തിരുവനന്തപുരം: സംസ്ഥാനത്തിന്‍റെ അടിസ്ഥാന സൗകര്യ വികസനത്തിന് വായ്പകളിലൂടെ തുക കണ്ടെത്തേണ്ട കിഫ്ബി, ഇടതുമുന്നണി സർക്കാരിൻ്റെ പരസ്യ പ്രചാരണങ്ങൾക്കായി 100 കോടിയിലധികം രൂപ ചെലവഴിച്ചു എന്ന് ഓഡിറ്റ് റിപ്പോർട്ട് .
പിണറായി വിജയന്‍ സര്‍ക്കാരിന്‍റെ അവസാന വര്‍ഷം കിഫ്ബിയുടെ അടിസ്ഥാനതത്വങ്ങളില്‍ നിന്ന് വ്യതിചലിച്ച് കൊണ്ടാണ് ‘എന്‍റെ കേരളം’, ‘സി.എം വിത്ത് മി’ പരിപാടികള്‍ക്കായി 2025-26 വര്‍ഷത്തില്‍ 1ഈ തുക ചെലവഴിച്ചതെന്നാണ് കണക്കുകള്‍.
2025-26 വര്‍ഷത്തെ കിഫ്ബിയുടെ ഓഡിറ്റ് ചെയ്ത കണക്കുകള്‍ പ്രകാരം, സര്‍ക്കാരിൻ്റെ നാലാം വാര്‍ഷികത്തോടനുബന്ധിച്ച് 2025 ഏപ്രില്‍-മെയ് മാസങ്ങളില്‍ ജില്ലകളില്‍ നടത്തിയ ‘എന്‍റെ കേരളം’ പദ്ധതിക്കായി 96.44 കോടി രൂപയും ‘സി.എം വിത്ത് മി’ പദ്ധതിക്കായി 6.14 കോടി രൂപയുമാണ് ചെലവഴിച്ചത്.
പരിപാടികളുടെ അടിസ്ഥാനസൗകര്യവുമായി ബന്ധപ്പെട്ട ചെലവുകള്‍ നിറവേറ്റുന്നതിനായി സര്‍ക്കാര്‍ ഉത്തരവുകളുടെ അടിസ്ഥാനത്തിലാണ് രണ്ട് ചെലവുകളും വരുത്തിയത്. കൂടാതെ അവ നേരിട്ടുള്ള പ്രോജക്റ്റ് ചെലവുകളായി രേഖപ്പെടുത്തുകയും ചെയ്തു.
സംസ്ഥാനത്തിന്‍റെ അടിസ്ഥാന സൗകര്യവികസന പദ്ധതികള്‍ നടപ്പിലാക്കുകയെന്നതാണ് കിഫ്ബിയുടെ പ്രധാന ലക്ഷ്യം. അങ്ങനെയിരിക്കെ രാഷ്ട്രീയ പ്രചാരണത്തിനായി തുക മാറ്റിയ നടപടി അനുചിതമാണെന്നും ഫണ്ട് ദുരുപയോഗം നടത്തുകയുമായിരുന്നെന്നും സാമ്പത്തിക വിദഗ്ധന്‍ കെപി കണ്ണന്‍ പറഞ്ഞു.
കിഫ്ബിയുടെ ഫണ്ടുകളില്‍ ഭൂരിഭാഗവും വായ്പകളാണെന്നിരിക്കെ അത് സര്‍ക്കാരിന്‍റെ പ്രചാരണങ്ങള്‍ക്കോ പരസ്യങ്ങള്‍ക്കേ വേണ്ടി ചെലവഴിക്കാന്‍ പാടില്ല. അത് സര്‍ക്കാര്‍ പണമാണെങ്കില്‍ പോലും. തുക ചെലവിട്ടതില്‍ സര്‍ക്കാര്‍ ഗൗരവമായ പരിശോധന നടത്തണമെന്നും നടപടികള്‍ സ്വീകരിക്കണമെന്നും അദ്ദേഹം ആവശ്യപ്പെട്ടു
വിപണിയിൽ നിന്ന് വൻതോതിൽ ഫണ്ട് സമാഹരിക്കുന്ന സ്ഥാപനമെന്ന നിലയിൽ കിഫ്ബിയുടെ ബ്രാൻഡ് മൂല്യവും വിപണിയിലെ വിശ്വാസ്യതയും വർദ്ധിപ്പിക്കാനാണ് ഇത്തരത്തിൽ പ്രചാരണം നടത്തിയത് എന്ന് കിഫ്ബി വ്യക്തമാക്കുന്നു. മുൻ ധനകാര്യമന്ത്രിയും കിഫ്ബി മുൻ വൈസ് ചെയർമാനുമായ കെ. എൻ. ബാലഗോപാൽ ഈ നടപടിയെ ന്യായീകരിച്ചു. ‘എന്‍റെ കേരളം’ എന്നത് വെറുമൊരു രാഷ്ട്രീയ പ്രചാരണം മാത്രമല്ലെന്നും, കിഫ്ബി വഴി നടപ്പിലാക്കിയ വലിയ വികസന പദ്ധതികൾ ജനങ്ങൾക്ക് മുന്നിൽ പ്രദർശിപ്പിക്കാനാണ് ഇത് സംഘടിപ്പിച്ചത് എന്നും അദ്ദേഹം പറഞ്ഞു. അടിസ്ഥാന സൗകര്യങ്ങളുമായി ബന്ധപ്പെട്ട പ്രദർശന ചെലവുകൾ വഹിക്കാൻ കിഫ്ബിക്ക് നിയമപരമായ വ്യവസ്ഥകൾ ഉണ്ടെന്നാണ് അദ്ദേഹത്തിന്‍റെ വിശദീകരണം.
കിഫ്ബി ഫണ്ട് വകമാറ്റി ചെലവഴിച്ചത് ഗുരുതരമായ ധനപ്രതിസന്ധിക്കും ക്രമക്കേടിനും കാരണമായെന്ന് യു ഡി എഫ് ആരോപിക്കുന്നു. നാടിൻ്റെ വികസനത്തിനും റോഡുകൾ, പാലങ്ങൾ, ആശുപത്രികൾ എന്നിവയുടെ നിർമ്മാണത്തിനും ഉപയോഗിക്കേണ്ട വായ്പപ്പണം സർക്കാർ സ്വന്തം പ്രതിച്ഛായ വർദ്ധിപ്പിക്കാൻ ദുരുപയോഗം ചെയ്തുവെന്ന് യു.ഡി.എഫ് നേതാക്കൾ കുറ്റപ്പെടുത്തുന്നു. സാമ്പത്തിക ബുദ്ധിമുട്ടുകൾ നേരിടുന്ന ഘട്ടത്തിൽ വൻതുക പരസ്യങ്ങൾക്കായി പാഴാക്കിയത് ജനങ്ങളോടുള്ള അനീതിയാണെന്നും വിഷയത്തിൽ ഉന്നതതല അന്വേഷണം വേണമെന്നുമാണ് അവരുടെ ആവശ്യം.
