പ്രമുഖ സംവിധായകൻ പി.ടി.കുഞ്ഞുമുഹമ്മദ് ലൈംഗിക പീഡനക്കേസിൽ

തിരുവനന്തപുരം: പ്രമുഖ സിനിമ സംവിധായകനും ഇടതു മുന്നണി മുൻ എം എൽ എയുമായ പി.ടി. കുഞ്ഞുമുഹമ്മദ് ലൈംഗിക പീഡനക്കേസിൽ കുടുങ്ങി.

കേരള അന്താരാഷ്ട്ര ചലച്ചിത്രമേളയുടെ (ഐഎഫ്എഫ്‌കെ) സെലക്ഷന്‍ സ്‌ക്രീനിങ്ങിനിടെ ലൈംഗികാതിക്രമം നടത്തിയെന്ന പരാതിയില്‍ അദ്ദേഹത്തിൻ്റെ പേരിൽ കേസെടുത്തു.ഹോട്ടല്‍ മുറിയില്‍ വെച്ച് ലൈംഗികാതിക്രമം നടത്തിയെന്നാണ് ചലച്ചിത്ര പ്രവര്‍ത്തകയുടെ ആരോപണം.

കഴിഞ്ഞമാസം മുഖ്യമന്ത്രിക്കാണ് ചലച്ചിത്ര പ്രവര്‍ത്തക പരാതി നല്‍കിയത്. തനിക്ക് ലഭിച്ച പരാതി മുഖ്യമന്ത്രി പോലീസിന് കൈമാറുകയായിരുന്നു. തുടര്‍ന്ന് പോലീസ് പരാതിക്കാരിയുടെ മൊഴി രേഖപ്പെടുത്തി. പരാതിയില്‍ പറഞ്ഞ അതേ കാര്യങ്ങള്‍ തന്നെയാണ് പോലീസിനോടും ചലച്ചിത്ര പ്രവര്‍ത്തക പറഞ്ഞത്.

ഐഎഫ്എഫ്‌കെയിലേക്കുള്ള മലയാള സിനിമകള്‍ തിരഞ്ഞെടുക്കാനുള്ള ജൂറി അംഗമാണ് കുഞ്ഞുമുഹമ്മദ്. പരാതിക്കാരിയും ജൂറിയായിരുന്നു. തിരുവനന്തപുരത്താണ് സ്‌ക്രീനിങ് നടന്നത്. ഇവര്‍ താമസിച്ചിരുന്ന നഗരമധ്യത്തിലെ ഹോട്ടലില്‍ വെച്ചാണ് അപമര്യാദയായി പെരുമാറിയതെന്ന് പരാതിയില്‍ പറയുന്നു.

ഹോട്ടലിലെ സിസിടിവി ദൃശ്യങ്ങള്‍ പരിശോധിച്ചപ്പോള്‍ കുഞ്ഞുമുഹമ്മദും പരാതിക്കാരിയും ഹോട്ടലിലുണ്ടായിരുന്നുവെന്ന് പോലീസ് സ്ഥിരീകരിച്ചു. ഇതോടെയാണ് കേസെടുത്തത്. ഭാരതീയ ന്യായ സംഹിതയിലെ 74, 75 (1) എന്നീ വകുപ്പുകള്‍ പ്രകാരമാണ് കേസ്.

1994 ലും 1996 ലും ഗുരുവായുർ മണ്ഡലത്തിൽ നിന്ന് സി.പി.എം.സ്വതന്ത്ര എം.എൽ.എ ആയി തിരഞ്ഞെടുക്കപ്പെട്ടിട്ടുണ്ട്.

അദ്ദേഹം സം‌വിധാനം ചെയ്ത മഗ്‌രിബ്(1993), ഗർഷോം(1998), പരദേശി(2007) എന്നീ ചിത്രങ്ങൾ നിരൂപകപ്രശംസയും പുരസ്കാരങ്ങളും നേടിയവയായിരുന്നു. അശ്വത്ഥമാവ്, സ്വരൂപം, പുരുഷാർഥം എന്നീ ചലച്ചിത്രങ്ങളുടെ നിർമ്മാണത്തിൽ പങ്കാളിയായികൊണ്ടാണ്‌ ഈ രംഗത്തേക്ക് വരുന്നത്.

ഉ പ്പ് എന്ന ചിത്രത്തിൽ അഭിനയിച്ചിട്ടുണ്ട്.’അറിയപ്പെടാത്ത മലപ്പുറം’ എന്ന ഒരു ഡോക്യുമെന്‍ററിയും കുഞ്ഞുമുഹമ്മദ് നിർമ്മിച്ചു.

ടെലിവിഷൻ അവതാരകൻ എന്ന നിലയിലും പ്രാഗാത്ഭ്യം തെളിയിച്ചു അദ്ദേഹം. കൈരളി ടിവിയിൽ അവതരിപ്പിച്ചു വരുന്ന പ്രവാസലോകം എന്ന പരിപാടി നിരവധി എപ്പിസോഡുകൾ പിന്നിട്ടു. കാണാതാവുന്ന പ്രവാസി ഇന്ത്യക്കാരെ കണ്ടെത്തുന്നതിനുള്ള പരിപാടിയാണിത്.

കേരാള പ്രവാസി സംഘത്തിന്റെ സംസ്ഥാന അധ്യക്ഷനാണ്‌ . ഗൾഫിൽ പ്രവാസിയായി കഴിഞ്ഞതിനാലാവാം കുഞ്ഞുമുഹമ്മദിൻ്റെ സിനിമകളും പ്രവർത്തനങ്ങളും പ്രവാസികളുമായി ഏറെ ബന്ധമുള്ളതായത്.

പ്രമുഖ സ്വാതന്ത്ര്യസമര സേനാനിയും മലബാറിലെ കോൺഗ്രസ്സ് നേതാവുമായിരുന്ന മുഹമ്മദ് അബ്ദുറഹ്മാൻ സാഹിബിനെ കുറിച്ചുള്ള വീരപുത്രൻ എന്ന ചിത്രമാണ്‌ അദ്ദേഹത്തിൻ്റെ പുതിയ ചിത്രം.വീരപുത്രനുശേഷം ബർസക് എന്ന ചിത്രം പൂർത്തിയായി വരുന്നു. ഏറ്റവും പുതിയ ചിത്രം ‘വിശ്വാസപൂർവം മൻസൂർ’ പണിപ്പുരയിലാണ്.

ഏറ്റവും നല്ല നവാഗത സം‌വിധായകനുള്ള സംസ്ഥാന ചലച്ചിത്ര അവാർഡ്-മഗ്‌രിബ് എന്ന ചിത്രത്തിലൂടെ നേടി.ഏറ്റവും നല്ല കഥക്കുള്ള സംസ്ഥാന ചലച്ചിത്രപുരസ്കാരം-പരദേശിയുടെ കഥയ്ക്കായിരുന്നു.