ഡോ ജോസ് ജോസഫ്..
“ടൈഗർ കാ ഹുക്കും.”വിഗ്രഹക്കടത്തുകാരെ വേട്ടയാടാൻ മുൻ ജയിലർ ‘ടൈഗർ’ മുത്തുവേൽ പാണ്ഡ്യൻ വീണ്ടുമെത്തുന്നു.
“ഈ 50 വർഷത്തിനിടയിൽ എന്നെ തകർക്കാൻ എണ്ണമറ്റ ശ്രമങ്ങൾ പലരും നടത്തിയിട്ടുണ്ട്, പക്ഷേ ആർക്കും അതിന് സാധിച്ചിട്ടില്ല” എന്ന പഞ്ച് ഡയലോഗോടെ സ്റ്റൈൽ മന്നൻ കളം നിറഞ്ഞാടുന്ന ജയിലർ 2 പൂർണ്ണമായും സൂപ്പർസ്റ്റാർ രജനികാന്ത് ആരാധകരെ തൃപ്തിപ്പെടുത്തുന്ന ചിത്രമാണ്.
ലോജിക്കില്ല.ഡാർക്ക് കോമഡിയും ഫാമിലി ഡ്രാമയും മാസ്സ് മസാലയും ചേർത്ത് രജനികാന്തിൻ്റെ സൂപ്പർസ്റ്റാർഡത്തിൻ്റെ ആഘോഷം പരമാവധി പ്രേക്ഷകരിൽ എത്തിച്ചു കൊണ്ടാണ് നെൽസൺ ദിലിപ്കുമാർ ജയിലർ 2 സംവിധാനം ചെയ്തിരിക്കുന്നത്. രണ്ട് മണിക്കൂർ 45 മിനിറ്റ് ദൈർഘ്യമുള്ള ചിത്രം മുഴുവനും രജ്നികാന്തിൻ്റെ ജയിലറെ കേന്ദ്രീകരിച്ചാണ് നീങ്ങുന്നത്.
ഒന്നാം ഭാഗത്തിൽ കാമിയോ റോളുകളിലെത്തി ആവേശം വിതച്ച മാത്യൂസും (മോഹൻലാൽ ),കാംദേവും (ജാക്കി ഷ്റോഫ്), നരസിംഹയും (ശിവ്രാജ് കുമാർ) രണ്ടാം ഭാഗത്തിലുമെത്തുന്നുണ്ട്. ഹൃത്വിക് റോഷനും പ്രധാന വേഷത്തിൽ എത്തുന്നു.എന്നാൽ ഹൃത്വിക് റോഷൻ്റെ ‘റോഡി’ക്കൊഴികെ മറ്റ് സൂപ്പർ താരങ്ങൾക്കൊന്നും കാര്യമായ സ്ക്രീൻ പ്രസൻസില്ല.
ഒന്നാം ഭാഗത്തിൽ പ്രേക്ഷകർ ആവേശത്തോടെ സ്വീകരിച്ച മോഹൻലാലിൻ്റെ മാത്യൂസിനെ ജയിലർ രണ്ടിൽ മുത്തുവേലിൻ്റെ പ്രഭാവത്തിനു മുന്നിൽ തീർത്തും അപ്രസക്തനാക്കി. സംവിധായകൻ മോഹൻലാലിലെ ഒതുക്കി എന്നു തന്നെ പറയണം.ജയിലറിൽ കൊടും വില്ലൻ വർമ്മനായി നിറഞ്ഞാടിയത് വിനായകനായിരുന്നു.
ജയിലർ രണ്ടിൽ ആദ്യ പകുതിയിൽ വർമ്മൻ്റെ ആത്മസുഹൃത്തായ ദിലീപാണ് (സുരാജ് വെഞ്ഞാറമ്മൂട് ) പ്രധാന വില്ലൻ.കോമഡി ആസ്വദിക്കുന്ന ദിലീപ് വർമ്മനെ പോലെ കൊടും ക്രൂരനല്ല. കേരളവും പ്രധാന ലൊക്കേഷനായി വരുന്ന ജയിലർ രണ്ടിൽ സുരാജിന് പുറമെ അന്ന രേഷ്മ രാജൻ, ഷംന കാസിം, വിനായകൻ, കോട്ടയം നസീർ, ഹക്കിം ഷാജഹാൻ, സുനിൽ സുഖദ, സുജിത് ശങ്കർ ,രാജേഷ് മാധവൻ തുടങ്ങിയ മലയാളി താരങ്ങളുടെ വലിയ നിര തന്നെ പ്രധാന വേഷങ്ങളിൽ എത്തുന്നുണ്ട്.
