തിരുവനന്തപുരം : സിഎംആർഎൽ-എക്സാലോജിക് മാസപ്പടി കേസിൽ സിഎംആർഎൽ സ്ഥാപക എംഡി ശശിധരൻ കർത്തയുടെ ഡയറിക്കുറിപ്പുകൾ പുറത്തുവന്നതിനെ തുടർന്ന് കേരള രാഷ്ട്രീയത്തിലും ബിജെപിക്കുള്ളിലും വലിയ തർക്കങ്ങൾ രൂപപ്പെടുന്നു.
എൻഫോഴ്സ്മെന്റ് ഡയറക്ടറേറ്റും ഗൗരവകരമായ സാമ്പത്തിക കുറ്റകൃത്യങ്ങൾ അന്വേഷിക്കുന്ന എസ്എഫ്ഐഒയും കോടതിയിൽ സമർപ്പിച്ച രേഖകളുടെ ഭാഗമായുള്ള ഡയറി പേജുകളാണ് ബിജെപി സംസ്ഥാന വൈസ് പ്രസിഡന്റ് ഷോൺ ജോർജ് പുറത്തുവിട്ടത്.
ഇതിൽ മുൻ കേന്ദ്ര മന്ത്രിയും എം എൽ എയുമായ വി. മുരളീധരൻ്റെ പേരു വന്നത് ബി ജെ പി യിൽ ആഭ്യന്തര കലഹത്തിന് വഴിയൊരുക്കി. മുരളീധരനെ സംരക്ഷിച്ചുകൊണ്ട് സംസ്ഥാന പ്രസിഡൻ്റ് രാജീവ് ചന്ദ്രശേഖർ തന്നെ രംഗത്തിറങ്ങിയതാണ് ഏററവും പുതിയ സംഭവവികാസം.
മുഖ്യമന്ത്രി പിണറായി വിജയന്റെ മകൾ വീണ വിജയന്റെ ഉടമസ്ഥതയിലുള്ള എക്സാലോജിക് കമ്പനിയും സിഎംആർഎല്ലും തമ്മിൽ നടന്ന സാമ്പത്തിക ഇടപാടുകളിൽ കേന്ദ്ര ഏജൻസികൾ അന്വേഷണം നടത്തിവരികയാണ്. ഈ കേസിൽ അഴിമതി നിരോധന നിയമപ്രകാരം വിജിലൻസ് അന്വേഷണം നടത്താതെ സംസ്ഥാന സർക്കാർ ക്രൈംബ്രാഞ്ച് പ്രാഥമിക അന്വേഷണത്തിന് മാത്രം ഉത്തരവിട്ടത് എൽഡിഎഫ്-യുഡിഎഫ് ഒത്തുകളിയുടെ ഭാഗമാണെന്ന് ബിജെപി ആരോപിച്ചിരുന്നു.
തുടർന്ന്, സിഎംആർഎല്ലിൽ നിന്ന് ഭരണ-പ്രതിപക്ഷ നേതാക്കൾ പണം കൈപ്പറ്റിയതിന്റെ തെളിവെന്ന നിലയിലാണ് ശശിധരൻ കർത്തയുടെ ഡയറിത്താളുകൾ ഷോൺ ജോർജ് മാധ്യമങ്ങൾക്ക് മുന്നിൽ വെളിപ്പെടുത്തിയത്. ഈ ഡയറിയിൽ ഭരണ-പ്രതിപക്ഷങ്ങളിലെ മുൻനിര നേതാക്കളുടെ പേരുകൾക്കൊപ്പം “മിസ്റ്റർ മുരളീധരൻ ബിജെപി” എന്ന പേരിൽ 3 ലക്ഷം രൂപ നൽകിയതായി രേഖപ്പെടുത്തിയിരുന്നത് ബിജെപിയെ കടുത്ത പ്രതിരോധത്തിലാക്കി. ഡയറിയിലെ വിവരങ്ങൾ പുറത്തുവിട്ടതോടെ പാർട്ടിയിലെ മുതിർന്ന നേതാവായ വി. മുരളീധരന്റെ പേര് ഇതിലേക്ക് വലിച്ചിഴക്കപ്പെടുകയും പാർട്ടിയിൽ അമർഷം പുകയുകയും ചെയ്തു.
പത്രസമ്മേളനത്തിൽ സംസാരിച്ച ഷോൺ ജോർജ്, എക്സാലോജിക് കേസിൽ യഥാർത്ഥ അഴിമതിക്കാരെ സംരക്ഷിക്കാൻ എൽഡിഎഫും യുഡിഎഫും തമ്മിൽ പരസ്പര ധാരണയുണ്ടെന്ന് ആരോപിച്ചു. കർത്തയുടെ ഡയറിയിൽ യുഡിഎഫ്, എൽഡിഎഫ് പ്രമുഖരുടെ പേരുകളും കൈപ്പറ്റിയ തുകയും കൃത്യമായി രേഖപ്പെടുത്തിയിട്ടുണ്ട്.
