ന്യൂഡൽഹി : പ്രധാനമന്ത്രി നരേന്ദ്ര മോദിയുടെ ഊർജ്ജസ്വലമായ ജീവിതശൈലിയുടെ രഹസ്യമെന്ത് ? യോഗയും ഭക്ഷണക്രമവും എന്നാണ് ഉത്തരം.
76-ാം വയസ്സിലും വിശ്രമമില്ലാതെ പ്രവർത്തിക്കുന്ന അദ്ദേഹത്തിന്റെ കരുത്തിന് പിന്നിലെ രഹസ്യം തികച്ചും ലളിതവും സാത്വികവുമായ സസ്യാഹാര ശീലങ്ങളാണ്. കനത്ത ഭക്ഷണങ്ങൾക്ക് പകരം ശരീരത്തിന് എളുപ്പത്തിൽ ദഹിക്കുന്നതും അല്പം എണ്ണമയം കുറഞ്ഞതുമായ പരമ്പരാഗത ഉത്തരേന്ത്യൻ, ദക്ഷിണേന്ത്യൻ വിഭവങ്ങളാണ് അദ്ദേഹം ഭക്ഷണക്രമത്തിൽ ഉൾപ്പെടുത്തുന്നത്.
സാബുദാന ഖിച്ച്ഡി, ഉപ്പുമാവ്, പൊങ്കൽ എന്നിവയാണ് ഏറ്റവും പ്രിയപ്പെട്ട ചില വിഭവങ്ങൾ. വ്രതകാലങ്ങളിലും സാധാരണ ദിവസങ്ങളിലും ശരീരത്തിന് പെട്ടെന്ന് ഊർജ്ജം നൽകാൻ ഇതാണ് അദ്ദേഹം തിരഞ്ഞെടുക്കുന്നത്.
സാത്വിക ഭക്ഷണങ്ങൾ മനസ്സിന് ശാന്തത നൽകാനും ദീർഘനേരം ജോലി ചെയ്യാനുള്ള ശാരീരികക്ഷമത നിലനിർത്താനും സഹായിക്കുമെന്നാണ് അദ്ദേഹത്തിന്റെ ഭക്ഷണരീതി തെളിയിക്കുന്നത്. മോദിക്ക് പ്രിയപ്പെട്ട ഈ മൂന്ന് വിഭവങ്ങളും വീടുകളിൽ വളരെ എളുപ്പത്തിൽ തയ്യാറാക്കുന്ന വിധം താഴെ നൽകുന്നു.
സാബുദാന ഖിച്ച്ഡി തയ്യാറാക്കാൻ ഒരു കപ്പ് സാബുദാന (ചൗവരി) ആവശ്യത്തിന് വെള്ളത്തിൽ കഴുകി 4-5 മണിക്കൂർ കുതിർത്തു വെക്കുക. അതിനുശേഷം വെള്ളം പൂർണ്ണമായും വാർത്തുകളയണം. ഒരു പാനിൽ രണ്ട് ടേബിൾസ്പൂൺ നെയ്യ് ചൂടാക്കി അര സ്പൂൺ ജീരകം, ചെറിയ കഷണം ഇഞ്ചി ചതച്ചത്, രണ്ട് പച്ചമുളക് അരിഞ്ഞത്, കറിവേപ്പില എന്നിവ മൂപ്പിക്കുക. ഇതിലേക്ക് ഒരു പുഴുങ്ങിയ ഉരുളക്കിഴങ്ങ് ചെറിയ കഷണങ്ങളാക്കിയത് ചേർത്ത് ചെറുതായി വഴറ്റുക. തുടർന്ന് കുതിർത്ത സാബുദാനയും, അര കപ്പ് വറുത്തു പൊടിച്ച നിലക്കടലയും, ആവശ്യത്തിന് ഉപ്പും ചേർത്ത് നന്നായി ഇളക്കുക. കുറഞ്ഞ തീയിൽ 3-4 മിനിറ്റ് അടച്ചുവെച്ച് വേവിക്കുക. സാബുദാന സുതാര്യമായി കഴിയുമ്പോൾ അടുപ്പിൽ നിന്ന് മാറ്റി നാരങ്ങാനീരും മല്ലിയിലയും ചേർത്ത് ഉപയോഗിക്കാം.
