ന്യൂഡൽഹി: രാജ്യത്തെ സ്കൂൾ വിദ്യാഭ്യാസ രംഗത്ത് വിപ്ലവകരമായ മാറ്റങ്ങൾ ലക്ഷ്യമിട്ട്, 2026-27 അധ്യയന വർഷം മുതൽ മൂന്നാം ക്ലാസ് മുതൽ നിർമിത ബുദ്ധി എന്ന ആർട്ടിഫിഷ്യൽ ഇൻ്റെലിജൻസ് പഠനം നിർബന്ധമാക്കാൻ കേന്ദ്ര സർക്കാർ തീരുമാനിച്ചു.
മാറുന്ന ലോകത്തെ സാങ്കേതിക വെല്ലുവിളികൾ നേരിടാൻ വിദ്യാർത്ഥികളെ ചെറുപ്രായത്തിൽ തന്നെ സജ്ജരാക്കുക എന്നതാണ് ഈ പദ്ധതിയുടെ പ്രധാന ലക്ഷ്യം. 2020-ലെ ദേശീയ വിദ്യാഭ്യാസ നയത്തിനും , 2023-ലെ നാഷണൽ കരിക്കുലം ഫ്രെയിംവർക്കിനും അനുസൃതമായാണ് പുതിയ സിലബസ് തയാറാക്കുന്നത്. സിബിഎസ്ഇ , എൻസിഇആർടി എന്നിവയുടെ സഹകരണത്തോടെ മദ്രാസ് ഐഐടിയിലെ വിദഗ്ധരടങ്ങുന്ന സമിതിയാണ് പാഠ്യപദ്ധതിക്ക് രൂപം നൽകുന്നത്.
പ്രാഥമിക ഘട്ടത്തിൽ (ക്ലാസ് 3 മുതൽ 5 വരെ) സങ്കീർണ്ണമായ കോഡിംഗിന് പകരം കമ്പ്യൂട്ടേഷണൽ തിങ്കിംഗ്, ലോജിക്കൽ റീസണിംഗ് തുടങ്ങിയ അടിസ്ഥാന കാര്യങ്ങൾക്കാണ് മുൻഗണന നൽകുന്നത്. ദൈനംദിന ജീവിതത്തിൽ എഐ എങ്ങനെ പ്രവർത്തിക്കുന്നുവെന്നും അതിന്റെ ധാർമ്മികമായ ഉപയോഗം എങ്ങനെയാണെന്നും ലളിതമായ ഉദാഹരണങ്ങളിലൂടെ കുട്ടികളെ പഠിപ്പിക്കും.
2025 ഡിസംബറോടെ ഇതിനാവശ്യമായ ഡിജിറ്റൽ പാഠപുസ്തകങ്ങളും അധ്യാപകർക്കുള്ള പരിശീലന സഹായികളും പൂർത്തിയാകും. ഏകദേശം ഒരു കോടിയോളം അധ്യാപകർക്ക് ഇതിനായി പ്രത്യേക പരിശീലനം നൽകാനാണ് മന്ത്രാലയം ലക്ഷ്യമിടുന്നത്.
ഇന്ത്യയിൽ കേരളം ഉൾപ്പെടെയുള്ള സംസ്ഥാനങ്ങൾ ഇതിനകം തന്നെ എഐ പഠനത്തിന് തുടക്കം കുറിച്ചിട്ടുണ്ട്. കേരളത്തിൽ കഴിഞ്ഞ അധ്യയന വർഷം തന്നെ ഏഴാം ക്ലാസ് ഐടി പാഠപുസ്തകങ്ങളിൽ എഐ ഉൾപ്പെടുത്തിയിരുന്നു. കൂടാതെ ഹൈസ്കൂൾ തലത്തിലും എഐ അധിഷ്ഠിത പാഠഭാഗങ്ങൾ നിലവിലുണ്ട്.
തമിഴ്നാടും കർണാടകയും സമാനമായ രീതിയിൽ സ്കൂൾ തലത്തിൽ എഐ പ്രോത്സാഹിപ്പിക്കുന്നുണ്ട്. ആഗോളതലത്തിൽ നോക്കുകയാണെങ്കിൽ ചൈനയിലെ ഹാങ്ചൗ നഗരം പ്രൈമറി ക്ലാസ് മുതൽ എഐ നിർബന്ധമാക്കിയ ആദ്യ നഗരങ്ങളിൽ ഒന്നാണ്.
സിംഗപ്പൂർ, ജപ്പാൻ, ഫിൻലാൻഡ്, യുഎസ് തുടങ്ങിയ രാജ്യങ്ങളും തങ്ങളുടെ വിദ്യാഭ്യാസ പദ്ധതിയിൽ എഐയും ഡിജിറ്റൽ ലിറ്ററസിയും ഇതിനകം തന്നെ മുൻനിരയിൽ എത്തിച്ചിട്ടുണ്ട്. സിംഗപ്പൂരിലെ സ്കൂളുകളിൽ അധ്യാപനത്തിനും പഠനത്തിനുമായി എഐ അധിഷ്ഠിത പ്ലാറ്റ്ഫോമുകൾ ഔദ്യോഗികമായിത്തന്നെ ഉപയോഗിച്ചു വരുന്നു.
നിർമിത ബുദ്ധിയുടെ അടിസ്ഥാന തത്വങ്ങൾ കുട്ടികൾക്ക് മനസ്സിലാക്കി കൊടുക്കുന്നതിലൂടെ ഭാവിയിലെ തൊഴിൽ വിപണിയിൽ ഇന്ത്യൻ വിദ്യാർത്ഥികൾക്ക് ആഗോള തലത്തിൽ മികച്ച അവസരങ്ങൾ ഉറപ്പാക്കാൻ ഈ നീക്കം സഹായിക്കുമെന്ന് കേന്ദ്ര വിദ്യാഭ്യാസ മന്ത്രാലയം പ്രതീക്ഷിക്കുന്നു.
