മുംബൈ: മഹാരാഷ്ട്രയിൽ അടുത്തിടെ നടപ്പിലാക്കിയ മതപരിവർത്തന നിരോധന നിയമം സാധാരണക്കാരായ വിശ്വാസികളിലും ന്യൂനപക്ഷ വിഭാഗങ്ങളിലും വലിയ ഭയവും ആശങ്കയും സൃഷ്ടിക്കുന്നു.
മുംബൈയിലെയും പരിസര പ്രദേശങ്ങളിലെയും ചില ക്രൈസ്തവ ദേവാലയങ്ങളിൽ എത്തുന്ന വിശ്വാസികൾ ഇപ്പോൾ പ്രാർത്ഥനയ്ക്ക് മുമ്പ് ഒരു രേഖയിൽ ഒപ്പിടണം. തങ്ങൾ സ്വന്തം ഇഷ്ടപ്രകാരമാണ് പ്രാർത്ഥനയിൽ പങ്കെടുക്കാൻ എത്തിയതെന്നും ആരും നിർബന്ധിച്ചോ പ്രലോഭിപ്പിച്ചോ കൊണ്ടു വന്നതല്ലെന്നും വ്യക്തമാക്കുന്ന സത്യപ്രസ്താവനയിലാണ് ഇവർ ഒപ്പിടുന്നത്.
ഈ ഫോമുകൾക്ക് നിയമപരമായ സാധുതയൊന്നുമില്ല. എങ്കിലും പ്രാർത്ഥനാ യോഗങ്ങൾക്കെതിരെ ആരെങ്കിലും പരാതി നൽകിയാൽ തങ്ങളെ സംരക്ഷിക്കുന്നതിനായി പള്ളികൾ ഈ രേഖകൾ സൂക്ഷിച്ചു വെക്കുകയാണ്. ഈ വർഷം ഓഗസ്റ്റ് അവസാനത്തോടെയാണ് ചില പള്ളികളിൽ ഇത്തരമൊരു രീതി ആരംഭിച്ചത്. മഹാരാഷ്ട്രയിൽ പുതിയ മതപരിവർത്തന നിരോധന നിയമം പ്രാബല്യത്തിൽ വരുന്നതിന് തൊട്ടുമുമ്പായിരുന്നു ഇത്.
ബലപ്രയോഗം, വഞ്ചന, ഭീഷണി, അല്ലെങ്കിൽ പ്രലോഭനം എന്നിവയിലൂടെയുള്ള മതപരിവർത്തനങ്ങളെ പുതിയ നിയമം പൂർണ്ണമായി നിരോധിക്കുന്നു. സ്വന്തം ഇഷ്ടപ്രകാരം മതം മാറാൻ ആഗ്രഹിക്കുന്നവർ പോലും മുൻകൂട്ടി സർക്കാറിനെ വിവരമറിയിക്കണം എന്ന് ഈ നിയമം വ്യവസ്ഥ ചെയ്യുന്നു.
നിയമവിരുദ്ധമായി മതപരിവർത്തനം നടത്തിയാൽ ഏഴ് വർഷം വരെ തടവുശിക്ഷ ലഭിക്കാം. കുറ്റം ആവർത്തിച്ചാൽ ശിക്ഷ പത്ത് വർഷം വരെയായി ഉയരും. സാമൂഹികമായും സാമ്പത്തികമായും പിന്നാക്കം നിൽക്കുന്ന ആളുകളെ പ്രലോഭനങ്ങളിൽ നിന്നോ വഞ്ചനയിൽ നിന്നോ സംരക്ഷിക്കാനാണ് ഈ നിയമമെന്നാണ് മഹാരാഷ്ട്ര സർക്കാരിൻ്റെ വാദം. എന്നാൽ വ്യക്തിപരമായ സ്വാതന്ത്ര്യത്തിൽ ഭരണകൂടവും പോലീസും ഇടപെടാൻ ഈ നിയമം കാരണമാകുമെന്ന് വിമർശകർ ചൂണ്ടിക്കാണിക്കുന്നു. നിയമത്തിലെ നിർവചനങ്ങൾ വളരെ വിപുലവും അവ്യക്തവുമാണെന്നാണ് പ്രധാന വിമർശനം.
നിയമം എല്ലാ മതങ്ങൾക്കും ബാധകമാണെങ്കിലും ന്യൂനപക്ഷങ്ങളായ ക്രൈസ്തവ സമൂഹത്തിലാണ് ഇത് വലിയ ഭീതിയുണ്ടാക്കിയിരിക്കുന്നത്. ആളുകൾക്ക് ആനുകൂല്യങ്ങൾ നൽകി മതം മാറ്റുന്നു എന്ന തീവ്ര വലതുപക്ഷ ഗ്രൂപ്പുകളുടെ ആരോപണമാണ് ഈ നിയമത്തിന് പിന്നിലുള്ള പ്രധാന കാരണം. ഇത്തരം നിയമങ്ങൾ കാരണം പ്രാർത്ഥനാ യോഗങ്ങൾ പോലും തടസ്സപ്പെടുന്നതായി നിയമസഹായം നൽകുന്ന സംഘടനകൾ പറയുന്നു.
