ആക്രമണ സ്വഭാവമുള്ള നായകൾക്ക് ദയാവധം വിധിച്ച് സുപ്രിംകോടതി

ന്യൂഡൽഹി: അക്രമകാരികളായ തെരുവുനായകളെ കൊല്ലാൻ സുപ്രീം കോടതി ഉത്തരവിട്ടു.

തെരുവുനായകൾക്കെതിരെ നടപടി എടുക്കുന്ന മുനിസിപ്പൽ ജീവനക്കാർക്ക് നിയമപരമായ സംരക്ഷണം നൽണം. സ്‌കൂളുകൾ, കോളേജുകൾ തുടങ്ങിയ സ്ഥലങ്ങളിൽ അലഞ്ഞ് തിരിഞ്ഞ് നടക്കുന്ന തെരുവുനായകളെ നീക്കാനും കോടതി നിർദേശിച്ചു.

പ്രകടമായും അപകടകാരികളും ആക്രമണാത്മക സ്വഭാവമുള്ള തെരുവുനായകളെ ദയാവധം ചെയ്യാമെന്നാണ് സുപ്രീം കോടതിയുടെ സുപ്രധാനമായ ഉത്തരവ്.

ദേശീയപാതകൾ, മറ്റ് റോഡുകൾ, എക്സ്പ്രസ് വേകൾ എന്നിവിടങ്ങളിൽ നിന്ന് അലഞ്ഞു തിരിയുന്ന കന്നുകാലികൾ ഉൾപ്പടെയുള്ള മൃഗങ്ങളെ നീക്കാനും കോടതി ആവശ്യപ്പെട്ടു.

ജസ്റ്റിസുമാരായ വിക്രം നാഥ്‌, സന്ദീപ് മേത്ത, എൻ.ജെ. അൻജാരിയാ എന്നിവരടങ്ങിയ ബെഞ്ചിന്റേതാണ് നിർണ്ണായക ഉത്തരവ്.

സ്‌കൂളുകൾ, കോളേജുകൾ തുടങ്ങിയ സ്ഥലങ്ങളിൽ അലഞ്ഞ് തിരിഞ്ഞ് നടക്കുന്ന തെരുവുനായകളെ വന്ധ്യംകരണത്തിന് ശേഷം ഷെൽട്ടറിലേക്ക് മാറ്റണം. എവിടെ നിന്നാണോ തെരുവുനായകളെ പിടികൂടുന്നത് അവിടെ തുറന്നുവിടരുത് എന്ന മുൻ ഉത്തരവിൽ ഇടപെടാൻ സുപ്രീം കോടതി വിസ്സമ്മതിച്ചു.

പൗരന്മാരുടെ സഞ്ചാരസ്വാതന്ത്ര്യം ഭരണഘടന ഉറപ്പ് നൽകുന്ന അവകാശമാണ്. ഏതെങ്കിലും ഒരു ജീവിയെ പേടിച്ച് സഞ്ചാരസ്വാതന്ത്ര്യം ഹനിക്കാനാകില്ല. പൊതു സുരക്ഷയ്ക്ക് ഭീഷണിയാകുന്ന തെരുവുനായകൾക്കെതിരെ ശക്തമായ നടപടിയെടുക്കണം. സർക്കാരുകൾക്ക് മൂകസാക്ഷിയായി ഇരിക്കാൻ കഴിയില്ലന്നും സുപ്രീം കോടതി വ്യക്തമാക്കി.

രാജ്യത്ത് വർധിച്ചുവരുന്ന തെരുവ് നായ ശല്യവും അതുമൂലമുണ്ടാകുന്ന പേവിഷബാധയും  ഗുരുതരമായ ഒരു പൊതുജനാരോഗ്യ പ്രശ്നമായി മാറിയ സാഹചര്യത്തിലാണ് കോടതിയുടെ ഇടപെടൽ.

ലോകാരോഗ്യ സംഘടനയുടെ ) കണക്കുകൾ പ്രകാരം, ലോകത്താകമാനം പേവിഷബാധ മൂലം സംഭവിക്കുന്ന മരണങ്ങളിൽ ഏകദേശം 36 ശതമാനവും ഇന്ത്യയിലാണ് സംഭവിക്കുന്നത്.

പ്രതിവർഷം 18,000 മുതൽ 20,000 വരെ ആളുകൾ ഇന്ത്യയിൽ പേവിഷബാധയേറ്റ് മരണമടയുന്നു എന്നാണ് പരമ്പരാഗത കണക്കുകൾ സൂചിപ്പിക്കുന്നത്.

എന്നാൽ, സമീപകാലത്ത് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് നടത്തിയ പഠനങ്ങൾ പ്രകാരം കൃത്യമായ റിപ്പോർട്ടിംഗിലൂടെ ഈ മരണസംഖ്യ പ്രതിവർഷം 5,700 നും 6,000 നും ഇടയിലാണെന്നും വിലയിരുത്തപ്പെടുന്നു.

  പേവിഷബാധയേറ്റാൽ മരണം 100% ഉറപ്പാണെങ്കിലും, ശരിയായ സമയത്ത് കൃത്യമായ പ്രതിരോധ ചികിത്സ ലഭിക്കാത്തതു കൊണ്ടാണ് ഈ മരണങ്ങൾ സംഭവിക്കുന്നത്.

