വോട്ടു മോഷണ വിവാദം; ഗ്യാനേഷ് കുമാർ വീഴുമോ വാഴുമോ ?

ന്യൂഡൽഹി : വോട്ടു മോഷണ വിവാദത്തിൽപ്പെട്ട് വലയുന്ന, കേരള കേഡർ ഐഎഎസ് ഉദ്യോഗസ്ഥനായ ഗ്യാനേഷ് കുമാർ, മുഖ്യ തിരഞ്ഞെടുപ്പ് കമ്മീഷണറായി (സി ഇസി) തുടരുന്നത്  വൻ രാഷ്ട്രീയ കൊടുങ്കാറ്റിന് വഴിവെക്കുന്നു.

മുൻകാലങ്ങളിലെ അഴിമതി ആരോപണങ്ങളും നിയമനത്തിലെ സുതാര്യതയില്ലായ്മയും മുൻനിർത്തി പ്രതിപക്ഷം തെരുവിൽ പ്രക്ഷോഭം കടുപ്പിച്ചതോടെ അദ്ദേഹത്തിന്‍റെ സ്ഥാനം കടുത്ത ഭീഷണിയിലാണ്.

കേരളത്തിലെ പഴയ കെഎസ്ടിപി അഴിമതി കേസും മലേഷ്യൻ കമ്പനി എഞ്ചിനീയറുടെ ആത്മഹത്യയും ഉയർത്തിക്കാട്ടി ഇടതുപക്ഷ പാർട്ടികളും കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികളും സിഇസിക്കെതിരെ വിട്ടുവീഴ്ചയില്ലാത്ത സമരത്തിലാണ്.

സുപ്രീം കോടതി വിധിയെ മറികടന്ന് ചീഫ് ജസ്റ്റിസിനെ ഒഴിവാക്കി രൂപീകരിച്ച പ്രത്യേക സമിതിയിലൂടെയുള്ള നിയമനം കമ്മീഷന്‍റെ നിഷ്പക്ഷത തകർത്തു എന്ന് കോൺഗ്രസ് ആരോപിക്കുന്നു.

വരാനിരിക്കുന്ന തിരഞ്ഞെടുപ്പുകളുടെ വിശ്വാസ്യത ഉറപ്പാക്കാൻ അദ്ദേഹത്തിന്‍റെ രാജി അത്യാവശ്യമാണെന്ന് സമാജ്‌വാദി പാർട്ടി, തൃണമൂൽ കോൺഗ്രസ് തുടങ്ങിയ സഖ്യകക്ഷികളും നിലപാടെടുക്കുന്നു.

കമ്മീഷന്‍റെ നിഷ്പക്ഷത തിരിച്ചുപിടിക്കാൻ രാജ്യവ്യാപകമായി ജനകീയ വിചാരണയും ഇംപീച്ച്‌മെൻ്റ് പ്രമേയത്തിനുള്ള നീക്കങ്ങളും പ്രതിപക്ഷം ശക്തമാക്കിയിട്ടുണ്ട്. സി ജെ പി യും തെരുവിലിറങ്ങാൻ തയാറെടുക്കുന്നു.

എന്നാൽ ആരോപണങ്ങളെല്ലാം ബിജെപിയും കേന്ദ്ര ഭരണനേതൃത്വവും പൂർണ്ണമായും തള്ളിക്കളയുന്നുണ്ട്. ഭരണഘടനാ സ്ഥാപനങ്ങളെ രാഷ്ട്രീയ നേട്ടങ്ങൾക്കായി അപകീർത്തിപ്പെടുത്താനാണ് പ്രതിപക്ഷം ശ്രമിക്കുന്നതെന്ന് ബിജെപി കുറ്റപ്പെടുത്തുന്നു.

ആർട്ടിക്കിൾ 370 റദ്ദാക്കൽ, അയോധ്യ ക്ഷേത്ര ട്രസ്റ്റ് രൂപീകരണം തുടങ്ങിയ നിർണ്ണായക ദൗത്യങ്ങൾ വിജയകരമായി പൂർത്തിയാക്കിയ കാര്യപ്രാപ്തിയുള്ള ഉദ്യോഗസ്ഥനാണ് ഗ്യാനേഷ് കുമാർ എന്ന് ഭരണപക്ഷം വാദിക്കുന്നു. പാർലമെൻ്റ് പാസാക്കിയ നിയമപ്രകാരമാണ് ഈ നിയമനം നടന്നതെന്നും തിരഞ്ഞെടുപ്പ് നടപടികൾ തടസ്സപ്പെടുത്താനുള്ള രാഷ്ട്രീയ നാടകമാണ് പ്രക്ഷോഭമെന്നും ബി ജെ പി പറയുന്നു.

