ന്യൂഡൽഹി: ആം ആദ്മി പാർടി ഡൽഹി ഭരിച്ചിരുന്ന കാലത്തെ മദ്യനയ കേസിൽ മുൻ ഡൽഹി മുഖ്യമന്ത്രി അരവിന്ദ് കേജ്രിവാളിനെയും മുൻ ഉപമുഖ്യമന്ത്രി മനീഷ് സിസോദിയയെയും വിചാരണ കോടതി കുറ്റവിമുക്തരാക്കി.
ബിആർഎസ് നേതാവ് കെ. കവിത ഉൾപ്പെടെയുള്ള കേസിലെ മറ്റ് 21 പ്രതികളെയും കോടതി വിട്ടയച്ചു. ആം ആദ്മി പാർട്ടിയുടെ അടിവേരിളക്കിയ കേസിനാണ് ഈ കോടതി വിധ. ഇത് സി ബി ഐയ്ക്കും കേന്ദ്ര സർക്കാരിനും ബി ജെ പിക്കും കനത്ത തിരിച്ചടിയായി.
സിബിഐയെ ഡൽഹി കോടതി രൂക്ഷമായി വിമർശിച്ചു. പ്രോസിക്യൂഷന്റെ ആരോപണങ്ങൾ വിശ്വസനീയമായ തെളിവുകൾ ഉപയോഗിച്ച് തെളിയിക്കുന്നതിൽ പരാജയപ്പെട്ടുവെന്ന് വിധിക്കുകയും ചെയ്തു. ഗൂഢാലോചനയും ക്രിമിനൽ ഉദ്ദേശ്യവും സംബന്ധിച്ച അവകാശവാദങ്ങൾ ജുഡീഷ്യൽ പരിശോധനയ്ക്ക് വിധേയമല്ലെന്ന് കോടതി വിലയിരുത്തി,
പകരം ഭരണപരമായ തീരുമാനങ്ങളിലേക്കാണ് രേഖകൾ വിരൽ ചൂണ്ടുന്നതെന്ന് കോടതി ചൂണ്ടിക്കാട്ടി. എക്സൈസ് നയത്തിൽ യാതൊരു വിധത്തിലുള്ള ഗൂഢാലോചനയോ ക്രിമിനൽ ഉദ്ദേശ്യമോ ഉണ്ടായിരുന്നില്ല,” കോടതി വിധിച്ചു.
കേജ്രിവാൾ മാധ്യമങ്ങൾക്ക് മുന്നിൽ പൊട്ടിക്കരയുന്നു. ആശ്വസിപ്പിക്കുന്ന മനീഷ് സിസോദിയയേയും കാണാം.
ആം ആദ്മി പാർട്ടിയെ (എഎപി) ഡൽഹിയിൽ അധികാരത്തിൽ നിന്ന് പുറത്താക്കാൻ ബിജെപി നടത്തിയതായി ആരോപിക്കപ്പെടുന്ന ‘സ്വതന്ത്ര ഇന്ത്യയിലെ ഏറ്റവും വലിയ രാഷ്ട്രീയ ഗൂഢാലോചന’ എന്നാണ് കേജ്രിവാൾ വിധിയോട് വൈകാരികമായി പ്രതികരിച്ചത്.
അധികാരത്തിനുവേണ്ടി ആരും രാജ്യത്തോടും ഭരണഘടനയോടും ഇങ്ങനെ ചെയ്യരുത് എന്നും, കേജ്രിവാളും എഎപിയും അത്യന്തം സത്യസന്ധമാണെന്ന് ഈ വിധി തെളിയിക്കുന്നുവെന്നും അദ്ദേഹം കൂട്ടിച്ചേർത്തു.
കേജ്രിവാളിനെതിരെ തെളിവുകളുടെ അഭാവമുണ്ടെന്ന് ചൂണ്ടിക്കാട്ടിയ പ്രത്യേക ജഡ്ജി ജിതേന്ദ്ര സിംഗ്, തെളിവുകളുടെ അഭാവത്തിൽ കേന്ദ്ര ഗൂഢാലോചനയിൽ പങ്കുണ്ടെന്ന് ആരോപിക്കുന്നത് തെളിയിക്കാൻ കഴിയില്ലെന്നും അതിനാൽ ഗുരുതരമായ ആരോപണങ്ങൾ തെളിവുകളുടെ അടിസ്ഥാനത്തിൽ സ്ഥിരീകരിക്കേണ്ടതുണ്ടെന്നും പറഞ്ഞു. പ്രോസിക്യൂഷന്റെ വാദങ്ങൾക്ക് തെളിവുകളുടെ പിന്തുണയില്ലെന്ന് കണ്ടെത്തിയാൽ പൊതുജന വിശ്വാസത്തെ ബാധിക്കുമെന്ന് കോടതി ചൂണ്ടിക്കാട്ടി.
