തിരുവനന്തപുരം: ശബരിമല ക്ഷേത്രത്തിൽ യുവതികൾ കയറുന്നത് എതിർക്കാൻ സർക്കാർ തീരുമാനിക്കുന്നു.
യുവതീ പ്രവേശനത്തെ അനുകൂലിച്ച് സംസ്ഥാനത്തുടനീളം പ്രക്ഷോഭം നടത്തിയ സി പി എമ്മും ഇടതുമുന്നണിയും നിയമസഭ തിരഞ്ഞെടുപ്പ് അടുത്തപ്പോൾ നിലപാട് മാറുകയാണ്.
യുവതീ പ്രവേശനത്തെ എതിര്ക്കാനും, ആചാരങ്ങള് സംരക്ഷിക്കാനുമുള്ള നിലപാട് സ്വീകരിക്കാനും സിപിഎം സംസ്ഥാന സെക്രട്ടേറിയറ്റ് സർക്കാരിന് നിർദേശം നൽകി എന്നാണ് അറിയുന്നത്.
വിശ്വാസികളെ അകറ്റുന്ന നിലപാട് സ്വീകരിക്കരുതെന്ന് യോഗം സര്ക്കാരിനോട് ശുപാര്ശ ചെയ്തു. മന്ത്രിസഭായോഗത്തില് ആചാര സംരക്ഷണത്തിന് അനുകൂലമായി തീരുമാനമെടുത്ത് സര്ക്കാര് സുപ്രീംകോടതിയെ അറിയിക്കുമെന്നാണ് വിവരം.
ശബരിമല യുവതീപ്രവേശന കേസ് സുപ്രീംകോടതി വീണ്ടും പരിശോധിക്കുന്ന സാഹചര്യത്തില് കേരളം പുതിയ സത്യവാങ്മൂലം സമര്പ്പിക്കും. ഇക്കാര്യത്തില് കോടതി സര്ക്കാരിന്റെ നിലപാട് തേടിയിരുന്നു.
ശബരിമലയിലെ ആചാരങ്ങള് സംരക്ഷിക്കണമെന്നും, ശബരിമലയില് യുവതീ പ്രവേശനത്തെ അനുകൂലിച്ച മുന് നിലപാട് തിരുത്താനും തിരുവിതാംകൂര് ദേവസ്വം ബോര്ഡ് തീരുമാനിച്ചിരുന്നു.
ഇതിന്റെ കൂടി അടിസ്ഥാനത്തിലാണ്, നേരത്തെ യുവതീ പ്രവേശത്തെ അനുകൂലിച്ചിരുന്ന സിപിഎമ്മും സംസ്ഥാന സര്ക്കാരും മുന്നിലപാടില് നിന്നും മലക്കം മറിഞ്ഞത്. വിശ്വാസികളെ അടുപ്പിക്കുന്നതിന്റെ ഭാഗമായി സര്ക്കാര് ആഗോള അയ്യപ്പ സംഗമവും നടത്തിയിരുന്നു.
എന്എസ്എസ്, എസ്എന്ഡിപി യോഗം അടക്കമുള്ള സമുദായങ്ങള് ആചാരം സംരക്ഷിക്കണമെന്ന് ആവര്ത്തിച്ച് വ്യക്തമാക്കിയിരുന്നു. എന്നാല് നവോത്ഥാന സംരക്ഷണ സമിതിയിലെ മറ്റൊരു പ്രബല സമുദായമായ കെപിഎംഎസ് യുവതീപ്രവേശന നിലപാടില് ഉറച്ചു നില്ക്കണമെന്ന അഭിപ്രായക്കാരാണ്.
ശബരിമല യുവതീപ്രവേശനത്തെ അനുകൂലിച്ച സിപിഎമ്മും മുഖ്യമന്ത്രിയും മുമ്പ്, നാല് വോട്ടിനും രണ്ട് സീറ്റിനും വേണ്ടി നിലപാട് മാറ്റില്ലെന്നായിരുന്നു പ്രസ്താവിച്ചത്. സുപ്രീംകോടതി വിധിയെത്തുടര്ന്ന് യുവതികള് ശബരിമലയില് പ്രവേശിക്കാന് എത്തിയതിനെത്തുടര്ന്ന്, സംസ്ഥാനത്ത് വലിയ പ്രതിഷേധമാണ് അരങ്ങേറിയത്.
അതേസമയം ശബരിമലയിലെ യുവതീപ്രവേശന വിധി നിലനിര്ത്തണമെന്ന് ഇന്ത്യന് യങ് ലോയേഴ്സ് അസോസിയേഷന് സുപ്രീംകോടതിയെ നിലപാട് അറിയിച്ചിട്ടുണ്ട്. സ്ത്രീകളുടെ അന്തസ്സുമായി ബന്ധപ്പെട്ട വിഷയമാണെന്നും, ശബരിമലയെ പ്രത്യേക വിഭാഗമായി കാണാനാകില്ലെന്നുമാണ് അസോസിയേഷന് വ്യക്തമാക്കി.
