സോണിയാമ്മയുടെ ഓർമ്മയെഴുത്ത് അബദ്ധപ്പഞ്ചാംഗമായപ്പോൾ

ക്ഷത്രിയൻ.. 

ഗാന്ധി-നെഹ്രു കുടുംബത്തിൽ നിന്ന് ചരിത്രാക്ഷരങ്ങൾ അടർന്നു വീഴുന്നത് ഇന്നോ ഇന്നലെയോ തുടങ്ങിയതേയല്ല. അതിൽ വലിയ മൂപ്പര്, അതായത് സാക്ഷാൽ ജവഹർലാൽ നെഹ്രു തന്നെയായിരുന്നു കൊമ്പൻ.

മകൾക്ക് ജയിലിൽക്കിടന്ന് കത്തെഴുതുക എന്നത് മൂപ്പരുടെ ഒരു വകതിരിവില്ലാത്ത ഹോബിയായിരുന്നു—’ഇന്ത്യയെ കണ്ടെത്തൽ’ വരെ നീണ്ടു ആ സാഹിത്യവിനോദം. ഇപ്പോഴിതാ, ആ പരമ്പരയിലെ ഇളമുറക്കാരിയായ സോണിയ ജി ‘ഇന്ത്യയെ വീണ്ടും കണ്ടെത്താൻ’ ഇറങ്ങിയിരിക്കുന്നു; നിറയെ അബദ്ധങ്ങളുടെ പെരുമഴയാണെന്ന് മാത്രം!

സ്വന്തം പേരിൽ മാർക്കറ്റിൽ ഇറക്കിയ ‘രാഷ്ട്രീയ ചരിത്ര ഗ്രന്ഥം’ നന്നായി വിററുപോയി. എന്നാലത് സാക്ഷാൽ സോണിയ ജി യെത്തന്നെ തിരിഞ്ഞു കൊത്തുകയാണത്രേ. സംഘ് പരിവാർ ബുദ്ധിജീവികൾ മാത്രം പരിഹസിച്ച് കൈയൊഴിയുന്നതല്ല ഈ കോമഡി.

എഴുത്തും വായനയും തമ്മിൽ വലിയ ബന്ധമില്ലാത്തവരെക്കൊണ്ട് ഈ പുസ്തകം നിർമ്മിപ്പിച്ചു കൊടുത്ത ‘തിരുമേനിമാർ’ ആരാണെന്ന മർമ്മപ്രധാനമായ ചോദ്യം ചോദിക്കുന്നത് സാക്ഷാൽ കോൺഗ്രസ്സുകാർ തന്നെയാണെന്നതാണ് ഇതിലെ പരമമായ തമാശ. ആരാധകരെപ്പോലും അമ്പരപ്പിക്കുന്ന അബദ്ധങ്ങൾ ഒന്നല്ല, ഒട്ടേറെയുണ്ട് ഈ ഗ്രന്ഥത്തിൽ.

ഉദാഹരണത്തിന്, 2002-ൽ ഗുജറാത്തിന്‍റെ തലസ്ഥാനം അഹമ്മദാബാദ് ആയിരുന്നുവെന്നാണ് സോണിയാജി ഗ്രന്ഥത്തിൽ കുറിച്ചിരിക്കുന്നത്. ഗുജറാത്ത് തലസ്ഥാനം ഗാന്ധിനഗറാണെന്നത് നന്നായി പള്ളിക്കൂടത്തിൽ പോകാത്ത രാഹുൽജി ക്ക് പോലും പാഠപുസ്തകത്തിൽ നിന്ന് അടിയറവായി കിട്ടിയിട്ടുള്ള വിവരമാണ്.

അതുപോലെ 1994-ൽ ഇന്ത്യയുടെ രാഷ്ട്രപതി ആർ.കെ. നാരായണൻ ആയിരുന്നുവെന്ന മറ്റൊരു ചരിത്ര കണ്ടുപിടുത്തം ! മാൽഗുഡി ഡെയ്സ് എന്ന പുസ്തകമൊക്കെ എഴുതിയ ആർ.കെ. നാരായണൻ സാഹിത്യകാരനല്ലേ എന്ന് മലയാളികൾ പോലും ചോദിക്കും.

