കൊൽക്കത്ത: ബംഗാളിൽ മുഖ്യമന്ത്രി സുവേന്ദു അധികാരി നയിക്കുന്ന ബിജെപി സർക്കാരിൻ്റെ ബജററിൽ വാരിക്കോരി സൗജന്യങ്ങൾ.
സാമൂഹിക ക്ഷേമ പദ്ധതികൾ, അടിസ്ഥാന സൗകര്യ വികസനം, വൻ തൊഴിൽ നിയമനങ്ങൾ എന്നിവ ഉൾപ്പെടുന്ന നിരവധി വാഗ്ദാനങ്ങൾ ബജറ്റിൽ ഉൾപ്പെടുത്തിയിടുണ്ട്. തൃണമൂൽ കോൺഗ്രസ്സിനെ താഴെയിറക്കി ആദ്യമായി സംസ്ഥാനത്ത് അധികാരം പിടിച്ച ബിജെപി വലിയ പ്രഖ്യാപനങ്ങളാണ് ബജറ്റിൽ നടത്തിയിരിക്കുന്നത്.
21 മുതൽ 45 വയസ് വരെയുള്ള തൊഴിലില്ലാത്ത യുവാക്കൾക്കായി ‘ഭരോസ സ്കീം’ എന്ന പുതിയ പദ്ധതി ധനമന്ത്രി സ്വപൻ ദാസ് ഗുപ്ത പ്രഖ്യാപിച്ചു. ഈ പദ്ധതിപ്രകാരം തൊഴിൽ ലഭിക്കാത്ത ബിരുദധാരികൾക്ക് പ്രതിമാസം 3,000 രൂപയും, ബിരുദമില്ലാത്ത തൊഴിലില്ലാത്തവർക്ക് പ്രതിമാസം 2,000 രൂപയും ധനസഹായമായി നൽകുമെന്നതാണ് പ്രത്യേകത.
സ്ത്രീകൾക്ക് സംസ്ഥാന സർക്കാർ സർവീസുകൾ നടത്തുന്ന ബസുകളിൽ സൗജന്യ യാത്ര ഉറപ്പാക്കുന്നതിനായി 550 കോടി രൂപ ബജറ്റിൽ വകയിരുത്തി. സ്ത്രീകൾക്കായുള്ള അന്നപൂർണ യോജന സാമ്പത്തിക സഹായ പദ്ധതിക്കായി 36,000 കോടി രൂപയും അനുവദിച്ചു. കൂടാതെ, ഉന്നത വിദ്യാഭ്യാസം തുടരുന്നതിനായി വിവാഹിതരല്ലാത്ത സ്ത്രീകൾക്ക് ഒറ്റത്തവണയായി 50,000 രൂപ ധനസഹായം നൽകുമെന്നും ധനമന്ത്രി പ്രഖ്യാപിച്ചു.
സംസ്ഥാനത്തെ ഒഴിവുള്ള 20,000 പോലീസ് തസ്തികകളും 50,000 അധ്യാപക തസ്തികകളും ഉടൻ നികത്തുമെന്നും അദ്ദേഹം അറിയിച്ചു. ഇതുകൂടാതെ വിവിധ സർക്കാർ വകുപ്പുകളിലായി ആകെ ഒരു ലക്ഷം സർക്കാർ ജോലികളിലേക്ക് നിയമനം നടത്തുമെന്നും, അതിൽ 33 ശതമാനം തസ്തികകൾ സ്ത്രീകൾക്കായി സംവരണം ചെയ്യുമെന്നും ബജറ്റിലുണ്ട്.
വടക്കൻ ബംഗാളിൽ ആദ്യമായി ഒരു ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയും ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെൻ്റും സ്ഥാപിക്കും. കൊൽക്കത്ത വിമാനത്താവളത്തിലെ യാത്രക്കാരുടെ തിരക്ക് കുറയ്ക്കുന്നതിനായി കല്യാണിൽ 1,000 മുതൽ 1,500 ഏക്കർ വരെ ഭൂമി കണ്ടെത്തി പുതിയ ഗ്രീൻഫീൽഡ് വിമാനത്താവളം നിർമ്മിക്കും.
വ്യോമഗതാഗത മേഖലയ്ക്ക് കൂടുതൽ പ്രോത്സാഹനം നൽകുന്നതിനായി കേന്ദ്ര സർക്കാരിൻ്റെ ഉഡാൻ പദ്ധതിയുടെ ഭാഗമായി പുരുലിയ, ബാലുർഘട്ട്, മാൽഡ എന്നിവിടങ്ങളിൽ പുതിയ വിമാനത്താവളങ്ങൾ സ്ഥാപിക്കും. കൂച്ച് ബെഹാർ വിമാനത്താവളം വിപുലീകരിക്കും.
വിരമിച്ച മാധ്യമപ്രവർത്തകർക്ക് പ്രതിമാസം 5000 രൂപ പെൻഷൻ നൽകുമെന്നും അദ്ദേഹം അറിയിച്ചു. സംസ്ഥാന സർക്കാർ ജീവനക്കാരുടെ ക്ഷാമബത്ത 20 ശതമാനം വർധിപ്പിക്കും. പുതുക്കിയ നിരക്ക് ഈ വർഷം ഒക്ടോബർ മുതൽ പ്രാബല്യത്തിൽ വരുമെന്നും ധനമന്ത്രി വ്യക്തമാക്കി.
