ന്യൂഡൽഹി : ജനാധിപത്യ സ്ഥാപനങ്ങളുടെ സ്വതന്ത്ര സ്വഭാവം നഷ്ടപ്പെടുന്നതിലും വോട്ടവകാശവും പൗരത്വവും തമ്മിൽ കൂട്ടിക്കുഴച്ച് പൗരന്മാരുടെ മൗലികാവകാശങ്ങൾ ഇല്ലാതാക്കുന്നതിലും മുൻ കേന്ദ്ര ആഭ്യന്തര സെക്രട്ടറി ജി.കെ. പിള്ളയും മുൻ ലോക്സഭാ സെക്രട്ടറി ജനറൽ പി.ഡി.ടി. ആചാരിയും ആശങ്ക പ്രകടിപ്പിക്കുന്നു.
ജനാധിപത്യത്തിന്റെ ഭാവി, ജനസംഖ്യാ കണക്കെടുപ്പ് , വോട്ടർ പട്ടികയുടെ പ്രത്യേക തീവ്ര പുനഃപരിശോധന (എസ്.ഐ.ആർ ),പൗരത്വ വിഷയങ്ങൾ എന്നിവയെ മുൻനിർത്തി ഇരു ഭരണഘടനാ വിദഗ്ധരും നടത്തുന്ന അപഗ്രഥനങ്ങൾ രാഷ്ട്രീയ-സാമൂഹിക മണ്ഡലങ്ങളിൽ വലിയ ചർച്ചകൾക്ക് വഴിതുറക്കുകയാണ്.
രാജ്യത്തിന്റെ ജനാധിപത്യ അടിത്തറയെ തകരാറിലാക്കുന്ന രീതിയിൽ ഭരണഘടനാ സ്ഥാപനങ്ങളും വിവരശേഖരണ സംവിധാനങ്ങളും ഉപയോഗിക്കപ്പെടുകയാണെന്ന് ജി.കെ. പിള്ള ചൂണ്ടിക്കാണിക്കുന്നു.
ജനസംഖ്യാ കണക്കെടുപ്പ്, പ്രത്യേക വോട്ടർ പുനഃപരിശോധന , ഡെമോഗ്രാഫിക് കമ്മീഷൻ എന്നിവ വെവ്വേറെയല്ലെന്നും, ജനങ്ങളെ ഭരണഘടനാപരമായ അവകാശങ്ങളിൽ നിന്ന് പുറന്തള്ളാൻ ലക്ഷ്യമിട്ടുള്ള വ്യക്തമായ ആസൂത്രണത്തിന്‍റെ ഭാഗമാണെന്നും അദ്ദേഹം വിലയിരുത്തുന്നു.
മുൻകാലങ്ങളിൽ വികസന പദ്ധതികൾക്കും തന്ത്രങ്ങൾക്കും കൃത്യമായ വിവരങ്ങൾ നൽകിയിരുന്ന വിശ്വാസയോഗ്യമായ ഒരു പ്രക്രിയയായിരുന്നു സെൻസസ്. എന്നാൽ മുൻകൂട്ടി നിശ്ചയിച്ച രാഷ്ട്രീയ ലക്ഷ്യങ്ങൾ കൈവരിക്കുന്നതിനും പാർലമെൻ്റ് മണ്ഡല പുനർനിർണയത്തിന് ആവശ്യമായ വിവരങ്ങൾ കൃത്രിമമായി നിർമിക്കുന്നതിനും വേണ്ടി സെൻസസിനെ ഉപയോഗപ്പെടുത്തുന്നത് അപകടകരമായ സൂചനയാണെന്ന് അദ്ദേഹം അഭിപ്രായപ്പെടുന്നു.
എസ്.ഐ.ആർ പ്രക്രിയയിലൂടെ ലക്ഷക്കണക്കിന് ആളുകൾക്ക് വോട്ടവകാശം നിഷേധിക്കപ്പെടുമ്പോൾ അത് ജനാധിപത്യത്തിന്റെ സുതാര്യതയെ ചോദ്യം ചെയ്യുന്നു. കൃത്യമായ ചർച്ചകളും കൂടിയാലോചനകളും ഇല്ലാതെയും സിവിൽ സമൂഹത്തെ ഒഴിവാക്കിയും നടത്തുന്ന ഇത്തരം പരിഷ്കാരങ്ങൾ അന്താരാഷ്ട്ര തലത്തിൽ ഇന്ത്യൻ സ്ഥിതിവിവരക്കണക്കുകൾക്കുണ്ടായിരുന്ന പവിത്രതയും വിശ്വാസ്യതയും നഷ്ടപ്പെടുത്തും.
