മുംബൈ : ദേശീയ രാഷ്ട്രീയത്തിലെ അനിശ്ചിതത്വങ്ങളും വരാനിരിക്കുന്ന ഭാരതീയ ജനതാ പാർട്ടി – കോൺഗ്രസ് ശക്തിപരീക്ഷണങ്ങളും ചർച്ചയാകുന്ന സാഹചര്യത്തിൽ, വൈദിക ജ്യോതിഷിയായ ആസ്ട്രോ ഷർമിഷ്ഠ എന്ന ഷർമിഷ്ഠ ദാസ് നടത്തുന്ന പ്രവചനങ്ങൾ രാഷ്ട്രീയ വൃത്തങ്ങളിൽ വീണ്ടും ശ്രദ്ധ നേടുന്നു.
അടുത്ത് നടക്കാനിരിക്കുന്ന ലോക്സഭാ തിരഞ്ഞെടുപ്പിന്റെ ഫലത്തെക്കുറിച്ചും എ ഐ സി സി ജനറൽ സെക്രട്ടറി പ്രിയങ്ക ഗാന്ധിയുടെ രാഷ്ട്രീയ ഭാവിയെക്കുറിച്ചുമുള്ള അവരുടെ പ്രവചനങ്ങൾ രാഷ്ട്രീയ നിരീക്ഷകർക്കിടയിൽ വലിയ ചർച്ചകൾക്ക് വഴിവെച്ചിട്ടുണ്ട്. വരാനിരിക്കുന്ന ലോക്സഭാ തിരഞ്ഞെടുപ്പിൽ ദേശീയ തലത്തിൽ ശക്തമായ ഭരണത്തുടർച്ചയ്ക്കോ അല്ലെങ്കിൽ ബി.ജെ.പി നേതൃത്വം നൽകുന്ന എൻ.ഡി.എ മുന്നണിക്ക് അധികാരം നിലനിർത്താനോ സഹായിക്കുന്ന ശക്തമായ രാജയോഗങ്ങൾ നിലനിൽക്കുന്നുണ്ടെന്നാണ് ഷർമിഷ്ഠയുടെ പ്രാഥമിക ജ്യോതിഷ വിലയിരുത്തൽ.
ഷർമിഷ്ഠ
എന്നിരുന്നാലും, പ്രതിപക്ഷ നിരയുടെ സ്വാധീനം മുൻപത്തേക്കാൾ ശക്തമാകുകയും ഭരണപക്ഷത്തിന് കൂടുതൽ കടുത്ത പോരാട്ടവും വെല്ലുവിളികളും നേരിടേണ്ടി വരികയും ചെയ്യും. ചില പ്രമുഖ സംസ്ഥാനങ്ങളിൽ ഉണ്ടാകുന്ന അപ്രതീക്ഷിത തിരിച്ചടികളും രാഷ്ട്രീയ സഖ്യങ്ങളിലെ വിള്ളലുകളും തിരഞ്ഞെടുപ്പ് ഫലങ്ങളെയും പുതിയ സർക്കാരിൻ്റെ ഘടനയെയും സ്വാധീനിക്കാൻ സാധ്യതയുണ്ട്.
പ്രിയങ്ക ഗാന്ധിയുടെ രാഷ്ട്രീയ ഭാവിയെക്കുറിച്ച് വളരെ പ്രാധാന്യമർഹിക്കുന്ന നിരീക്ഷണങ്ങളാണ് ഷർമിഷ്ഠ പങ്കുവെക്കുന്നത്. പ്രിയങ്കയുടെ ജാതകത്തിലെ വ്യാഴത്തിന്റെയും ശുക്രന്റെയും ഗ്രഹസ്ഥിതി അവർക്ക് വിശാലമായ ജനപ്രീതിയും ആകർഷണീയതയും നൽകുന്നു. കോൺഗ്രസ് പാർട്ടിക്കുള്ളിലും സംഘടനാ തലത്തിലും അവരുടെ സ്വാധീനം മുൻപത്തേക്കാൾ വർദ്ധിക്കുകയും ജനങ്ങളെ സ്വാധീനിക്കാനുള്ള കഴിവ് പ്രകടമാകുകയും ചെയ്യും.
