അവതാർ : ഫയർ ആൻഡ് ആഷ് – ആഴമില്ലാത്ത ദൃശ്യ വിസ്മയം

ഡോ ജോസ് ജോസഫ് ..

ജെയിംസ് കാമറൂണിൻ്റെ അവതാർ യൂണിവേഴ്സിലെ ചിത്രങ്ങൾ eപ്രക്ഷകർ എപ്പോഴും വലിയ ആകാംഷയോടെയാണ് കാത്തിരിക്കുന്നത്. ഈ പരമ്പരയിലെ ഓരോ ചിത്രവും പുറത്തിറങ്ങുന്നത് തൊട്ടു മുമ്പിറങ്ങിയ അവതാർ ചിത്രത്തിൻ്റെ ദൃശ്യ മികവ് മറികടക്കുമെന്ന വാഗ്ദാനത്തോടെയാണ്.

എന്നാൽ തൊട്ട് മുമ്പിറങ്ങിയ അവതാർ ചിത്രങ്ങളുമായി താരതമ്യപ്പെടുത്തുമ്പോൾ അവതാർ ഫയർ ആൻഡ് ആഷ് എന്ന മൂന്നാം അവതാർ ചിത്രം അത്ര പോര. ദൃശ്യ മികവ് നിലനിർത്തിയിട്ടുണ്ടെങ്കിലും 3 മണിക്കൂർ 17 മിനിറ്റ് ദൈർഘ്യമുള്ള ചിത്രത്തിൽ മുൻ അവതാർ ചിത്രങ്ങളെ പോലെ പ്രേക്ഷകരെ പിടിച്ചിരുത്തുന്ന ഘടകങ്ങൾ കുറവാണ്. ആവർത്തന വിരസതയുള്ള തിരക്കഥയിൽ പുതുമകളില്ല. മേക്കിംഗിലെ മികവ് കൊണ്ട് കഥയില്ലായ്മയെ മറികടക്കാനായിട്ടില്ല.

സമ്പത്തിനു വേണ്ടി ദുര മൂത്ത മനുഷ്യർ വീണ്ടു വിചാരമില്ലാതെ പ്രകൃതിയെ നശിപ്പിക്കുന്നതായിരുന്നു ആദ്യ അവതാറിലെ പ്രമേയം.കരയിലെ വനങ്ങൾ പോലെ സമുദ്രവും സമുദ്രത്തിലെ ജൈവവൈവിധ്യവും മനുഷ്യരാശിയുടെ നിലനിൽപ്പിന് അനിവാര്യമാണെന്ന് അവതാർ ദ വേ ഓഫ് വാട്ടർ എന്ന രണ്ടാം ഭാഗത്തിലൂടെ സംവിധായകൻ ഓർമ്മിപ്പിച്ചു.

മിലിട്ടറി വിരുദ്ധ വികാരം, ഗോത്ര സംസ്ക്കാരം, ലിംഗ നീതി, ആത്മീയത, വംശ വിവേചനം, ജീവ ലോകത്തിൻ്റെ പരസ്പര സഹവർത്തിത്വം, കുടുംബത്തിൻ്റെ ഐക്യം തുടങ്ങിയവയെക്കുറിച്ചുള്ള സംവിധായകൻ്റെ മൗലിക ദർശനങ്ങൾ പുതിയ അവതാറിലും ആവർത്തിക്കുന്നു.

അതിവേഗം വാസയോഗ്യമല്ലാതായി മാറിക്കൊണ്ടിരിക്കുന്ന ഭൂമി ഉപേക്ഷിച്ച് വിദൂര ഗ്രഹങ്ങളിൽ കോളണികൾ സ്ഥാപിച്ചു തുടങ്ങിയ കാലത്താണ് പാൻഡോറയിൽ മനുഷ്യർ എത്തിയത്.കൊടും കാടുകളിൽ പ്രകൃതിയുമായി ഇണങ്ങി ജീവിക്കുന്നവരാണ് പാൻഡോറയിലെ നാവി വംശജർ.

