ധൂമകേതു: ടൈം ലൂപ്പിൽ കുടുങ്ങി പൊളിയുന്ന കല്യാണവും ആദ്യരാത്രിയും

ഡോ ജോസ് ജോസഫ്..

പ്രേക്ഷക ശ്രദ്ധ നേടിയ നെയ്മറിന് ശേഷം സുധി മാഡിസൺ സംവിധാനം ചെയ്ത ടൈം ലൂപ്പ് കോമഡി ചിത്രമാണ് ധൂമകേതു.

ടൈം ലൂപ്പിൻ്റെ സങ്കീർണ്ണതകളൊന്നുമില്ലാതെ കൊച്ചിക്കടുത്ത് ഓണം തുരുത്തിൽ നടക്കുന ലളിതമായ ഒരു ഹാസ്യകഥയാണ് ധൂമകേതു.മലയാളത്തിൽ ലിജോ ജോസ് പെല്ലിശ്ശേരിയുടെ ചുരുളി, മിഥുൻ മാനുവേൽ തോമസിൻ്റെ ആട് മൂന്ന് തുടങ്ങിയ ചിത്രങ്ങളിലെല്ലാം ടൈം ലൂപ്പ് പ്രമേയമായി കടന്നു വന്നിരുന്നു.

തമിഴിൽ മാനാട്, 24, ബോളിവുഡിൽ ഭൂൽ ചുക് മാഫ്, ലൂപ്പ് ലപേട എന്നീ ചിത്രങ്ങളിലും ടൈം ലൂപ് പ്രമേയമാണ്. ഹോളിവുഡ് ക്ലാസിക് ചിത്രങ്ങളായ ഗ്രൗണ്ട്ഹോഗ് ഡേ, സോഴ്സ് കോഡ്, എഡ്ജ് ഓഫ് ടുമോറോ തുടങ്ങിയവയിൽ പ്രധാന കഥാപാത്രങ്ങൾ ഒരേ സംഭവങ്ങളുടെ ടൈം ലൂപ്പിൽ ആവർത്തിച്ച് കുടുങ്ങുന്നതായി കാണാം.

ടൈം ലൂപ് ചിത്രങ്ങളിൽ ഒരേ സംഭവങ്ങൾ നിരന്തരം ആവർത്തിക്കുന്നു. നായകൻ ആ സംഭവങ്ങളുടെ കുരുക്കഴിക്കുന്നു. അതിൽ നിന്ന് രക്ഷപെടുന്നു. ധൂമകേതുവിലും ഇതു തന്നെയാണ് സംഭവിക്കുന്നത്. എന്നാൽ ഈ ചിത്രത്തിൽ നായകൻ സങ്കീർണ്ണമായ സാഹചര്യങ്ങളിലൂടെ കടന്നു പോകുന്നില്ല.

പ്രേക്ഷകന് കണക്ടാകുന്ന നാടൻ കല്യാണമാണ് ചിത്രത്തിൻ്റെ പശ്ചാത്തലം. നീണ്ട കാത്തിരിപ്പിനൊടുവിൽ ഓണംതുരുത്തുകാരൻ ലതിൻ കുമാർ എന്ന കുട്ടൻ്റെ (സജിൻ ഗോപു) കല്യാണം നടക്കുകയാണ്. 3000 വർഷത്തിലൊരിക്കൽ പ്രത്യക്ഷപ്പെടുന്ന ഒരു ധൂമകേതു ഭൂമിയെ കടന്നു പോകുന്ന അവസരത്തിലാണ് കുട്ടൻ്റെ കല്യാണം.

നിഷേധിയും തൻ്റേടിയുമായ കുട്ടൻ കല്യാണം കഴിക്കാൻ 36 വയസ്സുവരെ കാത്തിരിക്കേണ്ടി വന്നതിന് പിന്നിൽ ചില കാരണങ്ങളുണ്ട്. അമ്മ ലതാമ്മ (മഞ്ജു പിള്ള) കടുത്ത മുത്തപ്പൻ ഭക്തയാണ്. മുത്തപ്പനോടുള്ള പ്രാർത്ഥനയാണ് വൈകിയാണെങ്കിലും കുട്ടൻ്റെ കല്യാണം നടക്കാൻ കാരണമെന്നാണ് ലതാമ്മയുടെ വിശ്വാസം. മുത്തപ്പനെക്കാളും എനിക്ക് എന്നെയാ വിശ്വാസം എന്നാണ് കുട്ടൻ്റെ മറുപടി.

