നെയ്റോബി : മതത്തിന്‍റെയും ആത്മീയതയുടെയും പേരിൽ വ്യാജ പ്രവാചകരും തീവ്രവാദ ഗ്രൂപ്പുകളും നടത്തിയ ചൂഷണങ്ങളും, അനുയായികളെ പട്ടിണിക്കിട്ടും വിഷം കൊടുത്തും കൂട്ടക്കൊല ചെയ്ത നടുക്കുന്ന ചരിത്ര സംഭവങ്ങളും ലോകമെമ്പാടും വീണ്ടും വലിയ ചർച്ചയാകുന്നു.
കെനിയയിലെ ശാഖാഹോള വനത്തിൽ യേശുവിനെ കാണിച്ചുനൽകാമെന്ന് വിശ്വസിപ്പിച്ച് അനുയായികളെ പട്ടിണിക്കിട്ട് കൊലപ്പെടുത്തിയ പാസ്റ്റർ പോൾ മക്കെൻസിക്ക് മൊംബാസ ഹൈക്കോടതി 200 വർഷത്തെ തടവുശിക്ഷ വിധിച്ചതോടെയാണ് ഇത്.ഇയാളുടെ 28 അനുയായികൾക്ക് 10 വർഷം മുതൽ 100 വർഷം വരെ തടവും വിധിച്ചിട്ടുണ്ട്.
ഗുഡ് ന്യൂസ് ഇൻ്റർനാഷണൽ ചർച്ച് തലവനായ ഇയാൾ 190 കുട്ടികൾ അടക്കം 191 പേരുടെ ദാരുണ മരണത്തിനാണ് കാരണക്കാരനായത്. ലോകാവസാനത്തിന് മുൻപ് യേശുവിനെ കാണാൻ മരണം വരെ ഉപവസിക്കാൻ അനുയായികളോട് ആവശ്യപ്പെട്ടു. ഉപവാസം അനുഷ്ഠിക്കാൻ വിസമ്മതിച്ച കുട്ടികളെ ക്രൂരമായി മർദ്ദിക്കുകയും മുറികളിൽ പൂട്ടിയിടുകയും ചെയ്തു.
ഈ വനമേഖലയിൽ നടത്തിയ പരിശോധനകളിൽ അഞ്ഞൂറിലധികം പേരുടെ മൃതദേഹാവശിഷ്ടങ്ങളും 400-ലേറെ കുഴിമാടങ്ങളുമാണ് പൊലീസ് കണ്ടെത്തിയത്. വിദ്യാഭ്യാസമെന്നും ചികിത്സയെന്നും ഉള്ളവയെല്ലാം തിന്മയാണെന്ന് വിശ്വസിപ്പിച്ചായിരുന്നു ഇയാളുടെ ഗൂഢാലോചന പ്രചാരണം.
പോൾ മക്കെൻസി 2003-ലാണ് സഭ സ്ഥാപിക്കുന്നത്. ടിവി ചാനലിലൂടെയും പ്രസംഗങ്ങളിലൂടെയും ഇയാൾ ഗൂഢാലോചന സിദ്ധാന്തങ്ങൾ പ്രചരിപ്പിച്ചു. വിദ്യാഭ്യാസം, ചികിത്സ, ഡിജിറ്റൽ തിരിച്ചറിയൽ കാർഡുകൾ എന്നിവയെല്ലാം തിന്മയാണെന്ന് ഇയാൾ അനുയായികളെ വിശ്വസിപ്പിച്ചു. 2019-ൽ പള്ളി അടച്ചുപൂട്ടിയ ശേഷം അനുയായികളുമായി വനത്തിലേക്ക് മാറിയാണ് ഇയാൾ ഈ ക്രൂരതകൾ നടത്തിയത്.
അന്വേഷണത്തിൽ പൊലീസും കോടതിയും കണ്ടെത്തിയ കൂടുതൽ നിർണായക വിവരങ്ങൾ ഞെട്ടിക്കുന്നതാണ്. ശാഖാഹോള വനത്തിൽ നടത്തിയ വ്യാപകമായ പരിശോധനകളിൽ അഞ്ഞൂറിലധികം പേരുടെ മൃതദേഹാവശിഷ്ടങ്ങളാണ് അന്വേഷണ സംഘം കണ്ടെടുത്തത്. കൂട്ടക്കുഴിമാടങ്ങളിൽ നിന്ന് ലഭിച്ച അസ്ഥികളും ശരീരഭാഗങ്ങളും ഡി.എൻ.എ പരിശോധനയ്ക്ക് വിധേയമാക്കിയാണ് ഇരകളെ തിരിച്ചറിഞ്ഞത്.
പട്ടിണി കിടന്ന് അവശരായ കുട്ടികൾ ഭക്ഷണം കഴിക്കാനോ മോഷ്ടിക്കാനോ ശ്രമിച്ചാൽ അവരെ ഇരുമ്പ് ദണ്ഡ് ഉപയോഗിച്ച് ക്രൂരമായി മർദ്ദിച്ചിരുന്നു. ഇതിനുപുറമേ, മുറികളിൽ അടച്ചുപൂട്ടിയും ശ്വാസം മുട്ടിച്ചും ചിലരെ ജീവനോടെ കുഴിച്ചുമൂടിയും കൊലപ്പെടുത്തിയതായി പോസ്റ്റ്‌മോർട്ടം റിപ്പോർട്ടുകൾ സ്ഥിരീകരിച്ചു.