പാൻഡോറയിലെ അമൂല്യമായ ധാതു സമ്പത്ത് ഖനനം ചെയ്യുകയായിരുന്നു ആകാശവാസികളായ മനുഷ്യരുടെ ആഗമന ലക്ഷ്യം. 2009 ൽ പുറത്തിറങ്ങിയ അവതാർ ഒന്നാം ഭാഗത്തിൽ മനുഷ്യനായിരുന്ന ജേക്ക് സള്ളിയുടെ (സാം വർത്തിംഗ്ടൺ) സഹായത്തോടെ പാൻഡോറ വാസികൾ മനുഷ്യരെ തുരത്തിയോടിച്ചു.

2022 ഡിസംബറിൽ റിലീസ് ചെയ്ത അവതാർ ദ വേ ഓഫ് വാട്ടർ എന്ന രണ്ടാം ഭാഗത്തിൽ മുൻ മനുഷ്യനായ ജേക്ക് സള്ളി അവതാര രൂപത്തിൽ നാവി വംശജരുടെ തലവനായി മാറുന്നു.

നെയ്തിരിയെ (സോ സൽദാന ) വിവാഹം കഴിച്ച് ആ ബന്ധത്തിൽ നാല് കുട്ടികളുടെ പിതാവായി. കുടുംബത്തെ രക്ഷിക്കുന്നതാണ് ആദ്യ ധർമ്മമെന്ന് വിശ്വസിക്കുന്ന അച്ഛനാണ് ജേക്ക് സള്ളി. ഭൂമി ഇല്ലാതായാതതോടെ ആകാശവാസികളായ മനുഷ്യർ വീണ്ടും യുദ്ധവുമായി പാൻഡോറയിൽ എത്തുന്നു.

ജീവജാലങ്ങളുടെ അനന്ത വൈവിധ്യം നിറഞ്ഞ കാട് വിട്ടോടിയ ജേക്ക് സള്ളിയും കുടുംബവും സമുദ്ര തീരവാസികളായ മെറ്റ്കെയ്ന ഗോത്രത്തിൻ്റെ സഹായത്തോടെ മനുഷ്യരെ തോൽപ്പിക്കുന്നതായിരുന്നു രണ്ടാം അവതാറിൻ്റെ പ്രമേയം. രണ്ടാം അവതാർ അവസാനിച്ചിടത്തു നിന്നാണ് മൂന്നാം ഭാഗമായ അവതാർ ഫയർ ആൻഡ് ആഷിൻ്റെ തുടക്കം.

ജേക്ക് സളളി കുടുംബത്തിനൊപ്പം മനുഷ്യ കുട്ടിയായ സ്പൈഡറും ( ജാക്ക് ചാമ്പ്യൻ) വളരുന്നുണ്ട്. ആദ്യ അവതാറിലെ ക്രൂരനായ വില്ലൻ കേണൽ മൈൽസ് ക്വാറിച്ചാണ് പിതാവ്. മനുഷ്യർ പാൻഡോറ ഒഴിഞ്ഞപ്പോൾ സ്പൈഡറിനെ ഉപേക്ഷിച്ചിട്ടു പോയതാണ്.ഫയർ ആൻഡ് ആഷ് യഥാർത്ഥത്തിൽ സ്പൈഡറിനെ ചുറ്റി കറങ്ങുന്ന സിനിമയാണ്. മനുഷ്യരും പാൻഡോറ വാസികളും തമ്മിലുള്ള സംഘർഷത്തിൻ്റെ കേന്ദ്ര ബിന്ദു അവനാണ്.

അവതാർ ഒന്നാം ഭാഗം കരയും വനവും ചേർന്ന അത്ഭുത ലോകം പ്രേക്ഷകർക്ക് മുന്നിൽ തുറന്നിട്ടു. രണ്ടാം ഭാഗത്തിൽ സമുദ്രക്കാഴ്ച്ചകളുടെ ജല വിസ്മയമായിരുന്നു ജെയിംസ് കാമറൂൺ അവതരിപ്പിച്ചത് അവതാർ മൂന്നാം ഭാഗത്തിൽ വനവും സമുദ്രവും ഒപ്പം അഗ്നിയും നിറഞ്ഞു നിൽക്കുന്നു.

