ന്യൂഡൽഹി : അമേരിക്കയിലെപ്പോലെ ഭാരതത്തിലും സ്വകാര്യ ആരോഗ്യ ഇൻഷുറൻസ് മേഖല ലാഭം മാത്രം ലക്ഷ്യമിട്ട് മുന്നോട്ട് പോകുന്നതിൻ്റെ വേഗം കൂടുന്നു. ഇത് സാധാരണക്കാരെയും ഇടത്തരക്കാരെയും ദുരിതത്തിലാക്കുന്നു.
രാജ്യത്തെ ആരോഗ്യ ഇൻഷുറൻസ് വിപണി അതിവേഗം വളരുകയാണെന്നാണ് കണക്കുകൾ വ്യക്തമാക്കുന്നത് ഒരു വർഷം ഏകദേശം 1 ലക്ഷം കോടി രൂപയ്ക്ക് മുകളിലാണ് ഈ മേഖലയിലൂടെ സമാഹരിക്കപ്പെടുന്ന പ്രീമിയം തുക. രാജ്യത്തെ മൊത്തം ജനറൽ ഇൻഷുറൻസ് വരുമാനത്തിന്റെ വൻ പങ്കും ആരോഗ്യ ഇൻഷുറൻസിൽ നിന്നാണ് ലഭിക്കുന്നത്.
ഇൻഷുറൻസ് പരിരക്ഷയുള്ളവരുടെ എണ്ണംഇന്ത്യയിൽ ഏകദേശം 50 കോടിയിലധികം ആളുകൾക്ക് ഏതെങ്കിലും തരത്തിലുള്ള ആരോഗ്യ ഇൻഷുറൻസ് പരിരക്ഷയുണ്ട്. ആയുഷ്മാൻ ഭാരത് പോലുള്ള സൗജന്യ പദ്ധതികൾ വഴി വലിയൊരു വിഭാഗം ജനങ്ങൾക്ക് ഇൻഷുറൻസ് ലഭിക്കുന്നു.
രാജ്യത്തെ 35-40 ശതമാനത്തോളം ആളുകൾക്ക് മാത്രമാണ് സ്വകാര്യ പോളിസികളോ അല്ലെങ്കിൽ തൊഴിൽദാതാക്കൾ നൽകുന്ന ഗ്രൂപ്പ് ഇൻഷുറൻസോ ഉള്ളത്. ഇപ്പോഴും 60 ശതമാനത്തിലധികം ആളുകൾ സ്വന്തം കയ്യിൽ നിന്ന് പണം മുടക്കിയാണ് ചികിത്സ തേടുന്നത്.
ആരോഗ്യ ഇൻഷുറൻസ് കമ്പനികളുടെ സാമ്പത്തിക സ്ഥിതി മിശ്രിതമാണ്.പ്രീമിയം വരുമാനവും ചികിത്സാ ചെലവുകളും തമ്മിൽ തട്ടിച്ചുനോക്കുമ്പോൾ കമ്പനികൾ നേരിട്ട് ലാഭത്തിലല്ല. അതായത്, പിരിച്ചെടുക്കുന്ന പ്രീമിയത്തേക്കാൾ ഉയർന്ന തുക ക്ലെയിമുകൾക്കായും നടത്തിപ്പ് ചെലവുകൾക്കുമായും കമ്പനികൾക്ക് ചെലവാകുന്നുണ്ട്.
എന്നാൽ, ആളുകളിൽ നിന്ന് പിരിച്ചെടുക്കുന്ന പണം ബോണ്ടുകളിലും ഓഹരികളിലും നിക്ഷേപിച്ച് ലഭിക്കുന്ന പലിശയും ലാഭവും ഉപയോഗിച്ച് ഇൻഷുറൻസ് കമ്പനികൾ പ്രവർത്തനം ലാഭകരമാക്കുന്നു. സ്റ്റാർ ഹെൽത്ത്, നിവ ബുപ്പ, കെയർ ഹെൽത്ത് തുടങ്ങിയ മുൻനിര കമ്പനികൾ പ്രതിവർഷം ലാഭം രേഖപ്പെടുത്തുന്നുണ്ട്.
