കശ്മീരിൽ ലഷ്കറെ തൊയ്ബ ഭീകര ശൃംഖല തകർച്ചയിൽ

ശ്രീനഗർ : ജമ്മു കശ്മീരിൽ പ്രവർത്തിച്ചിരുന്ന ഏറ്റവും പ്രധാനപ്പെട്ട ലഷ്കറെ തൊയ്ബ ഭീകരരിൽ ഒരാളായ ഹാഷിം മൂസ കൊല്ലപ്പെട്ടത് പാകിസ്ഥാൻ്റെ ഭീകര ശൃംഖലയ്ക്ക് വൻ തിരിച്ചടിയായി.

പഹൽഗാം ഭീകരാക്രമണവുമായി ഹാഷിം മൂസയ്ക്ക് (മുഹമ്മദ് ആസിഫ്) ശക്തമായ ബന്ധമുണ്ടായിരുന്നു. ആക്രമണം ആസൂത്രണം ചെയ്യുന്നതിലും നടപ്പിലാക്കുന്നതിലും ഇയാൾ പ്രധാന പങ്കുവഹിച്ചതായി അന്വേഷണ ഏജൻസികൾ കണ്ടെത്തിയിട്ടുണ്ട്.

ആക്രമണത്തിന് ശേഷം 2025 ഏപ്രിലിൽ അന്വേഷണ ഏജൻസികൾ പുറത്തുവിട്ട പ്രധാനപ്പെട്ട നാല് ഭീകരരുടെ ചിത്രങ്ങളിൽ ‘മൂസ’ എന്ന പേരിൽ ഇയാളും ഉൾപ്പെട്ടിരുന്നു. ലഷ്കറെ തൊയ്ബയുടെ പ്രാദേശിക ശൃംഖലയെ നയിച്ചിരുന്ന ഇയാൾക്ക് പഹൽഗാം ആക്രമണത്തിന്‍റെ സൂത്രധാരന്മാരുമായി നേരിട്ട് ബന്ധമുണ്ടായിരുന്നുവെന്ന് അന്വേഷണ ഏജൻസികൾ പറയുന്നു.

പ്രത്യേകിച്ച്, പഹൽഗാം ആക്രമണത്തിൽ പങ്കെടുത്ത ഭീകരരുമായി ലഹോറിലിരുന്ന് വാർത്താവിനിമയം നടത്തിയിരുന്ന സാജിദ് ജാട്ട് (സെയ്ഫുള്ള) എന്ന ഭീകരനുമായി ചേർന്ന് മൂസ പ്രവർത്തിച്ചിരുന്നു. താഴ്‌വരയിൽ ആക്രമണങ്ങൾ ഏകോപിപ്പിക്കാനും വഴിനടത്താനും മുന്നിൽ നിന്ന പ്രധാനികളിലൊരാളായിരുന്നു ഇയാൾ.

പാകിസ്ഥാൻ കേന്ദ്രീകരിച്ച് പ്രവർത്തിക്കുന്ന ഹാഷിം മൂസയുടെ അന്ത്യം കേന്ദ്ര കശ്മീരിലെ ബുഡ്ഗാം ജില്ലയിൽ നടന്ന സംയുക്ത സുരക്ഷാ ഓപ്പറേഷനിലായിരുന്നു. ഇത് സംഘടനയുടെ ബാക്കിയുള്ള ശൃംഖലയെ വലിയ രീതിയിൽ തളർത്തുമെന്ന് സുരക്ഷാ സേന വിലയിരുത്തുന്നുണ്ട്.

പിർ പഞ്ചാൽ മലനിരകളുടെ ഇരുവശങ്ങളിലും ഒരുപോലെ സാന്നിധ്യമുണ്ടായിരുന്ന ആളായിരുന്നു ഹാഷിം മൂസ. ജമ്മു മേഖലയ്ക്കും കശ്മീർ താഴ്‌വരയ്ക്കും ഇടയിൽ സുഗമമായി സഞ്ചരിക്കാനും ആക്രമണങ്ങൾ ഏകോപിപ്പിക്കാനും ഇയാൾക്ക് സാധിച്ചിരുന്നു. പ്രാദേശിക ഭീകരരുടെ പരിമിതമായ പിന്തുണയോടെ വിദേശ ഭീകരരുടെ ഒരു ചെറിയ സംഘത്തെയാണ് മൂസ ഈ പ്രദേശത്ത് നയിച്ചിരുന്നത്. ഇയാളുടെ വധത്തോടെ ഭീകരരെ റിക്രൂട്ട് ചെയ്യാനും ആക്രമണങ്ങൾ ആസൂത്രണം ചെയ്യാനും ആക്രമണങ്ങൾക്കുള്ള പിന്തുണ സമാഹരിക്കാനുമുള്ള ലഷ്കറിൻ്റെ ശേഷി തകരും.

2021 മുതൽ 2024 വരെയുള്ള കാലയളവിൽ മേഖലയിൽ സജീവമായിരുന്ന ലഷ്കർ ശൃംഖലയുമായി മൂസയ്ക്ക് അടുത്ത ബന്ധമുണ്ടായിരുന്നു. പൂഞ്ച്, രജൗരി, ഗുൽമാർഗ്, ഗാന്ദർബൽ, പഹൽഗാം തുടങ്ങിയ പ്രദേശങ്ങളിലെ വിവിധ ഭീകരാക്രമണങ്ങളിൽ ഇയാൾക്ക് പങ്കുണ്ടായിരുന്നു.