കെ.ആർ. നാരായണനെ ഉദ്ദേശിച്ചാണെങ്കിൽത്തന്നെ 1994-ൽ രാഷ്ട്രപതി ശങ്കർദയാൽ ശർമ്മയായിരുന്നു. കെ.ആർ. നാരായണൻ അന്നേരം ഉപരാഷ്ട്രപതിയായിരുന്നുവെന്ന് സോണിയയുടെ വിശ്വസ്തനായ വിൻ്റ്സൻ്റ് ജോർജിനു അറിയാമായിരുന്നിട്ടും, ഈ അപസ്മാരവിവരം ഗ്രന്ഥത്തിൽ കയറിപ്പറ്റി!

തൻ്റെ രാഷ്ടീയ ഉപദേശകനായ അഹമ്മദ്, പട്ടേൽ തന്നോടൊപ്പം 2022 വരെ പ്രവർത്തിച്ചിരുന്നുഎന്നാണ് സോണിയാജിയുടെ കണ്ടെത്തൽ. എന്നാൽ അഹമ്മദ് പട്ടേൽ 2020-ൽ തന്നെ സ്വർഗ്ഗലോകം പൂകി. ഡൽഹി സർക്കാരിൻ്റെ രേഖകൾ സാക്ഷ്യപ്പെടുത്തുന്ന പ്രകാരം കൊറോണയായിരുന്നു കാരണം.

ദേശസ്നേഹത്തിൻ്റെ മൂത്താശാനായി ആർ.എസ്.എസുകാർ എഴുന്നള്ളിച്ചു നടക്കുന്ന വീരസവർക്കർ, മുതിർന്ന ആർ.എസ്.എസിൻ്റെ താത്വികാചാര്യൻ ആയിരുന്നുവെന്നതാണ് മറ്റൊരു കണ്ടുപിടുത്തം.

സ്വാതന്ത്ര്യ സമരകാലത്ത് ആന്തമാൻ ജയിലിൽ കഴിഞ്ഞിരുന്ന സവർക്കർ ആർ.എസ്.എസിൻ്റെ പ്രാഥമിക അംഗംപോലും ആയിരുന്നില്ലെന്നും ഹിന്ദു മഹാസഭയുടെ ആളായിരുന്നുവെന്നും ചരിത്രകാരന്മാർ ആണയിട്ടു പറയുന്നു. മൂപ്പിലാൻ കൊള്ളാവുന്ന സ്വാതന്ത്ര്യ സമര സേനാനിയായിരുന്നുവെന്ന് അമ്മായിയമ്മ ഇന്ദിര തന്നെ പറഞ്ഞിട്ടുണ്ട്. ആദരസൂചകമായി തപാൽ മുദ്ര ഇറക്കുകയും ചെയ്തു.

ഇന്ത്യയെ ഹിന്ദുരാഷ്ട്രമാക്കാൻ രാവും പകലും പണിയെടുക്കുന്ന ആർ.എസ്.എസ് സ്ഥാപിതമായത് 1921-ൽ ആണെന്നാണ് സോണിയാജി മനസ്സിലാക്കിവെച്ചിരിക്കുന്നത്. എന്നാൽ അത് 1925-ൽ ആണെന്ന് കോൺഗ്രസ് അധ്യക്ഷൻ മല്ലികാർജുന ഖാർഗെയ്ക്കും, ഈ വിഷയത്തിൽ പി.എച്ച്.ഡി തന്നെ എടുത്ത അദ്ദേഹത്തിന്‍റെ പുത്രനായ കർണാടക മന്ത്രിയായ കൊച്ചു ഖാർഗെയ്ക്കും അറിയാം. ഒന്ന് ചോദിച്ചു നോക്കിയിരുന്നെങ്കിൽ….

