അവറാച്ചൻ ആൻഡ് സൺസ്: നന്നാകാത്ത അപ്പനും നല്ലവരായ മക്കളും

ഡോ ജോസ് ജോസഫ്..

പുറമെ ന്യൂ ജെൻ കുപ്പായമിട്ടിട്ടുണ്ടെങ്കിലും പഴയ മോഡൽ ഫാമിലി കോമഡി ഡ്രാമയാണ് ബിജു മേനോൻ പ്രധാന വേഷത്തിൽ എത്തുന്ന അവറാച്ചൻ ആൻഡ് സൺസ്.

നവാഗതനായ തമ്പി സംവിധാനം ചെയ്ത ചിത്രത്തിൻ്റെ ഇതിവൃത്തം മധു സി നാരായണൻ സംവിധാനം ചെയ്ത കുമ്പളങ്ങി നൈറ്റ്സിനോട് സാമ്യമുള്ളതായി തോന്നാം.കൊച്ചിയിലെ കുമ്പളങ്ങിയായിരുന്നു മധു സി നാരായണൻ്റെ ചിത്രത്തിൻ്റെ പശ്ചാത്തലമെങ്കിൽ ഈ ചിത്രത്തിൽ അത് ചെല്ലാനമാണ്.

രണ്ട് ചിത്രങ്ങളും ഒരേ വീട്ടിൽ താമസിക്കുന്നുവെങ്കിലും പരസ്പര ബന്ധമില്ലാത്ത കുടുംബാംഗങ്ങളുടെ കഥ പറയുന്നു. കുമ്പളങ്ങി നൈറ്റ്സിൽ ഫഹദ് ഫാസിൽ അവതരിപ്പിച്ച ഷമ്മിയായിരുന്നു സൈക്കോ കഥാപാത്രമെങ്കിൽ അവറാച്ചൻ ആൻഡ് സൺസിൽ വിനയ് ഫോർട്ടിൻ്റെ അനിയാണ് സൈക്കോ കഥാപാത്രം.

കുമ്പളങ്ങി നൈറ്റ്സിൽ ഷമ്മിയുടെ ഭാര്യയായിരുന്നു ഗ്രേസ് ആൻ്റണിയെങ്കിൽ ഈ ചിത്രത്തിൽ സൈക്കോയുടെ മുൻ ഭാര്യയാണ്.ഈ സാമ്യങ്ങൾക്കപ്പുറം കുമ്പളങ്ങി നൈറ്റ്സിൻ്റെ നിലവാരത്തിന് ഒപ്പമെത്തുന ചിത്രമല്ല അവറാച്ചൻ ആൻഡ് സൺസ്. തിരക്കഥ ദുർബ്ബലമാണ്. കഥാപാത്രങ്ങളും അവരുടെ വൈകാരിക ബന്ധങ്ങളും മതിയായി വികസിച്ചിട്ടില്ല. പാതിവെന്ത സംഭവങ്ങൾ ഒന്നിനു പുറകെ മറ്റൊന്നായി വരുന്നു.

വിഭാര്യനായ അവറാച്ചൻ്റെയും (ബിജു മേനോൻ) രണ്ട് ആൺമക്കളുടെയും കഥ പറയുന്ന ചിത്രമാണ് അവറാച്ചൻ ആൻഡ് സൺസ്.സാധാരണ കുടുംബങ്ങളിൽ മക്കളാണ് പ്രശ്നമെങ്കിൽ ഇവിടെ നേരെ തിരിച്ചാണ്. ചീട്ടുകളിച്ചും കള്ളുകുടിച്ചും അലസ ജീവിതം നയിക്കുന്ന അവറാച്ചനെക്കൊണ്ട് നല്ലവരായ മക്കൾക്കാണ് ശല്യം. വയസ്സ് 56 കഴിഞ്ഞെങ്കിലും പിള്ളേരു കളിച്ച്,ഉല്ലസിച്ചു നടക്കുന്നതാണ് അവറാച്ചന് സന്തോഷം.

