യുദ്ധത്തിൽ നിന്ന് തലയൂരാൻ കഴിയാതെ ട്രംപ്

വാഷിംഗ്ടൺ: ഇറാനുമായുള്ള യുദ്ധം മൂന്നാം വാരത്തിലേക്ക് കടക്കുമ്പോൾ, തന്‍റെ നിയന്ത്രണത്തിൽ നിന്നും വഴുതിപ്പോകുന്ന ഒരു വലിയ പ്രതിസന്ധിയെ അഭിമുഖീകരിക്കുകയാണ് അമേരിക്കയുടെ പ്രസിഡന്‍റ് ഡൊണാൾഡ് ട്രംപ്.

ആഗോള വിപണിയിൽ ഇന്ധനവില കുതിച്ചുയരുന്നു.നാറ്റോ സഖ്യകക്ഷികൾക്കിടയിൽ അമേരിക്ക ഒറ്റപ്പെടുന്നു. “ചെറിയൊരു സൈനിക നീക്കം” എന്ന് വിശേഷിപ്പിക്കപ്പെട്ട യുദ്ധത്തിലേക്ക് കൂടുതൽ സൈനികരെ അയക്കേണ്ടി വരുന്നു. ഇതെല്ലാം ട്രംപിന് തിരിച്ചടിയാവുകയാണ്.

ഹോർമുസ് കടലിടുക്കിലെ സുരക്ഷ ഉറപ്പാക്കാൻ സഹായിക്കാത്ത നാറ്റോ രാജ്യങ്ങളെ ‘ഭീരുക്കൾ’ എന്ന് ട്രംപ് ആക്ഷേപിച്ചെങ്കിലും, കാര്യങ്ങൾ പദ്ധതിയനുസരിച്ചാണ് നീങ്ങുന്നതെന്ന് അദ്ദേഹം ആവർത്തിച്ചു. യുദ്ധം സൈനികമായി വിജയിച്ചുകഴിഞ്ഞു എന്ന വെള്ളിയാഴ്ചത്തെ ട്രംപിന്റെ പ്രഖ്യാപനം
യാഥാർത്ഥ്യവുമായി പൊരുത്തപ്പെടുന്നതല്ലെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.

ഗൾഫ് മേഖലയിലെ എണ്ണ, വാതക വിതരണം തടസ്സപ്പെടുത്തിയും മേഖലയിലുടനീളം മിസൈൽ ആക്രമണങ്ങൾ നടത്തിയും ഇറാൻ ഇപ്പോഴും ശക്തമായ പ്രതിരോധം തുടരുകയാണ്.

“വിഡ്ഢിത്തം” നിറഞ്ഞ സൈനിക ഇടപെടലുകളിൽ നിന്ന് അമേരിക്കയെ മാറ്റിനിർത്തുമെന്ന് വാഗ്ദാനം ചെയ്ത് അധികാരത്തിലേറിയ ട്രംപ്, ഇപ്പോൾ താൻ തന്നെ തുടങ്ങിയ ഒരു യുദ്ധത്തിന്റെ ഗതി നിയന്ത്രിക്കാനാവാത്ത അവസ്ഥയിലാണുള്ളത്. വ്യക്തമായ ഒരു പിൻവാങ്ങൽ പദ്ധതിയുടെ അഭാവം ട്രംപിന്റെ രാഷ്ട്രീയ ഭാവിക്ക് വലിയ ഭീഷണിയുയർത്തുന്നു.

വരാനിരിക്കുന്ന തിരഞ്ഞെടുപ്പിൽ കോൺഗ്രസിലെ നേരിയ ഭൂരിപക്ഷം നിലനിർത്താൻ പാടുപെടുന്ന റിപ്പബ്ലിക്കൻ പാർട്ടിയെയും ഈ സാഹചര്യം ആശങ്കയിലാക്കുന്നുണ്ട്. ട്രംപ് തന്നെ നിർമ്മിച്ച ‘ഇറാൻ യുദ്ധം’ എന്ന പെട്ടിയിൽ അദ്ദേഹം കുടുങ്ങിക്കിടക്കുകയാണെന്നും അതിൽ നിന്ന് എങ്ങനെ പുറത്തുകടക്കണമെന്ന് അദ്ദേഹത്തിന് അറിയില്ലെന്നും മുൻ മിഡിൽ ഈസ്റ്റ് ചർച്ചാ വിദഗ്ധൻ ആരോൺ ഡേവിഡ് മില്ലർ അഭിപ്രായപ്പെടുന്നു.