അവതാർ ഒന്നാം ഭാഗത്തിൽ വനത്തിൽ വസിക്കുന്ന ഒമാറ്റിക്കായ ഗോത്രവും രണ്ടാം ഭാഗത്തിൽ ജല ജീവിതം നയിക്കുന്ന മെറ്റ്‌കെയ്ന ഗോത്രവും കടന്നു വന്നു.ഇവരിൽ നിന്നു വ്യത്യസ്തരായി അഗ്നിപർവ്വത പ്രദേശങ്ങളിൽ വസിക്കുന്ന മാങ്ക്വാൻ (ചാര ജനങ്ങൾ ) ഗോത്രമാണ് അവതാർ മൂന്നിൽ സംവിധായകൻ പരിചയപ്പെടുത്തുന്ന പുതിയ ജന വിഭാഗം.

തീയാണ് അവരുടെ പ്രധാന ഐഡൻ്റററി. അത്യന്തം നിഷ്ഠൂരരും പ്രതികാര ദാഹികളും അക്രമാസക്തരുമാണ് മാങ്ക്വാൻ ഗോത്രം. ദുർമന്ത്രവാദിനിയായ വരാങാണ് ( ഊന ചാപ്ലിൻ) ഗോത്രത്തിൻ്റെ നേതാവ്.

മൂന്നാം അവതാറിൽ ജാക്ക് സള്ളിക്കും നെയ്തിരിക്കും ഒപ്പം വളർത്തു മകളായ കിരിയും (സിഗോർണി വീവർ) സ്പൈഡറും എതിരാളികളെ നേരിടുന്നതിൽ മുൻ നിരയിലുണ്ട്. ആദ്യ അവതാറിലെ ശാസ്ത്രജ്ഞ ഡോ ഗ്രേസ് അഗസ്റ്റിൻ്റെ മകളാണ് കിരി. കിരിയുടെ ജന്മ രഹസ്യം അവതാർ മുന്നിൽ വെളിപ്പെടുന്നുണ്ട്.

അവതാർ മൂന്നിൽ ഏയ്‌വയുടെ ആത്മീയ ലോകവുമായി നിരന്തര ബന്ധം പുലർത്തുന്നത് കിരിയാണ്. രണ്ടാം അവതാറിൽ കൊല്ലപ്പെട്ട ജ്യേഷ്ഠ സഹോദരൻ നെയ്തേയത്തിൻ്റെ മരണത്തിൽ ദുഖിച്ചിരിക്കുന്ന ലോക്കിനെ (ബ്രിട്ടൻ ഡാൽട്ടൺ) കാണിച്ചു കൊണ്ടാണ് മൂന്നാം അവതാറിൻ്റെ തുടക്കം. ലോക്കിൻ്റെ അമ്മ നെയ്തിരിയും (സോയ് സാൽഡാന) വിലാപത്തിലാണ്.

ജെയ്ക്കും (സാം വർത്തിംഗ്ടൺ) ദുഃഖിതനാണെങ്കിലും ശാന്തനാണ്. മനുഷ്യനായ സ്പൈഡറിന് ശ്വസനത്തിന് ബുദ്ധിമുട്ടുള്ളതിനാൽ അവനെ പാൻഡോറയിലെ ഹൈ ക്യാമ്പിലുള്ള മറ്റ് മനുഷ്യരോടൊപ്പം വിടാൻ ജെയ്ക്ക് കുടുംബം യാത്ര തിരിക്കുന്നു. യാത്രക്കിടയിൽ വരാങിൻ്റെ നേതൃത്വത്തിലുള്ള മാങ്ക്വാൻ ഗോത്രം കുടുംബത്തെ ആക്രമിക്കുന്നതോടെ യുദ്ധം തുടങ്ങുന്നു.

ജെയിംസ് കാമറൂൺ

ഇതിനിടയിൽ ആകാശവാസികളായ മനുഷ്യർ വീണ്ടും പാൻഡോറയെ കീഴടക്കാൻ പദ്ധതിയിടുന്നു,.പുതിയ അവതാറിൽ ക്ലോൺ ചെയ്ത് എടുത്ത കേണൽ മൈൽസ് ക്വാറിച്ചിനാണ് (സ്റ്റീഫൻ ലാങ്) മിലിട്ടറി ഓപ്പറേഷൻ്റെ നേതൃത്വം. സ്‌പൈഡറിൻ്റെ ജീവശാസ്ത്രപരമായ പിതാവുകൂടിയായ കേണൽ മൈൽസ് ക്വാറിച്ച് ജെയ്ക്കിൻ്റെ ബദ്ധശത്രുവാണ്.