കുട്ടികളുടെ ബാൻഡ് സെറ്റ് മാസ്റ്ററുമാണ്. ഉള്ള വള്ളിക്കെട്ടെല്ലാം പിടിച്ച് മക്കൾക്ക് ഇടക്കിടെ പണി കൊടുക്കും. ഒരു ലഹരി കേസിൽ നിന്ന് മക്കൾ പാടുപെട്ടാണ് അപ്പനെ രക്ഷിക്കുന്നത്. ഇത് പിന്നീട് ഇളയ മകന് തന്നെ പാരയാകുന്നു.

അപ്പൻ ഉഴപ്പനാണെങ്കിലും മക്കൾ രണ്ടു പേരും കഠിനാദ്ധ്വാനികളും നല്ലവരുമാണ് .മുത്ത മകൻ ജെയ്സൺ (ശ്രീനാഥ് ഭാസി ) അപ്പനോട് ചോദിക്കാതെ കാമുകിയെ കല്യാണം കഴിച്ച് വീട്ടിൽ കയറ്റിക്കൊണ്ടു വന്നതാണ്.

കുഞ്ഞുന്നാളിലെ അമ്മ മരിച്ചു പോയ തങ്ങൾക്ക് സ്കൂൾ യൂണിഫോം പോലും അപ്പൻ വാങ്ങിത്തന്നിട്ടില്ലെന്നാണ് മക്കളുടെ പരാതി. വീട്ടിൽ ജെയ്സൻ്റെ ഭാര്യ കീർത്തിയോടു (അഖില ഭാർഗ്ഗവൻ) മാത്രമാണ് അവറാച്ചന് ചെറിയ അടുപ്പം.കീർത്തി ഗർഭിണിയാണ്.

കലൂർ ബിസ്മിയിൽ ജോലി നോക്കുന്ന അനീറ്റയോട് (പാർവ്വതി ബാബു)ഇളയ മകൻ ജെയ്മോന് തോന്നുന്ന പ്രേമം വിവാഹാലോചനയിലേക്ക് നീളുന്നു. അത് മുടക്കിയ ആളിൻ്റെ ഉടുമുണ്ട് ഉരിഞ്ഞു കൊണ്ടാണ് അവറാച്ചൻ പകരം വീട്ടിയത്.തുടർന്നുണ്ടായ സംഘർഷത്തിൽ അവറാച്ചന് നാടുവിടേണ്ടി വരുന്നു.

ചെമ്മീൻ കെട്ടും പൊക്കാളിയുമെല്ലാമുള്ള ചെല്ലാനത്തു നിന്നും ആനക്കാംപൊയിൽ എന്ന മലബാറിലെ മലയോര ഗ്രാമത്തിലേക്കായിരുന്നു മക്കൾ അവറാച്ചനെ നാടുകടത്തിയത്.ആദ്യത്തെ 30 മിനിറ്റിന് ശേഷം ആനക്കാംപൊയിലാണ് കഥയുടെ പശ്ചാത്തലം.

ആനക്കാംപൊയിലിൽ പെങ്ങൾ ഏലിയാമ്മയുടെ (പോളി വിൽസൺ) വീട്ടിലായിരുന്നു അവറാച്ചൻ്റെ താമസം. അവിടെയും ‘കാളകളി’ തുടർന്ന അവറാച്ചൻ കുഴപ്പങ്ങളിൽ ചെന്നു ചാടുന്നു. “തന്ത നന്നായാലേ കുടുംബം നന്നാകൂ. കല്യാണം കഴിച്ചാൽ നന്നാകുമെന്ന് കരുതി. നന്നായില്ല.

മക്കളുണ്ടായാൽ നന്നാകുമെന്ന് കരുതി. നന്നായില്ല. നിനക്ക് പിശാച് കയറിയതാണ് ” എന്നായിരുന്നു പെങ്ങൾ ഏലിയാമ്മയുടെ കണ്ടെത്തൽ.പിശാചിനെ ഒഴിപ്പിച്ച് ആങ്ങളെയെ നന്നാക്കാൻ മടിക്കേരിയിലെ ഫാദർ ജോസഫ് ചാലിശേരിയുടെ ( സാബുമോൻ അബ്ദുസമദ് ) പുനരധിവാസ കേന്ദ്രത്തിലേക്ക് അവറാച്ചനെ അയക്കുന്നു.