പ്രാർത്ഥനയ്ക്കായി ഒത്തുകൂടുന്ന ആളുകളെ അന്യരായ വ്യക്തികൾ വന്ന് ചോദ്യം ചെയ്യുന്ന സംഭവങ്ങൾ വർദ്ധിച്ചിട്ടുണ്ട്. ആളുകളുടെ പേരും വിലാസവും പ്രാർത്ഥനയിൽ പങ്കെടുക്കുന്നതിന്റെ കാരണവും ഇവർ ചോദിക്കുന്നു. ക്രിസ്തീയമല്ലാത്ത പേരുകളുള്ള ആളുകളോടാണ് കൂടുതൽ ചോദ്യങ്ങൾ ഉന്നയിക്കുന്നത്. പ്രാർത്ഥന നടത്തുന്നത് പോലും മതപരിവർത്തനമായി ചിത്രീകരിക്കപ്പെടുമോ എന്നാണ് സാധാരണക്കാരായ വിശ്വാസികളുടെ പേടി.
മുംബൈ നഗരം എപ്പോഴും വിവിധ മതസ്ഥരുടെ സഹവർത്തിത്വത്തിന് പേരുകേട്ട ഇടമാണ്. എല്ലാ മതങ്ങളിലുംപെട്ട ആളുകൾ പരസ്പരം പ്രാർത്ഥനാലയങ്ങൾ സന്ദർശിക്കുന്ന പാരമ്പര്യം ഇവിടെയുണ്ട്. ഹാജി അലി ദർഗയിലും മൗണ്ട് മേരി പള്ളിയിലും സിദ്ധിവിനായക ക്ഷേത്രത്തിലുമെല്ലാം എല്ലാ വിഭാഗം ആളുകളും എത്താറുണ്ട്.
എന്നാൽ പുതിയ നിയമങ്ങൾ ഇത്തരം സ്വതന്ത്രമായ വിശ്വാസ സംസ്കാരത്തിന് ഭീഷണിയാകുന്നു. ഒരു ഡസനിലധികം സംസ്ഥാനങ്ങളിൽ ഇതിനോടകം ഇത്തരം മതപരിവർത്തന നിരോധന നിയമങ്ങൾ നിലവിലുണ്ട്. പ്രത്യേകിച്ച് ബി ജെ പി ഭരണത്തിലുള്ള സംസ്ഥാനങ്ങളിലാണ് ഇവ കൂടുതലായും നടപ്പിലാക്കിയിരിക്കുന്നത്. ഭരണഘടന ഉറപ്പുനൽകുന്ന അവകാശങ്ങളെ ലംഘിക്കുന്നു എന്ന് ചൂണ്ടിക്കാട്ടി ചില നിയമങ്ങൾ സുപ്രീം കോടതിയുടെ പരിഗണനയിലുമാണ്.
പണം, സ സൗജന്യ വിദ്യാഭ്യാസം, ചികിത്സ എന്നിവ നൽകി പാവപ്പെട്ടവരെയും ആദിവാസികളെയും മതം മാറ്റുന്നു എന്നാണ് തീവ്ര വലതുപക്ഷ സംഘടനകൾ ആരോപിക്കുന്നത്. കൂടാതെ മിശ്രവിവാഹങ്ങളെ ലവ് ജിഹാദ് എന്ന് ആക്ഷേപിക്കാനും ഇവർ ഈ നിയമങ്ങൾ ഉപയോഗിക്കുന്നു.
പ്രലോഭനം എന്ന വാക്കിന് പുതിയ നിയമം നൽകിയിരിക്കുന്ന നിർവചനം വളരെ വിപുലമാണ്. ജോലി വാഗ്ദാനം ചെയ്യുക, മതസ്ഥാപനങ്ങളിൽ സൗജന്യ വിദ്യാഭ്യാസം നൽകുക, വിവാഹ വാഗ്ദാനം നൽകുക, മികച്ച ജീവിതസാഹചര്യം വാഗ്ദാനം ചെയ്യുക എന്നിവയെല്ലാം പ്രലോഭനത്തിന്റെ പരിധിയിൽ വരും. ഒരു മതത്തെ മറ്റൊരു മതത്തേക്കാൾ മഹത്വപ്പെടുത്തി സംസാരിക്കുന്നത് പോലും കുറ്റകരമായി മാറിയേക്കാം. ഈ അവ്യക്തത കാരണം ആർക്കെതിരെ വേണമെങ്കിലും എളുപ്പത്തിൽ കേസ്സെടുക്കാൻ സാധിക്കും.
പ്രായപൂർത്തിയായ ഒരാൾ സ്വന്തം ബുദ്ധിയോടെ കാര്യങ്ങൾ മനസ്സിലാക്കി മതം മാറാൻ തീരുമാനിച്ചാൽ പോലും അതിനെ പ്രലോഭനമായി ചിത്രീകരിക്കാൻ നിയമത്തിന് കഴിയും. മാതാപിതാക്കൾക്കോ സഹോദരങ്ങൾക്കോ ബന്ധുക്കൾക്കോ മതം മാറ്റത്തിനെതിരെ പോലീസിൽ പരാതി നൽകാൻ നിയമം അവസരം നൽകുന്നുണ്ട്.