കല്യാണത്തിൻ്റെ തലേന്ന് രാവിലെ എന്നും ഒരേ സ്വപ്നം കണ്ടാണ് കുട്ടൻ ഉണരുന്നത്. ആകാശത്തു കൂടെ ധൂമകേതു കടന്ന് പോകുന്നതിനെ കുറിച്ച് ടി വി യിൽ ശാസ്ത്രജ്ഞൻ (ശ്രീകാന്ത് മുരളി) സംസാരിക്കുന്നു. ഇത് സർവ്വനാശത്തിൻ്റെ തുടക്കമാണെന്ന് മുത്തശ്ശി ശപിക്കും.

രാവിലെ വധു ശർമ്മിളയുമായി ( നിഖിലാ വിമൽ ) ഫോണിൽ സംസാരിക്കും. പൊന്നിൻ്റെ നിറമുള്ള ശർമ്മിളയുമായുള്ള പൊരുത്തത്തെ കുറിച്ച് കുട്ടന് സംശയമുണ്ട്.സുന്ദരിയായ വധുവിന് ചേരാത്തവൻ എന്ന് നാട്ടുകാർ ആക്ഷേപിക്കുമോ എന്നാണ് കുട്ടൻ്റെ ഭീതി. കല്യാണ ദിവസം വൈകിയുണരുന്ന കുട്ടൻ ചൊറിയനായ അമ്മാവനുമായി ( നിയാസ് ബക്കർ )ഉടക്കുന്നു.

‘ഒന്നാന്തരം വരിക്കച്ചക്ക പോലുള്ള പെണ്ണിനെ കുട്ടന് എങ്ങനെ കിട്ടി എന്ന് ദേഹണ്ഡക്കാർ അടക്കം കുശുമ്പ് പറയുന്നു. പെണ്ണിന് എന്തെങ്കിലും കുഴപ്പമുണ്ടായിരിക്കുമെന്നാണ് അഭ്യൂഹം.കൊച്ചിയിൽ നിന്നെത്തുന്ന മേക്കപ്പ് മാൻ. മരക്കൊമ്പൊടിഞ്ഞു വീഴുന്ന ബംഗാളി.ഇതെല്ലാം കഴിഞ്ഞ് വിവാഹപ്പന്തലിൽ എത്തുമ്പോൾ അവിടെയും അപശകുനങ്ങൾ. പ്രതീക്ഷയോടെ മണിയറയിലെത്തുമ്പോൾ അവിടെയും അപകടങ്ങൾ.

മുഖംമൂടിയെത്തി കുട്ടനെ ആക്രമിച്ച് വധുവിനെ കടത്തിക്കൊണ്ടു പോകുന്നു. ആദ്യ പകുതിയിൽ ഇതേ സ്വപ്നം നാലഞ്ചു തവണ ആവർത്തിക്കുന്നു.പിറ്റേന്ന് കാലത്ത് ഉണരുമ്പോൾ ഇതേ സംഭവം വീണ്ടും ആവർത്തിക്കും. ആദ്യ സ്വപ്നത്തിൽ ഒരാൾ മാത്രമായിരുന്നു മുഖംമൂടിയെങ്കിൽ നാലാം സ്വപ്നത്തിൽ മുഖം മൂടികളുടെ എണ്ണം നാലാകും.

ഈ സംഭവങ്ങൾ കുട്ടൻ്റെ ജീവിതത്തിൽ തുടർച്ചയായി സംഭവിക്കുന്ന ലൂപ്പായി മാറുന്നു.ഏറെ ആശിച്ച ആദ്യരാത്രി കൈയ്യെത്തും ദൂരത്ത് നഷ്ടമാകുന്നു. കുട്ടൻ്റെ ജീവിതം ഭ്രാന്തമായ അവസ്ഥയിലേക്ക് വീഴുന്നു.കുരുക്കഴിച്ച് ലൂപ്പിൽ നിന്നും രക്ഷപ്പെടാൻ കുട്ടൻ നടത്തുന്ന ജീവന്മരണ പോരാട്ടമാണ് രണ്ടാം പകുതി.കൂട്ടിന് ഉറ്റ സുഹൃത്ത് ആൻ്റി കുഞ്ഞുമുണ്ട് (ഗണപതി).