മകനും ലോക്സഭാ പ്രതിപക്ഷ നേതാവുമായ രാഹുൽ ഗാന്ധിജി നാല് തവണ എം.പി. ആയിട്ടുണ്ടെന്നാണ് സോണിയാജിയുടെ കണക്ക്. എന്നാൽ അദ്ദേഹം അഞ്ച് തവണ എം.പി. ആയിട്ടുണ്ടെന്നാണ് ലോക്സഭാ രേഖകൾ പറയുന്നത്. സ്പീക്കർ ഓം ബിർളയോട് ചോദിച്ചാൽ സംശയം തീർക്കാമായിരുന്നു. രേഖകൾ എല്ലാം സഭയിൽ കാണുമല്ലോ.

അത്യാധുനികേന്ത്യാ ചരിത്രത്തിൽ അഭിനവ മഹാത്മാ ഗാന്ധിയായി അവതരിച്ച അന്നാ ഹസാരെ 2012-ൽ ഡൽഹിയിൽ സമരവുമായി വന്നെന്ന അവകാശവാദവും സോണിയാമ്മ ഉന്നയിച്ചിട്ടുണ്ട്. 2011-ൽ സമരം ചെയ്ത് കളം പിടിക്കുകയായിരുന്നു ഹസാരെ ജി. അതുകൊണ്ട് ഗുണം സിദ്ധിച്ചത് അരവിന്ദ് കെജ്രിവാളിനായിരുന്നുവെന്ന് മാത്രം. ഡൽഹിയിൽ അയലക്കത്ത് താമസിക്കുന്ന ഈ വാളിനോട് ചോദിച്ചിരുന്നെങ്കിൽ ഈ വർഷം തെററില്ലായിരുന്നു.

ശ്രീരാമചന്ദ്ര മഹാരാജാവിന് ശേഷം ഭാരതം ഭരിക്കാൻ ഭഗവാൻ വിഷ്ണു അവതരിച്ചത് നരേന്ദ്ര മോദിയുടെ വേഷത്തിലാണെന്ന് വിശ്വസിക്കുന്ന ബി ജെ പിക്കാരെ പോലും അമ്പരപ്പിക്കുന്നതാണ് അടുത്ത വെളിപാട്. 2014-ൽ ബി.ജെ.പിക്ക് 353 സീറ്റ് ഉണ്ടായിരുന്നെന്നാണ് സോണിയാജി പറയുന്നത്. നരേന്ദ്ര മോദിയുടെ കണക്ക് പ്രകാരം അത് 336 ആയിരുന്നു. അമിത് ഷായോടൊന്ന് ചോദിക്കാൻ മടി കാണിച്ചതിൻ്റെ  അമാന്തം.

ഇനി ‘വോട്ടുചോരി’ കണക്കിലേക്ക് വരാം. 2004-ൽ തനിക്ക് 3.7 ലക്ഷവും രാഹുൽജിക്ക് 3.9 ലക്ഷവും വോട്ടിന്‍റെ ഭൂരിപക്ഷം ഉണ്ടായിരുന്നുവെന്ന് മാതാജി സോണിയ അവകാശപ്പെടുന്നു. യഥാർത്ഥ കണക്കുകൾ യഥാക്രമം 2.5 ലക്ഷവും 2.9 ലക്ഷവുമായിരുന്നു എന്ന് ലോക്സഭാ രേഖകൾ വ്യക്തമാക്കുന്നു. എതാണാവോ സത്യം ?

1985-ൽ കോമൺവെൽത്ത് തലവന്മാരുടെ നാല്പത്തൊമ്പതാമത്തെ സമ്മേളനം നടന്നു എന്ന് പറയുന്നിടത്തും പിഴവ് വന്നു. നടന്നത് എട്ടാമത്തെ സമ്മേളനമായിരുന്നു. അല്ലെങ്കിൽ ഇററലിക്കാർക്ക് എന്ത് കോമൺവെൽത്ത് ! അതെല്ലാം പഴയ ബ്രിട്ടീഷ് കോളനിക്കാർക്ക് വിധിച്ചിട്ടുള്ളതല്ലേ ?