ഇതോടെ കേസിൽ അകപ്പെടുന്ന ആൾ താൻ തെറ്റുകാരനല്ലെന്ന് സ്വന്തമായി തെളിയിക്കേണ്ടി വരുന്നു. മിശ്രവിവാഹം കഴിക്കാൻ ആഗ്രഹിക്കുന്ന ദമ്പതികൾക്ക് ഇത് വലിയ ബുദ്ധിമുട്ടുകൾ സൃഷ്ടിക്കുന്നു. മതം മാറാതെ തന്നെ മിശ്രവിവാഹം കഴിക്കാൻ പ്രത്യേക വിവാഹ നിയമം വഴി സാധിക്കുമെങ്കിലും അതിന് ഒരു മാസം മുമ്പ് നോട്ടീസ് നൽകണം. ഈ സമയത്തിനുള്ളിൽ തീവ്ര വലതുപക്ഷ ഗ്രൂപ്പുകളോ ബന്ധുക്കളോ ഇടപെട്ട് വിവാഹം തടസ്സപ്പെടുത്താൻ സാധ്യതയേറുന്നു.
പുതിയ നിയമം നിലവിൽ വന്നതോടെ രണ്ട് വ്യത്യസ്ത മതങ്ങളിൽപ്പെട്ടവർ വിവാഹം കഴിക്കുമ്പോൾ ഒരാൾ മറ്റൊരാളെ മതം മാറ്റാൻ ശ്രമിക്കുന്നു എന്ന് ബന്ധുക്കൾക്ക് എളുപ്പത്തിൽ ആരോപിക്കാം. മതം മാറാൻ ഉദ്ദേശമില്ലെങ്കിൽ പോലും ഇവർ പോലീസിന്റെയും കോടതികളുടെയും കയറിയിറങ്ങേണ്ടി വരും.
സ്വയം ഇഷ്ടപ്രകാരം മതം മാറാൻ ആഗ്രഹിക്കുന്നവർ സർക്കാറിനെ അറിയിക്കണം എന്ന വ്യവസ്ഥ വ്യക്തി സ്വാതന്ത്ര്യത്തിന്മേലുള്ള കടന്നുകയറ്റമാണ്. ആളുകൾക്ക് മതം മാറാനുള്ള അവകാശത്തെ നിയമം തടയുന്നില്ലെന്നാണ് സർക്കാർ വാദിക്കുന്നത്. വഞ്ചനയിലൂടെയുള്ള മതം മാറ്റങ്ങൾ തടയാൻ മാത്രമാണ് ഈ മുൻകൂട്ടി അറിയിക്കൽ രീതി എന്നാണ് സർക്കാരിന്റെ വിശദീകരണം. എന്നാൽ ഇത് സാധാരണക്കാരായ ആളുകളിൽ വലിയ മാനസിക സമ്മർദ്ദമാണ് ഉണ്ടാക്കുന്നത്.
വലിയ പള്ളികളിൽ മാത്രമല്ല, വീടുകളിലോ ചെറിയ ഹാളുകളിലോ നടക്കുന്ന പ്രാർത്ഥനാ യോഗങ്ങളെയും ഈ നിയമം ബാധിച്ചിട്ടുണ്ട്. പ്രാർത്ഥിക്കാൻ എത്തുന്നവരെ തടയാൻ സംഘാടകർക്ക് സാധിക്കില്ല. അയൽവാസികളോ മറ്റ് മതസ്ഥരോ പ്രാർത്ഥനയിൽ പങ്കെടുത്താൽ അത് വലിയ കേസുകളായി മാറാൻ സാധ്യതയുണ്ട്.
വോട്ട് ചെയ്യാനും ജീവിതപങ്കാളിയെ തിരഞ്ഞെടുക്കാനും അവകാശമുള്ള പ്രായപൂർത്തിയായ ഒരു വ്യക്തിക്ക് സ്വന്തം മതം തിരഞ്ഞെടുക്കാൻ സ്വാതന്ത്ര്യമില്ലേ എന്ന ചോദ്യമാണ് നിയമവിദഗ്ദ്ധർ ഉന്നയിക്കുന്നത്. പ്രാർത്ഥിക്കാനുള്ള സ്വാതന്ത്ര്യം പോലും സംശയത്തിന്റെ നിഴലിലാകുന്ന അവസ്ഥയാണ് മഹാരാഷ്ട്രയിൽ ഇപ്പോൾ നിലനിൽക്കുന്നത്. നിയമത്തിന്റെ ദുരുപയോഗം സാധാരണക്കാരുടെ ജീവിതത്തെയും മതസൗഹാർദ്ദത്തെയും ഒരുപോലെ ബാധിക്കുന്നു.