അതിനാൽ വിജിലൻസ് അന്വേഷണം പ്രഖ്യാപിച്ചാൽ ഇരു മുന്നണിയിലെയും പ്രമുഖർ കുടുങ്ങുമെന്നതിനാലാണ് സംസ്ഥാന ആഭ്യന്തര വകുപ്പ് എസ്ഐടിയെ വച്ച് കേസ് ഒതുക്കിതീർക്കാൻ ശ്രമിക്കുന്നതെന്നും അദ്ദേഹം വാദിച്ചു. കേസ് പൂർണ്ണമായും സിബിഐക്ക് കൈമാറണമെന്നതായിരുന്നു അദ്ദേഹത്തിന്റെ പ്രധാന ആവശ്യം.
എന്നാൽ, പത്രസമ്മേളനത്തിനിടയിൽ ബിജെപി നേതാവിന്റെ പേര് ഉയർന്നുവന്നപ്പോൾ, ബിജെപിയിൽ മറ്റ് മുരളീധരന്മാരും ഉണ്ടെന്നും താൻ ഉദ്ദേശിച്ച രേഖകളിൽ പാർട്ടിയെ ബാധിക്കുന്ന തരത്തിൽ ഒന്നുമില്ലെന്നുമായിരുന്നു ഷോൺ ജോർജിൻ്റെ വിശദീകരണം. താൻ ഉദ്ദേശിച്ചത് സിപിഎമ്മിൻ്റെയും കോൺഗ്രസിൻ്റെയും അഴിമതി പുറത്തുകൊണ്ടുവരാൻ മാത്രമാണെന്നും അദ്ദേഹം വ്യക്തമാക്കി.
വിവാദത്തിൽ വി. മുരളീധരന് പൂർണ്ണ പിന്തുണ പ്രഖ്യാപിച്ചുകൊണ്ട് രാജീവ് ചന്ദ്രശേഖർ ഫേസ് ബുക്കിൽ കുറിപ്പിടുകയായിരുന്നു. എക്സാലോജിക് തട്ടിപ്പും അഴിമതി നിരോധന നിയമത്തിലെ സെക്ഷൻ 13-ൻ്റെ ലംഘനവുമാണ് കേസിന്റെ കാതൽ എന്ന് അദ്ദേഹം ഓർമ്മിപ്പിച്ചു. സെക്ഷൻ 13 പ്രകാരം 10 വർഷത്തിലധികം തടവ് ശിക്ഷ ലഭിക്കാവുന്ന കുറ്റമായതിനാൽ ബിഎൻഎസ്എസ് 173(3) വകുപ്പ് പ്രകാരം പ്രാഥമിക അന്വേഷണം ആവശ്യമില്ലെന്നും ഉടൻ എഫ്ഐആർ രജിസ്റ്റർ ചെയ്യണമെന്നും അദ്ദേഹം വ്യക്തമാക്കി.
എൻഫോഴ്സ്മെൻ്റ് ഡയറക്ടറേറ്റിന്റെ വെളിപ്പെടുത്തലുകളിൽ ഇടപെടാൻ അധികാരമില്ലാത്ത സംസ്ഥാന ആഭ്യന്തര വകുപ്പ് എസ്ഐടി രൂപീകരിച്ചത് കേസ് അട്ടിമറിക്കാനാണ്. മുതിർന്ന കോൺഗ്രസ്, മുസ്ലിം ലീഗ് നേതാക്കൾ ഉൾപ്പെട്ടിട്ടുള്ളതിനാലാണ് വിജിലൻസ് അന്വേഷണത്തിന് ഉത്തരവിടാത്തതെന്നും സിപിഎമ്മും കോൺഗ്രസും “രണ്ടല്ല, ഒന്നാണ്” എന്നും അദ്ദേഹം കുറ്റപ്പെടുത്തി.
പ്രസ്തുത സംഭവവികാസങ്ങൾ നടക്കുമ്പോൾ മുരളീധരൻ മന്ത്രിയോ എംപിയോ എംഎൽഎയോ ആയിരുന്നില്ലെന്നും ആരോപണങ്ങൾ അദ്ദേഹം തള്ളിക്കളഞ്ഞിട്ടുണ്ടെന്നും പാർട്ടി മുരളീധരനൊപ്പം തന്നെയാണെന്നും രാജീവ് ചന്ദ്രശേഖർ വ്യക്തമാക്കി. എക്സാലോജിക് തട്ടിപ്പിൽ നിന്ന് ജനശ്രദ്ധ തിരിച്ചുവിടാൻ സിപിഎമ്മും കോൺഗ്രസും നടത്തുന്ന ബോധപൂർവമായ ശ്രമത്തിന്റെ ഭാഗമായാണ് മുരളീധരന്റെ പേര് ഈ വിവാദത്തിലേക്ക് വലിച്ചിഴയ്ക്കുന്നതെന്നും ബിജെപി വ്യക്തമാക്കി.