കഴിഞ്ഞ ഏതാനും വർഷങ്ങളായി ലഷ്കറെ തൊയ്ബയുടെ ഘടനയിൽ വലിയ മാറ്റങ്ങളാണ് ഉണ്ടായിട്ടുള്ളത്. ഒരു ദശാബ്ദം മുമ്പ് ഉണ്ടായിരുന്ന രീതിയിൽ നിന്നും തികച്ചും വ്യത്യസ്തമാണ് ഇന്നത്തെ അവസ്ഥ. അക്കാലത്ത് പ്രമുഖരായ പ്രാദേശിക കമാൻഡർമാരും വലിയ സംഘങ്ങളും ദക്ഷിണ കശ്മീരിലെ ചില പ്രദേശങ്ങളിൽ ലഷ്കറിന് ഉണ്ടായിരുന്നു.

എന്നാൽ അബു കാസിം, അബു ദുജാന, അബു ഇസ്മായിൽ, ബഷീർ ലഷ്കരി തുടങ്ങിയ പ്രമുഖ കമാൻഡർമാർ വധിക്കപ്പെട്ടതോടെ ലഷ്കറിൻ്റെ അടിത്തറ തകർന്നു. കശ്മീർ താഴ്‌വരയിൽ പ്രകടമായ സാന്നിധ്യം നിലനിർത്താൻ സംഘടനയെ സഹായിച്ച പഴയ രീതി ഇപ്പോൾ പൂർണ്ണമായി ഇല്ലാതായിട്ടുണ്ട്.

അതേസമയം, പാകിസ്ഥാൻ കേന്ദ്രീകരിച്ചുള്ള ശൃംഖല ഇപ്പോഴും വെല്ലുവിളിയായി തുടരുന്നുണ്ട്. പ്രാദേശിക ഭീകര ശൃംഖലകൾ വലിയ അളവിൽ നശിപ്പിക്കപ്പെട്ടെങ്കിലും അതിർത്തി കടന്നുള്ള ഭീകരരുടെ കടന്നുകയറ്റവും വാർത്താവിനിമയവും പിന്തുണയും സുരക്ഷാ സേനയ്ക്ക് ഭീഷണിയാണ്.

പഹൽഗാം ആക്രമണവുമായി ബന്ധപ്പെട്ട് ലഹോർ കേന്ദ്രീകരിച്ച് പ്രവർത്തിക്കുന്ന സാജിദ് ജാട്ട് എന്ന ഭീകരൻ ആക്രമണം നടത്തിയവർക്ക് നിർദ്ദേശങ്ങൾ നൽകിയിരുന്നതായി എൻ.ഐ.എ കണ്ടെത്തിയിരുന്നു. കൂടാതെ, താഴ്‌വരയ്ക്കുള്ളിൽ നിന്ന് പ്രവർത്തിക്കുന്ന മുഹമ്മദ് ലത്തീഫ് എന്ന പ്രാദേശിക കമാൻഡറെ പിടിയിലാക്കുന്നതിനായി സുരക്ഷാ സേന പ്രതിഫലം പ്രഖ്യാപിച്ചിട്ടുണ്ട്.

ദശാബ്ദങ്ങൾക്ക് മുമ്പുണ്ടായിരുന്ന വലിയ സംഘടനാരൂപം നഷ്ടപ്പെട്ടെങ്കിലും ലഷ്കറെ തൊയ്ബ പൂർണ്ണമായി അപ്രത്യക്ഷമായിട്ടില്ല എന്നാണ് ഇത് കാണിക്കുന്നത്. ചെറിയ സംഘങ്ങൾ, വിദേശ ഭീകരർ, പാകിസ്ഥാനിൽ നിന്നുള്ളവർ എന്നിവരെ ഉപയോഗിച്ച് പ്രവർത്തനങ്ങൾ തുടരാനാണ് സംഘടന ഇപ്പോൾ ശ്രമിക്കുന്നത്.

ബുഡ്ഗാം ജില്ലയിലെ യുസ്മാർഗിനും ദൂദ്പത്രിയ്ക്കും ഇടയിലുള്ള കുന്നിൻ പ്രദേശത്താണ് ഹാഷിം മൂസയെ വധിച്ച നിർണായക നീക്കം നടന്നത്. രഹസ്യവിവരത്തിന്റെ അടിസ്ഥാനത്തിൽ ഇന്ത്യൻ സൈന്യവും ജമ്മു കശ്മീർ പൊലീസും സി.ആർ.പി.എഫും ചേർന്ന് കോരാഗ് പ്രദേശത്തെ ഉയർന്ന മലനിരകളിൽ സംയുക്ത തിരച്ചിൽ നടത്തുകയായിരുന്നു. ഇതിനിടയിൽ ഭീകരർ വെടിയുതിർക്കുകയും സുരക്ഷാ സേന തിരിച്ചടിക്കുകയുമായിരുന്നു.

തുടർന്ന് നടത്തിയ തിരച്ചിലിലാണ് മുഹമ്മദ് ആസിഫ് എന്ന ഹാഷിം മൂസയുടെ മൃതദേഹവും വൻ ആയുധശേഖരവും കണ്ടെത്തിയത്. സെപ്റ്റംബർ ആദ്യവാരം യുസ്മാർഗ് കുന്നുകളിൽ നടന്ന ഏറ്റുമുട്ടലിൽ മൂസയുടെ അടുത്ത അനുയായിയായ യാസിർ കൊല്ലപ്പെട്ടിരുന്നു. അന്ന് രക്ഷപ്പെട്ട മൂസയെയാണ് ഇപ്പോൾ സുരക്ഷാ സേന വധിച്ചിരിക്കുന്നത്.