November 20, 2026 3:50 pm

വീണ്ടുമൊരു ബാച്ച്ലർ പാർട്ടി: ബാച്ച്ലർ പാർട്ടി ഡ്യു’എക്‌സ്

ഡോ ജോസ് ജോസഫ്…

അമൽ നീരദിൻ്റെ സംവിധാനത്തിൽ 2012-ൽ പുറത്തിറങ്ങിയ ബാച്ച്‌ലർ പാർട്ടി ബോക്സ് ഓഫീസിൽ പരാജയമായിരുന്നെങ്കിലും, പിന്നീട് കട്ട് പദവി നേടിയ ചിത്രമായിരുന്നു. ഹോങ് കോങ്ങ് ചിത്രമായ “എക്സൈൽഡ്’ ൻ്റെ മലയാളം ആവിഷ്ക്കാരമായിരുന്നു ബാച്ച്ലർ പാർട്ടി.

അഞ്ച് പേരടങ്ങിയ സുഹൃത്തുകളുടെ ഗ്യാങ് രണ്ടും മൂന്നും പേരടങ്ങുന്ന രണ്ട് ഗ്യാങുകളായി പിരിയുന്നതും ഗൺഫൈറ്റുകളിൽ ഏർപ്പെടുന്നതുമായിരുന്നു എക്സൈൽഡിൻ്റെ പ്രമേയം.

ബാച്ച്ലർ പാർട്ടിയുടെ സ്പിരിച്ചത് സീക്വലാണ് അമൽ നീരദിൻ്റെ സംവിധാനത്തിൽ ചിത്രത്തിൻ്റെ രണ്ടാം ഭാഗമായി പുറത്തിറങ്ങിയ ബാച്ച്‌ലർ പാർട്ടി ഡ്യു’എക്‌സ്. ടോണി (ആസിഫ് അലി ), അയ്യപ്പൻ (കലാഭവൻ മണി ), ഗീവർഗീസ് (ഇന്ദ്രജിത് സുകുമാരൻ ) ,ബെന്നി (റഹ്മാൻ ), വിനായകൻ എന്നിവരായിരുന്നു 2012-ലെ ബാച്ച്‌ലർ പാർട്ടിയിൽ ഗ്യാങിലെ സുഹൃത്തുക്കൾ.

രണ്ടാം ഭാഗത്തിൽ സോണി (നസ്ലെൻ), ഡാനി (സൗബിൻ ഷാഹിർ ) സേവി (ശ്രീനാഥ് ഭാസി ) പപ്പൻ ( ഷറഫുദ്ദീൻ ), മമ്മു (ചന്തു സലിം കുമാർ) എന്നിവർ ഗ്യാങിലെ സുഹൃത്തുക്കളായെത്തുന്നു.ഒന്നാം ഭാഗത്തിൽ പൃഥ്വിരാജ് ചെയ്ത വേഷത്തിന് തുല്യമായ വേഷത്തിൽ എത്തുന്നത് ടൊവിനോ തോമസാണ്.

നസ്‌ലൻ കൊണ്ടോയി... എന്താപ്പോ ചെയ്യാ..."; ഞെട്ടിച്ച് അമൽ നീരദിന്റെ 'ബാച്ച്ലർ പാർട്ടി D'EUX'ഫസ്റ്റ്ലുക്ക്

ഒന്നാം ബാച്ച്ലർ പാർട്ടിയുടെ അതെ വൈബിലും പാറ്റേണിലുമാണ് പുതിയ ബാച്ച്ലർ പാർട്ടിയും ഒരുക്കിയിരിക്കുന്നത്. 2024 ഒക്ടോബറിൽ റിലീസ് ചെയ്ത അമൽ നീരദ് ചിത്രം ബോഗേയ്ൻവില്ലക്ക് ശേഷം ഈ ചിത്രത്തിലും കുഞ്ചാക്കോ ബോബൻ പ്രതിനായക വേഷത്തിൽ എത്തുന്നു.