ഇവരുടെ അന്വേഷണം വധുവിൻ്റെ നാടായ കണ്ടനാട്ടിലേക്ക് നീളുന്നു.ആദ്യ രാത്രിയിൽ മുഖം മൂടികൾ തേടിയെത്തുന്നത് കുട്ടനെയോ, അതോ ശർമ്മിളയെയോ? ലൂപ്പിൽ നിരന്തരം പൊളിയുന്ന കല്യാണവും ആദ്യരാത്രിയും യഥാർത്ഥത്തിൽ നടക്കുമോ? ഇതിനുള്ള ഉത്തരമാണ് ചിത്രത്തിൻ്റെ രണ്ടാം പകുതി.

ആദ്യ പകുതിയിൽ ഒരേ സ്വപ്നം ഒരു മണിക്കൂറോളം ആവർത്തിച്ച്, ആവർത്തിച്ച് നാലഞ്ചു തവണ പ്രേക്ഷകന് കാണേണ്ടി വരും. രണ്ട് മണിക്കൂർ രണ്ട് മിനിറ്റ് ദൈർഘ്യമുള്ള ചിത്രത്തിൻ്റെ ഏറിയ ഭാഗവും ഒരേ സ്വപ്നത്തിൻ്റെ ടൈം ലൂപ്പ് ആവർത്തനമാണ്.വധു ശർമ്മിളയും ഈ സ്വപ്നത്തിലുണ്ടെങ്കിലും കുട്ടനാണ് കേന്ദ്ര കഥാപാത്രം.

ഇവരുടെ വിവാഹം പല തവണ ആവർത്തിക്കുന്നുണ്ടെങ്കിലും ആ രംഗങ്ങൾക്ക് ജീവനില്ല. വില്ലൻ ടൈഗർ എന്ന ശേഖരൻ കുട്ടിയുടെ (ഷൈൻ ടോം ചാക്കോ ) വൈകിയുള്ള രംഗ പ്രവേശനത്തിലും ടൈം ലൂപ്പിൽ നടക്കുന്ന സംഭവങ്ങളുമായി അയാൾക്കുള്ള ബന്ധത്തിലും കൃത്രിമത്വം അനുഭവപ്പെടും. അഴകിയ രാവണിലെ കുട്ടി ശങ്കരനെ പോലെ നാട്ടിലേക്ക് തിരിച്ചു വരുന്ന ശേഖരൻ കുട്ടിയും വലിയ ദാദയാണ്.

“വെറുത്ത്, വെറുത്ത്, വെറുപ്പിൻ്റെ അവസാനം സ്നേഹിക്കുമെന്ന ” ഡയലോഗും കേൾക്കാം.
ക്ലൈമാക്സിലെ ഏറ്റുമുട്ടൽ ലോകേഷ് കനഗ രാജിൻ്റെ കാർത്തി ചിത്രം കൈതിയെ ഓർമ്മിപ്പിക്കും. ക്ലൈമാക്സിലെ എറ്റുമുട്ടലിലേക്ക് പെട്ടെന്നുള്ള മാറ്റം പ്രേക്ഷകരുമായി കണക്ട് ആകുന്നില്ല. ചിത്രത്തിൻ്റെ ഒന്നാം പകുതിയാണ് കൂടുതൽ രസകരം.

രണ്ടാം പകുതി കുട്ടൻ ടൈം ലൂപ്പിൽ അകപ്പെട്ടതിൻ്റെ കാരണങ്ങളെക്കുറിച്ചുള്ള അന്വേഷണമാണ്. കുട്ടൻ്റെ വീടും പരിസരവും നാട്ടിൻ പുറവുമുൾപ്പെടെ പ്രേക്ഷകർക്ക് പരിചിതമായ ഒരന്തരീക്ഷത്തിൽ ടൈം ലൂപ്പ് കൊണ്ടുവരുന്നതിൽ തിരക്കഥാകൃത്തുക്കളായ മനുവും സോണിയും വിജയിച്ചു. എങ്കിലും ആദ്യ പകുതിയിലെ സ്വപ്നത്തിൻ്റെ ആവർത്തനത്തിൽ ചിലപ്പോഴെങ്കിലും വിരസത അനുഭവപ്പെടും. കോമഡിയിലെ ടൈമിംഗ് കൊണ്ട് അത് മറികടക്കാനാണ് സംവിധായകൻ്റെ ശ്രമം.

