കൊച്ചി : റിപ്പോർട്ടർ ബ്രോഡ്കാസ്റ്റിംഗ് കമ്പനി മാനേജിംഗ് ഡയറക്ടറും മാനേജിംഗ് എഡിറ്ററുമായ ആൻ്റോ അഗസ്റ്റിൻ, കമ്പനിയുടെ ഫണ്ട് ഉപയോഗിച്ച് അമ്മായിയമ്മ ലില്ലി ജോസസിൻ്റെ പേരിൽ ജപ്തി ചെയ്ത വീട് തിരിച്ചുപിടിച്ചത് 1988-ലെ ബെനാമി സ്വത്ത് ഇടപാട് നിരോധന നിയമം ലംഘിച്ചെന്ന് കണ്ടെത്തൽ.
ഈ ഇടപാടിൽ അന്വേഷണ ഏജൻസികൾ പരിശോധന ശക്തമാക്കിയിട്ടുണ്ട്. സ്വന്തം ഉടമസ്ഥതയിലായിരുന്ന, ബാങ്ക് ജപ്തി ചെയ്ത വസ്തു, കമ്പനി ഫണ്ടുപയോഗിച്ച് ബന്ധുവിൻ്റെ പേരിൽ ലേലത്തിൽ പിടിച്ച് സ്വന്തം കൈവശം തന്നെ സൂക്ഷിച്ചതാണ് പുതിയ നിയമക്കുരുക്കിന് വഴിവെച്ചിരിക്കുന്നത്.
ആൻ്റോ അഗസ്റ്റിൻ്റെ ഉടമസ്ഥതയിലുള്ള ‘ഏഷ്യൻ മോട്ടോഴ്സ്’ എന്ന സ്ഥാപനത്തിനായി സ്റ്റേറ്റ് ബാങ്ക് ഓഫ് ഇന്ത്യയിൽ നിന്ന് എടുത്ത 13.57 കോടി രൂപയുടെ വായ്പ കുടിശ്ശികയായതിനെ തുടർന്നാണ് ബാങ്ക് നടപടികൾ ആരംഭിച്ചത്. ചൈനയിൽ നിന്ന് ട്രക്കുകൾ ഇറക്കുമതി ചെയ്യാനും ഡീലർഷിപ്പ് നടത്താനുമെന്ന പേരിൽ എടുത്ത വായ്പയുടെ തിരിച്ചടവ് മുടങ്ങി.
ഇതോടെ, വയനാട് വാഴവറ്റയിലുള്ള 36.25 സെൻ്റ് സ്ഥലവും അതിലെ 10,000 ചതുരശ്ര അടിയിലധികം വിസ്തീർണ്ണമുള്ള മന്ദിരവും എസ്.ബി.ഐ ജപ്തി ചെയ്യുകയും ലേലത്തിന് വെക്കുകയും ചെയ്തു.
2022 ജൂൺ 30-ന് നടന്ന ഇ-ലേലത്തിൽ ആൻ്റോ അഗസ്റ്റിൻ്റെ അമ്മായിയമ്മ ലില്ലി ജോസ് മാത്രമാണ് പങ്കെടുത്തത്. കോടികൾ വിലമതിക്കുന്ന ഈ വസ്തു വെറും രണ്ട് കോടിയൊന്ന് ലക്ഷം രൂപയ്ക്കാണ് ലില്ലി ജോസിൻ്റെ പേരിൽ ബാങ്ക് ലേലം ഉറപ്പിച്ചത്. ലേലത്തുക നൽകിയത് ആൻ്റോയുയുടെയും മറ്റ് അനുബന്ധ സ്ഥാപനങ്ങളുടെയും അക്കൗണ്ടുകളിൽ നിന്നാണെന്നാണ് അന്വേഷണ സംഘത്തിന് ലഭിച്ച വിവരം.
ലേലത്തിന് ശേഷം ബാങ്ക് ലേല സർട്ടിഫിക്കറ്റ് നൽകിയെങ്കിലും, സബ് രജിസ്ട്രാർ ഓഫീസിലോ തദ്ദേശ സ്ഥാപനങ്ങളിലോ ഉടമസ്ഥാവകാശ മാറ്റം വരുത്താൻ ലില്ലി ജോസ് തയാറായില്ല.