‘വാളെടുക്കുന്നവൻ വാളാൽ ‘ എന്നായിരുന്നു ഒന്നാം ഭാഗത്തിൻ്റെ തുടക്കത്തിൽ എഴുതിക്കാണിച്ചിരുന്നത്.രണ്ടാം ഭാഗത്തിൽ അങ്ങനെയുള്ള ആപ്തവാക്യങ്ങൾ ഒന്നുമില്ല പ്രായപൂർത്തിയായവർക്ക് വേണ്ടിയുള്ള ചിത്രം ധാർമ്മിക മൂല്യങ്ങൾ ഉയർത്തിപ്പിടിക്കാനുള്ളതല്ലെന്നും വിനോദത്തിനു വേണ്ടി മാത്രമുള്ളതാണെന്നും തുടക്കത്തിലെ മുന്നറിയിപ്പ് നൽകുന്നുണ്ട്.

ദ്വയാർത്ഥ പ്രയോഗങ്ങൾ, ലഹരി ഉപയോഗം, രജീഷ വിജയൻ – ശ്രീനാഥ് ഭാസി, നസ്ലെൻ – ഹൻസിക കൃഷ്ണ ജോഡികളുടെ ചുംബന രംഗങ്ങൾ, ഐറ്റം ഡാൻസുകൾ, തുടങ്ങി പ്രായപൂർത്തിയായവർക്കു വേണ്ട വിഭവങ്ങളെല്ലാം ചിത്രത്തിൽ അമൽ നീരദ് ഒരുക്കിയിട്ടുണ്ട്.ഒന്നാം ഭാഗത്തിൻ്റെ പശ്ചാത്തലം ഇടുക്കിയും എറണാകുളവുമായിരുന്നെങ്കിൽ പുതിയ ചിത്രത്തിൻ്റെ പശ്ചാത്തലം ഫോർട്ട് കൊച്ചിയാണ്.

പൗളിയായി ജ്യോതിർമയി!! 'ബാച്ച്‌ലർ പാർട്ടി ദ്യു എക്സ് പോസ്റ്റർ പുറത്ത് | bachelor party duex poster | Madhyamam

അനാഥാലയം എന്ന നരകത്തിൽ തുടങ്ങി സാക്ഷാൽ നരകത്തിൻ്റെ ദൃശ്യങ്ങളിലാണ് ചിത്രം അവസാനിക്കുന്നത്.ടോണി എന്ന ബാലനെയും കൂട്ടി അഞ്ച് കുട്ടികൾ അനാഥാലയത്തിൽ നിന്നും രക്ഷപെടുന്ന ദൃശ്യങ്ങളോടെയാണ് ചിത്രത്തിൻ്റെ തുടക്കം.

20 വർഷങ്ങൾക്ക് ശേഷം അവർ കൊച്ചിയിലെ ഏറ്റവും വലിയ ഗുണ്ടാ ഗ്യാങായി മാറുന്നു. യുവഗായകനും ഗിറ്റാറിസ്റ്റുമായ മനു മാത്യൂസും (അരുൺ കുര്യൻ) ഭാര്യയും മകളും ഒരു കാർ അപകടത്തിൽ കൊല്ലപ്പെടുന്നു.കേരളത്തിൽ മുമ്പ് നടന്ന ഒരു ഗിറ്റാറിസ്റ്റിൻ്റെ അപകട മരണത്തോട് സാമ്യം തോന്നാമെങ്കിലും കഥ അവിടുന്ന് വഴി മാറുന്നു.

മകൻ്റെ അപകട മരണം ആസൂത്രിത കൊലപാതകമാണെന്ന് മനസ്സിലാക്കിയ അമ്മ അന്ന മാത്യൂസ് (നദിയ മൊയ്തു ) നിയമത്തിൻ്റെ വഴി നോക്കുന്നു. എതിരാളികൾ അതി ശക്തരായതിനാൽ അത് ഫലം കാണില്ലെന്ന് അവർ വൈകാതെ തിരിച്ചറിയുന്നു.

