തിരുവനന്തപുരം : രാഷ്ട്രീയ കാലാവസ്ഥയിൽ വലിയ മാറ്റങ്ങൾ വരുന്നതിൻ്റെ സൂചനകൾ വന്നുതുടങ്ങി. മുഖ്യമന്ത്രി വി.ഡി. സതീശൻ്റെ ജനപ്രിയതയിൽ മങ്ങലേൽക്കുന്നു എന്ന തോന്നൽ വരുന്നു.
നിയമസഭ തിരഞ്ഞെടുപ്പ് ഫലം വന്നതിന് പിന്നാലെ, എ ഐ സി സി ജനറൽ സെക്രട്ടറി കെ സി വേണുഗോപാലിന്‍റെ അനുയായികൾ അദ്ദേഹത്തെ മുഖ്യമന്ത്രിയാക്കാൻ ആഗ്രഹിച്ചു എന്ന വസ്തുത മറച്ചുവെക്കാനാവില്ല. എം എൽ എ മാരിൽ ഭൂരിപക്ഷവും അദ്ദേഹത്തോടൊപ്പമായിരുന്നു.
എന്നാൽ ജനങ്ങളുടെയും മാധ്യമങ്ങളുടെയും ശക്തമായ ഇടപെടൽ കാരണം സതീശൻ മുഖ്യമന്ത്രി സ്ഥാനത്തേക്ക് എത്തിയത് തന്നെ ഒരു വിസ്മയമായായിരുന്നു.
പിണറായി വിജയന്‍റെ ഭരണശൈലിക്ക് പകരമായി ഒരു പുതിയ മാറ്റം ജനങ്ങൾ ആഗ്രഹിച്ചിരുന്നു. ഇടതു മുന്നണി ഭരണത്തിന് ശേഷം സംസ്ഥാനത്തെ പുതിയ ദിശയിലേക്ക് നയിക്കാൻ സതീശന് സാധിക്കുമെന്ന് കരുതിയവരായിരുന്നു ഐക്യമുന്നണിയിലെ ഭൂരിപക്ഷവും. എന്നാൽ അധികാരമേറ്റെടുത്ത് കുറഞ്ഞ നാളുകൾക്കുള്ളിൽ തന്നെ സതീശന്‍റെ നിലപാടുകളിൽ മാറ്റങ്ങൾ കണ്ടുതുടങ്ങി. സുതാര്യതയില്ലായ്മയും ഇഷ്ടമല്ലാത്ത ചോദ്യങ്ങളോട് മുഖം തിരിക്കുന്ന രീതിയും വിമർശനങ്ങൾക്കിടയാക്കുന്നു.
ആദ്യത്തെ വിവാദം ആരംഭിക്കുന്നത് കർണാടകയിലേക്കുള്ള ചാർട്ടേഡ് വിമാന യാത്രയോടെയാണ്. ഈ യാത്രയുടെ ചെലവ് ആര് വഹിച്ചു എന്ന ചോദ്യത്തിന് കൃത്യമായ ഉത്തരം ലഭിച്ചില്ല. എങ്കിലും ആദ്യഘട്ടത്തിൽ മാധ്യമങ്ങൾ സതീശനോട് മൃദുസമീപനമാണ് സ്വീകരിച്ചത്.
ആഴ്ചതോറുമുള്ള വാർത്താസമ്മേളനങ്ങൾ പുനരാരംഭിച്ചതും മാധ്യമങ്ങളോട് സംസാരിച്ചതും അദ്ദേഹത്തിന്‍റെ പ്രതിച്ഛായ വർദ്ധിപ്പിച്ചു. വിഴിഞ്ഞം പദ്ധതി, മദ്യനയം, പിഎം ശ്രീ പദ്ധതി തുടങ്ങിയ വിഷയങ്ങളിൽ സർക്കാരിൻ്റെ ചില തീരുമാനങ്ങൾ ചോദ്യം ചെയ്യപ്പെട്ടെങ്കിലും മാധ്യമങ്ങൾ തുടക്കത്തിൽ വലിയ വിമർശനങ്ങൾക്ക് മുതിർന്നില്ല. എന്നാൽ പിന്നീട് വിവരങ്ങൾ മറച്ചുവെക്കുന്ന രീതി ഒരു സ്ഥിരം ശൈലിയായി മാറി. മാധ്യമങ്ങളെ തമ്മിൽ ഭിന്നിപ്പിക്കാനുള്ള ശ്രമങ്ങളും നടന്നു.