മുട്ടിൽ പഞ്ചായത്തിലെ കെട്ടിട നികുതി രേഖകളിൽ 2025-26 സാമ്പത്തിക വർഷത്തിലും ഉടമയായി തുടരുന്നത് ആൻ്റോ അഗസ്റ്റിൻ തന്നെയാണ്. 2026 മാർച്ച് 18-ന് പഞ്ചായത്തിൽ കെട്ടിട നികുതി അടച്ചതും ആൻ്റോയുടെ പേരിൽ തന്നെയാണ്. വസ്തു ലേലത്തിൽ പിടിച്ചതിന് ശേഷവും വീടിന്റെ പൂർണ്ണ നിയന്ത്രണവും കൈവശാവകാശവും ആന്റോ അഗസ്റ്റിന് തന്നെയായിരുന്നു.
തനിക്ക് ബാധ്യതയുള്ള വസ്തു ബാങ്ക് ലേലം ചെയ്തപ്പോൾ സ്വന്തം കമ്പനിയിലെ പണം ഉപയോഗിച്ച് അമ്മായിയമ്മയെ മുൻനിർത്തി വ്യാജ ലേലം സൃഷ്ടിച്ചെന്നാണ് പ്രാഥമിക നിഗമനം. കൂടാതെ എസ്.ബി.ഐയിൽ പണയത്തിലിരിക്കെത്തന്നെ ഈ വീടും സ്ഥലവും മറ്റൊരു പൊതുമേഖലാ ബാങ്കിലും പണയപ്പെടുത്തി ആന്റോ അഗസ്റ്റിൻ വായ്പയെടുത്തതായി ബാങ്ക് അധികൃതർ ഹൈക്കോടതിയിൽ വ്യക്തമാക്കിയിട്ടുണ്ട്.
ബെനാമി ഇടപാടിന് പുറമേ സാമ്പത്തിക തട്ടിപ്പ്, വനം കൊള്ള, അബ്കാരി ലംഘനം തുടങ്ങി നിരവധിയായ ക്രിമിനൽ കേസുകളിൽ ആന്റോ അഗസ്റ്റിൻ പ്രതിയാണ്. കഴിഞ്ഞ ദിവസം വാഴവറ്റയിലെ വീട്ടിൽ നടപ്പിലാക്കിയ മിന്നൽ പരിശോധനയിൽ 67 ലിറ്ററിലധികം വിദേശമദ്യം എക്സൈസ് സംഘം പിടിച്ചെടുത്തു.
അനുവദനീയമായ അളവിൽ കൂടുതൽ മദ്യം സൂക്ഷിച്ചതിന് ആന്റോ അഗസ്റ്റിനെ എക്സൈസ് അറസ്റ്റ് ചെയ്തു. അബ്കാരി നിയമത്തിലെ ജാമ്യമില്ലാ വകുപ്പുകളായ 55(A), 55(I), 58 എന്നിവ പ്രകാരമാണ് കേസ്. താൻ ഈ വീടിന്റെ ഉടമയല്ലെന്നും ബാങ്ക് ലേലത്തിൽ വിറ്റതാണെന്നും കാട്ടി ജാമ്യം നേടാൻ കോടതിയിൽ ബാങ്ക് സർട്ടിഫിക്കറ്റ് ഹാജരാക്കിയപ്പോഴാണ് ബെനാമി ഇടപാടിന്റെ വിവരങ്ങൾ പുറത്തുവന്നത്.
അർജന്റീന ഫുട്ബോൾ താരം ലയണൽ മെസ്സിയെയും ടീമിനെയും കേരളത്തിൽ എത്തിക്കുമെന്നും പ്രദർശന മത്സരം സംഘടിപ്പിക്കുമെന്നും വാഗ്ദാനം ചെയ്ത് സ്പോൺസർഷിപ്പ് ഇനത്തിൽ കോടികൾ തട്ടിയെടുത്ത കേസിൽ ആന്റോ അഗസ്റ്റിൻ ഒന്നാം പ്രതിയാണ്. റിപ്പോർട്ടർ ബ്രോഡ്കാസ്റ്റിംഗ് പ്രൈവറ്റ് ലിമിറ്റഡ് ആണ് കേസിലെ രണ്ടാം പ്രതി. ഈ കേസിന്റെ അന്വേഷണ ഭാഗമായാണ് എക്സൈസ് സംഘവും പൊലീസും വീട് പരിശോധിച്ചതും മദ്യം കണ്ടെടുത്ത് അറസ്റ്റ് ചെയ്തതും.