വിദേശ കമ്പനികൾ ഇന്ത്യയിലെ ആശുപത്രികൾ വാങ്ങുന്ന പ്രവണത തുടരുകയാണ്. വിദേശത്തെ വൻകിട പ്രൈവറ്റ് ഇക്വിറ്റി ഫണ്ടുകളും നിക്ഷേപ സ്ഥാപനങ്ങളും ഇന്ത്യയിലെ പ്രമുഖ സ്വകാര്യ ആശുപത്രി ശൃംഖലകളുടെ ഓഹരികൾ വൻതോതിൽ വാങ്ങിക്കൂട്ടുന്നുണ്ട്.മെഡിക്കൽ ടൂറിസവും സ്വകാര്യ ചികിത്സാ ആവശ്യങ്ങളും ഉയരുന്നതാണ് ഇവരെ ആകർഷിക്കുന്നത്.
സിംഗപ്പൂരിലെ ടെമാസെക് ഹോൾഡിംഗ്സ്, പ്രമുഖ ആശുപത്രി ശൃംഖലയായ മണിപ്പാൽ ഹോസ്പിറ്റൽസിൻ്റെ ഭൂരിഭാഗം ഓഹരികളും സ്വന്തമാക്കി. അമേരിക്കയിലെ ടിപിജി ക്യാപിറ്റൽ,മണിപ്പാൽ ഹോസ്പിറ്റൽസിലും, മദർഹുഡ്, സഹ്യാദ്രി ഹോസ്പിറ്റൽസ് എന്നിവയിലും വൻതോതിൽ നിക്ഷേപം നടത്തിയിട്ടുണ്ട്.
സിംഗപ്പൂർ ജിഐസി എന്ന സ്ഥാപനം, എഷ്യൻ ഇൻസ്റ്റിട്ട്യൂട്ട് ഓഫ് നെഫ്രോളജി ആന്റ് യൂറോളജി പോലെയുള്ള പ്രമുഖ സ്പെഷ്യാലിററി ആശുപത്രികളുടെ ഭൂരിഭാഗം ഓഹരികളും ടിപിജിയുമായി ചേർന്ന് സ്വന്തമാക്കി. സിംഗപ്പൂരിലെയും അമേരിക്കയിലെയും പ്രൈവറ്റ് ഇക്വിറ്റി കമ്പനികൾ ഡോ. അഗർവാൾസ് ഐ ഹോസ്പിററലിൽ ഇതിൽ വലിയ തോതിൽ നിക്ഷേപം നടത്തിയിട്ടുണ്ട്.
മാക്സ് ഹെൽത്ത്കെയർ, കെയർ ഹോസ്പിറ്റൽസ്: വിദേശ പ്രൈവറ്റ് ഇക്വിറ്റി ഫണ്ടുകളായ കെകെആർ , ബ്ലാക്ക്സ്റ്റോൺ എന്നിവ മുൻകാലങ്ങളിൽ ഈ ആശുപത്രികളുടെ ഓഹരികൾ വാങ്ങുകയും പിന്നീട് വൻ ലാഭത്തിൽ വിൽക്കുകയും ചെയ്തിട്ടുണ്ട്.
ഈ സാഹചര്യത്തിലാണ് ആശുപത്രിയിൽ പ്രവേശിപ്പിക്കുന്ന രോഗികളുടെ ചെലവുകൾ സംബന്ധിച്ച ബില്ലുകൾ വെട്ടിക്കുറയ്ക്കുക, നിരസിക്കപ്പെടുക, സങ്കീർണ്ണമായ കടലാസ് ജോലികൾ, ചികിത്സയ്ക്കായി മണിക്കൂറുകളോളം അനുമതിക്കായി കാത്തിരിക്കേണ്ടി വരിക തുടങ്ങിയ പരാതികൾ വ്യാപകമാവുന്നത്.
രോഗിയുടെ ക്ഷേമത്തേക്കാൾ സാമ്പത്തിക ലാഭത്തിനും സങ്കീർണ്ണമായ നിയമങ്ങൾക്കും മുൻഗണന നൽകുന്ന ഒരു വ്യവസ്ഥിതി എങ്ങനെയാണ് ഒരു സമൂഹത്തെ മുഴുവൻ ബാധിക്കുന്നത് എന്ന് ഇത് വ്യക്തമാക്കുന്നു.