എന്നാൽ വൈറ്റ് ഹൗസ് വൃത്തങ്ങൾ ഈ വാദങ്ങളെ എതിർക്കുകയാണ്. ഇറാന്റെ പ്രമുഖ നേതാക്കളെ വധിച്ചതും, അവരുടെ നാവികസേനയുടെ ഭൂരിഭാഗവും തകർത്തതും, മിസൈൽ ശേഖരം നശിപ്പിച്ചതും വലിയ സൈനിക വിജയമാണെന്നാണ് ഔദ്യോഗിക പക്ഷം.

നയതന്ത്രപരമായും സൈനികമായും രാഷ്ട്രീയമായും ട്രംപിന്റെ അധികാരം നേരിടുന്ന പരിമിതികൾ കഴിഞ്ഞയാഴ്ച വ്യക്തമായി പുറത്തുവന്നു. ഹോർമുസ് കടലിടുക്കിൽ കപ്പലുകൾക്ക് സുരക്ഷയൊരുക്കാൻ നാറ്റോ സഖ്യകക്ഷികൾ വിമുഖത കാണിച്ചത് ട്രംപിനെ അമ്പരപ്പിച്ചിട്ടുണ്ട്.

ഒറ്റപ്പെട്ടുപോയി എന്ന തോന്നൽ ഒഴിവാക്കാൻ, യുദ്ധത്തിന്റെ വ്യാപ്തി കുറച്ചുകൊണ്ട് എത്രയും വേഗം ഒരു ഒത്തുതീർപ്പ് പാത കണ്ടെത്താൻ ഉപദേശകർ നിർദ്ദേശിച്ചെങ്കിലും ട്രംപ് അത് ചെവികൊണ്ടിട്ടില്ല. സഖ്യകക്ഷികളുടെ ഈ വിമുഖതയ്ക്ക് കാരണം ട്രംപിന്റെ ഏകപക്ഷീയമായ തീരുമാനങ്ങളാണ്.

14 മാസം മുമ്പ് വീണ്ടും അധികാരമേറ്റെടുത്ത ശേഷം അമേരിക്കയുടെ പരമ്പരാഗത സഖ്യകക്ഷികളെ ട്രംപ് നിരന്തരം അവഗണിച്ചതിന്‍റെ പ്രതിഫലനമാണിതെന്ന് വിദേശകാര്യ വിദഗ്ധർ ചൂണ്ടിക്കാട്ടുന്നു. ഇസ്രായേലുമായുള്ള ബന്ധത്തിലും വിള്ളലുകൾ പ്രത്യക്ഷപ്പെട്ടു തുടങ്ങിയിട്ടുണ്ട്.

ഇറാന്റെ സൗത്ത് പാഴ്സ് ഗ്യാസ് ഫീൽഡിന് നേരെയുള്ള ഇസ്രായേൽ ആക്രമണത്തെക്കുറിച്ച് തനിക്ക് അറിവില്ലായിരുന്നു എന്ന് ട്രംപ് പറഞ്ഞപ്പോൾ, അത് അമേരിക്കയുമായി ആലോചിച്ചു ചെയ്തതാണെന്ന് ഇസ്രായേൽ വ്യക്തമാക്കി.