സഹായി സിമ്പിളിൻ്റെ (രജീഷ വിജയൻ) സഹായത്തോടെ അവർ ക്വൊട്ടേഷൻ ഗ്യാങിൻ്റെ സഹായം തേടുന്നു. ഡാനിയും കൂട്ടുകാരായ സേവിയും മമ്മുവും ഇതിനിടെ സോണിയിൽ നിന്നും പപ്പനിൽ നിന്നും വഴി തിരിഞ്ഞിരുന്നു.

കൊച്ചിയിൽ ഇവരുടെ ഗോഡ് ഫാദറായിരുന്ന ഗുരുവിൻ്റെ (ഷൈൻ ടോം ചാക്കോ ) സ്പാ ബിസിനസ്സിനോടുള്ള അഭിപ്രായ വ്യത്യാസമായിരുന്നു കാരണം.ഗുരുവിൻ്റെ ബിസിനസ്സിൻ്റെ ബുദ്ധികേന്ദ്രമായിരുന്നു നളിനി ( പാരീസ് ലക്ഷ്മി) .സോണിയും പപ്പനും ഗുരുവിനൊപ്പം തുടർന്നു.

യുവ ഗിറ്റാറിസ്റ്റിൻ്റെ മരണത്തിനു പിന്നിൽ സ്വർണ്ണ വ്യാപാരിയായ പ്രഭുവായിരുന്നു (കുഞ്ചാക്കോ ബോബൻ). തൃശൂരിലെ ഒരു സ്വർണ്ണ മുതലാളിയെ പോലെ ചാരിറ്റി പ്രവർത്തനങ്ങളിൽ തല്പരനാണ് പ്രഭു. സ്വർണ്ണക്കട ഉദ്ഘാടനത്തിനെത്തുന്ന നടിമാരെ കണ്ടാൽ ഇക്കിളിയാകും.

പ്രഭുവിനെ തീർക്കാനുള്ള ക്വൊട്ടേഷൻ അന്ന മാത്യൂസ് ഏൽപ്പിക്കുന്നത് ഡാനിയുടെ നേതൃത്വത്തിലുള്ള മൂവർ സംഘത്തെയാണ്. അവർ അന്ന മാത്യൂസിൻ്റെ വീട്ടിൽ താമസമാക്കുന്നു. വൈകാതെ സോണിയും പപ്പനും അയൽ വീട്ടിൽ താമസിക്കാനെത്തുന്നു

Bachelor party D'EUX movie poster unveiled | Mathrubhumi

ആ വീട്ടിലെ അമ്മ പോളി അബ്ദുള്ളയുടെ (ജ്യോതിർമയി ) ഇൻസ്റ്റാ റീൽസിൻ്റെ റീച്ച് കൂട്ടാനും മകൾ കരോളിനെ ( ഹൻസിക കൃഷ്ണ) നൃത്തം പഠിപ്പിക്കാനുമായിരുന്നു ഇവരുടെ വരവ്. അന്ന മാത്യൂസ് ഏൽപ്പിച്ച ദൌത്യം പൂർത്തീകരിക്കാൻ ഡാനിയ്ക്കും സംഘത്തിനും സാധിക്കുമോ?

ഇവരുടെ ദൌത്യത്തിന് സോണിയും പപ്പനും വിലങ്ങുതടിയാകുമോ? അഞ്ചു പേരും വീണ്ടും ഒന്നിക്കുമോ അതോ തമ്മിൽ പോരാടി നശിക്കുമോ? ഈ ചോദ്യങ്ങൾക്കാണ് രണ്ടാം പകുതി ഉത്തരം നൽകുന്നത്.ഇതിനിടയിൽ സിമ്പിളും സേവിയും തമ്മിലും സോണിയും കരോളിനും തമ്മിലുമുള്ള പ്രണയം ഉപകഥകളായി കടന്നു വരുന്നുണ്ടെങ്കിലും അതെല്ലാം ഉപരിപ്ലവമാണ്.

