേലും തമ്മിലുള്ള നേരിട്ടുള്ള യുദ്ധമായി മാറിയിരിക്കുകയാണ്. ഇതിനിടെ അയൽരാജ്യങ്ങളെ ആക്രമിക്കാൻ തങ്ങൾക്ക് പദ്ധതിയൊന്നുമില്ലെന്ന് ഇറാൻ പ്രസിഡന്‍റ് മസൂദ് പെസെഷ്കിയാൻ വ്യക്തമാക്കിയിട്ടുണ്ടെങ്കിലും, ഒത്തുതീർപ്പിനോ കീഴടങ്ങലിനോ തങ്ങൾ തയ്യാറല്ലെന്നും അദ്ദേഹം മുന്നറിയിപ്പ് നൽകി. അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാനെതിരെയുള്ള ആക്രമണം കൂടുതൽ ശക്തമാക്കുമെന്ന് പ്രഖ്യാപിച്ചതിന് തൊട്ടുപിന്നാലെയാണ് ഇറാൻ്റെ ഈ പ്രതികരണം വന്നത്.

ഇറാൻ്റെ തിരിച്ചടി ഗൾഫ് രാജ്യങ്ങളിലേക്കും വ്യാപിച്ചിരിക്കുകയാണ്. ശനിയാഴ്ച രാത്രി വൈകി ദുബായ്, ദോഹ, മനാമ തുടങ്ങിയ പ്രധാന നഗരങ്ങളിൽ വലിയ സ്ഫോടന ശബ്ദങ്ങൾ കേട്ടതായി റിപ്പോർട്ടുകളുണ്ട്. ഇറാൻ വിക്ഷേപിച്ച മിസൈലുകളും ഡ്രോണുകളും ഈ രാജ്യങ്ങളിലെ പ്രതിരോധ സംവിധാനങ്ങൾ തകർക്കാൻ ശ്രമിച്ചതായാണ് വിവരം.

സൗദി അറേബ്യയിലെ ഒരു വ്യോമത്താവളത്തിന് നേരെ വന്ന ബാലിസ്റ്റിക് മിസൈൽ സൗദി സൈന്യം തകർത്തു. ഗൾഫ് രാജ്യങ്ങളിലെ വിമാനത്താവളങ്ങളുടെ പ്രവർത്തനം തടസ്സപ്പെടുകയും എമിറേറ്റ്‌സ് ഉൾപ്പെടെയുള്ള വിമാനക്കമ്പനികൾ സർവീസുകൾ താൽക്കാലികമായി നിർത്തിവെക്കുകയും ചെയ്തിരിക്കുകയാണ്. മേഖലയിലെ യു എസ് സൈനിക താവളങ്ങളെ ലക്ഷ്യമിട്ടാണ് ഇറാൻ്റെ ഡ്രോൺ ആക്രമണങ്ങൾ അധികവും നടക്കുന്നത്. യുഎസ് സൈനിക കേന്ദ്രങ്ങൾ ഇനി സുരക്ഷിതമായിരിക്കില്ലെന്ന് ഇറാൻ്റെ വിപ്ലവ ഗാർഡ് നേരത്തെ തന്നെ മുന്നറിയിപ്പ് നൽകിയിരുന്നു.

മറ്റൊരു മുന്നണിയിൽ, ലബനനിലെ ഹിസ്ബുള്ളയും ഇസ്രായേലും തമ്മിലുള്ള പോരാട്ടം ശക്തമായി തുടരുകയാണ്. ഇസ്രായേൽ സൈന്യം തെക്കൻ ലബനനിൽ കടന്നുകയറി കരയുദ്ധം ആരംഭിച്ചതായാണ് പുറത്തുവരുന്ന വാർത്തകൾ. ലബനനിലെ ടൈർ നഗരത്തിലും ബെയ്റൂട്ടിലെ ചില ഭാഗങ്ങളിലും ഇസ്രായേൽ വ്യാപകമായി വ്യോമാക്രമണം നടത്തി.

