ന്യൂഡൽഹി : കഴിഞ്ഞ ഒന്നരപ്പതിറ്റാണ്ടായി രാഷ്ട്രീയത്തിൽ തികച്ചും അജയ്യനായി നിലകൊണ്ട പ്രധാനമന്ത്രി നരേന്ദ്ര മോദി, തന്‍റെ ഭരണകാലത്തെ ഏറ്റവും കടുപ്പമേറിയ രാഷ്ട്രീയ, സാമ്പത്തിക പരീക്ഷണങ്ങളെയാണ് അഭിമുഖീകരിക്കുന്നത്.
രാജ്യത്ത് അതിവേഗം വളരുന്ന യുവജന പ്രക്ഷോഭം, അമേരിക്കയുമായുള്ള നയതന്ത്ര ബന്ധത്തിലുണ്ടായ വിള്ളലുകൾ, വൻതോതിലുള്ള വിദേശ മൂലധന പിൻവലിക്കൽ, രൂപയുടെ മൂല്യത്തിലുണ്ടാകുന്ന തുടർച്ചയായ ഇടിവ് എന്നിങ്ങനെ ഒരേസമയം ഉയര്‍ന്നുവന്ന പ്രതിസന്ധികൾ മോദി സർക്കാരിൻ്റെ ഭരണസ്ഥിരതയ്ക്ക് വലിയ ഭീഷണിയായി മാറിയിരിക്കുകയാണ്.
തുടക്കത്തിൽ ഒരു പരിഹാസരൂപേണ ഉയർന്നുവന്ന ‘കോക്ക്റോച്ച് ജനത പാർട്ടി’ എന്ന യുവജന കൂട്ടായ്മയാണ് കേന്ദ്ര സർക്കാരിനെ പ്രതിരോധത്തിലാക്കിയിരിക്കുന്നത്. മുൻപ് നീററ് പരീക്ഷാ ചോദ്യപേപ്പർ ചോർച്ചയുമായി ബന്ധപ്പെട്ട പ്രക്ഷോഭത്തിലൂടെ കേന്ദ്ര വിദ്യാഭ്യാസ മന്ത്രിയുടെ രാജിയ്ക്ക് വഴിവെച്ച ഈ യുവജന മുന്നേറ്റം, ഇപ്പോൾ ശ്രദ്ധ കേന്ദ്രീകരിച്ചിരിക്കുന്നത് കേന്ദ്ര തിരഞ്ഞെടുപ്പ് കമ്മീഷണർക്കെതിരെയാണ്.
രാജ്യത്തെ വോട്ടർ പട്ടിക പുതുക്കലിൻ്റെ ഭാഗമായി കഴിഞ്ഞ വർഷം മുതൽ 13 കോടിയോളം പേരെ വോട്ടർ പട്ടികയിൽ നിന്ന് ഒഴിവാക്കിയ നടപടിയാണ് ഇപ്പോഴത്തെ പ്രതിഷേധങ്ങൾക്ക് ആധാരം. ആഗോള മാധ്യമങ്ങളും ദേശീയ വാർത്താ ഏജൻസികളും ഈ കണക്ക് റിപ്പോർട്ട് ചെയ്തിട്ടുണ്ട്
ഇതിൽ മരണപ്പെട്ടവരും താമസം മാറിയവരും ഉൾപ്പെടുന്നുണ്ടെങ്കിലും, ദശലക്ഷക്കണക്കിന് യഥാർത്ഥ വോട്ടർമാർ തഴയപ്പെട്ടു എന്ന ആരോപണമാണ് കോൺഗ്രസ് നേതൃത്വത്തിലുള്ള പ്രതിപക്ഷ സഖ്യവും പ്രക്ഷോഭകരും ഉയർത്തുന്നത്.
ഇതിനെത്തുടർന്ന് രാജ്യതലസ്ഥാനമായ ന്യൂഡൽഹിയിൽ നൂറുകണക്കിന് പ്രതിഷേധക്കാരെ തടഞ്ഞുവെക്കുകയും ഇൻ്റർനെറ്റ്, ഗതാഗത നിയന്ത്രണങ്ങൾ ഏർപ്പെടുത്തുകയും ചെയ്യേണ്ടി വന്നു. സുപ്രിം കോടതി ഇടപെടലുകളിലേക്കും അത് നയിക്കുന്നു.
അന്താരാഷ്ട്ര തലത്തിലും നയതന്ത്ര വൃത്തങ്ങളിലും ഈ പ്രതിസന്ധി വലിയ ചർച്ചകൾക്ക് വഴിവെച്ചിട്ടുണ്ട്. സാമ്പത്തിക വിശകലന സ്ഥാപനമായ ബി.എം.ഐയുടെ വിലയിരുത്തൽ അനുസരിച്ച്, സംഘടനാ ശേഷിയും പൊതുജന പിന്തുണയും വർദ്ധിച്ചതോടെ ഈ പ്രക്ഷോഭം വരും ആഴ്ചകളിൽ കൂടുതൽ ശക്തമാകാനാണ് സാധ്യത.