മുൻ മുൻകോപക്കാരിയായ ജനറൽ (എഡി ഫാൽക്കോ) അതീവ ബുദ്ധിശാലികളായ തുൾകുനുകൾ എന്ന ഭീമൻ തിമിംഗലങ്ങളെ ഒന്നടങ്കം കൊന്നൊടുക്കാൻ നിർദ്ദേശിക്കുന്നു.സൗമ്യനായ മറൈൻ ബയോളജിസ്റ്റ് (ജെമൈൻ ക്ലെമന്റ്) തുൾകുനുകളെ കൊല്ലരുതെന്ന് അപേക്ഷിക്കുന്നുണ്ടെങ്കിലും അവഗണിക്കപ്പെടുന്നു. മൈൽസ് ക്വാറിച്ച് വരാങിൻ്റെ മായിക വലയത്തിൽ അകപ്പെടുന്നതാടെ ജെയ്ക്ക് കുടുംബവും ശത്രുക്കളുമായുള്ള യുദ്ധം കൂടുതൽ സങ്കീർണ്ണമാകുന്നു.

അവതാർ ഒന്നിലും രണ്ടിലും ജെയ്ക്ക് സളളിയും നെയ്തിരിയുമാണ് കഥയെ മുന്നോട്ടു കൊണ്ടുപോയിരുന്നതെങ്കിൽ മൂന്നാം ഭാഗത്തിൽ വളർത്തു മക്കളായ കിരിയും സ്പൈഡറുമാണ് പ്രധാന കഥാപാത്രങ്ങൾ. സ്പൈഡർ സങ്കീർണ്ണമായ കഥാപാത്രമാണ്. ജന്മം കൊണ്ട് മനുഷ്യനാണെങ്കിലും കുറ് നാവി വംശത്തോടാണ് .

അവതാർ ഒന്നും രണ്ടുമായി താരതമ്യപ്പെടുത്തുമ്പോൾ മൂന്നാം ഭാഗത്തിന് ആവർത്തന വിരസത അനുഭവപ്പെടും.യുദ്ധ രംഗങ്ങൾക്ക് ദൈർഘ്യം കൂടുതലാണെങ്കിലും മനസ്സിൽ തങ്ങി നിൽക്കില്ല.പുതിയൊരു ഗോത്രത്തെ അവതരിപ്പിച്ചു എന്ന തൊഴിച്ചാൽ കഥയിലും വലിയ പുതുമയില്ല.

അവതാർ വേ ഓഫ് വാട്ടറിൻ്റെ വലിച്ചു നീട്ടിയ ഒരു എപ്പിസോഡ് മാത്രമാണ് മൂന്നാം ഭാഗം. തോറ്റ് മടങ്ങിയ ആകാശവാസികളായ മനുഷ്യർ പുതു തന്ത്രങ്ങളുമായി തിരികെയെത്തുന്നതാണ് അവതാർ മൂന്നിലും പ്രമേയം. ക്ലൈമാക്സിലും പുതുമയില്ല. കൊളോണിയൽ വിരുദ്ധ പോരാട്ടം അവതാറിൻ്റെ മൂന്ന് ഭാഗങ്ങളിലും അന്തർധാരയായി ഒഴുകുന്നത് കാണാം.

ഫയർ ആൻഡ് ആഷ് എന്ന് ടൈറ്റിലിൽ ഉണ്ടെങ്കിലും തീ കൊണ്ടുള്ള കളികൾ ചിത്രത്തിൽ കുറവാണ്. സമുദ്ര കാഴ്ച്ചകളും പാൻഡോറയിലെ ആദിമ വനങ്ങളും യുദ്ധരംഗങ്ങളുമാണ് കൂടുതലും.

