ന്യൂഡൽഹി : കേന്ദ്ര തിരഞ്ഞെടുപ്പ് കമ്മിഷന്റെ ഭരണഘടനാപരമായ പ്രവര്ത്തനങ്ങളിലും തീരുമാനങ്ങളിലും ഗുരുതരമായ ഭിന്നതകളും ആശങ്കകളും ഉയര്ന്നതായി വ്യക്തമാക്കുന്ന അന്വേഷണ റിപ്പോര്ട്ട്, ദി ഇന്ത്യന് എക്സ്പ്രസ് പത്രം പുറത്തുവിട്ടു.
ചീഫ് ഇലക്ഷന് കമ്മിഷണര് ഗ്യാനേഷ് കുമാറിന്റെ നേതൃത്വത്തില് കൈക്കൊണ്ട പല തീരുമാനങ്ങളെയും ഉത്തരവുകളെയും കമ്മിഷണര്മാരായ സുഖ്ബീര് സിങ് സന്ധുവും വിവേക് ജോഷിയും കഴിഞ്ഞ പത്ത് മാസത്തിനിടെ കുറഞ്ഞത് 14 തവണ രേഖാമൂലം എതിര്ത്തതായാണ് വാര്ത്തയില് ചൂണ്ടിക്കാട്ടുന്നത്.
ഒരേ ദിവസം തന്നെ നാല് തവണ വരെ എതിര്പ്പുകള് രേഖപ്പെടുത്തിയ സന്ദര്ഭങ്ങളുമുണ്ടായി. തങ്ങളുടെ അറിവോ അംഗീകാരമോ ഇല്ലാതെ ഏകപക്ഷീയമായി തീരുമാനങ്ങള് കൈക്കൊള്ളുകയും ഉത്തരവുകള് പുറപ്പെടുവിക്കുകയും ചെയ്തതായും ഇരുവരും ഉന്നയിച്ചു.
എന്നാല് ഈ വാര്ത്ത അടിസ്ഥാനരഹിതമാണെന്ന് വ്യക്തമാക്കി തിരഞ്ഞെടുപ്പ് കമ്മിഷന് ഔദ്യോഗികമായി രംഗത്തെത്തിയിട്ടുണ്ട്. കമ്മിഷനുള്ളില് ഭിന്നതകളില്ലെന്നും ഭരണഘടനാ തത്ത്വങ്ങളും ഭൂരിപക്ഷ തീരുമാനങ്ങളും അനുസരിച്ചാണ് എല്ലാ നടപടികളും പുരോഗമിക്കുന്നതെന്നും കേന്ദ്ര തിരഞ്ഞെടുപ്പ് കമ്മിഷന് വക്താവ് വ്യക്തമാക്കി.
/indian-express-hindi/media/media_files/2026/09/23/123-2026-09-23-01-39-15.png)
സുഖ്ബീര് സിങ് സന്ധു,,ഗ്യാനേഷ് കുമാർ,,വിവേക് ജോഷി
ബിഹാറില് ആരംഭിച്ച പ്രത്യേക തീവ്ര വോട്ടര്പട്ടിക പരിഷ്കരണം (എസ്.ഐ.ആര്.) പിന്നീട് മറ്റു സംസ്ഥാനങ്ങളിലേക്കും കേന്ദ്രഭരണ പ്രദേശങ്ങളിലേക്കും വ്യാപിപ്പിച്ചതോടെ കരട് വോട്ടര്പട്ടികയില്നിന്ന് കോടിക്കണക്കിന് പേരുകള് നീക്കം ചെയ്യപ്പെട്ടിരുന്നു. വോട്ടവകാശം ഉറപ്പാക്കുന്നതിലും പേരുകള് ഒഴിവാക്കുന്നതിലും തിരഞ്ഞെടുപ്പ് കമ്മിഷന്റെ പങ്കിനെക്കുറിച്ച് വ്യാപകമായ പൊതുചര്ച്ചകള് നടക്കുന്നതിനിടെയാണ് സ്ഥാപനത്തിനുള്ളിലെ അഭിപ്രായവ്യത്യാസങ്ങളും വാര്ത്തയായത്.
പുതിയ വോട്ടര്മാരുടെ രജിസ്ട്രേഷൻ, വോട്ടര്പട്ടികയിലെ പേരുകള് നീക്കം ചെയ്യലും പുനഃസ്ഥാപിക്കലും, എസ്.ഐ.ആര്. ഉത്തരവുകള്ക്കെതിരായ അപ്പീലുകള്, വോട്ടര്പട്ടികയുടെ സുരക്ഷ തുടങ്ങിയ വിഷയങ്ങളിലാണ് പ്രധാനമായും വിയോജിപ്പുകള് ഉയര്ന്നത്. ഇവയുമായി ബന്ധപ്പെട്ട പരാതികള് ചീഫ് ഇലക്ഷന് കമ്മിഷണര് ഗ്യാനേഷ് കുമാറിനും ഡെപ്യൂട്ടി ഇലക്ഷന് കമ്മിഷണര്മാര്ക്കും അയച്ചിരുന്നതായി റിപ്പോര്ട്ടില് പറയുന്നു.