ചിത്രത്തിൻ്റെ ഒന്നാം പകുതി കൂട്ടുകാർ തമ്മിലുള്ള വൈകാരിക അടുപ്പവും പിണക്കങ്ങളും കാണിക്കുന്നു. രണ്ടാം പകുതി തുടർച്ചയായ ഗൺഫൈറ്റുകളിലേക്കും സംഘർഷങ്ങളിലേക്കും കടക്കുകയാണ്.കഥയും കഥാപാത്രങ്ങളും കാലഘട്ടവും മാറിയെങ്കിലും ബാച്ച്‌ലർ പാർട്ടി ഒന്നാം ഭാഗത്തിൽ നിന്നും മേക്കിംഗിൽ കാര്യമായ മാറ്റമില്ല. കഥാഗതി ഏറെക്കുറെ പ്രവചനീയമാണ്.

അഞ്ചുപേരിൽ മൂന്ന് പേർക്കും പ്രണയമുണ്ട്. കരോളിൻ്റെ അമ്മയോട് പപ്പന് തോന്നുന്ന പ്രണയമൊന്നും വിശ്വസനീയമല്ല. അമൽ നീരദാണ് തിരക്കഥ എഴുതിയിരിക്കുന്നത്. തിരക്കഥ ദുർബ്ബലമാണ് ഒന്നാം പകുതി താരതമ്യേന മികച്ചതാണെങ്കിലും രണ്ടാം പകുതി പാളി. കഥാപാത്രങ്ങൾക്കൊന്നും ആഴമോ ഇഴയടുപ്പമോ ഇല്ല.

സന്തോഷ് എച്ചിക്കാനവും ഉണ്ണി ആറും ചേർന്ന് തയ്യാറാക്കിയ ഒന്നാം ഭാഗത്തിൻ്റെ തിരക്കഥയായിരുന്നു കൂടുതൽ മികച്ചത്.ഉണ്ണി ആറാണ് സംഭാഷണങ്ങൾ എഴുതിയിരിക്കുന്നത്. ലാലിൻ്റെ കഥാപാത്രം പറയുന്ന നരകം – പിശാച് തമാശയൊക്കെ അസ്ഥാനത്താണ്. സൗബിൻ ഷാഹിർ അവതരിപ്പിക്കുന്നത്, ഒറിജിനലിലെ അയ്യപ്പന് സമാനമായ, പക്വതയുള്ള ഡാനി എന്ന കഥാപാത്രത്തേയാണ്.

ഡാനിയെ സൗബിൻ ഭംഗിയായി അവതരിപ്പിച്ചു.നസ്ലെൻ്റെ സോണിയ്ക്ക് ആദ്യ പകുതിയിൽ കാര്യമായൊന്നും ചെയ്യാനില്ല.എന്നാൽ ക്ലൈമാക്സിൽ കഥ സോണിയിലേക്ക് തിരിയുന്നതോടെ നസ്ലെൻ തിളങ്ങി.ഷറഫുദ്ദീൻ്റെ തമാശകളാണ് പ്രേക്ഷകരെ ആകർഷിയ്ക്കുന്നത്. ചന്തു സലിംകുമാറിൻ്റെ മമ്മു വ്യത്യസ്തമായ കഥാപാത്രമാണ്.ശ്രീ നാഥ് ഭാസിയുടെ സേവി താരതമ്യേന ശാന്തനാണ്.

കഥാപാത്രങ്ങളിൽ ഏറ്റവും ശ്രദ്ധേയം കുഞ്ചാക്കോ ബോബൻ അവതരിപ്പിച്ച പ്രഭു എന്ന വില്ലനാണ്. അല്പത്തരം, ശൃംഗാരം, ക്രൂരത എന്നിങ്ങനെ പല ഷെയ്ഡുകളുള്ള കഥാപാത്രമാണ് പ്രഭു. കഥാപാത്രത്തിൻ്റെ വ്യത്യസ്ത ഭാവങ്ങൾ കുഞ്ചാക്കോ ബോബൻ ഭംഗിയായി അവതരിപ്പിച്ചു.