ഉപ്പുമാവ് ഉണ്ടാക്കുന്നതിനായി ഒരു കപ്പ് റവ ചെറിയ തീയിൽ വറുത്തെടുക്കുക. മറ്റൊരു പാനിൽ ഒരു ടേബിൾസ്പൂൺ വെളിച്ചെണ്ണയോ നെയ്യോ ചൂടാക്കി കടുക്, ഉഴുന്നുപരിപ്പ്, കശുവണ്ടിപ്പരിപ്പ്, പച്ചമുളക്, ഇഞ്ചി, കറിവേപ്പില എന്നിവ മൂപ്പിക്കുക. ആവശ്യമെങ്കിൽ കൊത്തിയരിഞ്ഞ സവാളയും പച്ചക്കറികളും ചേർക്കാം. ഇതിലേക്ക് രണ്ടര കപ്പ് വെള്ളവും ആവശ്യത്തിന് ഉപ്പും ഒഴിച്ച് തിളപ്പിക്കുക. വെള്ളം തിളച്ചു വരുമ്പോൾ വറുത്ത റവ കുറച്ചുകുറച്ചായി ചേർത്ത് കട്ടപിടിക്കാതെ ഇളക്കിക്കൊണ്ടിരിക്കണം. വെള്ളം വറ്റി റവ നന്നായി വെന്തു പരുവം പാകമാകുമ്പോൾ അല്പം നെയ്യ് മുകളിൽ തൂവി ചൂടോടെ വിളമ്പാം.
പൊങ്കൽ തയ്യാറാക്കാൻ അര കപ്പ് പച്ചരിയും അര കപ്പ് ചെറുപയർ പരിപ്പും കഴുകി വൃത്തിയാക്കുക. ഒരു പ്രഷർ കുക്കറിൽ ഇതും നാല് കപ്പ് വെള്ളവും ആവശ്യത്തിന് ഉപ്പും ചേർത്ത് 4-5 വിസിൽ വരുന്നതുവരെ നന്നായി വേവിക്കുക. വെന്ത ശേഷം ഇത് നന്നായി ഉടച്ചെടുക്കണം. ഒരു ചെറിയ പാനിൽ രണ്ട് ടേബിൾസ്പൂൺ നെയ്യ് ചൂടാക്കി ഒരു സ്പൂൺ ജീരകം, ഒരു സ്പൂൺ കുരുമുളക് ചതച്ചത്, ചെറിയ കഷണം ഇഞ്ചി കൊത്തിയരിഞ്ഞത്, കശുവണ്ടിപ്പരിപ്പ്, കായപ്പൊടി, കറിവേപ്പില എന്നിവ മൂപ്പിച്ചെടുക്കുക. ഈ താളിപ്പ് വേവിച്ചു വെച്ചിരിക്കുന്ന അരി-പരിപ്പ് മിശ്രിതത്തിലേക്ക് ഒഴിച്ച് നന്നായി ഇളക്കി യോജിപ്പിച്ചാൽ പോഷകസമൃദ്ധമായ വെൺ പൊങ്കൽ തയ്യാർ.
ശരീരത്തിന് ഭാരമുണ്ടാക്കാതെ ആവശ്യത്തിന് കലോറിയും പ്രോട്ടീനും നൽകുന്ന ഇത്തരം ലളിതമായ സാത്വിക വിഭവങ്ങളാണ് ദിനചര്യയുടെ ഭാഗമാക്കേണ്ടതെന്ന വലിയ സന്ദേശമാണ് പ്രധാനമന്ത്രിയുടെ ഈ ഭക്ഷണശീലം നമുക്ക് നൽകുന്നത്.
