മുൻ ഡിജിപി: തച്ചങ്കരിക്ക് നാല് വർഷം കഠിന തടവും പിഴയും

തിരുവനന്തപുരം : അനധികൃത സ്വത്ത് സമ്പാദന കേസിൽ സി പി എം സഹയാത്രികൻ എന്ന് വിശേഷിപ്പിക്കപ്പെടുന്ന മുൻ ഡിജിപി: ടോമിൻ തച്ചങ്കരിക്ക് നാല് വർഷം കഠിന തടവും 30 ലക്ഷം രൂപ പിഴയും വിധിച്ച കോട്ടയം വിജിലൻസ് കോടതിയുടെ വിധി പോലീസിനും ഭരണസംവിധാനത്തിനും ഒരുപോലെ വലിയ ആഘാതമായി.

സംസ്ഥാന പൊലീസിലെ ഏറ്റവും ഉന്നതമായ പദവി വഹിച്ചിരുന്ന ഒരു ഉദ്യോഗസ്ഥൻ ഇത്തരം ഗുരുതരമായ സാമ്പത്തിക ക്രമക്കേടിൽ ശിക്ഷിക്കപ്പെടുന്നത് അപൂർവ്വമാണ്.ഉയർന്ന പദവി വഹിച്ചിരുന്ന വ്യക്തിയായതിനാൽ തന്നെ യാതൊരുവിധ ശിക്ഷാ ഇളവും അർഹിക്കുന്നില്ലെന്ന് വ്യക്തമാക്കിയാണ് കോടതി വിധി പ്രസ്താവിച്ചത്. ശിക്ഷാവിധിയെ തുടർന്ന് തച്ചങ്കരിയെ തിരുവനന്തപുരം സെൻട്രൽ ജയിലിലേക്ക് മാറ്റാൻ കോടതി ഉത്തരവിട്ടു.

2007-ലാണ് ടോമിൻ തച്ചങ്കരിക്കെതിരെ വിജിലൻസ് അനധികൃത സ്വത്ത് സമ്പാദനത്തിന് കേസ് രജിസ്റ്റർ ചെയ്യുന്നത്. 2003 മുതൽ 2007 വരെയുള്ള കാലയളവിൽ ഉദ്യോഗസ്ഥനായിരിക്കെ തച്ചങ്കരി തന്‍റെ അറിയപ്പെടുന്ന വരുമാന സ്രോതസ്സുകളേക്കാൾ അധികമായി സ്വത്ത് സമ്പാദിച്ചെന്നതായിരുന്നു പ്രധാന ആരോപണം.

വിജിലൻസിൻ്റെ അന്വേഷണത്തിൽ ഇക്കാലയളവിൽ അദ്ദേഹത്തിൻ്റെ വരുമാനത്തേക്കാൾ ഏകദേശം 135 ശതമാനത്തോളം അധിക സ്വത്ത് സമ്പാദനം നടന്നതായി കണ്ടെത്തി. താൻ സമ്പാദിച്ച സ്വത്തിന്റെ വരവ് തെളിയിക്കുന്ന രേഖകൾ ഹാജരാക്കാൻ വിജിലൻസിന് മുന്നിലോ കോടതിയിലോ തച്ചങ്കരിക്ക് സാധിച്ചില്ല.

അതേസമയം, അദ്ദേഹത്തിന്‍റെ അനധികൃത സാമ്പത്തിക ഇടപാടുകളുടെയും ചെലവുകളുടെയും കൃത്യമായ തെളിവുകളും രേഖകളും ശേഖരിക്കാൻ വിജിലൻസ് അന്വേഷണ സംഘത്തിന് കഴിഞ്ഞു. തുടർന്ന്, തച്ചങ്കരി എ ഡി ജി പി പദവിയിലിരിക്കെ 2013-ലാണ് വിജിലൻസ് കേസിൽ കുറ്റപത്രം സമർപ്പിച്ചത്. അന്വേഷണ റിപ്പോർട്ടും തെളിവുകളും പൂർണ്ണമായും ശരിവെച്ചുകൊണ്ടാണ് കോട്ടയം വിജിലൻസ് കോടതി ഇപ്പോൾ അന്തിമ വിധി പ്രസ്താവിച്ചിരിക്കുന്നത്.

താൻ കുറ്റക്കാരനാണെന്ന് കണ്ടെത്തിയതായി കോടതി വ്യക്തമാക്കിയതിന് പിന്നാലെ, എന്തെങ്കിലും പറയാനുണ്ടോ എന്ന് വിചാരണക്കോടതി ആരായുകയുണ്ടായി. എന്നാൽ തനിക്ക് കടുത്ത ആരോഗ്യപ്രശ്നങ്ങളുണ്ടെന്നും രണ്ട് ദിവസം മുൻപ് നെഞ്ചുവേദന അനുഭവപ്പെട്ടതിനെ തുടർന്ന് ശാരീരിക ബുദ്ധിമുട്ടുകളിലുമാണെന്ന് തച്ചങ്കരി കോടതിയെ അറിയിച്ചു.