ഭാരതത്തിലെ ആരോഗ്യ സംരക്ഷണ മേഖല ഒരു മിശ്രിത സ്വഭാവമുള്ളതാണ്. ഒരു വശത്ത് സർക്കാരിൻ്റെ സൌജന്യ അല്ലെങ്കിൽ കുറഞ്ഞ ചെലവിലുള്ള മെഡിക്കൽ കോളേജുകളും പൊതുജനാരോഗ്യ കേന്ദ്രങ്ങളും നിലനിൽക്കുന്നു. മറു വശത്ത് വേഗത്തിൽ വളരുന്ന സ്വകാര്യ ആശുപത്രി ശൃംഖലകളും ഇൻഷുറൻസ് കമ്പനികളും പ്രവർത്തിക്കുന്നു.
എന്നാൽ ഭാരതത്തിലെ പ്രധാന വ്യത്യാസം ഇൻഷുറൻസ് പരിരക്ഷയുള്ള ആളുകളുടെ എണ്ണത്തിലാണ്. അമേരിക്കയിൽ ജോലിദാതാവ് വഴിയോ അല്ലാതെയോ ഭൂരിഭാഗം ആളുകൾക്കും ഇൻഷുറൻസ് ഉള്ളപ്പോൾ, ഭാരതത്തിൽ ജനസംഖ്യയുടെ വലിയൊരു വിഭാഗം ഇപ്പോഴും വ്യക്തിഗത ഇൻഷുറൻസ് പരിരക്ഷയ്ക്ക് പുറത്താണ്.
രോഗം വരുമ്പോൾ സ്വന്തം കൈയിൽ നിന്ന് പണം ചെലവഴിച്ച് ചികിത്സിക്കേണ്ടി വരുന്ന അവസ്ഥ ഭാരതത്തിൽ വളരെ കൂടുതലാണ്.ഒരു കുടുംബത്തിലെ പ്രധാന വ്യക്തിക്ക് ഉണ്ടാകുന്ന ഗുരുതരമായ രോഗം ആ കുടുംബത്തെ ദാരിദ്ര്യത്തിലേക്ക് തള്ളിയിടാൻ ഭാരതത്തിൽ കാരണമാകുന്നു. ഇതിനെ മറികടക്കാൻ കേന്ദ്ര-സംസ്ഥാന സർക്കാരുകൾ സാമ്പത്തികമായി പിന്നാക്കം നിൽക്കുന്നവർക്കായി വിവിധ ആരോഗ്യ പദ്ധതികൾ നടപ്പിലാക്കുന്നുണ്ടെങ്കിലും, അതിന്റെ ആനുകൂല്യം രാജ്യത്തെ മുഴുവൻ ജനങ്ങളിലേക്കും കൃത്യമായി എത്തുന്നില്ല.
സ്വകാര്യ മേഖലയിലെ ചികിത്സാച്ചെലവുകളുടെ കാര്യത്തിലും വലിയ സമാനത കാണാം. വൻകിട ആശുപത്രികളിൽ അനാവശ്യ പരിശോധനകൾ നടത്തുക, രോഗികളെ ദീർഘകാലം കിടത്തി ചികിത്സിക്കുക തുടങ്ങിയ പ്രവണതകൾ രോഗിയുടെ ആരോഗ്യം മെച്ചപ്പെടുത്തുന്നതിനേക്കാൾ സ്ഥാപനത്തിന്റെ വരുമാനം വർദ്ധിപ്പിക്കാൻ ലക്ഷ്യമിട്ടുള്ളതാണ്. ഇത് ഇൻഷുറൻസ് കമ്പനികളും ആശുപത്രികളും തമ്മിലുള്ള ഒരു സാമ്പത്തിക ഇടപാടായി മാറുകയും സാധാരണക്കാരൻ ഇതിനിടയിൽപ്പെട്ട് ബുദ്ധിമുട്ടുകയും ചെയ്യുന്നു.
ലോകത്തിലെ മറ്റു രാജ്യങ്ങളിലെ ആരോഗ്യ പരിപാലന സംവിധാനങ്ങളുമായി താരതമ്യം ചെയ്യുമ്പോൾ വ്യത്യസ്തമായ പല മാതൃകകളും കാണാൻ സാധിക്കും.
