ന്യൂഡൽഹി : രാജ്യത്തെ ഇന്നത്തെ സാമൂഹിക-സാമ്പത്തിക അന്തരീക്ഷം വലിയൊരു മാറ്റത്തിനും അതോടൊപ്പം കടുത്ത അസ്വസ്ഥതകൾക്കും സാക്ഷ്യം വഹിക്കുകയാണെന്ന് ബ്ലൂംബെർഗ് എന്ന ഇംഗ്ലീഷ് മാധ്യമത്തിൽ വന്ന ലേഖനത്തിൽ വിലയിരുത്തൽ.
ഒരു വശത്ത് രാജ്യത്തെ ശതകോടീശ്വരന്മാർ തങ്ങളുടെ സാമ്രാജ്യങ്ങൾ വ്യാപിപ്പിക്കാനും സ്വാധീനം ഉറപ്പിക്കാനും പരസ്പരം കടുത്ത മത്സരത്തിലും യുദ്ധത്തിലുമാണ്. മറുവശത്ത്, ഭാവിയെക്കുറിച്ച് അനിശ്ചിതത്വവും നിരാശയും നിറഞ്ഞ യുവതലമുറ വലിയ രോഷത്തിലാണ്.- ബ്ലൂംബെർഗ് അഭിപ്രായപ്പെടുന്നു
വളർന്നുവരുന്ന ഈ സാമ്പത്തിക അസമത്വവും തൊഴിലില്ലായ്മയും രാജ്യത്തിന്റെ ജനാധിപത്യത്തിനും സാമൂഹിക അന്തരീക്ഷത്തിനും വലിയ വെല്ലുവിളിയാണ് ഉയർത്തുന്നത്. ഇന്ത്യയിലെ യുവജനങ്ങളുടെ പ്രധാന രോഷത്തിന് കാരണം രൂക്ഷമായ തൊഴിലില്ലായ്മയും ഗുണനിലവാരമുള്ള അവസരങ്ങളുടെ അഭാവവുമാണ്.
രാജ്യത്തെ ബിരുദധാരികളായ വലിയൊരു വിഭാഗം യുവാക്കൾക്ക് അനുയോജ്യമായ ജോലികൾ ലഭിക്കുന്നില്ല. വ്യാവസായിക നിർമ്മാണ മേഖല പ്രതീക്ഷിച്ച രീതിയിൽ വളരാത്തതും, സർവീസ് അടിസ്ഥാനമാക്കിയുള്ള സമ്പദ്വ്യവസ്ഥയിൽ എല്ലാവർക്കും തൊഴിൽ നൽകാൻ കഴിയാത്തതും സ്ഥിതി വഷളാക്കുന്നു.
താത്കാലിക ജോലികളിലേക്ക് യുവാക്കൾ തള്ളിവിടപ്പെടുമ്പോൾ, സുരക്ഷിതമായ ഭാവിയെക്കുറിച്ചുള്ള അവരുടെ പ്രതീക്ഷകൾ അസ്തമിക്കുന്നു. ഗവൺമെൻ്റെ് തസ്തികകളിലെ പരീക്ഷാ ക്രമക്കേടുകളും മത്സരപ്പരീക്ഷകളിലെ അനിശ്ചിതത്വങ്ങളും യുവാക്കളുടെ അമർഷത്തിന് ആക്കം കൂട്ടുന്നു.
അതേസമയം, രാജ്യത്തെ സമ്പത്തിന്റെ ഭൂരിഭാഗവും വളരെ കുറച്ചു മാത്രം വരുന്ന ശതകോടീശ്വരന്മാരുടെ കൈകളിൽ കേന്ദ്രീകരിക്കപ്പെടുകയാണ്. ടെലികോം, തുറമുഖങ്ങൾ, ഊർജ്ജം, റീട്ടെയിൽ തുടങ്ങിയ തന്ത്രപ്രധാന മേഖലകളെല്ലാം പ്രധാനപ്പെട്ട ചില വ്യവസായ ഭീമന്മാർ കൈയടക്കിവെച്ചിരിക്കുന്നു.
വിപണിയിലെ തങ്ങളുടെ ആധിപത്യവും സ്വാധീനവും നിലനിർത്താൻ ഇവർ തമ്മിൽ നിഴൽയുദ്ധങ്ങൾ നടക്കുന്നു. വ്യവസായമേഖലയിലെ ഈ കുത്തകവൽക്കരണം പുതിയ സംരംഭകർക്കും ചെറുകിട ബിസിനസുകൾക്കും വളരാനുള്ള അവസരം ഇല്ലാതാക്കുന്നു. ‘ബിസിനസ് സൗഹൃദ’ അന്തരീക്ഷവും നികുതി ഇളവുകളും വൻകിട കോർപ്പറേറ്റുകൾക്ക് കൂടുതൽ ഗുണം ചെയ്യുമ്പോൾ, സാധാരണക്കാരിലേക്ക് ഇതിന്റെ പ്രയോജനം എത്തുന്നില്ല.
ഇത് ചരിത്രത്തിൽ കേട്ടുകേൾവിയില്ലാത്ത തരത്തിലുള്ള വരുമാന അസമത്വത്തിന് വഴിതെളിച്ചു. സമ്പന്നർ കൂടുതൽ സമ്പന്നരാവുകയും, സാധാരണക്കാരായ യുവാക്കൾ ഉപജീവനത്തിനായി നെട്ടോട്ടമോടുകയും ചെയ്യുന്ന ഈ അവസ്ഥ ഒരു വലിയ സാമൂഹിക സ്ഫോടനത്തിലേക്ക് നയിച്ചേക്കാമെന്ന് ലേഖനം മുന്നറിയിപ്പ് നൽകുന്നു.
യുവജനങ്ങളുടെ പങ്കാളിത്തവും അവരുടെ പ്രതീക്ഷകളും ഇല്ലാതാകുന്ന ഒരു സാമ്പത്തിക വ്യവസ്ഥ ദീർഘകാലത്തേക്ക് മുന്നോട്ടു കൊണ്ടുപോകാൻ കഴിയില്ല. സമ്പത്ത് ഏതാനും പേരിൽ മാത്രം കേന്ദ്രീകരിക്കുന്നതിന് പകരം പുതിയ തൊഴിലവസരങ്ങൾ സൃഷ്ടിക്കുകയും, യുവതലമുറയുടെ കഴിവിനെ തക്കതായ രീതിയിൽ പ്രയോജനപ്പെടുത്തുകയും ചെയ്യുന്ന നയ രൂപീകരണമാണ് ഇന്ത്യക്ക് അടിയന്തരമായി ആവശ്യം. അല്ലാത്തപക്ഷം, ഈ ആന്തരിക അമർഷവും കടുത്ത അസമത്വവും രാജ്യത്തിൻ്റെ സാമ്പത്തിക വികസനത്തെയും സാമൂഹിക സുസ്ഥിരതയെയും ഗുരുതരമായി ബാധിക്കും.