പാർട്ടിയെ നയിക്കുന്നതിലും പ്രചാരണങ്ങൾക്ക് ചുക്കാൻ പിടിക്കുന്നതിലും അവർ മുൻനിരയിൽ തന്നെ ഉണ്ടാകും. എന്നാൽ, പ്രിയങ്ക ഗാന്ധി നേരിട്ട് ഭരണസിംഹാസനത്തിൽ എത്തുകയോ പ്രധാനമന്ത്രി പദവിയിലെത്തുകയോ ചെയ്യാനുള്ള ഗ്രഹ പിന്തുണ ജാതകപ്രകാരം വളരെ പരിമിതമാണെന്നാണ് ഷർമിഷ്ഠ വ്യക്തമാക്കുന്നത്. അതേസമയം, പ്രിയങ്ക മുഖ്യമന്ത്രി പദത്തിലെത്താൻ സാധ്യതയുണ്ടെന്നും അവർ പറയുന്നു. എന്നാൽ എതു സംസ്ഥാനത്തെ മുഖ്യമന്ത്രി എന്ന കാര്യം വെളിപ്പെടുത്തുന്നില്ല.
ജനശ്രദ്ധ നേടാനും രാഷ്ട്രീയ എതിരാളികൾക്ക് കടുത്ത വെല്ലുവിളി ഉയർത്താനും കഴിയുമെങ്കിലും, അത് പൂർണ്ണമായ തിരഞ്ഞെടുപ്പ് വിജയമായോ പ്രധാനമന്ത്രി സ്ഥാനമായോ മാറ്റിയെടുക്കാൻ പ്രതികൂലമായ ഗ്രഹദശകൾ തടസ്സമായി നിൽക്കും.ചുരുക്കത്തിൽ, കോൺഗ്രസിൻ്റെ പ്രധാന പ്രചാരകയും നിർണായക തീരുമാനങ്ങൾ എടുക്കുന്ന ശക്തികേന്ദ്രവുമായി പ്രിയങ്ക വളരുമെങ്കിലും, ഭരണപരമായ ഉയർന്ന പദവികളിൽ എത്താൻ തടസ്സങ്ങൾ തുടരുമെന്നാണ് ഷർമിഷ്ഠയുടെ കണക്കുകൂട്ടൽ.
പ്രധാനമന്ത്രി നരേന്ദ്ര മോദിയുടെ രാഷ്ട്രീയ യാത്രയിലെ അവസാന ഘട്ടവും ഏറ്റവും നിർണായകവുമായ ഒരു “വലിയ ദൗത്യം” വരാനിരിക്കുന്നുവെന്നാണ് ഷർമിഷ്ഠയുടെ പ്രധാന പ്രവചനം.മോദിയുടെ ജാതകത്തിലെ വൃശ്ചിക രാശി അധിഷ്ഠിത ഗ്രഹസ്ഥിതിയും ശനിയുടെ സ്വാധീനവും അദ്ദേഹത്തിന് കരുത്തേകുമെങ്കിലും, വരും കാലയളവിൽ അദ്ദേഹം ഭരണത്തിൽ നിന്ന് പടിപടിയായി മാറി ഒരു തത്ത്വചിന്തകൻ അല്ലെങ്കിൽ ഉപദേശകൻ എന്ന നിലയിലേക്ക് മാറിയേക്കാമെന്ന് അവർ സൂചിപ്പിക്കുന്നു.2029-ഓടെ സജീവ രാഷ്ട്രീയത്തിന് അപ്പുറമുള്ള മേഖല അദ്ദേഹം സ്വീകരിക്കാനും സാധ്യതയുണ്ട്.