യുകെ തുടങ്ങിയ രാജ്യങ്ങളിൽ നിലനിൽക്കുന്ന സംവിധാനം പൂർണ്ണമായും സർക്കാരിൻ്റെ നികുതിപ്പണത്തെ ആശ്രയിച്ചുള്ളതാണ്. ഇവിടെ പൗരന്മാർക്ക് ചികിത്സ പൂർണ്ണമായും സൌജന്യമായി ലഭിക്കുന്നു. ഇൻഷുറൻസ് കമ്പനികളുടെയോ ആശുപത്രികളുടെയോ ലാഭം പരിഗണിക്കാതെ രോഗിയുടെ ആരോഗ്യത്തിനാണ് പ്രാധാന്യം നൽകുന്നത്. എങ്കിലും ആവശ്യത്തിന് ഡോക്ടർമാരുടെ അഭാവവും ചികിത്സയ്ക്കായി മാസങ്ങളോളം കാത്തിരിക്കേണ്ടി വരുന്നതും ഇതിന്റെ പ്രധാന പോരായ്മയാണ്.
കാനഡയിലെ രീതിയിൽ ആശുപത്രി സൌകര്യങ്ങളും ചികിത്സയും സർക്കാരാണ് സാമ്പത്തികമായി പിന്തുണയ്ക്കുന്നത്. സ്വകാര്യ ഇൻഷുറൻസ് കമ്പനികൾക്ക് അടിസ്ഥാന ചികിത്സകളിൽ വലിയ പങ്ക് ഇതിൽ ഇല്ല. ഇത് സാധാരണക്കാർക്ക് സാമ്പത്തിക ഭാരം ഉണ്ടാക്കുന്നില്ലെങ്കിലും അടിയന്തരമല്ലാത്ത ശസ്ത്രക്രിയകൾക്കും വിദഗ്ദ്ധ ചികിത്സകൾക്കും ദീർഘകാല കാത്തിരിപ്പ് അനിവാര്യമായി വരുന്നു.
ജർമ്മനി പോലുള്ള രാജ്യങ്ങളിൽ നിർബന്ധിത ആരോഗ്യ ഇൻഷുറൻസ് രീതിയാണ് പിന്തുടരുന്നത്. വരുമാനത്തിന് അനുസരിച്ച് ജീവനക്കാരനും ജോലി നൽകുന്ന സ്ഥാപനവും ചേർന്ന് ഇൻഷുറൻസിലേക്ക് പണം നൽകുന്നു. ലാഭേച്ഛയില്ലാതെ പ്രവർത്തിക്കുന്ന ഇൻഷുറൻസ് ഫണ്ടുകളാണ് ഇതിന് നേതൃത്വം നൽകുന്നത്. അതിനാൽ അമേരിക്കയിലെപ്പോലെ രോഗിയെ ചൂഷണം ചെയ്യുന്ന സാഹചര്യം അവിടെ കുറവാണ്.
ഡെൻമാർക്ക്, സ്വീഡൻ തുടങ്ങിയ രാജ്യങ്ങളിൽ ഏറ്റവും മികച്ച പൊതുജനാരോഗ്യ സംവിധാനമാണുള്ളത്. ഉയർന്ന നികുതി നിരക്കാണ് ഈ രാജ്യങ്ങളിൽ ഉള്ളതെങ്കിലും, പൗരന്മാരുടെ ജനനം മുതൽ മരണം വരെയുള്ള മുഴുവൻ ആരോഗ്യ ചെലവുകളും സർക്കാർ തന്നെ വഹിക്കുന്നു. സാമ്പത്തിക ബാധ്യത ഭയന്ന് അവിടെ ആർക്കും ചികിത്സ വേണ്ടെന്നുവെക്കേണ്ടി വരുന്നില്ല.
ചികിത്സാ നിരക്കുകളിലെ സുതാര്യതയും, നിയമങ്ങളുടെ ലളിതവൽക്കരണവും, സർക്കാരിൻ്റെ ശക്തമായ ഇടപെടലുകളും ഉണ്ടെങ്കിൽ മാത്രമേ രോഗിയെ ഒരു ഉപയോക്താവായി മാത്രം കാണുന്ന അവസ്ഥയ്ക്ക് മാറ്റം വരൂ. ലാഭത്തിന് പകരം ജനങ്ങളുടെ ആരോഗ്യത്തിന് പ്രാധാന്യം നൽകുന്ന ഒരു വ്യവസ്ഥിതിയാണ് ഭാരതത്തിനും ആവശ്യമുള്ളതെന്ന് വിദഗ്ധർ ചൂണ്ടിക്കാണിക്കുന്നു.
