കോഴിക്കോട് : എം.ടി. വാസുദേവൻ നായരുടെ തിരക്കഥയായ ‘രണ്ടാമൂഴം’കന്നഡ നടനും നടനും സംവിധായകനുമായ ഋഷഭ് ഷെട്ടി ഒരുക്കുമെന്ന വാർത്തകൾ പുറത്ത് വരുന്നു.
കാന്താരയുടെ വിജയത്തോടെയാണ് ഋഷഭ് ഷെട്ടി പാൻ ഇന്ത്യൻ തലത്തിൽ ശ്രദ്ധിക്കപ്പെടുന്നത് .എം.ടിയുടെ ഏറ്റവും വലിയ സ്വപ്നങ്ങളിലൊന്നായിരുന്നു രണ്ടാമൂഴം സിനിമയാക്കി കാണണമെന്ന്.
പലരുമായി സിനിമയെക്കുറിച്ച് ചർച്ചകൾ നടത്തിയെങ്കിലും തീരുമാനമായിരുന്നില്ല. ഋഷഭിനെ രണ്ടാമൂഴം ഏൽപ്പിക്കാൻ എംടി താൽപ്പര്യപ്പെട്ടിരുന്നു എന്നാണ് വിവരം. ഋഷഭ് ഷെട്ടിയുമായി ഒന്നരവർഷം മുൻപ് അദ്ദേഹം പ്രാരംഭ ചർച്ചകൾ നടത്തിയിരുന്നെന്നാണ് എം ടിയുടെ കുടുംബവുമായി അടുത്ത വൃത്തങ്ങൾ പറയുന്നത്.
ഏറെ താമസിയാതെ സംവിധായകൻ കോഴിക്കോട്ടെത്തുമെന്നും സിനിമയുടെ പ്രഖ്യാപനം നടത്തുമെന്നും കുടുംബവുമായി അടുത്ത വൃത്തങ്ങൾ വ്യക്തമാക്കുന്നു. എം ടി ആഗ്രഹിച്ചതു പോലെ രണ്ടു ഭാഗങ്ങളായാകും ചിത്രം ഒരുക്കുക.
രണ്ടാമൂഴം സിനിമയാക്കാനായി മുൻപ് പലരും ശ്രമിച്ചിരുന്നു. ഇടക്കാലത്ത് സംവിധായകൻ ശ്രീകുമാർ മേനോനുമായി കരാർ ഒപ്പിട്ടിരുന്നെങ്കിലും നിർമാണ പ്രവർത്തനങ്ങൾ നീണ്ടുപോയതിനാൽ എംടി കരാറിൽനിന്ന് പിൻവാങ്ങി. തിരക്കഥ തിരിച്ചുവാങ്ങുകയും ചെയ്തു