വയനാട് മുട്ടിൽ സൗത്ത് വില്ലേജിലെ പട്ടയഭൂമിയിൽ നിന്ന് കോടികൾ വിലമതിക്കുന്ന ഈട്ടിത്തടികൾ ( റവന്യൂ-വനം ഉദ്യോഗസ്ഥരുടെ ഒത്താശയോടെ അനധികൃതമായി മുറിച്ചുകടത്തിയ കേസിൽ ആന്റോ അഗസ്റ്റിനും സഹോദരങ്ങളായ റോജി അഗസ്റ്റിൻ, ജോസുകുട്ടി അഗസ്റ്റിൻ എന്നിവരും പ്രധാന പ്രതികളാണ്. സംരക്ഷിത വനവൃക്ഷങ്ങൾ വ്യാജ അനുമതി പത്രങ്ങൾ ഉണ്ടാക്കി കടത്തിയ സംഭവം വലിയ രാഷ്ട്രീയ-ഉദ്യോഗസ്ഥ വിവാദങ്ങൾക്ക് വഴിവെച്ചിരുന്നു.
മുട്ടിലിൽ നിന്ന് അനധികൃതമായി മുറിച്ച ഈട്ടിത്തടികൾ നിയമപരമായ അനുമതിയോടെ നൽകാം എന്ന് വിശ്വസിപ്പിച്ച് മലബാർ ടിംബർ ഇൻഡസ്ട്രീസ് ഉടമ എം.എം. വലിയ അലിയാരിൽ നിന്ന് 1.4 കോടി രൂപ മുൻകൂറായി വാങ്ങി വഞ്ചിച്ചതിന് ആന്റോ അഗസ്റ്റിനും സഹോദരങ്ങൾക്കുമെതിരെ അമ്പലമേട് പോലീസ് കേസ് രജിസ്റ്റർ ചെയ്തിട്ടുണ്ട്. ഐ.പി.സി 420 (വഞ്ചന) പ്രകാരമുള്ള ഈ കേസിന്റെ വിചാരണ നിർത്തിവെക്കണമെന്ന ഇവരുടെ ഹർജി അടുത്തിടെ ഹൈക്കോടതി തള്ളിയിരുന്നു.
കൂടാതെ ഏഷ്യൻ മോട്ടോഴ്സ് എന്ന സ്ഥാപനത്തിന്റെ പേരിൽ വ്യാജ രേഖകളും തെറ്റായ വിവരങ്ങളും നൽകി വിവിധ ബാങ്കുകളിൽ നിന്ന് കോടിക്കണക്കിന് രൂപ വായ്പയെടുത്ത് തിരിമറി നടത്തിയ കേസുകളിൽ ഡെബ്റ്റ് റിക്കവറി ട്രിബ്യൂണലിലും വിവിധ കോടതികളിലും നടപടികൾ നിലനിൽക്കുന്നുണ്ട്.
വാഴവറ്റയിലെ വസതിയിൽ നിന്ന് എക്സൈസ് പിടികൂടിയ മദ്യക്കേസിൽ നിന്ന് രക്ഷപ്പെടാൻ ബാങ്ക് ലേലരേഖകൾ കോടതിയിൽ ആയുധമാക്കാൻ ശ്രമിച്ചതാണ് ആന്റോ അഗസ്റ്റിന് തന്നെ തിരിച്ചടിയായത്. കമ്പനി ഫണ്ടുപയോഗിച്ച് അമ്മായിയമ്മയുടെ പേരിൽ സ്വത്ത് തിരിച്ചെടുത്തത് വഴി ബെനാമി നിയമത്തിന് പുറമെ കള്ളപ്പണം വെളുപ്പിക്കൽ തടയൽ നിയമവും ലംഘിക്കപ്പെട്ടിട്ടുണ്ടോ എന്ന് കേന്ദ്ര-സംസ്ഥാന അന്വേഷണ ഏജൻസികൾ നിരീക്ഷിച്ചുവരികയാണ്.