ഇവിടെ വെച്ച് പവിത്രൻ (ജോണി ആൻ്റണി ) എന്നയാളെ കണ്ടുമുട്ടുന്നതും തുടർന്നുണ്ടാകുന്ന സംഭവങ്ങളുമാണ് ചിത്രത്തിൻ്റെ രണ്ടാം പകുതി. ആദ്യ പകുതി കോമഡി യിലൂടെയാണ് മുന്നോട്ടു പോകുന്നതെങ്കിൽ രണ്ടാം പകുതി കുറെക്കൂടി ഗൗരവമുള്ളതാണ്.

ഏലിയാമ്മയുടെ തൊട്ടടുത്ത അയൽവാസിയാണ് ഹോം നഴ്സായി ജോലി ചെയ്യുന്ന ബിൻസി (ഗ്രേസ് ആൻ്റണി).ബെത്‌ലഹേം കുടുംബ യൂണിറ്റിലേത് പോലെ പ്രായ വ്യത്യാസമുള്ള രണ്ടു പേർ തമ്മിലുള്ള പ്രണയം രണ്ടാം പകുതിയിൽ കടന്നു വരുന്നുണ്ട്.

ബെത്‌ലഹേം കുടുംബ യൂണിറ്റിലെ ‘തൊട്ടപ്പുറത്താരോ തട്ടുന്നേ, മുട്ടുന്നേ ‘ എന്ന ഗാനവും പശ്ചാത്തലത്തിൽ കേൾക്കാം. ഇതിനിടയിലേക്കാണ് അലങ്കോലമുണ്ടാക്കാൻ ബിൻസിയുടെ മുൻ ഭർത്താവ് സൈക്കോ അനിയുടെ (വിനയ് ഫോർട്ട് ) കടന്നു വരവ്.ചിത്രത്തിൻ്റെ ക്ലൈമാക്സിൽ മലയാളത്തിൻ്റെ ലേഡി സൂപ്പർ സ്റ്റാർ അതിഥി വേഷത്തിൽ എത്തുന്നുണ്ട്.

ചിത്രത്തിലെ പല രംഗങ്ങളും കൃത്രിമത്വം നിറഞ്ഞതാണ്. പുനരിധിവാസ കേന്ദ്രത്തിൽ ഏതാനും ദിവസം മാത്രം ഒരുമിച്ചു താമസിക്കുന്ന പവിത്രൻ്റെ പെട്ടെന്നുള്ള മരണം അവറാച്ചനെ ആകെ ഉലയ്ക്കുന്നു. വർഷങ്ങളായി സ്വന്തം മക്കളുടെ ദുരിതങ്ങൾ കണ്ടിട്ടും ഉപദേശങ്ങൾ കേട്ടിട്ടും മനസ്സ് മാറാത്ത അയാൾ അടുത്തു പരിചയമില്ലാത്ത ഒരാളുടെ മരണം കൊണ്ട് ഒറ്റയടിക്ക് മാറുന്നത് വിശ്വസനീയമല്ല.

വീട്ടുകാർ സമ്മതിച്ചാലല്ലാതെ ജെയ്മോനെ കല്യാണം കഴിക്കില്ലെന്ന് വാശി പിടിച്ച അനീറ്റയുടെ മനം മാറ്റവും പെട്ടെന്നാണ്. സൈക്കോ അനിയുടെ സ്വഭാവ വൈകൃതങ്ങളും ആസിഡ് ആക്രമണ ശ്രമവുമെല്ലാം നിലം തൊടാത്ത കോമഡിയായി പാളി. മുൻ ഭാര്യയുടെ ചെരുപ്പ് മോഷണം പോലുള്ള രംഗങ്ങൾ വെറുപ്പ് ഉണ്ടാക്കും.

