ജനീവ : ഈ വർഷം ഡിസംബറോടെ എൽ നിനോ പ്രതിഭാസം കൂടുതൽ ശക്തമാകുമെന്ന് ഐക്യരാഷ്ട്രസഭ മുന്നറിയിപ്പ് നൽകി. 1950-ന് ശേഷം ഉണ്ടാകുന്ന ഏറ്റവും ശക്തമായ എൽ നിനോകളിൽ ഒന്നായിരിക്കും ഇത്.
ഭൂമധ്യരേഖാ പ്രദേശത്തെ പസഫിക് സമുദ്രത്തിലെ ഉപരിതല താപനില ഉയരുന്ന കാലാവസ്ഥാ പ്രതിഭാസമാണ് എൽ നിനോ. ഇത് സാധാരണയായി രണ്ടു മുതൽ ഏഴു വർഷം കൂടുമ്പോൾ ഉണ്ടാകാറുണ്ട്. സാധാരണ എട്ടു മുതൽ പന്ത്രണ്ട് മാസം വരെയാണ് ഇത് നീണ്ടുനിൽക്കാറുള്ളത്. ആളുകൾ വരുത്തിവെക്കുന്ന കാലാവസ്ഥാ വ്യതിയാനത്തോടൊപ്പം എൽ നിനോ കൂടിച്ചേരുമ്പോൾ ലോകത്തിന്‍റെ വിവിധ ഭാഗങ്ങളിൽ താപനില കുത്തനെ ഉയരും.
2027 ഫെബ്രുവരി വരെ ഈ പ്രതിഭാസം തുടരാൻ 100 ശതമാനം സാധ്യതയുണ്ട് എന്ന് ലോക കാലാവസ്ഥാ സംഘടന മുന്നറിയിപ്പ് നൽകുന്നു. പസഫിക് സമുദ്രത്തിലെ താപനില മുൻവർഷങ്ങളേക്കാൾ വളരെ ഉയർന്ന അവസ്ഥയിലാണ്. സമുദ്രത്തിൽ സംഭരിക്കപ്പെട്ടിരിക്കുന്ന ഈ ചൂട് പുറന്തള്ളപ്പെടുന്നതാണ് താപനില ഉയരാൻ കാരണം. മധ്യ അമേരിക്കൻ രാജ്യങ്ങളിൽ ഇതിനകം തന്നെ കടുത്ത വരൾച്ചയും കൃഷിനാശവും മൃഗങ്ങളുടെ മരണവും റിപ്പോർട്ട് ചെയ്തിട്ടുണ്ട്.
എൽ നിനോ ശക്തമാകുന്നത് ഇന്ത്യയിൽ തെക്കുപടിഞ്ഞാറൻ മൺസൂൺ മഴ കുറയാൻ ഇടയാക്കും. ഇത് രാജ്യത്തുടനീളം കടുത്ത വരൾച്ചയ്ക്കും കൃഷിനാശത്തിനും കുടിവെള്ള ക്ഷാമത്തിനും കാരണമായേക്കാം. പച്ചക്കറികളുടെയും ധാന്യങ്ങളുടെയും ഉൽപ്പാദനം കുറയുന്നത് വിലക്കയറ്റത്തിന് വഴിവെക്കും.
കേരളത്തിൽ സാധാരണയായി ലഭിക്കേണ്ട മൺസൂൺ മഴയുടെ അളവിൽ കുറവുണ്ടാകാനും, വേനൽക്കാലത്ത് കടുത്ത ചൂടും കുടിവെള്ള ക്ഷാമവും അനുഭവപ്പെടാനും സാധ്യതയുണ്ട്. എന്നാൽ ചില ഘട്ടങ്ങളിൽ ഇത് അപ്രതീക്ഷിതവും ശക്തവുമായ മഴയ്ക്കും വെള്ളപ്പൊക്കത്തിനും കാരണമാകാറുമുണ്ട്. കൃഷിയെയും വനമേഖലയെയും നദികളിലെ ജലനിരപ്പിനെയും ഇത് സാരമായി ബാധിക്കും.
