ക്ഷത്രിയൻ .
ജനങ്ങളോട് എത്രകണ്ട് ചേർന്ന് നിൽക്കാൻ കഴിയുന്നുവോ, അത്രയും അടുത്ത് നിൽക്കുമ്പോഴാണ് പൊതുപ്രവർത്തകൻ വിജയിക്കുന്നത്. അത്തരമൊരു ചേർന്ന് നിൽപാണ് കൂത്തുപറമ്പിലെ വീട്ടമ്മയോട് അവിടുത്തെ നഗരസഭാംഗം കാണിച്ചത്.
അടുക്കളഭാഗത്ത് മീൻ വൃത്തിയാക്കുകയായിരുന്ന സ്ത്രീയുടെ കഴുത്തിൽനിന്ന് മാല പൊട്ടിച്ചോടിയതിനെ ആ അർഥത്തിലാണ് വിലയിരുത്തേണ്ടത്. മറിച്ച് മാല പൊട്ടിച്ചോടിയതിനെ അപരാധമായും അതിൻ്റെ പേരിൽ നഗരസഭാംഗത്തിൻ്റെ പാർട്ടിയുടെ പേരിൽ അവഹേളനവും ചൊരിയുന്നത് കൊടുംപാതകമാണ്.
അദ്ധ്വാനിക്കുന്നവരോടും ഭാരം വലിക്കുന്നവരോടുമൊക്കെ ചേർന്ന് നിൽക്കണമെന്ന് പണ്ടേക്കും പണ്ടേ പാർട്ടി പഠിപ്പിച്ചിട്ടുണ്ട്. അതുകൊണ്ടാണ് വീട്ടമ്മയുടെ വീട്ടിൽ കയറി ആ അമ്മയുടെ കഴുത്തിൽക്കിടന്ന മാല തന്നെ പൊട്ടിച്ചോടിയത്.
അത്രയ്ക്കുമങ്ങ് ചേർത്തുനിർത്തി എന്നുസാരം. അങ്ങനെയൊക്കെയുള്ള ചേർത്തുനിൽപ്പ് തന്നെയാണ് കാറൽ മാർക്സ് മുത്തപ്പനും ലെനിൻ ചിറ്റപ്പനും സ്റ്റാലിൻ അപ്പൂപ്പനുമൊക്കെ മനസിൽകണ്ടതെന്ന് വേണം നിരീക്ഷിക്കാൻ.
ചേർത്തുനിർത്തപ്പെടുന്നവർ അദ്ധ്വാനിക്കുന്നവർ ആയിരിക്കണമെന്നത് സൂക്ഷ്മതയോടെയാണ് കൂത്തുപറമ്പിലെ സഖാവ് നടപ്പാക്കിയത്. വീട്ടമ്മ മീൻ വൃത്തിയാക്കുകയായിരുന്നുവല്ലോ.
മീൻ വൃത്തിയാക്കുക എന്നതിനെയും അദ്ധ്വാനപ്പട്ടികയിൽ ചേർത്ത് വായിച്ചാൽ മതി. അദ്ധ്വാന സിദ്ധാന്തവും ചേർത്തുനിർത്തലുമൊന്നും മനസിൽപ്പിടിക്കാത്തവരാണെങ്കിൽ അത്രയ്ക്കങ്ങ് വിശ്വസിക്കേണ്ട.
ബൂർഷാസികളോട് ഒരു കരുണയും പാടില്ലെന്ന് പാർട്ടി എപ്പോഴും പറയുന്നതാണല്ലോ. സ്വർണവില വാണം പോലെ ഉയരുമ്പോഴും കഴുത്തിൽ സ്വർണമണിഞ്ഞു നിൽക്കുകയെന്നത് ബൂർഷ്വാ ചിന്ത തന്നെയല്ലേ.
അത്തരം ബൂർഷ്വാസികളെ പ്രയാസപ്പെടുത്തുക എന്നത് വിപ്ലവപ്പാർട്ടിയുടെ കടമയും. കൂത്തുപറമ്പിലെ സഖാവും അത്രമാത്രമേ ചെയ്തിട്ടുള്ളൂ.അതിനാണ് പാർട്ടിയിൽനിന്ന് പുറത്താക്കലും പടിയടച്ച് പിണ്ഡം വെക്കലുമൊക്കെ.
അല്ലെങ്കിൽത്തന്നെ സ്വർണവും പാർട്ടിയും തമ്മിൽ വലിയ ലോഹ്യത്തിലായിട്ട് കുറച്ചായതല്ലേ. നയതന്ത്ര സ്വർണം, ഈത്തപ്പഴത്തിൽ സ്വർണം, ദ്വാരപാലക സ്വർണം, കട്ട്ള സ്വർണം എന്നിത്യാദി എത്രയെത്ര സ്വർണമാണ് അന്തരീക്ഷത്തിൽ തിളങ്ങിനിൽക്കുന്നത്.
അതിനിടയിൽ ഒരു വീട്ടമ്മയുടെ കഴുത്തിൽക്കിടന്ന സ്വർണവും അത് പൊട്ടിച്ചോടിയ സഖാവിൻ്റെ ചെയ്തിയും അങ്ങനെയങ്ങ് ചർച്ച ചെയ്യേണ്ട വിഷയമാണോ. ഏമ്പ്രാനൽപം കട്ടുമുടിച്ചാൽ അമ്പലവാസികളൊക്കെ കക്കും എന്നാണല്ലോ കുഞ്ചൻ നമ്പ്യാർ ചൊല്ലിയിട്ടുള്ളത്.
നമ്പ്യാരാശാൻ ഉദ്ദേശിച്ചത് നമ്മുടെ ശബരിമലപ്പോററിയെ ആണോ ? ആ, ആർക്കറിയാം. അതോ വേറെ വലിയ ആരെയോ ? അയ്യപ്പനറിയാം. തെളിച്ച് പറയില്ലെന്ന് മാത്രം.