വ്യത്യസ്ത ആവാസ വ്യവസ്ഥകൾ വിശ്വാസ സംഹിതകളെയും സംസ്ക്കാരത്തെയും എങ്ങനെ എങ്ങനെ പരുവപ്പെടുത്തുതു എന്നാണ് ഈ സിനിമ പരിശോധിക്കുന്നത്. അവതാർ ഒന്നിലും രണ്ടിലും പ്രകൃതിയും ജീവലോകവുമായി ഐക്യപ്പെട്ടു ജീവിക്കുന്ന ഗോത്ര സമൂഹങ്ങളായിരുന്നുവെങ്കിൽ മൂന്നാം അവതാർ അഗ്നി സംഹാരം, അക്രമം, സർവ്വ നാശം എന്നിവയെ ആരാധിക്കുന്ന ഒരു സംസ്കാരത്തെ പുതിയതായി അവതരിപ്പിക്കുന്നു.

അവതാർ മുന്നിൽ സാം വർത്തിംഗ്ടൺൻ്റെ ജെയ്ക്ക് സള്ളി വളരെ നിയന്ത്രിതമാണ്.സോയി സാൽഡാനയുടെ നെയ്തിരി കൂടുതൽ വൈകാരികമായാണ് പ്രതികരിക്കുന്നത്. സ്പൈഡറായി ജാക്ക് ചാമ്പ്യനും കിരിയായി സിഗോർണി വീവറും തിളങ്ങി. അക്രമകാരികളായ മാങ്ക്വാൻ ഗോത്രത്തിൻ്റെ നായിക വരാങിൻ്റെ വേഷത്തിൽ ഊന ചാപ്ലിനും ശ്രദ്ധേയമായ പ്രകടനം നടത്തി.

കഥാപാത്രത്തിൻ്റെ ആജ്ഞാശക്തിയും മാന്ത്രികമായ വശീകരണ ശേഷിയും പ്രസരിപ്പിക്കുന്നതിൽ ഊന ചാപ്ലിൻ വിജയിച്ചു.1997ൽ ടൈറ്റാനിക് പുറത്തിറങ്ങി 25 വർഷത്തിന് ശേഷം 2022 ലെ അവതാർ രണ്ടിലാണ് ജെയിംസ് കാമറൂണിൻ്റെ മറ്റൊരു ചിത്രത്തിൽ കേറ്റ് വിൻസ്ലെറ്റ് വേഷമിട്ടത്. അവതാർ മൂന്നിൽ അവർ വേഷമിട്ട മെറ്റ്കെയ്ന ഗോത്രത്തലവി റോണൽ മരണമടയുകയാണ്.

ചിത്രം വലിച്ചു നീട്ടി ഇടക്ക് ബോറടിപ്പിക്കുമെങ്കിലും ഇത്രയും വിപുലമായ സ്കെയിലിലുള്ള മാസ്റ്റർ ക്ലാസ് ചിത്രമൊരുക്കുന്നതിൽ ജെയിംസ് കാമറൂണിനുള്ള മികവ് അവതാർ മൂന്നിലും ആവർത്തിക്കുന്നു.സിനിമയുടെ ഏറ്റവും ശക്തമായ ഘടകങ്ങളിൽ ഒന്ന് ഛായാഗ്രഹണമാണ്.പ്രത്യേകിച്ച് അഗ്നി പടരുന്ന രംഗങ്ങളിൽ വെളിച്ചത്തിൻ്റെയും നിഴലിൻ്റെയും  ഉപയോഗം കാഴ്ചയ്ക്ക് ആഴം നൽകുന്നു. ആക്ഷൻ രംഗങ്ങൾ മികവോടെ അവതരിപ്പിച്ചിട്ടുണ്ട്. ദൈർഘ്യം കൂടുതലാണെങ്കിലും വൻ യുദ്ധങ്ങൾ പോലും ദൃശ്യപരമായി അമ്പരിപ്പിക്കും.

———————————————————————————-

(കേരള കാർഷിക സർവ്വകലാശാലയുടെ തൃശൂർ വെളളാനിക്കര കാർഷിക കോളേജ് മുൻ പ്രൊഫസറാണ് ലേഖകൻ)
——————————————————————-
കൂടുതല്‍ വാര്‍ത്തകള്‍ക്കായി
http://www.newsboardindia.com
സന്ദര്‍ശിക്കുക