‘ഓപ്പറേഷൻ എപിക് ഫ്യൂറി’ എന്ന് പേരിട്ടിരിക്കുന്ന ഈ സൈനിക നീക്കം ഇപ്പോൾ ഒരു വഴിത്തിരിവിലാണ്. ഇറാനിലെ ഖാർഗ് ദ്വീപ് പിടിച്ചെടുക്കാനോ തീരപ്രദേശങ്ങളിൽ കൂടുതൽ സൈന്യത്തെ ഇറക്കി മിസൈൽ ലോഞ്ചറുകൾ തകർക്കാനോ ട്രംപിന് മുതിരാം.

എന്നാൽ ഇത് അമേരിക്കൻ പൊതുസമൂഹം എതിർക്കുന്ന ദീർഘകാല യുദ്ധത്തിലേക്ക് രാജ്യത്തെ നയിക്കും. മറിച്ച്, വിജയം പ്രഖ്യാപിച്ച് പിന്മാറാൻ ശ്രമിച്ചാൽ അത് ഗൾഫ് സഖ്യകക്ഷികളെ പ്രകോപിപ്പിക്കും. പരിക്കേറ്റ സിംഹത്തെപ്പോലെ നിൽക്കുന്ന ഇറാൻ വീണ്ടും ആണവായുധങ്ങൾക്കായി ശ്രമിക്കുമെന്നും കപ്പൽ ഗതാഗതം തടസ്സപ്പെടുത്തുമെന്നും അവർ ഭയപ്പെടുന്നു.

തങ്ങൾ ആണവായുധം നിർമ്മിക്കുന്നില്ലെന്നാണ് ഇറാൻ ഇപ്പോഴും പറയുന്നത്. അതിനിടെ, ആയിരക്കണക്കിന് മറീനുകളെയും നാവികരെയും മിഡിൽ ഈസ്റ്റിലേക്ക് അയക്കാൻ അമേരിക്ക തീരുമാനിച്ചതായി റോയിട്ടേഴ്സ് റിപ്പോർട്ട് ചെയ്തിട്ടുണ്ട്, എങ്കിലും ഇറാൻ മണ്ണിലേക്ക് നേരിട്ട് സൈന്യത്തെ ഇറക്കാൻ നിലവിൽ തീരുമാനമില്ല.

ട്രംപിന്റെ കടുത്ത അനുയായികളായ മാഗ പ്രസ്ഥാനത്തിനുള്ളിൽ പോലും ഈ യുദ്ധം വിള്ളലുകൾ ഉണ്ടാക്കിയിട്ടുണ്ട്. പല പ്രമുഖ ഇൻഫ്ലുവൻസർമാരും യുദ്ധത്തിനെതിരെ പരസ്യമായി രംഗത്തെത്തി. ഇന്ധനവില വർദ്ധനവ് സാധാരണക്കാരെ ബാധിച്ചു തുടങ്ങുന്നതോടെ ജനരോഷം കൂടുമെന്ന് റിപ്പബ്ലിക്കൻ സ്ട്രാറ്റജിസ്റ്റുകൾ മുന്നറിയിപ്പ് നൽകുന്നു.

ഫെബ്രുവരി 28-ന് യുദ്ധം തുടങ്ങിയപ്പോൾ തന്നെ ഇതിന്റെ പ്രത്യാഘാതങ്ങൾ വേണ്ടവിധം വിലയിരുത്തുന്നതിൽ വൈറ്റ് ഹൗസിന് വീഴ്ച പറ്റിയെന്ന് ഭരണകൂടത്തിനുള്ളിൽ തന്നെ സംസാരമുണ്ട്. ഇറാന്റെ തിരിച്ചടിക്കാനുള്ള ശേഷിയെ ട്രംപ് കുറച്ചുകണ്ടു എന്നതാണ് പ്രധാന വിലയിരുത്തൽ.

ഡ്രോണുകളും മിസൈലുകളും ഉപയോഗിച്ച് ഇറാൻ ഗൾഫ് രാജ്യങ്ങളെ ആക്രമിക്കുന്നതും കടലിടുക്ക് ഭാഗികമായി അടച്ചതും ലോകത്തെ എണ്ണ വിതരണത്തിന്റെ അഞ്ചിലൊന്നിനെ ബാധിച്ചു. മുൻകൂട്ടി കണ്ടിരിക്കേണ്ട പല വെല്ലുവിളികളും ഫലപ്രദമായി നേരിടുന്നതിൽ ട്രംപ് പരാജയപ്പെട്ടു എന്ന് മുൻ അംബാസഡർ ജോൺ ബാസ് പറയുന്നു.

