ന്യൂഡൽഹി : തിരഞ്ഞടുപ്പ് കമ്മീഷൻ്റെ കണക്കുകൾ അനുസരിച്ച് ഡൽഹിയിലെ വോട്ടർ പട്ടികയിൽ നിന്ന് 47.6 ലക്ഷം പേരുടെ പേരുകൾ ഒഴിവാക്കപ്പെട്ടു. എന്നാൽ പേര് വീണ്ടും ചേർക്കാൻ ഫോം 6 വഴി അപേക്ഷ നൽകിയത് 2.5 ലക്ഷം പേർ മാത്രം.
ഓഗസ്റ്റ് 31 മുതൽ ഒക്ടോബർ 22 വരെയുള്ള കണക്കാണിത്. ചീഫ് ഇലക്ട്രൽ ഓഫീസറുടെ കാര്യാലയമാണ് ഈ വിവരങ്ങൾ പുറത്തുവിട്ടത്. ഈ കാലയളവിൽ ലഭിച്ച അപേക്ഷകളിൽ പുതിയ വോട്ടർമാരും ഉൾപ്പെടുന്നു. പ്രത്യേക തീവ്ര തിരുത്തൽ പ്രക്രിയയിലൂടെ പുറത്തായവരും ഇതിലുണ്ട്.
ഓഗസ്റ്റ് 31-ന് കരട് വോട്ടർ പട്ടിക പുറത്തിറങ്ങുന്നതിന് മുൻപ് 2.12 ലക്ഷം അപേക്ഷകൾ ലഭിച്ചിരുന്നു. 33 ലക്ഷം വോട്ടർമാരുടെ കാര്യത്തിൽ അധികൃതർ സംശയം രേഖപ്പെടുത്തിയിരുന്നു. പഴയ പട്ടികയുമായി ബന്ധമില്ലാത്തതും വിവരങ്ങളിലെ പൊരുത്തക്കേടുകളുമാണ് ഇതിന് കാരണം. ഇവരിൽ 29.5 ലക്ഷം ആളുകളുടെ പ്രശ്നങ്ങൾ പരിഹരിച്ചു. ആരെങ്കിലും ഫോം 7 വഴി എതിർപ്പ് ഉന്നയിച്ചില്ലെങ്കിൽ ഇവർ അന്തിമ പട്ടികയിൽ ഇടംപിടിക്കും.
വോട്ടർമാരെ തിരിച്ചെത്തിക്കാൻ തിരഞ്ഞെടുപ്പ് കമ്മീഷൻ പ്രത്യേക ക്യാമ്പുകൾ സംഘടിപ്പിക്കുകയായിരുന്നു.. സെപ്റ്റംബർ 20 മുതൽ രാജ്യത്തുടനീളം ക്യാമ്പുകൾ നടത്തി എന്നാണ് കണക്ക്.
ഡൽഹിയിൽ മാത്രം എൺപത്തൊൻപതിനായിരം ക്യാമ്പുകൾ. . സെപ്റ്റംബർ 20 മുതൽ ഒക്ടോബർ 22 വരെ 1.58 ലക്ഷം അപേക്ഷകൾ ലഭിച്ചു. ലഭിച്ച എല്ലാ അപേക്ഷകളും നവംബർ 30-ഓടെ പരിഹരിക്കും. അന്തിമ വോട്ടർ പട്ടിക ഡിസംബർ 4-ന് പ്രസിദ്ധീകരിക്കും. വോട്ടർ പട്ടികയിൽ പേര് ചേർക്കാൻ ഫോം 6 ആണ് ഉപയോഗിക്കുന്നത്. ഒഴിവാക്കപ്പെട്ടവരോടും ഫോം 6 നൽകാൻ കമ്മീഷൻ ആവശ്യപ്പെട്ടിട്ടുണ്ട്.
ഡൽഹിയിൽ ജൂൺ 30-നാണ് പ്രത്യേക തീവ്ര തിരുത്തൽ പ്രക്രിയ ആരംഭിച്ചത്. അന്ന് 1.45 കോടി വോട്ടർമാർ പട്ടികയിൽ ഉണ്ടായിരുന്നു. ഓഗസ്റ്റ് 31-ന് കരട് പട്ടിക വന്നപ്പോൾ 47.6 ലക്ഷം പേർ പുറത്തായി. താമസം മാറിയവർ, മരിച്ചവർ, ഇരട്ടിപ്പുള്ളവർ എന്നിവരെയാണ് ഒഴിവാക്കിയത്. പരാതികളും അപേക്ഷകളും സമർപ്പിക്കാനുള്ള അവസാന തീയതി ഒക്ടോബർ 30 ആണ്. പേര് ചേർക്കാൻ ഫോം 6 നൽകാം. പേര് ഒഴിവാക്കാൻ ഫോം 7 ഉപയോഗിക്കാം. വിവരങ്ങൾ തിരുത്താൻ ഫോം 8 നൽകാം.
നിരവധി ക്യാമ്പുകൾ നടത്തിയിട്ടും അപേക്ഷകരുടെ എണ്ണം കുറവാണ്. ഒഴിവാക്കപ്പെട്ടവരുടെ പട്ടിക കൃത്യമായിരുന്നു എന്നാണ് ഇത് കാണിക്കുന്നതെന്ന് കമ്മീഷൻ പറയുന്നു. പുതിയ അപേക്ഷകരിൽ പകുതിയോളം പേർ കന്നി വോട്ടർമാരാണ്.
രണ്ട് തിരിച്ചറിയൽ കാർഡുള്ളവർ സ്വന്തം നാട്ടിലെ കാർഡ് നിലനിർത്താൻ ആഗ്രഹിക്കുന്നു. ഇതാണ് അപേക്ഷ കുറയാൻ കാരണമെന്ന് ഉദ്യോഗസ്ഥർ പറയുന്നു. ന്യൂഡൽഹിയിൽ നിരവധി സർക്കാർ വസതികളുണ്ട്. ഇവിടെ നിന്നും ഇരുപത് ശതമാനം വോട്ടർമാരെ ഒഴിവാക്കേണ്ടി വന്നു. ഇവർ ഉദ്യോഗത്തിൽ നിന്ന് വിരമിച്ച ശേഷം മറ്റ് സ്ഥലങ്ങളിലേക്ക് താമസം മാറിയവരാണ്. നിലവിൽ താമസിക്കുന്ന സ്ഥലങ്ങളിൽ പേര് ചേർക്കാൻ അധികൃതർ ഇവരോട് ആവശ്യപ്പെടുന്നു.
മുൻപ് പട്ടികയിൽ ഉണ്ടാവുകയും പിന്നീട് പുറത്താകുകയും ചെയ്തവരെ ബൂത്ത് തല ഉദ്യോഗസ്ഥർ നേരിട്ട് കാണുന്നുണ്ട്. അർഹരായവരെ വീണ്ടും ഫോം 6 വഴി പട്ടികയിൽ ചേർക്കാൻ ഇവർ സഹായിക്കുന്നുവെന്നും കമ്മീഷൻ വക്താവ് അറിയിച്ചു.