ഗർഭിണികളായ സ്ത്രീകളെയും നവജാത ശിശുക്കളെയും പ്രത്യേക മുറികളിൽ പാർപ്പിച്ചിരുന്നു. കുഞ്ഞുങ്ങൾക്ക് മുലപ്പാൽ നൽകുന്നത് വിലക്കിയതിനെത്തുടർന്ന് ദിവസങ്ങൾക്കകം നിരവധി നവജാത ശിശുക്കൾ മരണത്തിന് കീഴടങ്ങി.
സഭാംഗങ്ങളോട് തങ്ങളുടെ സ്വത്തുക്കളും പണവും വിറ്റ് പള്ളിക്ക് നൽകാൻ മക്കെൻസി ആവശ്യപ്പെട്ടിരുന്നു. ലക്ഷക്കണക്കിന് രൂപയും ആസ്തികളും കൈക്കലാക്കിയ ശേഷമാണ് ഇയാൾ അനുയായികളെ കാട്ടിലേക്ക് കൊണ്ടുപോയി പാർപ്പിച്ചത്.
പ്രതിയുടെ പ്രവൃത്തികൾ മതത്തിന്‍റെ പേരിലുള്ള അങ്ങേയറ്റത്തെ ക്രൂരതയാണെന്നും, നിരപരാധികളായ കുട്ടികളുടെ ജീവിയെടുത്ത ഇത്തരം കുറ്റകൃത്യങ്ങൾക്ക് പരമാവധി ശിക്ഷ നൽകേണ്ടതുണ്ടെന്നും മൊംബാസ ഹൈക്കോടതി വ്യക്തമാക്കി.
ചരിത്രത്തിൽ വിശ്വാസികളെ വഞ്ചിച്ച് ഇത്തരത്തിലുള്ള കൂട്ടമരണങ്ങൾക്ക് കാരണമായ സമാനമായ നിരവധി ദുരന്തങ്ങൾ ഉണ്ടായിട്ടുണ്ട്. 1978-ൽ ഗയാനയിലെ ജോൺസ്ടൗണിൽ ജിം ജോൺസ് എന്ന മതനേതാവിന്‍റെ ആഹ്വാനപ്രകാരം സയനൈഡ് കഴിച്ച് 918 പേരാണ് കൂട്ടത്തോടെ ജീവനൊടുക്കിയത്.
1993-ൽ അമേരിക്കയിലെ ടെക്സാസിലുള്ള വാക്കോയിൽ ഡേവിഡ് കോറെഷിൻ്റെ നേതൃത്വത്തിലുള്ള സംഘവും സുരക്ഷാ സേനയുമായുള്ള ഏറ്റുമുട്ടലിൽ കുഞ്ഞുങ്ങളടക്കം 76 പേർ വെന്തുമരിച്ചു. 2000-ൽ ഉഗാണ്ടയിൽ ദൈവത്തിന്‍റെ പത്തു കൽപനകളുടെ പുനഃസ്ഥാപനത്തിനായി പ്രവർത്തിച്ച പ്രസ്ഥാനത്തിന്‍റെ നേതാക്കൾ അഞ്ഞൂറിലധികം അനുയായികളെ പള്ളിയിലിട്ട് തീവെച്ചു കൊന്നു.
കൂടാതെ, സ്വിറ്റ്സർലൻഡിലെ സോളാർ ടെമ്പിൾ ഓർഡറും, അമേരിക്കയിലെ ഹേവൻസ് ഗേറ്റ് കൾട്ടുമെല്ലാം സമാനമായ രീതിയിൽ നൂറുകണക്കിന് അനുയായികളുടെ കൂട്ടആത്മഹത്യയ്ക്കും കൂട്ടക്കൊലയ്ക്കും കാരണമായിട്ടുണ്ട്.
ആഫ്രിക്കൻ രാജ്യങ്ങളിൽ ഇത്തരത്തിലുള്ള മതതീവ്രവാദ ഗ്രൂപ്പുകളുടെ ഭീഷണി ഇന്നും ശക്തമാണ്. നൈജീരിയയിൽ പാശ്ചാത്യ വിദ്യാഭ്യാസത്തെ എതിർത്ത് സ്കൂളുകൾക്കും പള്ളികൾക്കും നേരെ ആക്രമണം അഴിച്ചുവിട്ട ബോക്കോ ഹറാമും, ഉഗാണ്ടയിൽ കുട്ടികളെ ബലമായി പടയാളികളാക്കി ഭീകരത പരത്തിയ ലർഡ്സ് റെസിസ്റ്റൻസ് ആർമിയും ഇതിന് ഉദാഹരണങ്ങളാണ്.
ദാരിദ്ര്യവും സാമൂഹിക അരക്ഷിതാവസ്ഥയും മുതലെടുത്ത് അത്ഭുത രോഗശാന്തികളും ലോകാവസാന ഭയവും കാണിച്ച് ജനങ്ങളുടെ പണവും ജീവനും തട്ടിയെടുക്കുന്ന ഇത്തരം വ്യാജ പ്രവാചകരും കൾട്ടുകളും ഇന്നും ലോകത്തിന് വലിയൊരു സുരക്ഷാ ഭീഷണിയാണ് ഉയർത്തുന്നത്.