മുൻകാലങ്ങളിലെ പ്രതിപക്ഷ പ്രക്ഷോഭങ്ങളിൽ നിന്ന് വ്യത്യസ്തമായി ദേശീയതയും ഭരണഘടനാ അവകാശങ്ങളും മുൻനിർത്തി യുവതലമുറ നടത്തുന്ന ഈ പ്രതിഷേധം മോദിയുടെ രാഷ്ട്രീയ പ്രതിച്ഛായയെ കാര്യമായി ബാധിച്ചിട്ടുണ്ടെന്നാണ് ഗാർഡിയൻ, അൽ ജസീറ തുടങ്ങിയ പ്രമുഖ ആഗോള മാധ്യമങ്ങൾ നിരീക്ഷിക്കുന്നത്,
ആഭ്യന്തര രാഷ്ട്രീയത്തിലെ ഈ കൊടുങ്കാറ്റിനൊപ്പം അമേരിക്കയുമായുള്ള നയതന്ത്ര ബന്ധത്തിലെ വിള്ളലുകളും സർക്കാരിനെ വലയ്ക്കുന്നുണ്ട്. മാസങ്ങളായി നടന്നു വന്ന വ്യാപാര ചർച്ചകൾ വഴിമുട്ടി നിൽക്കുകയാണെന്ന് കേന്ദ്ര ധനമന്ത്രി നിർമ്മലാ സീതാരാമൻ തുറന്നുസമ്മതിക്കുന്നു.
റഷ്യയിൽ നിന്ന് വൻതോതിൽ ക്രൂഡ് ഓയിൽ വാങ്ങുന്ന ഇന്ത്യ ഉൾപ്പെടെയുള്ള രാജ്യങ്ങൾക്ക് 100 ശതമാനം വരെ തീരുവ ചുമത്താൻ അമേരിക്കൻ പ്രസിഡന്‍റിന് അധികാരം നൽകുന്ന പുതിയ നിയമനിർമ്മാണമാണ് ഇതിന് പ്രധാന കാരണമായി ചൂണ്ടിക്കാണിക്കപ്പെടുന്നത്. ഇതോടെ അമേരിക്കക്കെതിരെ മൃദുസമീപനം കൈവിട്ട് പരസ്യമായ കടുത്ത നിലപാടുകളിലേക്ക് കടക്കാൻ കേന്ദ്ര സർക്കാർ നിർബന്ധിതരായിരിക്കുകയാണ്.
അതേസമയം, സാമ്പത്തിക രംഗത്ത് ഏഴ് ശതമാനത്തിലധികം വളർച്ചാ നിരക്കുമായി ഇന്ത്യ മുന്നേറുന്നുണ്ടെങ്കിലും ബാഹ്യമായ ഘടകങ്ങൾ വിപണിയെ പ്രതികൂലമായി ബാധിക്കുന്നുണ്ട്. അന്താരാഷ്ട്ര വിപണിയിൽ എണ്ണവില ഉയർന്നുനിൽക്കുന്നതും കൃത്രിമബുദ്ധി മേഖലയിൽ ഇന്ത്യയിൽ നിക്ഷേപാവസരങ്ങൾ പരിമിതമാണെന്ന വിലയിരുത്തലും കാരണം വിദേശ നിക്ഷേപകർ വൻതോതിൽ പണം പിൻവലിക്കുകയാണ്.
ഇത് ഇന്ത്യൻ രൂപയുടെ മൂല്യത്തിൽ ചരിത്രപരമായ ഇടിവാണ് ഉണ്ടാക്കിയിരിക്കുന്നത്. അടിയന്തരമായി പലിശ നിരക്കുകൾ ഉയർത്തിയിട്ടും രൂപയുടെ തകർച്ച തടയാൻ സാധിക്കാത്തതിനെ തുടർന്ന് റിസർവ് ബാങ്കിന് കൂടുതൽ വിപണി ഇടപെടലുകൾ നടത്തേണ്ടി വന്നു.
ഇതിനുപുറമേ, സെപ്റ്റംബറിൽ പണപ്പെരുപ്പ നിരക്ക് 5.54 ശതമാനമായും ഭക്ഷ്യ പണപ്പെരുപ്പം 7.74 ശതമാനമായും ഉയർന്നത് സാധാരണക്കാരുടെ ജീവിതച്ചെലവ് ക്രമാതീതമായി വർദ്ധിപ്പിച്ചിട്ടുണ്ട്. വരുന്ന മാസങ്ങളിൽ റിസർവ് ബാങ്ക് പലിശ നിരക്കുകൾ ഇനിയും ഉയർത്താൻ നിർബന്ധിതരാകും എന്നാണ് സാമ്പത്തിക വിദഗ്ദ്ധരുടെ പ്രവചനം.
ചുരുക്കത്തിൽ, തെരഞ്ഞെടുപ്പുകളിൽ ബി.ജെ.പി നേടുന്ന രാഷ്ട്രീയ വിജയങ്ങൾക്കപ്പുറമാണ് കാര്യങ്ങൾ. അസംതൃപ്തരായ യുവാക്കളുടെ തെരുവ് പ്രക്ഷോഭങ്ങളും അമേരിക്കൻ സമ്മർദ്ദങ്ങളും തളരുന്ന സാമ്പത്തിക സൂചികകളും ഒരേസമയം ഉന്നയിക്കുന്ന ചോദ്യങ്ങൾക്ക് വ്യക്തമായ മറുപടി നൽകാൻ സാധിച്ചില്ലെങ്കിൽ, നരേന്ദ്ര മോദി സർക്കാരിന് വരും നാളുകൾ കൂടുതൽ കടുപ്പമേറിയതായിരിക്കും.
