കൊൽക്കത്ത : ഉത്തർപ്രദേശിൽ കുപ്രസിദ്ധി നേടിയ “എൻകൗണ്ടർ രാജ്” മാതൃകയിലുള്ള പോലീസ് നടപടികൾ
ബി ജെ പി ഭരിക്കുന്ന പശ്ചിമ ബംഗാളിലും വർദ്ധിച്ചുവരുന്നത് മനുഷ്യാവകാശ പ്രവർത്തകർക്കിടയിലും സമൂഹത്തിലും വലിയ ആശങ്കകൾക്ക് വഴിവെക്കുന്നു.
ക്രമസമാധാന പരിപാലനത്തിന്‍റെ പേരിൽ പ്രതികളെ ഏറ്റുമുട്ടലുകളിൽ വധിക്കുന്നതും പോലീസ് കസ്റ്റഡിയിലെ മരണങ്ങളും സമീപകാലത്തായി ബംഗാളിൽ കുത്തനെ ഉയർന്നതോടെയാണ് ബി ജെ പി ഭരിക്കുന്ന ഉത്തർപ്രദേശിലെ പോലീസ് ശൈലിയുടെ നിഴൽ ബംഗാളിലും വീഴുന്നുവെന്ന ആരോപണം ശക്തമായത്.
കേസന്വേഷണത്തിൻ്റെ ഭാഗമായി തെളിവെടുപ്പിന് കൊണ്ടുപോകുമ്പോൾ പ്രതികൾ തോക്ക് തട്ടിയെടുക്കാൻ ശ്രമിച്ചെന്നോ ആക്രമിക്കാൻ തുനിഞ്ഞെന്നോ ഉള്ള പോലീസിന്‍റെ സ്ഥിരം ന്യായീകരണങ്ങൾ യുപി മോഡൽ വ്യാജ ഏറ്റുമുട്ടലുകളുടെ ആവർത്തനമാണെന്ന് നിയമവിദഗ്ധരും പ്രതിപക്ഷവും വിമർശിക്കുന്നു.
ഭരണകൂടത്തിന്‍റെ അനുമതിയോടെ നിയമവാഴ്ചയെ കാറ്റിൽപ്പറത്തി പോലീസിന് അനാവശ്യ സ്വാതന്ത്ര്യം നൽകുന്ന പ്രവണത ജനാധിപത്യ സംവിധാനത്തിന് കടുത്ത ഭീഷണിയാണെന്ന് വിലയിരുത്തപ്പെടുന്നു.
ബംഗാള്‍ മുഖ്യമന്ത്രി സുവേന്ദു അധികാരി
മംമ്ത ബാനർജിയുടെ നേതൃത്വത്തിലുള്ള തൃണമൂൽ കോൺഗ്രസ് ഭരണകാലത്ത് ബംഗാളിൽ രേഖപ്പെടുത്തിയ കസ്റ്റഡി മരണങ്ങളുടെയും ഏറ്റുമുട്ടൽ കൊലപാതകങ്ങളുടെയും കണക്കുകൾ ആശങ്കാജനകമാണ്. ദേശീയ മനുഷ്യാവകാശ കമ്മീഷന്‍റെയും പാർലമെന്റിൽ കേന്ദ്ര ആഭ്യന്തര മന്ത്രാലയം സമർപ്പിച്ച കണക്കുകളുടെയും അടിസ്ഥാനത്തിൽ, 2016 മുതൽ 2022 വരെയുള്ള കാലയളവിൽ മാത്രം ബംഗാളിൽ 21 പോലീസ് ഏറ്റുമുട്ടൽ മരണങ്ങൾ ഔദ്യോഗികമായി രേഖപ്പെടുത്തിയിട്ടുണ്ട്.
കൂടാതെ സമീപ മാസങ്ങളിൽ പോലും കുറ്റകൃത്യങ്ങൾ പുനരാവിഷ്കരിക്കുന്നതിനിടയിൽ ആഴ്ചകളുടെ വ്യത്യാസത്തിൽ തുടർച്ചയായി പ്രതികൾ പോലീസ് വെടിവെപ്പിൽ കൊല്ലപ്പെടുന്ന സംഭവങ്ങൾ റിപ്പോർട്ട് ചെയ്യപ്പെട്ടു. കസ്റ്റഡി മരണങ്ങളുടെ കാര്യത്തിൽ രാജ്യത്ത് തന്നെ മുൻപന്തിയിലുള്ള സംസ്ഥാനങ്ങളിൽ ഒന്നാണ് പശ്ചിമ ബംഗാൾ.
2020-21 വർഷത്തിൽ മാത്രം 185 പേരും 2021-22 കാലയളവിൽ നൂറിലധികം പേരും ബംഗാളിൽ പോലീസ്/ജുഡീഷ്യൽ കസ്റ്റഡിയിൽ കൊല്ലപ്പെട്ടതായി ലോക്സഭയിൽ അവതരിപ്പിച്ച വിവരങ്ങൾ വ്യക്തമാക്കുന്നു. മംമ്ത ഭരണത്തിന്‍റെ കഴിഞ്ഞ ഒരു പതിറ്റാണ്ടിലേറെയുള്ള കണക്കെടുത്താൽ കസ്റ്റഡി മരണങ്ങളുടെ എണ്ണം നൂറുകണക്കിനാണ്.
ഇത്തരം നടപടികൾ ക്രമസമാധാനം ഉറപ്പാക്കാൻ അത്യന്താപേക്ഷിതമാണെന്ന് ഭരണകൂടവും പോലീസും വാദിക്കുമ്പോൾ, ഇത് കേവലം നിയമവിരുദ്ധവും ഭരണഘടനാ വിരുദ്ധവുമായ “തൽക്ഷണ നീതി നടപ്പാക്കൽ” രീതിയാണെന്ന് മനുഷ്യാവകാശ സംഘടനകൾ ചൂണ്ടിക്കാണിക്കുന്നു.
അറസ്റ്റിലാവുന്ന പ്രതികൾക്ക് കോടതി മുഖേന അർഹമായ ശിക്ഷ ഉറപ്പാക്കുന്നതിന് പകരം വിചാരണ കൂടാതെ വെടിവെച്ചുകൊല്ലുന്ന രീതി വർദ്ധിക്കുന്നത് പോലീസിന്‍റെ അധികാര ദുർവിനിയോഗത്തെയാണ് കാണിക്കുന്നത്. നീതിന്യായ വ്യവസ്ഥയോടുള്ള ജനങ്ങളുടെ വിശ്വാസ്യത തകർക്കാനും പോലീസിലെ കസ്റ്റഡി പീഡനങ്ങൾ വർദ്ധിക്കാനും ഇത്തരം പ്രവണതകൾ കാരണമാകുന്നുണ്ട്.
അക്രമരാഷ്ട്രീയത്തിനെതിരെ പോരാടി അധികാരത്തിലെത്തിയ ബി ജെ പി സർക്കാർ, അതേ അടിച്ചമർത്തൽ നയങ്ങളും യുപി മോഡൽ എൻകൗണ്ടർ തന്ത്രങ്ങളും പിന്തുടരുന്നുവെന്ന വിമർശനം ബംഗാളിന്‍റെ രാഷ്ട്രീയ ഭാവിയിൽ വലിയ ചോദ്യചിഹ്നങ്ങൾ ഉയർത്തുന്നു.
