കൊച്ചി : രാഷ്ട്രീയത്തിൽ ഏറെ കോളിളക്കം സൃഷ്ടിച്ച സി.എം.ആർ.എൽ – എക്സാലോജിക് മാസപ്പടി വിവാദവുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയനും കുടുംബത്തിനുമെതിരെ സംസ്ഥാന വിജിലൻസ്എഫ്.ഐ.ആർ രജിസ്റ്റർ ചെയ്ത് അന്വേഷണം ആരംഭിച്ചു.
കൊച്ചിൻ മിനറൽസ് ആൻഡ് റൂട്ടൈൽ ലിമിറ്റഡ് (സി.എം.ആർ.എൽ) എന്ന കരിമണൽ ഖനന കമ്പനിയും പിണറായി വിജയന്‍റെ മകൾ വീണ വിജയന്‍റെ ഉടമസ്ഥതയിലുള്ള എക്സാലോജിക് സൊല്യൂഷൻസ് എന്ന ഐ.ടി സ്ഥാപനവും തമ്മിലുള്ള സാമ്പത്തിക ഇടപാടുകളാണ് ഈ കേസിന് ആസ്പദം.
യാതൊരുവിധ സേവനങ്ങളും നൽകാതെ മാസപ്പടിയായി ലക്ഷക്കണക്കിന് രൂപ കൈമാറി എന്നായിരുന്നു പ്രധാന ആരോപണം.
ഈ വിഷയത്തിൽ എൻഫോഴ്സ്മെൻ്റ് ഡയറക്ടറേറ്റ് (ഇ.ഡി) നേരത്തെ തന്നെ കള്ളപ്പണം വെളുപ്പിക്കൽ തടയുന്നതിനുള്ള പി.എം.എൽ.എ നിയമപ്രകാരം അന്വേഷണം നടത്തിവരികയായിരുന്നു. ഇ.ഡി നടത്തിയ അന്വേഷണത്തിൽ അനധികൃത പണമിടപാടുകളും ഹവാല വഴിയുള്ള പണം കടത്തലും സംബന്ധിച്ച നിർണായക തെളിവുകൾ ലഭിച്ചിരുന്നു.
ഈ തെളിവുകളുടെയും റിപ്പോർട്ടിൻ്റെയും അടിസ്ഥാനത്തിൽ പ്രാഥമിക അന്വേഷണത്തിന് പകരം നേരിട്ട് എഫ്.ഐ.ആർ രജിസ്റ്റർ ചെയ്ത് അന്വേഷണം നടത്താൻ ഹൈക്കോടതി ഉത്തരവിടുകയായിരുന്നു.
ആരോപണ വിധേയർ അഴിമതി നിരോധന നിയമപ്രകാരം (പി സി ആക്ട്) കുറ്റം ചെയ്തെന്നാണ് ഇ ഡി നൽകിയ വിവരങ്ങളിലുള്ളത്. വി എസ് അച്യൂതാനന്ദൻ മുഖ്യമന്ത്രിയായിരുന്നപ്പോൾ അഡിഷനൽ പ്രൈവറ്റ് സെക്രട്ടറിയായിരുന്ന കെഎം ഷാജഹാൻ നൽകിയ ഹർജിയിലായിരുന്നു ഈ മാസം 9 ലെ ഉത്തരവ്.
ഇ ഡി നല്‍കിയ കത്തില്‍ പ്രാഥമിക അന്വേഷണം നടത്തിയതിന് ശേഷം എഫ്‌ഐആര്‍ എന്നതായിരുന്നു സംസ്ഥാന സര്‍ക്കാരിൻ്റെ നിലപാട്. എന്നാല്‍ സംസ്ഥാന സര്‍ക്കാരിൻ്റെ ഈ വാദം തള്ളിയാണ് പ്രാഥമിക അന്വേഷണം ആവശ്യമില്ലെന്നും നേരിട്ട് എഫ്‌ഐആര്‍ ഇടാമെന്നും ഹൈക്കോടതി വ്യക്തമാക്കിയത്.