ബിജു മേനോൻ്റെ തനത് ശൈലിക്ക് ഇണങ്ങുന്ന കഥാപാത്രമാണ് അവറാച്ചൻ. അദ്ദേഹത്തിന് വലിയ പ്രകടനത്തിനുള്ള അവസരമൊന്നും തിരക്കഥയിൽ ഇല്ല. എങ്കിലും അവറാച്ചനെ ബിജു മേനോൻ തന്മയത്വത്തോടെ അവതരിപ്പിച്ചു.

ബിജു മേനോൻ്റെ മികച്ച പ്രകടനമാണ് ചിത്രത്തെ മുന്നോട്ടു കൊണ്ടു പോകുന്നത്.രണ്ട് മക്കളിൽ ഗണപതിക്കാണ് കൂടുതൽ സ്ക്രീൻ പ്രെസൻസ്.നല്ലവരായ മക്കളെ ഗണപതിയും ശ്രീനാഥ് ഭാസിയും നന്നായി അവതരിപ്പിച്ചുവെങ്കിലും കഥാപാത്ര സൃഷ്ടിയിൽ പാളിച്ചകളുണ്ട്. നായികമാരിൽ ഗ്രേസ് ആൻ്റണിക്കാണ് കൂടുതൽ തിളക്കം.

പെങ്ങളായി എത്തിയ പോളി വത്സനും നന്നായി. അഖില ഭാർഗവനും പാർവ്വതി ബാബുവിനും പ്രകടനത്തിന് കൂടുതൽ അവസരങ്ങൾ ഇല്ല. സൈക്കോ അനി വിനയ് ഫോർട്ടിൻ്റെ വ്യത്യസ്തമായ കഥാപാത്രമാണ്.ഷൈജു ശ്രീധർ, കോട്ടയം നസീർ, സുധി കോപ്പ, സാജൻ പള്ളുരുത്തി, സജിൻ ചെറുകയിൽ, വിനീത് തട്ടിൽ, നിഷ സാരംഗ്, വെട്ടുകിളി പ്രകാശ് തുടങ്ങി ഒരു നീണ്ട താരനിര ചിത്രത്തിൽ പ്രത്യക്ഷപ്പെടുന്നുണ്ട്.

ജോസഫ് വിജീഷും സംവിധായകന്‍ തമ്പിയും ചേര്‍ന്നാണ് ചിത്രത്തിൻ്റെ തിരക്കഥ എഴുതിയിരിക്കുന്നത്. തിരക്കഥയിൽ ഒന്നു കൂടി ശ്രദ്ധിച്ചിരുന്നെങ്കിൽ ചിത്രം മേക്കിംഗിൽ മികച്ചതാവുമായിരുന്നു.

നവാഗതനായ തമ്പി അവറാച്ചൻ ആൻഡ് സൺസ് തരക്കേടില്ലാതെ ഒരുക്കിയിട്ടുണ്ട്.ചെല്ലാനത്തെ കായലോരങ്ങളുടെയും ആനക്കാംപൊയിലെ മലനിരകളുടെയും ദൃശ്യങ്ങൾ ക്യാമറാമാൻ സജിത് പുരുഷൻ ഭംഗിയായി പകർത്തി. ആകാശ് ജോസഫ് വർഗീസാണ് എഡിറ്റർ.

റാപ്പ് സ്റ്റൈലിൽ നിരവധി ഗാനങ്ങളുള്ള ചിത്രത്തിന് സംഗീതം നൽകിയിരിക്കുന്നത് സനല്‍ ദേവാണ്.മാജിക് ഫ്രെയിംസിൻ്റെ ബാനറിൽ ലിസ്റ്റിൻ സ്റ്റീഫനാണ് 134 മിനിറ്റ് ദൈർഘ്യമുള്ള ചിത്രം നിർമ്മിച്ചിരിക്കുന്നത്.

——————————————————–

(കേരള കാർഷിക സർവ്വകലാശാലയുടെ തൃശൂർ വെളളാനിക്കര കാർഷിക കോളേജ് മുൻ പ്രൊഫസറാണ് ലേഖകൻ)
——————————————————————-
കൂടുതല്‍ വാര്‍ത്തകള്‍ക്കായി
http://www.newsboardindia.com
സന്ദര്‍ശിക്കുക