ഇന്ത്യയിൽ പ്രതിവർഷം തെരുവ് നായ്ക്കളുടെ കടിയേൽക്കുന്നവരുടെ എണ്ണം ലോകത്തിൽ തന്നെ ഏറ്റവും ഉയർന്നതാണ്. ഏകദേശം 1.5 കോടി മുതൽ 2 കോടി വരെ ആളുകൾക്ക് രാജ്യത്ത് ഓരോ വർഷവും നായ്ക്കളുടെ കടിയേൽക്കുന്നുണ്ടെന്നാണ് കണക്കാക്കപ്പെടുന്നത്.

ഇതിൽ വലിയൊരു പങ്ക് കുട്ടികളാണ്. ഔദ്യോഗിക പോർട്ടലുകളിൽ രേഖപ്പെടുത്തുന്ന കേസുകളുടെ എണ്ണം പ്രതിവർഷം 25 ലക്ഷത്തിനും 30 ലക്ഷത്തിനും ഇടയിലാണ്.

പല ഗ്രാമീണ മേഖലകളിലും കടിയേൽക്കുന്ന കേസുകൾ കൃത്യമായി ആശുപത്രികളിൽ റിപ്പോർട്ട് ചെയ്യപ്പെടാത്തതിനാൽ യഥാർത്ഥ എണ്ണം ഇതിലും വളരെ കൂടുതലായിരിക്കാനാണ് സാധ്യത.

സംസ്ഥാനങ്ങൾ തിരിച്ചുള്ള കണക്കുകൾ പരിശോധിക്കുമ്പോൾ ഉത്തർപ്രദേശ്, മഹാരാഷ്ട്ര, ബിഹാർ, പശ്ചിമ ബംഗാൾ എന്നീ സംസ്ഥാനങ്ങളിലാണ് നായ്ക്കളുടെ കടിയേൽക്കുന്ന സംഭവങ്ങൾ ഏറ്റവും കൂടുതൽ റിപ്പോർട്ട് ചെയ്യപ്പെടുന്നത്.

തമിഴ്നാട്, ഗുജറാത്ത്, മധ്യപ്രദേശ് എന്നീ സംസ്ഥാനങ്ങളിലും ഈ നിരക്ക് വളരെ ഉയർന്നതാണ്. കേരളത്തിലും തെരുവ് നായ ശല്യം അതിരൂക്ഷമായി തുടരുകയാണ്

. ഔദ്യോഗിക കണക്കുകൾ പ്രകാരം 2025-ൽ മാത്രം കേരളത്തിൽ മൂന്ന് ലക്ഷത്തിലധികം ആളുകൾക്ക് തെരുവ് നായ്ക്കളുടെ കടിയേറ്റിട്ടുണ്ട്. ഈ കാലയളവിൽ സംസ്ഥാനത്ത് പേവിഷബാധയേറ്റ് 33 മരണങ്ങളും റിപ്പോർട്ട് ചെയ്യപ്പെട്ടു,

ഇത് കഴിഞ്ഞ അഞ്ച് വർഷത്തെ ഏറ്റവും ഉയർന്ന നിരക്കാണ്. തിരുവനന്തപുരം, കൊല്ലം, തൃശ്ശൂർ, എറണാകുളം തുടങ്ങിയ ജില്ലകളിലാണ് കേരളത്തിൽ കൂടുതൽ കേസുകൾ ഉള്ളത്.

നായ്ക്കളുടെ കടിയേറ്റാൽ നൽകേണ്ട പ്രതിരോധ വാക്സിനുകളുടെ ലഭ്യത മുൻകാലങ്ങളെ അപേക്ഷിച്ച് ഇന്ന് രാജ്യത്ത് വർദ്ധിച്ചിട്ടുണ്ട്. നാഷണൽ റേബീസ് കൺട്രോൾ പ്രോഗ്രാമിൻ്റെ ഭാഗമായി എല്ലാ സർക്കാർ ആശുപത്രികളിലും പ്രാഥമിക ആരോഗ്യ കേന്ദ്രങ്ങളിലും ആൻ്റി-റേബീസ് വാക്സിനുകളും ,കടിയുടെ തീവ്രത കൂടിയ സാഹചര്യങ്ങളിൽ ( നൽകേണ്ട റേബീസ് ഇമ്മ്യൂണോഗ്ലോബുലിനും  സൗജന്യമായി ലഭ്യമാക്കിയിട്ടുണ്ട്.

എന്നിരുന്നാലും, ചില ഉൾനാടൻ ഗ്രാമീണ മേഖലകളിൽ കൃത്യസമയത്ത് വാക്സിൻ എത്തിച്ചേരാത്തതും, സ്വകാര്യ വിപണിയിൽ ഇതിനുള്ള ഉയർന്ന വിലയും വെല്ലുവിളിയാണ്. കൂടാതെ കടിയേറ്റവർ വാക്സിനേഷന്റെ മുഴുവൻ ഡോസുകളും കൃത്യമായ ഇടവേളകളിൽ പൂർത്തിയാക്കാൻ കാണിക്കുന്ന വീഴ്ചയും മരണങ്ങൾക്ക് കാരണമാകുന്നുണ്ട്.

നായ്ക്കളുടെ വന്ധ്യംകരണവും  വാക്സിനേഷനും ഊർജ്ജിതമാക്കുന്നതിനൊപ്പം ജനങ്ങൾക്കിടയിൽ ശരിയായ പ്രഥമശുശ്രൂഷാ ബോധവൽക്കരണം നൽകിയാൽ മാത്രമേ ഈ പ്രതിസന്ധിക്ക് ശാശ്വത പരിഹാരം കാണാൻ സാധിക്കൂ.