ന്യൂഡല്ഹി: ജനുവരി 26 ന് റിപ്പബ്ലിക് ദിനത്തില് ഡൽഹിയിൽ വലിയ സ്ഫോടനങ്ങള്ക്ക് പദ്ധതിയിട്ടിരുന്നതായി ഫരീദാബാദില് നിന്നും പിടിയിലായ ഡോക്ടര് മുസമ്മല് ഷക്കീൽ അന്വേഷണ സംഘത്തിന് മൊഴി നല്കിയതായി സൂചന.
ഇതിൻ്റെ ഭാഗമായി താനും ഡല്ഹിയില് ചാവേര് സ്ഫോടനം നടത്തിയ ഡോ. ഉമര് നബിയും ചെങ്കോട്ടയില് സന്ദര്ശനം നടത്തിയിരുന്നുവെന്നാണ് അദ്ദേഹത്തിൻ്റെ വെളിപ്പെടുത്തൽ.
ജമ്മു കശ്മീരിലെ പുല്വാമ സ്വദേശിയായാണ് ഡോക്ടര് മുസമ്മല് ഷക്കീൽ. പലതവണ ചെങ്കോട്ടയും പരിസരത്തും ഈ സംഘം നിരീക്ഷണം നടത്തിയിരുന്നതായാണ് അന്വേഷണ സംഘം കരുതുന്നത്.ഫരീദാബാദിലെ അല് ഫലാഹ് മെഡിക്കല് കോളജിലെ ഡോക്ടറാണ് മുസമ്മില്.
ഡോക്ടര് മുസമ്മലിൻ്റെ ഫോണില് നിന്നും ലഭിച്ച വിവരങ്ങളുടെ അടിസ്ഥാനത്തില് വിശദമായി ചോദ്യം ചെയ്തപ്പോഴാണ് അദ്ദേഹം ഇക്കാര്യം വെളിപ്പെടുത്തിയത്.
ഇക്കഴിഞ്ഞ ദീപാവലി ദിവസം തിരക്കേറിയ സ്ഥലത്ത് സ്ഫോടനം നടത്താന് പദ്ധതിയിട്ടിരുന്നു. എന്നാല് അത് നടപ്പാക്കാന് കഴിഞ്ഞില്ലെന്നും ഇയാള് മൊഴി നല്കിയതായി അധികൃതര് സൂചിപ്പിക്കുന്നു. ഭീകരസംഘങ്ങളുമായി ബന്ധപ്പെട്ട് പ്രവര്ത്തിച്ചിരുന്ന ജമ്മുകശ്മീര് സ്വദേശിയായ ഡോക്ടര് ആദില് മുഹമ്മദ് റാത്തറാണ് ആദ്യം അറസ്റ്റിലാകുന്നത്.
ഇയാളെ ചോദ്യം ചെയ്തതില് നിന്നും ലഭിച്ച വിവരങ്ങളുടെ അടിസ്ഥാനത്തിലാണ് ഫരീദാബാദിലെ ഡോക്ടറായ മുസമ്മില് ഷക്കീലും പിടിയിലാകുന്നത്. ആലിന്റെ വെളിപ്പെടാത്തതിന്റെ അടിസ്ഥാനത്തില് പൊലീസ് നടത്തിയ തിരച്ചിലിൽ ഫരീദാബാദിലെ ആശുപത്രിയിൽ നിന്ന് പൊലീസ് സംഘം 300 കിലോ ആര്ഡിഎക്സ്, എകെ 47 തോക്കുകള്, വെടിക്കോപ്പുകള് തുടങ്ങിയവ പിടിച്ചെടുത്തിരുന്നു.
കൂട്ടാളികളായ രണ്ടു ഡോക്ടര്മാരും പിടിയിലായതോടെ ഡല്ഹിയില് ചാവേറായ ഡോക്ടര് ഉമര് നബി പരിഭ്രാന്തനായി.തുടര്ന്ന് ഫരീദാബാദില് നിന്നും കാറില് ചെങ്കാട്ടയ്ക്ക് സമീപമെത്തി സ്ഫോടനം നടത്തുകയായിരുന്നുവെന്നാണ് റിപ്പോര്ട്ട്.
അതിനിടെ ഡല്ഹി സ്ഫോടനവുമായി ബന്ധപ്പെട്ട് ഏഴു പേരുടെ അറസ്റ്റ് കൂടി രേഖപ്പെടുത്തി. കാര് വില്പ്പനയ്ക്ക് സഹായിച്ച ഡീലറും അറസ്റ്റിലായിട്ടുണ്ട്. ഇന്നലെ എട്ടുപേര് അറസ്റ്റിലായിരുന്നു.
ഭീകരസംഘടനയായ ജെയ്ഷെ മുഹമ്മദിന്റെ വനിതാ വിഭാഗത്തിൻ്റെ മുഖ്യചുമതലക്കാരിയായി പ്രവര്ത്തിച്ച, നേരത്തെ അറസ്റ്റിലായ ഡോക്ടര് ഷഹീന് ഷാഹിദയുടെ സഹോദരന് പര്വേസ് സയീദിനെയും പൊലീസ് അറസ്റ്റ് ചെയ്തു. പൊലീസ് വ്യാപക തിരച്ചിൽ ആരംഭിച്ചതോടെ, ഡോ. ഷഹീൻ്റെ പക്കല് സൂക്ഷിച്ചിരുന്ന സ്ഫോടക വസ്തുക്കള് ഇയാള് നശിപ്പിച്ചതായിട്ടാണ് സംശയിക്കുന്നത്.
ഷഹീൻ്റെ കൂട്ടാളിയായ കശ്മീരി ഡോക്ടര് മുസമ്മില് ഗ്രാനി എന്ന മുസൈബിൻ്റെ രണ്ട് വാടകമുറിയില് നിന്നായി 2,900 സ്ഫോടക വസ്തുക്കൾ കണ്ടെടുത്തിരുന്നു. ഫരീദാബാദിലെ അല് ഫലാഹ് മെഡിക്കല് സര്വകലാശാല കേന്ദ്രീകരിച്ച് പരിശോധനകള് തുടരുകയാണ്.