ആദ്യ പകുതിയിൽ തിരക്കഥാകൃത്തു കൂടിയായ സംവിധായകൻ കഥയുടെ പശ്ചാത്തലം വികസിപ്പിക്കുന്നു. രണ്ടാം പകുതിയിലാണ് മുത്തുവേലും വില്ലന്മാരുമായി നേരിട്ടുള്ള ഏറ്റുമുട്ടൽ.2023 -ൽ ജയിലർ നിർത്തിയിടത്തു നിന്നാണ് ജയിലർ 2 വീണ്ടും തുടങ്ങുന്നത്. തീഹാർ ജയിലിൻ്റെ മുൻ ജയിലറായ മുത്തുവേൽ കള്ളക്കടത്ത് ഗ്യാങിൻ്റെ ഭാഗമായി മാറിയ സ്വന്തം മകൻ എ സി പി അർജുൻ പാണ്ഡ്യനെ (വസന്ത് രവി ) കൊല്ലുന്നതോടെയാണ് ജയിലർ അവസാനിക്കുന്നത്.
സ്വന്തം മകൻ്റെ ദുരന്തം മുത്തുവേലിനെ വേട്ടയാടുന്നുണ്ട്. ഭാര്യ വിജയയും ( രമ്യ കൃഷ്ണൻ ) മകൻ്റെ ഭാര്യ ശ്വേതയും (മിർണാ മേനോൻ) കൊലപാതകി മുത്തുവേലാണെന്ന് അറിഞ്ഞിട്ടില്ല. അത് സംഭവിച്ചാലുണ്ടാകുന്ന കോളിളക്കത്തെക്കുറിച്ച് അയാൾ ആകുലനാണ്.കുടുംബം ഇപ്പോൾ ഒരു മലയോര ഗ്രാമത്തിൽ അജ്ഞാതവാസത്തിലാണ്.
‘ബാഷ’ യിലെ ഓട്ടോ ഡ്രൈവറെപ്പോലെ സ്വന്തം ഭൂതകാലം മറച്ചു വെച്ച് മുത്തു എന്ന പേരിൽ ഒരു സാധു മനുഷ്യനായാണ് അയാളുടെ ജീവിതം.മഹാറാണി സൂപ്പർ മാർക്കറ്റിലെ നല്ലവനായ സൂപ്പർവൈസറാണ് അയാൾ ഇപ്പോൾ.
കുടിവെള്ളത്തിൽ മണ്ണ് കലർത്തിയതുമായി ബന്ധപ്പെട്ട് പ്രാദേശിക ഉദ്യാഗസ്ഥനും മുത്തുവേലുമായുണ്ടായ തർക്കത്തോടെ ചിത്രം മാറുന്നു. മുത്തുവേലിന് മൂർത്തി ഫ്രൂട്സിൻ്റെ ഉടമ പഴക്കട മൂർത്തി എന്ന പ്രാദേശിക ഡോണിൻ്റെ ഡ്രൈവർ ജോലി ഏറ്റെടുക്കേണ്ടി വരുന്നു.വിമലിലൂടെ ( യോഗി ബാബു) മുത്തുവേൽ വിഗ്രഹ കടത്ത് മാഫിയയിലേക്ക് എത്തിച്ചേരുന്നു.