കേന്ദ്ര ഭരണത്തിൽ കേന്ദ്ര ആഭ്യന്തര മന്ത്രി അമിത് ഷായുടെ തന്ത്രപരമായ സ്വാധീനം തുടർന്നും അതിശക്തമായി നിൽക്കുമെന്നാണ് ഷർമിഷ്ഠയുടെ കണ്ടെത്തൽ. സംഘടനാ തലത്തിലും ഭരണ തലത്തിലും ഏറ്റവും നിർണായക തീരുമാനങ്ങൾ എടുക്കുന്ന സൂത്രധാരനായി അദ്ദേഹം തുടരുമെങ്കിലും, ഭാവിയിലെ അധികാര കൈമാറ്റങ്ങളിൽ അപ്രതീക്ഷിതമായ വെല്ലുവിളികൾ അമിത് ഷായ്ക്ക് നേരിടേണ്ടി വരുമെന്നും ഗ്രഹ ചലനങ്ങൾ വ്യക്തമാക്കുന്നു.
വരാനിരിക്കുന്ന കാലയളവിൽ ഏറ്റവും കൂടുതൽ ശ്രദ്ധ നേടുക ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ആയിരിക്കുമെന്നാണ് ഷർമിഷ്ഠ അവകാശപ്പെടുന്നത്. ശക്തമായ കുജ-ഗുരു യോഗവും ദശാഗ്രഹ സ്ഥിതിയും യോഗിക്ക് രാഷ്ട്രീയത്തിൽ വലിയ മുന്നേറ്റം നൽകുന്നു.
വരാനിരിക്കുന്ന യു പി തിരഞ്ഞെടുപ്പിലെ കടുത്ത മത്സരങ്ങൾക്കും തടസ്സങ്ങൾക്കും ശേഷം, ദേശീയ രാഷ്ട്രീയത്തിന്റെ അമരത്തേക്ക് യോഗി ആദിത്യനാഥ് ഉയർന്നുവരാനുള്ള സാധ്യതകൾ വളരെ കൂടുതലാണ്.മോദിയുടെ പിൻഗാമിയായും പ്രധാനമന്ത്രി സ്ഥാനാർത്ഥിയായും ഉയരാവുന്ന ഏറ്റവും ശക്തമായ രാജയോഗം യോഗിയുടെ ജാതകത്തിലുണ്ടെന്ന് അവർ ചൂണ്ടിക്കാണിക്കുന്നു.
വിപരീത രാജയോഗത്തിൻ്റെ സ്വാധീനത്താൽ ജനശ്രദ്ധയും ജനപ്രീതിയും ഉയരുമെങ്കിലും ഭരണാധികാരം കൈയാളുന്നതിൽ ഗ്രഹ പ്രതികൂലതകൾ ലോക്സഭ പ്രതിപക്ഷ നേതാവ് രാഹുൽ ഗാന്ധിക്ക് തടസ്സമാകുന്നു. രാഹുലിൻ്റെ സ്വാധീനം വർദ്ധിക്കുമെങ്കിലും, വരാനിരിക്കുന്ന തിരഞ്ഞെടുപ്പുകളിൽ നേരിട്ട് പ്രധാനമന്ത്രി പദവിയിലെത്താൻ ആവശ്യമായ വ്യാഴത്തിൻ്റെയും രാഹുവിൻ്റെയും അനിവാര്യമായ പിന്തുണ അദ്ദേഹത്തിൻ്റെ ജാതകത്തിൽ പരിമിതമാണെന്ന് ഷർമിഷ്ഠ വിലയിരുത്തുന്നു.