ഹൈക്കോടതി ഉത്തരവിനെ തുടർന്ന് വിജിലൻസ് ഡയറക്ടറേറ്റ്, പിണറായി വിജയനെ ഒന്നാം പ്രതിയാക്കിയും, മരുമകൻ മുഹമ്മദ് റിയാസിനെ രണ്ടാം പ്രതിയാക്കിയും, മകൾ വീണ വിജയനെ മൂന്നാം പ്രതിയാക്കിയും കേസ് രജിസ്റ്റർ ചെയ്തിട്ടുണ്ട്. അഴിമതി നിരോധന നിയമവും ഹവാല ഇടപാടുകളും ഉൾപ്പെടെയുള്ള വകുപ്പുകളാണ് ചുമത്തിയിരിക്കുന്നത്.
ഈ നിയമനടപടികളെ രാഷ്ട്രീയമായും നിയമപരമായും നേരിടാനാണ് പിണറായി വിജയന്‍റെയും കുടുംബത്തിന്‍റെയും തീരുമാനം. ഹൈക്കോടതി ഉത്തരവുകൾക്കെതിരെ നിയമവിദഗ്ധരുമായി ആലോചിച്ച് ഉയർന്ന കോടതികളിൽ അപ്പീൽ ഹർജി പോകുന്നത് ഉൾപ്പെടെയുള്ള കാര്യങ്ങൾ അവർ ആലോചിക്കുന്നുണ്ട്.
അതേസമയം, കേന്ദ്ര ഏജൻസികളെയും കോടതി നടപടികളെയും രാഷ്ട്രീയ ലക്ഷ്യങ്ങൾക്കായി ഉപയോഗിക്കുകയാണെന്ന നിലപാടാണ് സി.പി.എം സ്വീകരിച്ചിരിക്കുന്നത്. രാഷ്ട്രീയ എതിരാളികളെ വേട്ടയാടാനുള്ള ഭരണകൂട നീക്കമാണിതെന്നും, ജനങ്ങളെ അണിനിരത്തി ഇതിനെ രാഷ്ട്രീയമായി പ്രതിരോധിക്കുമെന്നും പാർട്ടി നേതൃത്വം വ്യക്തമാക്കിയിട്ടുണ്ട്.
ഈ കേസ് ദുർബലമായ നിയമപരമായ അടിസ്ഥാനത്തിലാണ് നിലനിൽക്കുന്നത് എന്ന വാദത്തെക്കുറിച്ച് വിവിധ കോണുകളിൽ നിന്ന് ചർച്ചകൾ നടക്കുന്നുണ്ട്. സേവനങ്ങളൊന്നും നൽകാതെ പണം കൈപ്പറ്റിയെന്ന ആദായനികുതി സെറ്റിൽമെൻ്റ് ബോർഡിൻ്റെ പഴയ കണ്ടെത്തലുകളെ മാത്രം ആശ്രയിച്ചാണ് ഈ അന്വേഷണങ്ങളെല്ലാം മുന്നോട്ട് പോകുന്നത് എന്നാണ് ഇതിനെ വിമർശിക്കുന്നവർ ഉന്നയിക്കുന്ന പ്രധാന വാദം.
കമ്പനികളും വ്യക്തികളും തമ്മിലുള്ള സാധാരണ ബിസിനസ് ഇടപാടുകളെയും കരാറുകളെയും തെറ്റായ രീതിയിൽ വ്യാഖ്യാനിച്ചാണ് ക്രിമിനൽ കുറ്റങ്ങളും ഹവാല ഇടപാടുകളും ആരോപിക്കുന്നത് എന്ന വിമർശനവും ഉയരുന്നുണ്ട്.
കൃത്യമായ തെളിവുകളുടെയോ പരസ്യമായ അഴിമതി തെളിയിക്കുന്ന രേഖകളുടെയോ അഭാവത്തിൽ രാഷ്ട്രീയ ലക്ഷ്യങ്ങളോടെയുള്ള ഊഹാപോഹങ്ങളുടെ പുറത്താണ് കേസ് കെട്ടിപ്പടുത്തിരിക്കുന്നതെന്നാണ് ഈ നിലപാട് സ്വീകരിക്കുന്ന നിയമ വിദഗ്ധരുടെ അഭിപ്രായം. കോടതികളിൽ ഇത്തരം വാദങ്ങൾ നിലനിൽക്കുമോ എന്ന കാര്യത്തിലും സംശയങ്ങൾ പ്രകടിപ്പിക്കപ്പെടുന്നുണ്ട്.
