കൊച്ചി : കരിമണൽ ഖനന കമ്പനിയായ സി എം അർ എൽ -എക്സാലോജിക് സാമ്പത്തിക ഇടപാടിൽ പ്രാഥമിക അന്വേഷണം മാത്രം നടത്തി കേസ് അവസാനിപ്പിക്കാനുള്ള വിജിലൻസ് നീക്കം ഹൈക്കോടതി തള്ളി.
ഈ വിഷയത്തിൽ വിജിലൻസ് ഡയറക്ടറുടെ പ്രാഥമിക പരിശോധനാ റിപ്പോർട്ട് റദ്ദാക്കിയ കോടതി, അഴിമതി നിരോധന നിയമപ്രകാരം എഫ്.ഐ.ആർ രജിസ്റ്റർ ചെയ്ത് കേസ് എടുക്കാൻ ഉത്തരവിട്ടു. അഡ്വ.കെ എം .ഷാജഹാൻ സമർപ്പിച്ച ഹർജിയിൽ ആണ് ഉത്തരവ്. വി. എസ്. അച്യുതാനന്ദൻ മുഖ്യമന്ത്രിയായിരുന്നപ്പോൾ അഡീഷണൽ സെക്രട്ടറിയായിരുന്നു ഷാജഹാൻ.
ഈ വിധി മുഖ്യമന്ത്രി പിണറായി വിജയൻ, മകൾ വീണ വിജയൻ, മുൻ മന്ത്രി പി.എ. മുഹമ്മദ് റിയാസ് എന്നിവർ ഉൾപ്പെടെയുള്ളവർക്ക് ഉത്തരവ് വലിയ തിരിച്ചടിയാവുകയാണ്.
കേസിൽ ഡി.ജി.പി, എഫ്.ഐ.ആർ രജിസ്റ്റർ ചെയ്യാതെ പ്രാഥമിക അന്വേഷണം മാത്രം നടത്തിയത് നിയമപരമല്ലെന്ന വാദം കോടതി അംഗീകരിച്ചു. ഇടപാടിൽ പ്രഥമദൃഷ്ട്യാ ക്രമക്കേടുണ്ടെന്ന നിരീക്ഷണമാണ് ഹൈക്കോടതി വിധിയിലൂടെ ചൂണ്ടിക്കാണിക്കപ്പെടുന്നത്.
ഇനി അന്വേഷണ ഏജൻസിയുടെ അടുത്ത നടപടി എന്തായിരിക്കും എന്നത് നിർണായകമാണ്. ഹൈക്കോടതി ഉത്തരവിന്‍റെ അടിസ്ഥാനത്തിൽ വിജിലൻസ് ഉടൻ തന്നെ ഔദ്യോഗികമായി എഫ്.ഐ.ആർ രജിസ്റ്റർ ചെയ്യേണ്ടിവരും. തുടർന്ന് പ്രതി ചേർക്കപ്പെട്ട പ്രമുഖ വ്യക്തികളുടെ മൊഴിയെടുക്കലും തെളിവ് ശേഖരണവും അടക്കമുള്ള നടപടികളിലേക്ക് അന്വേഷണസംഘം കടക്കേണ്ടിവരും.
സി.പി.എമ്മിനെയും സംസ്ഥാന സർക്കാരിനെയും സംബന്ധിച്ച് രാഷ്ട്രീയമായി വലിയ പ്രതിസന്ധിയാണ് ഈ വിധി സൃഷ്ടിക്കുന്നത്. കേസിനെ നിയമപരമായും രാഷ്ട്രീയമായും നേരിടുമെന്നാണ് സി പി എം കേന്ദ്രങ്ങളുടെ നിലപാട്. വിജിലൻസ് അന്വേഷണം സ്വാഭാവിക നിയമനടപടിയാണെന്നും സർക്കാരിന് മറച്ചുവെക്കാൻ ഒന്നുമില്ലെന്നും ഭരണപക്ഷവും വ്യക്തമാക്കുന്നു.
മറുഭാഗത്ത് എൻഫോഴ്സ്മെന്റ് ഡയറക്ടറേറ്റിന്‍റെ (ഇ.ഡി) അന്വേഷണത്തിന് ഈ വിധി പുതിയ ഊർജ്ജം നൽകും. നേരത്തെ തന്നെ സാമ്പത്തിക ഇടപാടുകളിൽ ഇ.ഡി അന്വേഷണം നടത്തിവരികയായിരുന്നു.
വിജിലൻസ് അഴിമതി നിരോധന നിയമപ്രകാരം എഫ്.ഐ.ആർ രജിസ്റ്റർ ചെയ്യുന്നതോടെ, കള്ളപ്പണം വെളുപ്പിക്കൽ തടയൽ നിയമപ്രകാരമുള്ള ഇ.ഡി അന്വേഷണത്തിന് നിയമപരമായ അടിത്തറ കൂടുതൽ ശക്തമാകും.
നിയമപോരാട്ടം അടുത്ത ഘട്ടത്തിലേക്ക് കടക്കുമ്പോൾ ഹൈക്കോടതി വിധി ചോദ്യം ചെയ്ത് സുപ്രീം കോടതിയെ സമീപിക്കാനുള്ള സാധ്യതയും തള്ളിക്കളയാനാവില്ല. എന്നിരുന്നാലും, വരും ദിവസങ്ങളിൽ കേസിന്റെ തുടർനടപടികൾ കേരള രാഷ്ട്രീയത്തിൽ വൻ കൊടുങ്കാറ്റ് ഉയർത്തുമെന്ന് ഉറപ്പാണ്.
ഇഡിയുടെ കത്തിൽ കേസെടുക്കുന്നതിൽ സർക്കാർ തുടക്കംമുതലേ വിമുഖത കാണിച്ചിരുന്നു. ഇഡി റിപ്പോർട്ടിൽ യുഡിഎഫ് നേതാക്കളുടെയും ആഭ്യന്തര മന്ത്രി അടക്കമുള്ളവരുടെയും പേരുകൾ പരാമർശിക്കുന്ന പശ്ചാത്തലത്തിലാണ് ഈ വിമുഖതയെന്നായിരുന്നു ആക്ഷേപം.