ഈ ആക്രമണങ്ങളിൽ കുട്ടികളടക്കം നിരവധി പേർ കൊല്ലപ്പെട്ടതായാണ് ലബനീസ് ആരോഗ്യ മന്ത്രാലയം അറിയിക്കുന്നത്. ഇതിന് മറുപടിയായി ഹിസ്ബുള്ള ഇസ്രായേലിലെ ഹൈഫ സൈനിക താവളത്തിന് നേരെയും മറ്റ് വടക്കൻ നഗരങ്ങൾക്ക് നേരെയും റോക്കറ്റുകൾ തൊടുത്തുവിടുന്നുണ്ട്. ലബനൻ സർക്കാരും ഹിസ്ബുള്ളയുടെ പ്രവർത്തനങ്ങൾക്കെതിരെ രംഗത്തുവന്നിട്ടുണ്ട്. ഹിസ്ബുള്ളയുടെ സൈനിക പ്രവർത്തനങ്ങൾ നിയമവിരുദ്ധമാണെന്ന് പ്രഖ്യാപിച്ച ലബനീസ് സർക്കാർ, രാജ്യം ഒരു വലിയ വിനാശത്തിലേക്ക് നീങ്ങുന്നത് തടയാൻ ശ്രമിക്കുന്നുണ്ടെങ്കിലും ഹിസ്ബുള്ള ആക്രമണം തുടരുകയാണ്.

യുദ്ധം മൂലം പശ്ചിമേഷ്യയിലെ ജനജീവിതം ആകെ ദുസ്സഹമായി മാറിയിരിക്കുന്നു. ഇറാൻ്റെയും ഇസ്രായേലിൻ്റെയും വിവിധ ഭാഗങ്ങളിൽ നിന്ന് പതിനായിരക്കണക്കിന് ആളുകളാണ് വീടുകൾ വിട്ട് പാലായനം ചെയ്യുന്നത്. ലോകാരോഗ്യ സംഘടനയുടെ റിപ്പോർട്ടുകൾ പ്രകാരം മേഖലയിൽ ഇതിനകം തന്നെ ആയിരത്തിലധികം പേർ കൊല്ലപ്പെടുകയും ഏഴായിരത്തോളം പേർക്ക് പരിക്കേൽക്കുകയും ചെയ്തിട്ടുണ്ട്.

ഇറാനിലെ ആശുപത്രികൾക്കും ആരോഗ്യ കേന്ദ്രങ്ങൾക്കും നേരെയും ആക്രമണങ്ങൾ ഉണ്ടായതായി റിപ്പോർട്ടുകളുണ്ട്. ഇത് ഗുരുതരമായ മാനുഷിക പ്രത്യാഘാതങ്ങൾ ഉണ്ടാക്കുമെന്ന് അന്താരാഷ്ട്ര സമൂഹം ആശങ്കപ്പെടുന്നു. യുദ്ധം മൂലം ആഗോള തലത്തിൽ എണ്ണ വില വർദ്ധിക്കാനും വിതരണ ശൃംഖലകൾ തടസ്സപ്പെടാനും സാധ്യതയുണ്ട്. ഹോർമുസ് കടലിടുക്ക് വഴി സമാധാനപരമായി കപ്പൽ ഗതാഗതം നടത്താൻ അനുവദിക്കില്ലെന്ന ഇറാൻ്റെ ഭീഷണിയും ലോകത്തെ ആശങ്കയിലാക്കുന്നു.

അമേരിക്കൻ സൈനിക ലക്ഷ്യങ്ങളിൽ മാറ്റമില്ലെന്നും എന്നാൽ ഇറാനിലെ ഭരണമാറ്റമാണ് ലക്ഷ്യമെന്ന സൂചനയുമാണ് വൈറ്റ് ഹൗസ് നൽകുന്നത്. ഇറാനിലെ ഇസ്‌ലാമിക് റിപ്പബ്ലിക് ഭരണകൂടത്തിന്റെ അടിത്തറ തകർക്കാനാണ് അമേരിക്കയുടെയും ഇസ്രായേലിന്റെയും നീക്കം.

എന്നാൽ തങ്ങളുടെ പരമാധികാരത്തിന് മേലുള്ള കടന്നുകയറ്റത്തെ സർവ്വശക്തിയും ഉപയോഗിച്ച് നേരിടുമെന്നാണ് ഇറാൻ നിലപാട്. ഇതിനിടെ റഷ്യയുടെ ഇടപെടലുകളും ശ്രദ്ധേയമാണ്. ഇറാൻ ആക്രമിക്കപ്പെടുന്നതിനെ റഷ്യ അപലപിക്കുകയും ഇറാനുമായുള്ള ബന്ധം ശക്തമാക്കാൻ തീരുമാനിക്കുകയും ചെയ്തിട്ടുണ്ട്. മേഖലയിലെ മറ്റ് രാജ്യങ്ങൾ സംയമനം പാലിക്കാൻ അഭ്യർത്ഥിക്കുന്നുണ്ടെങ്കിലും യുദ്ധത്തിന്‍റെ തീവ്രത ഓരോ മണിക്കൂറിലും കൂടിവരികയാണ്. സമാധാന ചർച്ചകൾക്ക് നിലവിൽ സാധ്യതകളൊന്നുമില്ലാത്ത അവസ്ഥയാണുള്ളത്.