വാർത്താമാധ്യമങ്ങൾക്ക് മേൽ ട്രംപ് നടത്തുന്ന കടന്നാക്രമണങ്ങൾ അദ്ദേഹത്തിന്റെ നിരാശയുടെ പ്രതിഫലനമായാണ് കാണുന്നത്. യുദ്ധം എന്തിനാണെന്നും അടുത്ത നീക്കം എന്താണെന്നും ജനങ്ങളെ ബോധ്യപ്പെടുത്താൻ കഴിയാത്തതിനാൽ വാർത്താചക്രങ്ങളെ തന്റെ ഇഷ്ടാനുസരണം തിരിക്കാനുള്ള ട്രംപിന്റെ കഴിവിന് മങ്ങലേറ്റതായി മുൻ നയതന്ത്ര പ്രതിനിധി ബ്രെറ്റ് ബ്രൂയൻ അഭിപ്രായപ്പെട്ടു. യുദ്ധം നീണ്ടുപോകുന്തോറും ട്രംപിന്റെ രാഷ്ട്രീയ വിലാസവും പ്രതിസന്ധിയിലാവുകയാണ്.

ഈ സാഹചര്യത്തിൽ അമേരിക്കയുടെ അടുത്ത നീക്കം എന്തായിരിക്കുമെന്നതിൽ ലോകം ഉറ്റുനോക്കുകയാണ്. ഇറാന്റെ സൈനിക കേന്ദ്രങ്ങൾ ലക്ഷ്യമിട്ടുള്ള കൂടുതൽ തീവ്രമായ വ്യോമാക്രമണങ്ങളാണോ അതോ സഖ്യകക്ഷികളെ വിശ്വാസത്തിലെടുത്തുകൊണ്ടുള്ള ഒരു നയതന്ത്ര പിൻവാങ്ങലാണോ ട്രംപ് തിരഞ്ഞെടുക്കുക എന്നത് നിർണ്ണായകമാണ്.

ആഭ്യന്തരമായി ഉയരുന്ന പ്രതിഷേധങ്ങളും സാമ്പത്തിക പ്രതിസന്ധിയും ട്രംപിനെ ഒരു തീരുമാനമെടുക്കാൻ നിർബന്ധിതനാക്കുന്നു. മിഡ്‌ടേം തിരഞ്ഞെടുപ്പിന് മുൻപ് യുദ്ധം അവസാനിപ്പിക്കാൻ കഴിഞ്ഞില്ലെങ്കിൽ അത് റിപ്പബ്ലിക്കൻ പാർട്ടിക്ക് വലിയ ആഘാതമാകും. യുദ്ധം സൈനികമായി ജയിച്ചുവെന്ന വൈറ്റ് ഹൗസിന്റെ വാദവും നിലത്തെ യാഥാർത്ഥ്യങ്ങളും തമ്മിലുള്ള വലിയ അന്തരം ഭരണകൂടത്തിന് തലവേദനയാകുന്നുണ്ട്.

അന്താരാഷ്ട്ര തലത്തിൽ അമേരിക്കയുടെ വിശ്വാസ്യത തിരിച്ചുപിടിക്കുക എന്നതും ട്രംപിന് മുന്നിലുള്ള വലിയ വെല്ലുവിളിയാണ്. വരും ആഴ്ചകളിൽ ഇന്ധനവിലയിൽ ഉണ്ടായേക്കാവുന്ന മാറ്റങ്ങളും മിഡിൽ ഈസ്റ്റിലെ സൈനിക വിന്യാസവും ട്രംപിന്റെ രാഷ്ട്രീയ ഭാവി നിശ്ചയിക്കുന്നതിൽ പ്രധാന പങ്കുവഹിക്കും.