മഴക്കെടുതി ബാധിച്ച മലപ്പുറം സന്ദർശിക്കാൻ നടത്തിയ ചാർട്ടേഡ് വിമാന യാത്ര വീണ്ടും വലിയ വിവാദമായി. ഈ യാത്രയ്ക്ക് പണം നൽകിയത് ആരാണെന്ന് വ്യക്തമാക്കാൻ മുഖ്യമന്ത്രിയുടെ ഓഫീസ് തയ്യാറായില്ല.
ഇതിനുപുറമേ, പല മന്ത്രിമാരും സ്ഥാനം ഏറ്റെടുത്ത ഉടൻ തന്നെ വിദേശ യാത്രകൾ നടത്തിയത് വിമർശനങ്ങൾക്ക് വഴിവെച്ചു. സെപ്റ്റംബർ 23 ന് നടന്ന വാർത്താസമ്മേളനത്തിൽ മാധ്യമങ്ങളുടെ ചോദ്യങ്ങൾക്ക് വ്യക്തമായ മറുപടി നൽകാൻ മുഖ്യമന്ത്രിക്ക് സാധിച്ചില്ല. മന്ത്രി കെ എം ഷാജി സ്വകാര്യ വ്യക്തിയുടെ വാഹനം ഉപയോഗിച്ചതിനെ സതീശൻ ന്യായീകരിച്ചു.
സ്വകാര്യ വ്യക്തിയിൽ നിന്ന് യാത്രാ സഹായം സ്വീകരിച്ചത് ഭരണഘടനാപരമായ ചട്ടങ്ങളുടെ ലംഘനമാണ്. ഭരണഘടനയുടെ മൂന്നാം ഷെഡ്യൂൾ പ്രകാരം എടുത്ത സത്യപ്രതിജ്ഞയ്ക്ക് വിരുദ്ധമാണ് ഇത്തരം നടപടികൾ.
സ്വകാര്യ വിമാന കമ്പനിയായ ചിപ്സൺ ഏവിയേഷന് നൽകിയ ബില്ലുകൾ പുറത്തുവന്നതോടെ വിവാദം കൂടുതൽ ശക്തമായി. മുൻ സർക്കാരിൻ്റെ കാലത്ത് ഹെലികോപ്റ്റർ വാടകയ്ക്കെടുക്കാൻ ഉയർന്ന തുക കരാർ ഉണ്ടാക്കിയ കമ്പനിയാണിത്. സതീശൻ സർക്കാരുമായി പുതിയ കരാറുകളിൽ ഏർപ്പെടാൻ ഇവർ ശ്രമിക്കുന്നുണ്ടായിരുന്നു.
അതിനാൽ സൗജന്യ യാത്രയ്ക്ക് പിന്നിൽ അനാവശ്യ താല്പര്യങ്ങൾ ഉണ്ടോ എന്ന സംശയം ഉയർന്നു. ഇടുക്കി, തൃശ്ശൂർ, കൊച്ചി എന്നിവിടങ്ങളിൽ നടന്ന പരിപാടികളിൽ മാധ്യമപ്രവർത്തകരെ അകറ്റി നിർത്താൻ മുഖ്യമന്ത്രിയുടെ ഓഫീസ് പോലീസിന് നിർദ്ദേശം നൽകി.