പ്രിയങ്കയുടെ സാന്നിധ്യം പാർട്ടിയുടെ അടിത്തറ ശക്തിപ്പെടുത്താനും പൊതുജന ശ്രദ്ധ ആകർഷിക്കാനും സഹായിക്കുമെങ്കിലും, തിരഞ്ഞെടുപ്പ് വിജയങ്ങളിലേക്ക് അതിനെ മാറ്റിയെടുക്കുന്നതിൽ കടുത്ത ജ്യോതിഷപരമായ വെല്ലുവിളികൾ ഉണ്ടെന്നാണ് അവരുടെ വിലയിരുത്തൽ. വരാനിരിക്കുന്ന വർഷങ്ങളിൽ സഖ്യ രാഷ്ട്രീയത്തിലും പാർട്ടികളുടെ ഭരണ നേതൃത്വത്തിലും അപ്രതീക്ഷിത മാറ്റങ്ങൾക്ക് ഗ്രഹ സംക്രമണങ്ങൾ വഴിവെക്കുമെന്നും, നിലവിലെ പല രാഷ്ട്രീയ ധാരണകളും തകരുമെന്നുമാണ് ആസ്ട്രോ ഷർമിഷ്ഠ വ്യക്തമാക്കുന്നത്.
പാകിസ്ഥാൻ അധീന കശ്മീരിൻ്റെയും നേപ്പാളിൻ്റെയും ഒരു ഭാഗം ഇന്ത്യയിൽ ചേരാൻ സാധ്യതയുണ്ടെന്നും അവർ പ്രവചിക്കുന്നുണ്ട്. അതോടെ ഇന്ത്യയുടെ രാഷ്ടീയഭൂപടം മാറും എന്നാണ് അവർ പറയുന്നത്.
എയറോനോട്ടിക്കൽ എൻജിനീയറായ ഷർമിഷ്ഠ, മുംബൈയിലെ ഭാരതീയ വിദ്യാ ഭവനിൽ നിന്നാണ് ജ്യോതിഷത്തിൽ (ജ്യോതിർവിദ്) ബിരുദം പൂർത്തിയാക്കിയത്. ബി ജെ പിക്കാരുടെ ജ്യോതിഷി എന്ന് വിമർശകർ വിശേഷിപ്പിക്കുന്ന അവർക്ക് ഈ രംഗത്ത് 15 വർഷത്തെ പരിചയം ഉണ്ടെന്ന് അവരുടെ വെബ് സൈററ് അവകാശപ്പെടുന്നു.
ബോളിവുഡ് സിനിമാ താരങ്ങൾ, പ്രമുഖ രാഷ്ട്രീയ നേതാക്കൾ, വ്യവസായികൾ തുടങ്ങിയവർ ഇവരുടെ ഉപദേശങ്ങൾ സ്വീകരിക്കാറുണ്ട്.എന്നാൽ പേരുകൾ ഇവർ വെളിപ്പെടുത്താറില്ല.
എവിയേഷൻ മേഖലയിലെ വളർച്ചയ്ക്കൊപ്പം തന്നെ വലിയ വിമാന അപകടങ്ങൾ നടക്കുമെന്ന ഇവരുടെ പ്രവചനങ്ങൾ വലിയ തോതിൽ സാമൂഹിക മാധ്യമങ്ങളിൽ ശ്രദ്ധ നേടിയിട്ടുണ്ട്.
ബഹിരാകാശ സാങ്കേതികവിദ്യയിലും സാറ്റലൈറ്റ് എൻജിനീയറിംഗിലും വരുത്തുന്ന വൻ മുന്നേറ്റങ്ങളെക്കുറിച്ചും പ്രവചിച്ചിട്ടുണ്ട്. ഇന്ത്യയിലെയും ആഗോളതലത്തിലെയും പ്രധാന രാഷ്ട്രീയ അട്ടിമറികൾ, സാമ്പത്തിക പ്രതിസന്ധികൾ, ഗ്രഹങ്ങളുടെ ചലനങ്ങൾ മൂലമുണ്ടാകുന്ന ആഗോള സംഭവവികാസങ്ങൾ എന്നിവ മുൻകൂട്ടി പ്രവചിച്ചതിലൂടെയാണ് ഇവർ അറിയപ്പെടുന്നത്.