സിസോദിയയെ കുറ്റവിമുക്തനാക്കിയ കോടതി, പ്രോസിക്യൂഷന്റെ കേസ് ജുഡീഷ്യൽ പരിശോധനയെ അതിജീവിച്ചിട്ടില്ലെന്നും അദ്ദേഹത്തിന്റെ ഭാഗത്ത് ക്രിമിനൽ ഉദ്ദേശ്യമുണ്ടെന്ന് സൂചിപ്പിക്കുന്ന ഒരു തെളിവും കണ്ടെത്തിയില്ലെന്നും പറഞ്ഞു. രേഖകൾക്കൊപ്പം ഉണ്ടായിരുന്ന പ്രസ്താവനകളും ഒരുമിച്ച് വായിച്ചപ്പോൾ, അവ ഭരണപരമായ ചർച്ചകളാണ് പ്രതിഫലിപ്പിച്ചതെന്ന് കോടതി ചൂണ്ടിക്കാട്ടി.
അരവിന്ദ് കെജ്രിവാൾ മുഖ്യമന്ത്രി സ്ഥാനം രാജിവയ്ക്കുകയും തുടർന്നുണ്ടായ തിരഞ്ഞെടുപ്പിൽ ദേശീയ തലസ്ഥാനത്ത് ആം ആദ്മി പാർട്ടിക്ക് അധികാരം നഷ്ടപ്പെടുകയും ചെയ്ത കേസായിരുന്നു ഇത്.
ആം ആദ്മി പാർട്ടി അധികാരത്തിലിരുന്നപ്പോൾ ഡൽഹിയിൽ അവതരിപ്പിച്ച 2021-22 എക്സൈസ് നയം ചില സ്വകാര്യ മദ്യ കമ്പനികൾക്ക് നേട്ടമുണ്ടാക്കാൻ വേണ്ടി രൂപകൽപ്പന ചെയ്തതാണെന്നും ‘സൗത്ത് ഗ്രൂപ്പ്’ എന്നറിയപ്പെടുന്ന ഒരു ലോബി അരവിന്ദ് കേജ്രിവാളിൻ്റെ പാർട്ടിക്കും അതിന്റെ നേതാക്കൾക്കും 100 കോടി രൂപ കൈക്കൂലി നൽകിയതായും സിബിഐയും എൻഫോഴ്സ്മെൻ്റ് ഡയറക്ടറേറ്റും (ഇഡി) ആരോപിച്ചു.
സിബിഐയുടെ അഭിപ്രായത്തിൽ, ഈ കൈക്കൂലി ഇടപാടുകൾക്ക് സൗകര്യമൊരുക്കുന്നതിനായി ഈ നയം മനഃപൂർവ്വം സ്വകാര്യ ലാഭവിഹിതം 5 ശതമാനത്തിൽ നിന്ന് 12 ശതമാനമായി വർദ്ധിപ്പിച്ചു എന്നായിരുന്നു.
2022 ജൂലൈയിൽ ഡൽഹി ചീഫ് സെക്രട്ടറി ക്രമക്കേടുകൾ കണ്ടെത്തിയതിനെ തുടർന്നാണ് കേസ് ആരംഭിച്ചത്. ഇതേത്തുടർന്ന്, ലഫ്റ്റനന്റ് ഗവർണർ വി.കെ. സക്സേന സിബിഐ അന്വേഷണത്തിന് ശുപാർശ ചെയ്തു.
നയത്തിന്റെ പ്രാഥമിക ശിൽപിയായി അന്നത്തെ എക്സൈസ് മന്ത്രിയായിരുന്ന മനീഷ് സിസോദിയയെ പരാമർശിച്ചു. 2023 ഫെബ്രുവരിയിൽ സിബിഐ അദ്ദേഹത്തെ അറസ്റ്റ് ചെയ്യുകയും, 17 മാസത്തിലധികം ജയിലിൽ കഴിഞ്ഞ ശേഷം 2024 ഓഗസ്റ്റിൽ സുപ്രീം കോടതി അദ്ദേഹത്തിന് ജാമ്യം നൽകുകയും ചെയ്തു.
‘പ്രധാന ഗൂഢാലോചനക്കാരൻ’ അരവിന്ദ് കെജ്രിവാൾ ആണെന്നും സിബിഐ ആരോപിച്ചിട്ടുണ്ട്. മുഖ്യമന്ത്രിയായിരിക്കെ 2024 മാർച്ചിൽ അദ്ദേഹത്തെ അറസ്റ്റ് ചെയ്യുകയും പിന്നീട് 2024 സെപ്റ്റംബറിൽ സുപ്രീം കോടതി അദ്ദേഹത്തിന് ജാമ്യം നൽകുകയും ചെയ്തു.