എന്നാൽ ഉയർന്ന സ്ഥാനത്തിരുന്ന് നിയമം കയ്യിലെടുക്കുകയും ജനങ്ങളുടെ വിശ്വസ്തത തകർക്കുകയും ചെയ്ത പ്രതിക്ക് നിയമപ്രകാരമുള്ള പരമാവധി ശിക്ഷ തന്നെ നൽകണമെന്നായിരുന്നു പ്രൊസിക്യൂഷൻ ശക്തമായി വാദിച്ചത്. ഈ വാദം ശരിവെച്ചാണ് കോടതി കഠിനതടവും ഭീമമായ പിഴയും ചുമത്തിയത്.

കേരളത്തിലെ രാഷ്ട്രീയ, ഭരണ മേഖലകളിൽ ഏറെ നിർണ്ണായക സ്വാധീനമുണ്ടായിരുന്ന ഉദ്യോഗസ്ഥനായിരുന്നു ടോമിൻ തച്ചങ്കരി.പ്രത്യേകിച്ച് മുഖ്യമന്ത്രി പിണറായി വിജയന്‍റെ ഭരണകാലത്ത് പൊലീസിലും വിവിധ പൊതുമേഖലാ സ്ഥാപനങ്ങളിലും അതീവ ശക്തനായ ഉദ്യോഗസ്ഥനായിട്ടാണ് അദ്ദേഹം അറിയപ്പെട്ടിരുന്നത്.

സുപ്രധാന വകുപ്പുകളുടെ ചുമതലയും സർക്കാരിൻ്റെ പ്രത്യേക ‘ട്രബിൾ ഷൂട്ടർ’ എന്ന പ്രതിച്ഛായയും തച്ചങ്കരിക്കുണ്ടായിരുന്നു. എൽഡിഎഫ് ഭരണകാലത്ത് കെഎസ്ആർടിസി എംഡി, കൺസ്യൂമർഫെഡ് തലവൻ, ഫയർഫോഴ്സ് മേധാവി, കേരള ബുക്സ് ആൻഡ് പബ്ലിക്കേഷൻ സൊസൈറ്റി (കെബിപിഎസ്) മേധാവി തുടങ്ങിയ വിവിധ തന്ത്രപ്രധാന പദവികളിൽ സേവനമനുഷ്ഠിച്ചു. ഈ സ്ഥാപനങ്ങളിലെല്ലാം വിപ്ലവകരമായ മാറ്റങ്ങൾ കൊണ്ടുവന്നു എന്ന് അവകാശപ്പെടുമ്പോഴും അവിടെയെല്ലാം അനാവശ്യ വിവാദങ്ങളും അദ്ദേഹത്തെ പിന്തുടർന്നിരുന്നു.

ഇടതുപക്ഷവുമായുള്ള അദ്ദേഹത്തിന്‍റെ അടുത്ത ബന്ധം നിരവധി സാമ്പത്തിക-രാഷ്ട്രീയ ആരോപണങ്ങൾക്കും വഴിതുറന്നു. സിപിഎം നിയന്ത്രണത്തിലുള്ള കൈരളി ടിവിക്ക് വേണ്ടി വിദേശത്തുനിന്ന് സംപ്രേക്ഷണ ഉപകരണങ്ങളും മറ്റും ഇറക്കുമതി ചെയ്തതിൽ ടോമിൻ തച്ചങ്കരി തന്‍റെ പദവി ദുരുപയോഗം ചെയ്ത് ഇടപെടൽ നടത്തി എന്ന ആരോപണം ഏറെ ശ്രദ്ധ നേടിയിരുന്നു.

ഔദ്യോഗിക പദവിയിലിരിക്കെ, സർക്കാരിന്റെ പൂർണ്ണ അനുമതിയില്ലാതെ വിദേശയാത്രകൾ നടത്തി എന്ന ആരോപണവും തച്ചങ്കരിക്കെതിരെ ഉയർന്നിരുന്നു. ഈ സംഭവത്തെ തുടർന്ന് അന്നത്തെ എൽഡിഎഫ് സർക്കാരിൻ്റെ കാലത്ത് അദ്ദേഹത്തെ സർവീസിൽ നിന്ന് സസ്പെൻഡ് ചെയ്യുന്ന സാഹചര്യം വരെയുണ്ടായി.

തച്ചങ്കരിയുടെ സർവീസ് ജീവിതം എന്നും വിവാദങ്ങളാൽ നിറഞ്ഞതായിരുന്നു. ടേപ്പ് റെക്കോർഡിംഗ് സാങ്കേതികവിദ്യ വ്യാപകമായ കാലത്ത് കൊച്ചിയിൽ മ്യൂസിക് സ്റ്റുഡിയോ പ്രവർത്തിപ്പിച്ചതും, അതുമായി ബന്ധപ്പെട്ട് സാമ്പത്തിക നേട്ടങ്ങളുണ്ടാക്കാൻ പദവി ദുരുപയോഗം ചെയ്തെന്ന ആരോപണവും തച്ചങ്കരിക്ക് തിരിച്ചടിയായിരുന്നു.