നദിയ മൊയ്തുവും രജിഷ വിജയനും വേഷങ്ങൾ ഭംഗിയായി ചെയ്തു. ആദ്യ ഭാഗത്തിൽ പൃഥ്വിരാജ് ചെയ്ത വേഷത്തിന് സമാനമാണ് ടൊവിനോ അവതരിപ്പിക്കുന്ന മുസ്തഫ എന്ന കഥാപാത്രം. ആക്ഷന് വേണ്ടി മാത്രമുള്ള കഥാപാത്രമാണിത്.ഷൈൻ ടോം ചാക്കോയുടെ ഗുരു എന്ന വേഷവും മികച്ചതാണ്.

വൻ താരനിരയുമായി 'ബാച്ച്‌ലർ പാർട്ടി ഡ്യൂഎക്സ് നാളെ തിയേറ്ററുകളിലേക്ക് | bachelor party deux, featuring a star-studded cast, hits theaters tomorrow

നടനും ബിജെപി നേതാവുമായ കൃഷ്ണകുമാറിൻ്റെ മകളും സോഷ്യൽ മീഡിയ താരവുമായ ഹൻസിക കൃഷ്ണയുടെ അരങ്ങേറ്റ ചിത്രം കൂടിയാണിത്. എന്നാൽ ഹൻസികയ്ക്ക് കാര്യമായൊന്നും ചെയ്യാനില്ല.

തിളങ്ങി നിൽക്കുന്ന ഒട്ടേറെ യുവനടന്മാർ ഒന്നിച്ചഭിനയിക്കുന്ന മൾട്ടി സ്റ്റാർ ചിത്രമാണ് ബാച്ച്ലർ പാർട്ടി ഡ്യു’എക്‌സ് എന്നാൽ അതിൻ്റെ മെച്ചം ചിത്രത്തിൽ കാണാനില്ല.

ക്രിസ്റ്റോ സേവ്യറിൻ്റെ സംഗീതവും അപ്പു പ്രഭാകറിൻ്റെ ഛായാഗ്രഹണവും മികച്ചതാണ്.വിവേക് ഹർഷനാണ് എഡിറ്റർ.അമല്‍ നീരദ് പ്രൊഡക്ഷന്‍സിന്റെ ബാനറില്‍ ജ്യോതിര്‍മയിയും അന്‍വര്‍ റഷീദ് എന്റര്‍ടെയ്ന്‍മെൻ്റെസിൻ്റെ ബാനറില്‍ അന്‍വര്‍ റഷീദും ഫഹദ് ഫാസില്‍ ആന്റ് ഫ്രൻഡ്സിന്റെ ബാനറില്‍ നസ്‌റിയ നാസിമും ചേര്‍ന്നാണ് ബാച്ചിലര്‍ പാര്‍ട്ടി നിർമ്മിച്ചിരിക്കുന്നത്. 132 മിനിറ്റാണ് ചിത്രത്തിൻ്റെ ദൈർഘ്യം.

——————————————————–

(കേരള കാർഷിക സർവ്വകലാശാലയുടെ തൃശൂർ വെളളാനിക്കര കാർഷിക കോളേജ് മുൻ പ്രൊഫസറാണ് ലേഖകൻ)
——————————————————————-
കൂടുതല്‍ വാര്‍ത്തകള്‍ക്കായി
http://www.newsboardindia.com
സന്ദര്‍ശിക്കുക

കൂടുതൽ വാർത്തകൾക്ക് www.newsboardindia.com സന്ദർശിക്കുക

Leave a Reply

Your email address will not be published. Required fields are marked *

Related News

Latest News