ന്യൂഡൽഹി : വോട്ടർ പട്ടിക വിവാദവും, തുടർനടപടികളും ബി ജെ പി നയിക്കുന്ന എൻ ഡി എ സർക്കാരും പ്രതിപക്ഷവും തമ്മിലുള്ള പോര് കൂടുതൽ രൂക്ഷമാക്കും.
ഇത് വരാനിരിക്കുന്ന നിയമസഭ തിരഞ്ഞെടുപ്പുകളിൽ പ്രധാന ചർച്ചാവിഷയമായി മാറുമെന്ന കാര്യം ഉറപ്പ്. വോട്ടർ പട്ടികയിൽ നിന്ന് ലക്ഷക്കണക്കിന് അർഹരായ വോട്ടർമാരെ ഒഴിവാക്കിയെന്നാണ് പ്രതിഷേധക്കാരുടെ പ്രധാന ആരോപണം. ഇത് തിരഞ്ഞെടുപ്പ് കമ്മീഷനും സർക്കാരും നിഷേധിക്കുന്നുണ്ടെങ്കിലും പൊതുസമൂഹത്തെയും സുപ്രിം കോടതിയെയും ബോധ്യപ്പെടുത്താൻ അവർക്ക് കഴിയുന്നില്ല.
ഡൽഹിയിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിൻ്റെ രാജിയാവശ്യപ്പെട്ട് നടത്തിയ പ്രതിഷേധങ്ങൾക്കിടയിൽ പ്രതിപക്ഷ നേതാക്കൾ, പ്രവർത്തകർ, മാധ്യമപ്രവർത്തകർ എന്നിവർ അടക്കം 7000 പേരെ പോലീസ് കസ്റ്റഡിയിലെടുത്തിട്ടുണ്ട്. പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ കഴിഞ്ഞ ദിവസങ്ങളിൽ നടത്തിയ പ്രക്ഷോഭം സർക്കാരിനെ പിടിച്ചുകുലുക്കിയിരുന്നു. അതിൻ്റെ തുടർച്ചയെന്നോണമായിരുന്നു ശനിയാഴ്ചത്തെ പ്രതിഷേധം.
പ്രധാനമന്ത്രി നരേന്ദ്ര മോദിയുടെ ബി.ജെ.പിക്ക് അനുകൂലമായി വോട്ടർ പട്ടികയിൽ കൃത്രിമം കാട്ടിയെന്ന് ആരോപിച്ചാണ് ഗ്യാനേഷ് കുമാറിനെതിരെ പ്രതിഷേധം പൊട്ടിപ്പുറപ്പെട്ടത്. യുവതലമുറ നയിക്കുന്ന കോക്രോച്ച് ജനത പാർട്ടി’ (സി.ജെ.പി) പ്രവർത്തകർക്കായിരുന്നു ശനിയാഴ്ചത്തെ പ്രക്ഷോഭത്തിൻ്റെ നേതൃത്വം.
ഡൽഹിയിലെ ജന്തർ മന്ദറിൽ പ്രതിഷേധം നടത്താനായിരുന്നു തീരുമാനം. എന്നാൽ സുരക്ഷാ കാരണങ്ങളേത്തുടർന്ന് പോലീസ് അനുമതി നിഷേധിച്ചു. പ്രതിഷേധക്കാരെ തടയാൻ ഡൽഹിയിൽ ഇരുപത്തിയേഴായിരത്തിലധികം പോലീസിനെയും അർദ്ധസൈനികരെയും വിന്യസിച്ചു. കൂടാതെ ഗതാഗത തടസ്സങ്ങളും മൊബൈൽ ഇൻ്റർനെറ്റ് സേവന നിരോധനവും ഡൽഹിയിൽ ഏർപ്പെടുത്തി.
കോക്രോച്ച് ജനത പാർട്ടി നേതാവ് അഭിജീത് ദീപ്കെ, ഡൽഹി മുൻ മുഖ്യമന്ത്രി അരവിന്ദ് കെജ്‌രിവാൾ, പശ്ചിമ ബംഗാൾ മുഖ്യമന്ത്രി മമത ബാനർജി, കേരള മുഖ്യമന്ത്രി പിണറായി വിജയൻ, സിപിഎം നേതാവ് ബൃന്ദ കാരാട്ട്, സാമ്പത്തിക വിദഗ്ധൻ ജീൻ ഡ്രെസ് തുടങ്ങിയ പ്രമുഖരെ പോലീസ് കസ്റ്റഡിയിലെടുത്തു. കൂടാതെ നിരവധി മാധ്യമപ്രവർത്തകരെയും പ്രതിഷേധം റിപ്പോർട്ട് ചെയ്യുന്നതിനിടയിൽ പിടികൂടി.
ഈ സംഭവം രാഷ്ട്രീയത്തിൽ വലിയ പ്രത്യാഘാതങ്ങൾ ഉണ്ടാക്കാൻ സാധ്യതയുണ്ടാക്കുമെന്ന് രാഷ്ടീയ നിരീക്ഷകർ കരുതുന്നു. തിരഞ്ഞെടുപ്പ് കമ്മീഷൻ്റെ വിശ്വാസ്യതയെ പ്രതിപക്ഷം ചോദ്യം ചെയ്യുന്നതിന്‍റെ ആഴമാണ് ഈ വലിയ പ്രതിഷേധവും അറസ്റ്റും വ്യക്തമാക്കുന്നത്.
പ്രതിഷേധക്കാരെയും നേതാക്കളെയും അറസ്റ്റ് ചെയ്തെങ്കിലും പ്രക്ഷോഭം അവസാനിക്കാൻ സാധ്യതയില്ല. കോൺഗ്രസ്സും അവർ നയിക്കുന്ന ഇന്ത്യ സഖ്യവും അടക്കമുള്ള പ്രതിപക്ഷ പാർട്ടികളുടെ പിന്തുണയോടെ സമരം രാജ്യവ്യാപകമായി വ്യാപിച്ചേക്കാം. മാധ്യമപ്രവർത്തകരുടെയും പ്രതിഷേധക്കാരുടെയും അറസ്റ്റിനെതിരെയും ഇൻ്റർനെറ്റ് വിച്ഛേദിച്ചതിനെതിരെയും കോടതിയിൽ നിയമപോരാട്ടങ്ങൾ ഉണ്ടാവുമെന്നും നിയമ വിദഗ്ധർ പറയുന്നു.