കൂടാതെ, വകുപ്പുതല മേധാവിയായിരുന്ന സമയത്ത് സ്വന്തം ജന്മദിനത്തിൽ ഫയർഫോഴ്സ് ആസ്ഥാനത്ത് കേക്ക് മുറിച്ച് ആഘോഷിക്കുകയും കീഴുദ്യോഗസ്ഥർക്ക് അതിൽ പങ്കെടുക്കാൻ നിർദ്ദേശം നൽകുകയും ചെയ്തത് സർവീസ് ചട്ടങ്ങളുടെ ലംഘനമായി വലിയ പ്രതിഷേധത്തിന് വഴിവെച്ചു. കൺസ്യൂമർഫെഡിലും കെഎസ്ആർടിസിയിലും നടപ്പിലാക്കിയ ചില പരിഷ്കാരങ്ങളും ജീവനക്കാരുടെ കടുത്ത എതിർപ്പിനും തൊഴിൽ തർക്കങ്ങൾക്കും കാരണമായിരുന്നു.

രാജ്യത്ത് ഐപിഎസ് ഉദ്യോഗസ്ഥർ അനധികൃത സ്വത്ത് സമ്പാദനത്തിനോ അഴിമതിക്കോ ശിക്ഷിക്കപ്പെടുന്നത് ആദ്യത്തെ സംഭവമല്ലെങ്കിലും, ഒരു മുൻ ഡിജിപി തലത്തിലുള്ള ഉദ്യോഗസ്ഥൻ വർഷങ്ങൾ നീണ്ട വിചാരണയ്ക്കൊടുവിൽ തടവുശിക്ഷയ്ക്ക് വിധിക്കപ്പെടുന്നത് അപൂർവ്വമാണ്. രാജ്യത്തെ വിവിധ സംസ്ഥാനങ്ങളിൽ സമാനമായ രീതിയിൽ ഉന്നത ഐപിഎസ് ഉദ്യോഗസ്ഥർ അഴിമതിക്കേസുകളിൽ ശിക്ഷിക്കപ്പെട്ട ചരിത്രമുണ്ട്.

തമിഴ്നാട്ടിലെ മുൻ ഡിജിപി: എ.കെ. ഇക്ബാൽ ഉൾപ്പെടെയുള്ള ഉദ്യോഗസ്ഥർ അഴിമതി, സ്വത്ത് സമ്പാദന കേസുകളിൽ നിയമനടപടികളും കോടതി ശിക്ഷകളും നേരിടേണ്ടി വന്നിട്ടുള്ളവരാണ്. പഞ്ചാബിൽ മുൻ ഡിജിപി കെ.പി.എസ്. ഗില്ലിനെതിരെ ലൈംഗിക അതിക്രമ കേസിൽ കോടതി ശിക്ഷ വിധിച്ചത് വലിയ ചർച്ചയായിരുന്നു. അതുപോലെ, മഹാരാഷ്ട്രയിലെയും ഉത്തർപ്രദേശിലെയും ചില മുൻ ഐപിഎസ് ഉദ്യോഗസ്ഥർ അനധികൃത സാമ്പത്തിക ഇടപാടുകളിലും റിയൽ എസ്റ്റേറ്റ് തട്ടിപ്പുകളിലും വിജിലൻസിൻ്റെയും സിബിഐയുടെയും അന്വേഷണത്തിൽ കുറ്റക്കാരാണെന്ന് കണ്ടെത്തുകയും തടവുശിക്ഷ അനുഭവിച്ചിട്ടുമുണ്ട്.

സർവീസിലിരിക്കെ പദവിയുടെ സ്വാധീനം ഉപയോഗിച്ച് കേസ് അട്ടിമറിക്കാൻ ശ്രമിച്ചു എന്ന ആരോപണം പലപ്പോഴും ഉയർന്നിരുന്നെങ്കിലും, വിജിലൻസ് ഉദ്യോഗസ്ഥരുടെ ദീർഘകാലത്തെ തെളിവുശേഖരണവും കൃത്യമായ അന്വേഷണവുമാണ് ഇപ്പോൾ അന്തിമ ശിക്ഷാവിധിയിലേക്ക് എത്തിച്ചത്. നിയമത്തിന് മുന്നിൽ ആരും അതിമാനുഷരല്ലെന്നും ഉയർന്ന സിവിൽ സർവീസ് പദവികൾ ദുരുപയോഗം ചെയ്യുന്നവർക്ക് കടുത്ത പ്രത്യാഘാതങ്ങൾ നേരിടേണ്ടി വരുമെന്നുമുള്ള ശക്തമായ മുന്നറിയിപ്പാണ് കോട്ടയം വിജിലൻസ് കോടതിയുടെ ഈ വിധി നൽകുന്നത്.