പിണറായി വിജയന്‍റെ കാലത്തെ സുരക്ഷാ രീതികളെ വിമർശിച്ചിരുന്ന സതീശൻ, പിന്നീട് സ്വന്തം സുരക്ഷ വർദ്ധിപ്പിച്ചു. മുതിർന്ന കോൺഗ്രസ് നേതാവ് എ കെ ആൻ്റണിയെപ്പോലെ ലളിതമായി ജീവിക്കുമെന്ന് പ്രഖ്യാപിച്ചിരുന്ന മുഖ്യമന്ത്രിയുടെ വാഗ്ദാനങ്ങൾ ഇതോടെ ചോദ്യം ചെയ്യപ്പെട്ടു.
മറുഭാഗത്ത്, തിരഞ്ഞെടുപ്പിലെ കനത്ത തോൽവിയെ തുടർന്ന് സി പി എം വലിയ രീതിയിലുള്ള തിരുത്തൽ പ്രക്രിയകൾ ആരംഭിച്ചിട്ടുണ്ട്. ജനങ്ങളിൽ നിന്ന് പാർട്ടി ഒറ്റപ്പെട്ടു എന്ന തിരിച്ചറിവാണ് ഇത്തരം നടപടികൾക്ക് കാരണം.
ജനപ്രതിനിധികളുടെയും പാർട്ടി നേതാക്കളുടെയും ശൈലി മാറ്റണമെന്ന് നേതൃത്വം നിർദ്ദേശിച്ചിട്ടുണ്ട്. താഴെത്തട്ടിലുള്ള പ്രവർത്തകരുമായി വീണ്ടും ബന്ധം സ്ഥാപിക്കാൻ ഗൃഹ സമ്പർക്ക പരിപാടികൾ ആരംഭിച്ചു.
മുൻ സർക്കാരിൻ്റെ കാലത്തുണ്ടായ തെറ്റുകൾ തിരുത്താനും ജനവിശ്വാസം വീണ്ടെടുക്കാനും ശക്തമായ നീക്കങ്ങളാണ് സി പി എം നടത്തുന്നത്. ഭരണപക്ഷത്തെ പോരായ്മകൾ കൃത്യമായി ചൂണ്ടിക്കാട്ടി പ്രതിപക്ഷ ശക്തി തെളിയിക്കാനും പാർട്ടി ശ്രമിക്കുന്നു.
മുഖ്യമന്ത്രി സതീശൻ തന്‍റെ തെറ്റുകൾ തിരുത്തി മുന്നോട്ട് പോകേണ്ടതുണ്ടെന്ന് രാഷ്ടീയ നിരീക്ഷകർ കരുതുന്നു. മാധ്യമങ്ങളെ അകറ്റി നിർത്തുന്നത് അദ്ദേഹത്തിന് തിരിച്ചടിയാകും. കോൺഗ്രസ് പാർട്ടിയിലെ ആഭ്യന്തര തർക്കങ്ങളും എതിരാളികളുടെ സാന്നിധ്യവും അദ്ദേഹത്തിന് വെല്ലുവിളിയാണ്.
അനാവശ്യ വിവാദങ്ങൾ ഒഴിവാക്കി സുതാര്യമായി ഭരണം നടത്താൻ സാധിച്ചില്ലെങ്കിൽ സതീശന്‍റെ രാഷ്ട്രീയ ഭാവി പ്രയാസകരമാകും. ജനങ്ങൾക്ക് നൽകിയ വാഗ്ദാനങ്ങൾ പാലിക്കുകയും മാധ്യമങ്ങളോട് തുറന്ന സമീപനം സ്വീകരിക്കുകയും ചെയ്യേണ്ടത് അദ്ദേഹത്തിന്‍റെ സ്ഥാനത്തിന് അത്യന്താപേക്ഷിതമാണെന്ന് അവർ വിലയിരുത്തുന്നു.
