തിരുവനന്തപുരം: ബുധനാഴ്ച മുതൽ കേരളത്തിൽ പ്രീ-മൺസൂൺ മഴ ശക്തമാകുമെന്ന് സൂചന. കേന്ദ്ര കാലാവസ്ഥാ വകുപ്പ് ഇക്കാര്യം പ്രവചിക്കുന്നു.
ഏപ്രിൽ 19, 20 തിയ്യതികളിൽ തിരുവനന്തപുരം മുതൽ ഇടുക്കി വരെയുള്ള ജില്ലകളിൽ നേരിയ മഴ പെയ്യും. 21ന് സംസ്ഥാനത്തെ എല്ലാ ജില്ലകളിലും നേരിയ മഴ ലഭിക്കും
ഇതിനകം തന്നെ പ്രീ മൺസൂൺ മഴ പല സംസ്ഥാനങ്ങളിലും ലഭിക്കുന്നുണ്ട്. കേരളത്തിന്റെ ചില ഭാഗങ്ങളിലും നേരിയ തോതിൽ മഴ കിട്ടുന്നുണ്ട്. ജൂൺ 1-നാണ് സാധാരണ മൺസൂൺ ആരംഭിക്കുക. ഇതിന് ഏകദേശം 40 ദിവസം മുമ്പ് പ്രീ-മൺസൂൺ മഴ എത്തും.
ഇത്തവണത്തെ തെക്ക്-പടിഞ്ഞാറൻ മൺസൂൺ വൈകില്ല. ജൂൺ 1-നാണ് സാധാരണ ഇടവപ്പാതി മഴ തുടങ്ങാറുള്ളത്. ഇത് കഴിഞ്ഞ പല വർഷങ്ങളിലും തെറ്റിയിരുന്നു. എന്നാൽ ഇത്തവണ ഇടവപ്പാതി മഴ കൃത്യമായി തുടങ്ങാൻ സാധ്യതയുണ്ട്.
കേരളമടക്കമുള്ള ദക്ഷിണേന്ത്യൻ സംസ്ഥാനങ്ങളിൽ കടുത്ത ചൂട് കാലാവസ്ഥ തുടരുകയാണ്. ബെംഗളൂരുവിൽ 36-38 ഡിഗ്രി വരെ താപനില ഉയർന്നു. കേരളത്തിൽ പാലക്കാട് ജില്ലയിൽ താപനില 40 ഡിഗ്രി വരെയായി.
സംസ്ഥാനത്ത് ഞായറാഴ്ചയും ഉയർന്ന താപനില തുടരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. പാലക്കാട് ജില്ലയിൽ 40 ഡിഗ്രി സെൽഷ്യസ് വരെയും, കൊല്ലം ജില്ലയിൽ 39 ഡിഗ്രി സെൽഷ്യസ് വരെയും, കോട്ടയം ജില്ലയിൽ 38 ഡിഗ്രി സെൽഷ്യസ് വരെയും, ആലപ്പുഴ, പത്തനംതിട്ട, എറണാകുളം, തൃശൂർ, മലപ്പുറം, കോഴിക്കോട്, കണ്ണൂർ, കാസറഗോഡ് ജില്ലകളിൽ 37 ഡിഗ്രി സെൽഷ്യസ് വരെയും, തിരുവനന്തപുരം ജില്ലയിൽ 36 ഡിഗ്രി സെൽഷ്യസ് വരെയും താപനില ഉയരാൻ സാധ്യതയെന്ന് കേന്ദ്ര കാലാവസ്ഥ വകുപ്പ് പറയുന്നു.
ഉയർന്ന താപനിലയും ഈർപ്പമുള്ള വായുവും തുടരും. മലയോര മേഖലകളിലൊഴികെ എല്ലാ ജില്ലകളിലും ചൂടും അസ്വസ്ഥതയുമുള്ള കാലാവസ്ഥയ്ക്ക് സാധ്യതയുണ്ട്. ചൂടുള്ള കാലാവസ്ഥയിൽ പകൽ 11 മണി മുതല് 3 മണി വരെയുള്ള സമയത്ത് നേരിട്ട് ശരീരത്തിൽ കൂടുതൽ സമയം തുടർച്ചയായി സൂര്യപ്രകാശം ഏൽക്കുന്നത് ഒഴിവാക്കണമെന്ന് കാലാവസ്ഥാ വകുപ്പ് മുന്നറിയിപ്പ് നൽകി.