പുതിയ വോട്ടര് രജിസ്ട്രേഷനുള്ള ഫോം 6-ല് വരുത്തിയ മാറ്റങ്ങളാണ് പ്രധാന തര്ക്കവിഷയങ്ങളിലൊന്ന്. വോട്ടറുടെയോ മാതാപിതാക്കളുടെയോ പൂര്വികരുടെയോ പേരുകള് മുന് എസ്.ഐ.ആറിലുണ്ടോ എന്ന് വ്യക്തമാക്കണമെന്ന പുതിയ ചോദ്യം ഉള്പ്പെടുത്തിയതിനെ കമ്മിഷണര്മാര് എതിര്ത്തിരുന്നു. നിയമഭേദഗതിയില്ലാതെ ഇത്തരം മാറ്റങ്ങള് വരുത്തുന്നത് അനധികൃതവും നിയമവിരുദ്ധവുമാണെന്ന് സുഖ്ബീര് സിങ് സന്ധുവും വിവേക് ജോഷിയും ചൂണ്ടിക്കാട്ടി.
കൂടാതെ, ഇലക്ടറല് രജിസ്ട്രേഷന് ഓഫീസര്മാര്ക്ക് കേന്ദ്രീകൃത സോഫ്റ്റ്വെയറായ ഇസിഐനെറ്റില് പ്രവേശനം പരിമിതപ്പെടുത്തിയതും ആശങ്കയ്ക്കിടയാക്കി. വോട്ടര്പട്ടിക തയ്യാറാക്കുന്നതിലെ വികേന്ദ്രീകൃത സ്വഭാവം ഇല്ലാതാക്കി വിവരങ്ങള് കേന്ദ്രീകരിക്കാനുള്ള നീക്കത്തിനെതിരെയും കമ്മിഷണര്മാര് എതിര്പ്പറിയിച്ചു.
പശ്ചിമ ബംഗാളിലും ഗോവയിലും എസ്.ഐ.ആറുമായി ബന്ധപ്പെട്ട് ഉയര്ന്ന തര്ക്കങ്ങളും വാര്ത്തയുടെ ഭാഗമായിരുന്നു. ബംഗാളില് ഒഴിവാക്കപ്പെട്ട വോട്ടര്മാരുടെ അപ്പീലുകള് പരിഗണിക്കുന്നതിലും സുപ്രീം കോടതി ഉത്തരവുകള് നടപ്പാക്കുന്നതിലും വ്യക്തതയില്ലായ്മ ഉണ്ടായെന്നും കമ്മിഷന് സ്വയം അപ്പീല് നല്കിയതില് ഉദ്യോഗസ്ഥരോട് വിശദീകരണം തേടിയെന്നും റിപ്പോര്ട്ടിലുണ്ട്.
ഗോവയിലാകട്ടെ, അര്ഹരായ 97 വോട്ടര്മാരുടെ പേരുകള് സോഫ്റ്റ്വെയര് റോള്ബാക്ക് സംവിധാനത്തിന്റെ അഭാവത്താല് അന്തിമ പട്ടികയ്ക്ക് പുറത്തായ സംഭവവും ചൂണ്ടിക്കാണിക്കപ്പെട്ടു. 2023-ലെ തിരഞ്ഞെടുപ്പ് കമ്മിഷന് നിയമപ്രകാരം തീരുമാനങ്ങള് കഴിയുന്നത്ര ഏകകണ്ഠമായിരിക്കണമെന്നും അഭിപ്രായവ്യത്യാസമുണ്ടെങ്കില് ഭൂരിപക്ഷാഭിപ്രായപ്രകാരം നടപ്പാക്കണമെന്നുമാണ് വ്യവസ്ഥ. എല്ലാ ഔദ്യോഗിക ആശയവിനിമയങ്ങള്ക്കും സമ്പൂര്ണ കമ്മിഷൻ്റെ അംഗീകാരം വേണമെന്ന് വ്യക്തമാക്കി ഏപ്രിലില് ഇരു കമ്മിഷണര്മാരും കുറിപ്പുകള് അയച്ചിരുന്നതായും പറയപ്പെടുന്നു.
എന്നാല്, റിപ്പോര്ട്ടില് ഉന്നയിച്ചിട്ടുള്ള എല്ലാ ആരോപണങ്ങളെയും തള്ളിക്കളഞ്ഞുകൊണ്ടാണ് തിരഞ്ഞെടുപ്പ് കമ്മിഷന് വിശദീകരണം നല്കിയത്. ഭരണഘടനാ സ്ഥാപനമെന്ന നിലയില് നിയമപരമായ ചട്ടക്കൂടിനുള്ളില് നിന്നുകൊണ്ട് പരസ്പര ചര്ച്ചകളിലൂടെയും ജനാധിപത്യപരമായ രീതിയിലുമാണ് എല്ലാ തീരുമാനങ്ങളും കൈക്കൊള്ളുന്നതെന്ന് ഇസിഐ വ്യക്തമാക്കി.
സുതാര്യവും കൃത്യവുമായ വോട്ടര്പട്ടിക ഉറപ്പാക്കാനാണ് എസ്.ഐ.ആര്. നടപടികള് നടപ്പാക്കുന്നത്. ഏതെങ്കിലും തരത്തിലുള്ള വ്യക്തിപരമായ എതിര്പ്പുകളോ നിയമവിരുദ്ധ നടപടികളോ കമ്മിഷന്റെ പ്രവര്ത്തനങ്ങളെ ബാധിച്ചിട്ടില്ലെന്നും സ്ഥാപനത്തിൻ്റെ സുതാര്യതയെ സംശയമുനയിലാക്കുന്ന പ്രചാരണങ്ങള് വസ്തുതാവിരുദ്ധമാണെന്നും തിരഞ്ഞെടുപ്പ് കമ്മിഷൻ വക്താവ് കൂട്ടിച്ചേർത്തു.
