ധാക്ക: ബംഗ്ലാദേശിൽ മുഹമ്മദ് യൂനുസിൻ്റെ നേതൃത്വത്തിലുള്ള ഇടക്കാല സർക്കാരിനെതിരെ പരസ്യ വെല്ലുവിളിയുമായി ഷെയ്ഖ് ഹസീനയുടെ അവാമി ലീഗ് രംഗത്തെത്തി.
നിലവിലെ സർക്കാർ നിയമവിരുദ്ധമാണെന്നും മുഹമ്മദ് യൂനുസ് ഉടൻ രാജിവെക്കണമെന്നും ആവശ്യപ്പെട്ട് രാജ്യവ്യാപകമായി പ്രക്ഷോഭം സംഘടിപ്പിക്കാനാണ് അവാമി ലീഗിൻ്റെ നീക്കം. ജൂലൈ-ഓഗസ്റ്റ് മാസങ്ങളിലായി നടന്ന വിദ്യാർത്ഥി പ്രക്ഷോഭങ്ങളെ അടിച്ചമർത്താൻ ശ്രമിച്ചുവെന്നാരോപിച്ച്, ഹസീനയുൾപ്പെടെയുള്ള അവാമി ലീഗ് നേതാക്കൾക്കെതിരെ ഇൻ്റർനാഷണൽ ക്രൈംസ് ട്രൈബ്യൂണൽ വധശിക്ഷ ഉൾപ്പെടെയുള്ള നടപടികളിലേക്ക് നീങ്ങുന്നതിനെതിരെയാണ് പാർട്ടി പ്രധാനമായും രംഗത്തുവന്നിരിക്കുന്നത്.
വിദ്യാർത്ഥി പ്രക്ഷോഭത്തെ തുടർന്ന് ഷെയ്ഖ് ഹസീന രാജ്യം വിട്ടതിന് ശേഷം ഇതാദ്യമായാണ് അവാമി ലീഗ് ഇത്രയും ശക്തമായ രാഷ്ട്രീയ നീക്കത്തിന് ശ്രമിക്കുന്നത്. തങ്ങളുടെ നേതാക്കൾക്കെതിരെയുള്ള വിചാരണയും ശിക്ഷാ നടപടികളും രാഷ്ട്രീയ പകപോക്കലാണെന്നും, ഭരണഘടനാപരമായ സാധുതയില്ലാത്ത സർക്കാരാണ് ഇത്തരം തീരുമാനങ്ങൾ എടുക്കുന്നതെന്നും അവാമി ലീഗ് വൃത്തങ്ങൾ ആരോപിക്കുന്നു.
വധശിക്ഷ പോലുള്ള കടുത്ത ശിക്ഷാവിധികൾ നടപ്പിലാക്കുന്നത് നിയമവിരുദ്ധമാണെന്ന് ചൂണ്ടിക്കാട്ടിയാണ് അണികളെ സംഘടിപ്പിക്കാൻ നീക്കം നടക്കുന്നത്. ധാക്കയിലെ ‘സീറോ പോയിൻ്റിൽ’ ഒത്തുചേരാൻ പാർട്ടി അനുഭാവികളോട് ആഹ്വാനം ചെയ്തിട്ടുണ്ടെങ്കിലും, ഇത് തടയുമെന്ന് വിദ്യാർത്ഥി സംഘടനകളും വ്യക്തമാക്കിയിട്ടുണ്ട്.
അതേസമയം, മനുഷ്യത്വത്തിനെതിരായ കുറ്റകൃത്യങ്ങൾക്കാണ് ഹസീനയ്ക്കും കൂട്ടാളികൾക്കും എതിരെ അന്വേഷണം നടക്കുന്നതെന്നും, നീതി നടപ്പിലാക്കുമെന്നുമാണ് ഇടക്കാല സർക്കാരിൻ്റെ നിലപാട്. ഹസീനയെ വിട്ടുതരണമെന്ന് ആവശ്യപ്പെട്ട് ബംഗ്ലാദേശ് സർക്കാർ ഇൻ്റർപോളിനെ സമീപിച്ചിരിക്കുകയാണ്.
അവാമി ലീഗിൻ്റെ പുതിയ പ്രക്ഷോഭ ആഹ്വാനത്തെത്തുടർന്ന് ധാക്കയിലും പ്രധാന നഗരങ്ങളിലും സുരക്ഷാ സേന ജാഗ്രത വർധിപ്പിച്ചിട്ടുണ്ട്. നിരോധിത സംഘടനയായി പ്രഖ്യാപിക്കപ്പെട്ടേക്കാവുന്ന സാഹചര്യത്തിൽ, അവാമി ലീഗ് നടത്തുന്ന ഈ നീക്കം ബംഗ്ലാദേശിൽ വീണ്ടും ആഭ്യന്തര കലാപങ്ങൾക്ക് വഴിവെച്ചേക്കുമെന്ന ആശങ്ക ശക്തമാണ്.
