കെ.ഗോപാലകൃഷ്ണൻ വികസന പരിപാടികളിൽ സ്വകാര്യമേഖലയ്ക്കു കൂടുതൽ അവസരങ്ങളൊരുക്കുമെന്നതിന്‍റെയും ഇടതു ജനാധിപത്യ മുന്നണി സര്‍ക്കാരിന്‍റെ പതിവു നയങ്ങളില്‍നിന്നും പരിപാടികളില്‍നിന്നും കൂടുതല്‍ പുരോഗമനപരമായ സമീപനത്തിലേക്കു മാറുമെന്നതിന്‍റെയും വ്യക്തമായ സൂചനകൾ നൽകുന്നതാണ് ധനമന്ത്രി കെ.എന്‍. ബാലഗോപാല്‍ അവതരിപ്പിച്ച കേരള ബജറ്റിലെ നിർദേശങ്ങൾ. സംസ്ഥാനം നേരിടുന്ന കടുത്ത സാന്പത്തിക പ്രതിസന്ധി മറികടക്കുകയെന്ന ലക്ഷ്യത്തോടെ പാര്‍ട്ടിയില്‍നിന്നുള്ള അനുമതി ലഭിക്കും മുൻപേയാണ് ഈ നയസമീപനത്തിന്‍റെ പ്രഖ്യാപനം. “തകരില്ല കേരളം, തകരില്ല കേരളം, തകര്‍ക്കാനാകില്ല കേരളത്തെ’’ എന്ന് ആദ്യമേതന്നെ പറഞ്ഞുകൊണ്ട് കൂടുതൽ വിശദാംശങ്ങൾ നൽകാതെയാണു പുതിയ നയസമീപനത്തിലേക്കുള്ള സൂചനകൾ […]