വർമ്മൻ്റെ കൊലയാളികളെ കണ്ടെത്താനുള്ള അന്വേഷണത്തിലാണ് വിഗ്രഹക്കടത്ത് സംഘം. വർമ്മൻ്റെ കൊലപാതകത്തോടെ അപ്രത്യക്ഷമായ മൂന്ന് ലോഡ് വിഗ്രഹങ്ങളും കണ്ടെത്തണം. വിഗ്രഹക്കടത്തിൽ വർമ്മ ന് മുകളിലുള്ള കണ്ണികളിൽ എത്തിച്ചേരാണ് മുത്തുവേലിൻ്റെ ശ്രമം. ഈ
രണ്ട് ലക്ഷ്യങ്ങളും ഒരേ പോയിൻ്റിൽ സന്ധിക്കുന്നിടത്താണ് ജയിലർ രണ്ടിൻ്റെ വഴിത്തിരിവ്. വിഗ്രഹക്കടത്തിൻ്റെ കേരളത്തിലെ ഗ്യാങ് ലീഡറാണ് ദിലീപ് (സൂരജ് വെഞ്ഞാറമ്മൂട് ). ഇതു വരെ കണ്ടിട്ടില്ലാത്ത വ്യത്യസ്തമായ വില്ലൻ ലുക്കിലാണ് സുരാജ് എത്തുന്നത്.ആത്മബന്ധമുള്ള വർമ്മൻ്റെ കൊലയാളിയെ കണ്ടെത്താനുള്ള അന്വേഷണത്തിലാണ് അയാൾ. പലവഴിക്ക് അന്വേഷിച്ചിട്ടും ആരെയും കണ്ടെത്താനാവുന്നില്ല. ആദ്യ പകുതി രജനി, നമോ നാരായണ, സുരാജ്, യോഗി ബാബു എന്നിവർ ചേർന്നുള്ള ഡാർക്ക് കോമഡിയിലൂടെയാണ് ചിത്രം മുന്നോട്ടു പോകുന്നത്.
ദിലീപിൽ നിന്നും വിഗ്രഹക്കടത്ത് ലോബിയുടെ മുകളിലുള്ള കണ്ണികളെക്കുറിച്ചുള്ള സൂചന മുത്തുവേലിന് ലഭിക്കുന്നു. അതോടെ മുത്തുവേലിൻ്റെ ഒളിവുജീവിതത്തിന് അവസാനമായി.
വിഗ്രഹക്കടത്ത് ശൃംഖലയുടെ തലവൻ ബോധി കൽപ്പക് (എസ് ജെ സൂര്യ) നേരിട്ട് കളത്തിൽ ഇറങ്ങുന്നതോടെ രണ്ടാം പകുതിയുടെ പശ്ചാത്തലം ഗോവയിലേക്ക് മാറുന്നു.
എല്ലാ നിയന്ത്രണവും ബോധിയുടെ അച്ഛനാണ് (മിഥുൻ ചക്രബർത്തി). ആദ്യ ജയിലറിലേതിനേക്കാൾ കരുത്തരായ കൂടുതൽ വില്ലന്മാരെ .ജയിലർ രണ്ടിൽ മുത്തുവേൽ നേരിടുന്നുണ്ട്. ഈ ഗ്യാങിൽ ബോധിയുടെ സഹോദരി കാന്തയും (വിദ്യാ ബാലൻ ) സഹോദരനുമെല്ലാമുണ്ട് ( ഹക്കിം ഷാജഹാൻ ).രണ്ടാം പകുതി ഒരു യഥാർത്ഥ രജനികാന്ത് മാസ്സ് മസാലയായി മാറുന്നു.
ആദ്യ പകുതിയിൽ ഐറ്റം ഡാൻസുമായി എത്തുന്നത് ഷംന കാസിമാന്നെങ്കിൽ രണ്ടാം പകുതിയിൽ അത് നോറ ഫത്തേഹിയാണ്. മൂന്നാം ഭാഗത്തിൻ്റെ സൂചന നൽകിക്കൊണ്ടാണ് ചിത്രം അവസാനിക്കുന്നത്. ക്ലൈമാക്സ് കഴിയുമ്പോൾ കാമിയോ വേഷത്തിൽ വിജയ് സേതുപതിയും എത്തുന്നു.