ദക്ഷിണാഫ്രിക്കയിൽ നെൽസൺ മണ്ഡേല ഇന്ത്യയിൽ വന്ന് പ്രസംഗിച്ചത് 1991-ൽ അല്ല, 1990-ൽ ആയിരുന്നു എന്ന് എ.കെ. ആന്‍റണിയെങ്കിലും പറഞ്ഞു കൊടുക്കേണ്ടതായിരുന്നു. ഭർത്താവ് രാജീവ് ഗാന്ധി ജി പ്രധാനമന്ത്രിയായതിനെ തുടർന്ന് 1984-ൽ പ്രണാബ് മുഖർജി കോൺഗ്രസ് വിട്ട് വേറെ പാർട്ടി ഉണ്ടാക്കിയെന്നാണ് മറ്റൊരു പരാമർശം.

പ്രണാബ്ദാ പാർട്ടി ഉണ്ടാക്കുന്നത് 1986-ലാണ്. അർക്കുവേണം ചരിത്രത്തിൽ ഇത്ര കൃത്യതയും വ്യക്തതയും. ഇത് ചരിത്രപഠന ഗ്രന്ഥം ഒന്നുമല്ലല്ലോ. വെറും സ്നേഹപ്പൂക്കൾ നിറച്ചുവെച്ച പുസ്തകമല്ലേ !

രാഹുലിനെ അപകീർത്തി കേസിൽ ഗുജറാത്ത് ഹൈക്കോടതി രണ്ടുവർഷം തടവിന് ശിക്ഷിച്ചെന്നും, അതേത്തുടർന്ന് പാർലമെന്റിൽ നിന്നും ഔദ്യോഗിക വസതിയിൽ നിന്നും പുറത്താക്കപ്പെട്ടെന്നും സോണിയാമ്മ വിലപിക്കുന്നുണ്ട്. ഒരു വർഷത്തിന് ശേഷം സുപ്രീം കോടതി അദ്ദേഹത്തിന്‍റെ ശിക്ഷ മരവിപ്പിക്കുകയും പാർലമെൻ്റ് സ്ഥാനം തിരികെ നൽകുകയും ചെയ്തുവത്രെ.

ഇനി, യഥാർഥ കഥ  നോക്കാം.

രാഹുലിനെ ശിക്ഷിച്ചത് ഗുജറാത്ത് ഹൈക്കോടതിയല്ല, സൂറത്ത് മെട്രോപൊളിറ്റൻ മജിസ്ട്രേറ്റ് കോടതിയാണ്. ഒരു വർഷത്തിന് ശേഷമല്ല അദ്ദേഹത്തിന് എം പി സ്ഥാനം തിരികെ കിട്ടിയത്, നാലര മാസത്തിന് ശേഷമാണ്.

അതിർത്തിയിലെ കാർഗിലിൽ നടന്ന നുഴഞ്ഞുകയറ്റവും വാജ്പേയിയുടെ പാകിസ്ഥാൻ സന്ദർശനവും തമ്മിലുള്ള കാലഗണനയും ഇതുപോലെതന്നെ പാളിപ്പോയിരിക്കുന്നു. ഇന്ദിരാഗാന്ധിയുടെ കേസിലെ കോടതി വിധികളുടെ തീയതികൾ മുതൽ ചന്ദ്രിക കുമാരതുംഗയുടെ ശ്രീലങ്കൻ തിരഞ്ഞെടുപ്പ് കഥകൾ വരെയുള്ളവയിൽ ഈ ചരിത്രവിരുദ്ധത പ്രകടമാണ്.

എല്ലാം സഹിക്കാം, പൊറുക്കാം. പുസ്തകം വാങ്ങിയെന്ന് പൊങ്ങച്ചം പറയാൻ സമൂഹ മാധ്യമങ്ങളിൽ പോട്ടമിട്ട് ഞെളിഞ്ഞവരുടെ നാണക്കേടിന് ആര് നഷ്ടപരിഹാരം തരും ?