സജിൻ.ഗോപു അവതരിപ്പിച്ച പൈങ്കിളിയിലെ സുകുവിൻ്റെയും പൊന്മാനിലെ മാരിയാനോയുടെയും ഒരു സങ്കരമാണ് ധൂമകേതുവിലെ കുട്ടൻ.മാസ്സും കോമഡിയും ഒരു പോലെ കൂടിച്ചേർന്ന കഥാപാത്രം. ആറ്റു നോറ്റിരുന്ന കല്യാണവും ആദ്യ രാത്രിയും ആവർത്തിച്ചു പൊളിയുന്നതിൻ്റെ അങ്കലാപ്പ് സജിൻ ഗോപു നന്നായി അവതരിപ്പിച്ചു.

നടൻ്റെ കോമഡി ടൈമിംഗ് മികച്ചതാണ്.മലയാള സിനിമയിലെ ‘നിത്യ വധു ‘നിഖിലാ വിമൽ ശർമ്മിളയെ ശ്രദ്ധേയമായി അവതരിപ്പിച്ചു.കുട്ടൻ്റെ അടുത്ത സുഹൃത്തിൻ്റെ വേഷത്തിൽ ഗണപതിയും  തിളങ്ങി. വില്ലൻ ശേഖരൻ കുട്ടി എന്ന ടൈഗറായി ‘ഹൈ എനർജി’ പ്രകടനമാണ് ഷൈൻ ടോം ചാക്കോ നടത്തിയിരിക്കുന്നത്.

വില്ലൻ്റെ പ്രധാന സഹായിയായി വന്ന സിദ്ധാർത്ഥ് ഭരതന് കാര്യമായൊന്നും ചെയ്യാനില്ല.കുട്ടന്റെ അമ്മയുടെ വേഷത്തിൽ മഞ്ജു പിള്ളയും, അമ്മാവനായി നിയാസ് ബക്കറും കഥാപാത്രങ്ങളെ ഭംഗിയാക്കി.’ സുര ക്വട്ടേഷൻ’ എന്ന പേരിൽ ഫോൺകോളിലെ രസകരമായ ശബ്ദ സാന്നിധ്യമായി സുരേഷ് കൃഷ്ണയും ചിത്രത്തിൽ എത്തുന്നുണ്ട്.

ടൈം ലൂപ്പിന് ലളിതമായ ഒരു ഭാഷ്യം നൽകാൻ സംവിധായകൻ സുധി മാഡിസൺ ശ്രമിച്ചിട്ടുണ്ട്. എന്നാൽ വിഷയത്തിൻ്റെ ആഴത്തിലേക്ക് പോയിട്ടില്ല. വിവേക് ഹർഷൻ്റെ എഡിറ്റിംഗും ജിൻ്റോ ജോർജ്ജിൻ്റെ ക്യാമറയും മികച്ചതാണ്. രംഗനാഥ് രവിയുടെ സൗണ്ട് ഡിസൈനിംഗും എടുത്തു പറയണം.

അങ്കിത് മേനോനാണ് സംഗീതം.തുടക്കത്തിലെ ഗാനം 80-കളിൽ രവീന്ദ്രൻ അഭിനയിച്ച മലയാള ചിത്രങ്ങളിലെ ഡിസ്കോ ഡാൻസ് രംഗങ്ങളെ ഓർമ്മിപ്പിക്കും.ഹാപ്പി അവേഴ്‌സ് എന്റര്‍റ്റെയ്മെൻ്റ്സ്, എ ആൻ്റ് എച്ച് എസ് പ്രൊഡക്ഷന്‍ ഹൗസ് എന്നിവയുടെ ബാനറില്‍ സമീര്‍ താഹിര്‍, ഷൈജു ഖാലിദ്, സജിന്‍ അലി, അബ്ബാസ് തിരുന്നാവായ എന്നിവര്‍ ചേര്‍ന്നാണ് ധൂമകേതു നിര്‍മ്മിച്ചത്.

——————————————————–

(കേരള കാർഷിക സർവ്വകലാശാലയുടെ തൃശൂർ വെളളാനിക്കര കാർഷിക കോളേജ് മുൻ പ്രൊഫസറാണ് ലേഖകൻ)
——————————————————————-
കൂടുതല്‍ വാര്‍ത്തകള്‍ക്കായി
http://www.newsboardindia.com
സന്ദര്‍ശിക്കുക