ജയിലർ 2 നൂറ് ശതമാനവും രജനി ഷോയാണ്. ഒരു രജനി ചിത്രത്തിൽ നിന്ന് ആരാധകർ പ്രതീക്ഷിക്കുന്നതെല്ലാം സംവിധായകൻ ചിത്രത്തിൽ ഒരുക്കിയിട്ടുണ്ട്. എത്ര തവണ കണ്ടാലും ആരാധകർക്ക് മടുക്കാത്ത രജനി സ്റ്റൈലും മാനറിസ്സങ്ങളുമെല്ലാം ആദ്യാവസാനം കാണാം. ആദ്യ പകുതിയിലെ തമാശ നിറഞ്ഞ രംഗങ്ങൾ രജനി കൈയ്യടക്കത്തോടെ അവതരിപ്പിച്ചപ്പോൾ രണ്ടാം പകുതിയിൽ ഫാമിലി ഡ്രാമയും മാസ്സ് രംഗങ്ങളും സ്ഥിരം ശൈലിയിൽ തീവ്രത തെല്ലും ചോരാതെ ഭംഗിയാക്കി.
ഒരു രജനി ചിത്രത്തിൽ എത്ര വലിയ സൂപ്പർ സ്റ്റാറുകൾ വന്നു പോയാലും അവരെല്ലാം നായകന് ചുറ്റും കറങ്ങുന്ന ഉപഗ്രഹങൾ മാത്രമാണ്. ജാക്കി ഷ്റോഫിന് സെക്കൻഡുകൾ മാത്രമാണ് ചിത്രത്തിലെ സാന്നിധ്യം. മോഹൻലാലിൻ്റെ മാത്യൂസിനെ സംവിധായകൻ സൈഡാക്കി.ശിവരാജ് കുമാറിനും ജയിലർ രണ്ടിൽ കാര്യമായൊന്നും ചെയ്യാനില്ല.
രണ്ടാം പകുതിയിൽ ഹൃത്വിക് റോഷൻ്റെ കാമിയോ റോളിലുള്ള വരവ് പ്രേക്ഷകരിൽ വലിയ ആവേശം സൃഷ്ടിക്കുന്നുണ്ട്. മറ്റുള്ളവർക്കൊന്നും കാര്യമായ റോളില്ല.ആദ്യ പകുതിയിലെ ഡാർക്ക് കോമഡിയിലൂടെ നമോ നാരായണ പ്രേക്ഷകരുടെ കൈയ്യടി നേടി.
ആദ്യ പകുതിയിലെ വില്ലൻ സുരാജ് വെഞ്ഞാറമ്മൂടിൻ്റെ ദിലീപും കൊള്ളാം.എത്ര വില്ലന്മാർ കടന്നു വന്നാലും അവർക്കൊന്നും ആദ്യ ജയിലറിൽ വിനായകൻ്റെ വർമ്മൻ സൃഷ്ടിച്ച ബെഞ്ച്മാർക്കിന് അടുത്തെങ്ങും എത്താനായിട്ടില്ല.
രജനി ചിത്രങ്ങൾ ഇഷ്ടമുള്ളവർക്ക് കണ്ടിരിക്കാവുന്ന ചിത്രമാണ് ജയിലർ 2. ആദ്യ ജയിലറിൽ സൃഷ്ടിച്ച ഹൈപ്പ് തെല്ലും താഴാതെ രണ്ടാം ഭാഗത്തിലും നിലനിർത്തുന്നതിൽ സംവിധായകൻ വിജയിച്ചിട്ടുണ്ട്. തിരക്കഥയിൽ രണ്ടാം പകുതിയിൽ ചെറിയ പാളിച്ചകളുണ്ട്.
അനിരുദ്ധിൻ്റെ സംഗീതവും കൈയ്യടി നേടുന്നു. വിജയ് കാർത്തിക് കണ്ണനാണ് ക്യാമറ. കേരളത്തിൻ്റെയും ഗോവയുടെയും ദൃശ്യങ്ങൾ മനോഹരമായി പകർത്തി.ആർ.നിർമ്മലാണ് എഡിറ്റർ.സൺ പിക്ച്ചേഴ്സിനു വേണ്ടി കലാനിധി മാരനാണ് ചിത്രം നിർമ്മിച്ചത്.
——————————————————–
(കേരള കാർഷിക സർവ്വകലാശാലയുടെ തൃശൂർ വെളളാനിക്കര കാർഷിക കോളേജ് മുൻ പ്രൊഫസറാണ് ലേഖകൻ)
——————————————————————-
കൂടുതല്‍ വാര്‍ത്തകള്‍ക്കായി
http://www.newsboardindia.com
സന്ദര്‍ശിക്കുക