ഭരണഘടന നൽകുന്ന പരിരക്ഷകൾ അവഗണിക്കപ്പെടുകയും നീതിപീഠങ്ങൾ പോലുമുള്ള സ്വതന്ത്ര സ്ഥാപനങ്ങൾ പൗരന്മാരുടെ മൗലികാവകാശങ്ങൾ സംരക്ഷിക്കുന്നതിൽ പരാജയപ്പെടുകയും ചെയ്യുന്നത് ഭയപ്പെടുത്തുന്ന സാഹചര്യമാണെന്ന്പിള്ള ഓർമ്മിപ്പിക്കുന്നു.
എന്നാൽ രാഷ്ട്രീയ നേതാക്കളെ വശത്താക്കാൻ സാധിച്ചാലും പോരാട്ടവീര്യമുള്ള ജനങ്ങളെ നിശ്ശബ്ദരാക്കാൻ കഴിയില്ലെന്നും, പ്രാദേശിക തലത്തിൽ ജനകീയ സമിതികൾ രൂപീകരിച്ച് ഇത്തരം അനീതികളെ ചെറുത്തുതോൽപ്പിക്കണമെന്നും അദ്ദേഹം ആഹ്വാനം ചെയ്യുന്നു.
ഇതോടൊപ്പം തന്നെ, പാർലമെൻ്ററി കാര്യങ്ങളിലും ഭരണഘടനാനിർവഹണത്തിലും ദീർഘകാല പരിചയമുള്ള പി.ഡി.ടി. ആചാരിയും എസ്.ഐ.ആർ അടക്കമുള്ള പൗരത്വ-വോട്ടർ പുനഃപരിശോധനാ നടപടികളിലെ ഭരണഘടനാ ലംഘനങ്ങൾ ചൂണ്ടിക്കാണിക്കുന്നു.
വോട്ടവകാശവും പൗരത്വവും പരിശോധിക്കാനുള്ള നിർദ്ദിഷ്ട നടപടികൾ ഭരണഘടനയുടെ അനുച്ഛേദം 324 നൽകുന്ന നിർദ്ദേശങ്ങൾക്ക് വിരുദ്ധമായി മാറുകയാണെന്ന് അദ്ദേഹം വ്യക്തമാക്കുന്നു. ജനപ്രാതിനിധ്യ നിയമവും തിരഞ്ഞെടുപ്പ് കമ്മീഷന്റെ അധികാര പരിധിയും കൃത്യമായി നിർവചിക്കപ്പെട്ടിട്ടുള്ള രാജ്യത്ത്, വോട്ടർ പട്ടിക പുതുക്കലിന്റെ മറവിൽ സാധാരണക്കാരായ ജനങ്ങൾക്ക് തങ്ങളുടെ പൗരത്വം തെളിയിക്കാൻ കടുപ്പമേറിയ ഉപാധികൾ വച്ചുനീട്ടുന്നത് തികച്ചും ജനാധിപത്യവിരുദ്ധമാണ്.
ഭരണഘടന ഉറപ്പുനൽകുന്ന സമത്വവും നീതിയും ഉറപ്പാക്കേണ്ടത് തിരഞ്ഞെടുപ്പ് കമ്മീഷന്റെ ചുമതലയാണ്. എന്നാൽ ഭരണകൂടത്തിന്‍റെ രാഷ്ട്രീയ അജണ്ടകൾക്ക് വഴങ്ങി പൗരന്മാരുടെ പ്രാഥമിക വോട്ടവകാശം നിഷേധിക്കുന്ന രീതിയിലേക്ക് ഇത്തരം പ്രക്രിയകൾ മാറുന്നത് അപകടകരമാണെന്ന് ആചാരി മുന്നറിയിപ്പ് നൽകുന്നു.
പൗരത്വം എന്നത് കേവലം രേഖകളുടെ കൈമാറ്റമല്ലെന്നും അത് ഒരു വ്യക്തിക്ക് രാജ്യവുമായുള്ള അടിസ്ഥാനപരമായ ഭരണഘടനാ ബന്ധമാണെന്നും ഇരു വിദഗ്ധരും അടിവരയിടുന്നു. ഭൂരിപക്ഷ രാഷ്ട്രീയത്തിന്‍റെ സ്വാധീനത്തിൽ ഭരണഘടനാ സ്ഥാപനങ്ങളുടെ സ്വതന്ത്രമായ പ്രവർത്തന സ്വാതന്ത്ര്യം കവർന്നെടുക്കപ്പെടുന്നത് ഇന്ത്യയുടെ വൈവിധ്യത്തിനും മതേതരത്വത്തിനും ഭീഷണിയാണ്.
ജനങ്ങളുടെ സജീവമായ പങ്കാളിത്തവും ജാഗ്രതയും കൊണ്ട് മാത്രമേ വരുംകാലങ്ങളിൽ രാജ്യത്തിന്റെ ജനാധിപത്യ മൂല്യങ്ങളെയും പൗരാവകാശങ്ങളെയും സംരക്ഷിച്ചു നിർത്താൻ സാധിക്കൂ എന്ന വലിയ മുന്നറിയിപ്പാണ് പിള്ളയുടെയും ആചാരിയുടെയും വാക്കുകൾ നൽകുന്നത്.