എന്നാൽ ടി ഡി പി, അർ എൽ എം,എൽ ജെ പി എന്നീ പാർടികൾ ഈ വിഷയത്തിൽ ഭിന്നാഭിപ്രായം പ്രകടിപ്പിക്കുന്നുണ്ട്. ഗ്യാനേഷ് കുമാർ കാര്യങ്ങൾ വിശദീകരിക്കാൻ തയാറാവണമെന്ന് അവർ ആവശ്യപ്പെടുന്നു. കേന്ദ്ര മന്ത്രി ചിരാഗ് പാസ്വാൻ ഇക്കാര്യം പരസ്യമായി ആവശ്യപ്പെട്ടു കഴിഞ്ഞു.

മുഖ്യ തിരഞ്ഞെടുപ്പ് കമ്മീഷണറെ സ്ഥാനത്തുനിന്ന് മാറ്റുന്നതിന്‍റെ നിയമ സാധുത പരിശോധിച്ചാൽ, ഭരണഘടന അനുസരിച്ച് അത് തികച്ചും സങ്കീർണ്ണമായ ഒരു പ്രക്രിയയാണ്. സുപ്രീം കോടതി ജഡ്ജിയെ പുറത്താക്കുന്നതിന് തുല്യമായ ഇംപീച്ച്‌മെൻ്റ് നടപടികളിലൂടെ മാത്രമേ ഒരു സിഇസിയെ മാറ്റാൻ നിയമപരമായി സാധിക്കൂ. ഇതിനായി പാർലമെൻ്റിൻ്റെ ഇരുസഭകളിലും പ്രമേയം അവതരിപ്പിക്കുകയും കേവല ഭൂരിപക്ഷവും ഹാജരായ അംഗങ്ങളുടെ മൂന്നിൽ രണ്ട് ഭൂരിപക്ഷവും (വിശേഷ ഭൂരിപക്ഷം) ലഭിക്കുകയും വേണം.

പ്രതിപക്ഷത്തിന് പാർലമെൻ്റിൽ നിലവിൽ ഇതിനുള്ള സംഖ്യാബലമില്ലാത്തതിനാൽ നിയമപരമായി അദ്ദേഹത്തെ പുറത്താക്കുക എളുപ്പമല്ല. എന്നാൽ കടുത്ത രാഷ്ട്രീയ സമ്മർദ്ദവും തനിക്കെതിരെയുള്ള പ്രചാരണങ്ങളും കാരണം പദവിയുടെ അന്തസ്സ് മുൻനിർത്തി സ്വന്തം ഇഷ്ടപ്രകാരം രാജിവെക്കുക എന്നതാണ് പ്രായോഗികമായ മറ്റൊരു വഴി.

ഗ്യാനേഷിൻ്റെ പ്രവർത്തങ്ങൾ നിയമവിരുദ്ധമായിരുന്നുവെന്നും, അദ്ദേഹം രാജിവെക്കുകയാണ് ഉചിതമെന്നും കേരളത്തിലെ മുഖ്യ തിരഞ്ഞെടുപ്പ് ഓഫീസർ ആയിരുന്ന ടിക്കാറാം മീണ അഭിപ്രായപ്പെടുന്നുണ്ട്. കമ്മീഷൻ്റെ പ്രവർത്തന ശൈലികൾ തെററാണെന്ന് കാണിച്ച് കഴിഞ്ഞ സെപ്തംബറിൽ അദ്ദേഹത്തിന് കത്തയച്ചിരുന്നു. പക്ഷെ, ഒന്നും തിരുത്തിയില്ല.

കഴിഞ്ഞ ഏതാനും വർഷങ്ങളിൽ ഗ്യാനേഷ് എടുത്ത എല്ലാ തീരുമാനങ്ങളും റദ്ദാക്കണം. എല്ലാ തീരുമാനങ്ങളും ഭൂരിപക്ഷാടിസ്ഥാനത്തിലാക്കണം.ഏതോ സമ്മർദത്തിന് വഴങ്ങിയാണ് അദ്ദേഹം തീരുമാനങ്ങൾ എടുത്തതെന്ന് വ്യക്തം – ടിക്കാറാം മീണ പറഞ്ഞു.

ഇതിനിടെ,  ആരാണ് ഗ്യാനേഷ് കുമാർ എന്നും അദ്ദേഹത്തിൻ്റെ പൂർവാശ്രമം എന്താണെന്നും സി പി എം നേതാവും കേരളത്തിലെ മുൻ ധനകാര്യ മന്ത്രിയുമായ ഡോ. തോമസ് ഐസക്ക് ഫേസ് ബുക്കിൽ കുറിപ്പിട്ടിട്ടുണ്ട്.

ആ കുറിപ്പ് താഴെ :

തുടക്കം കേരളത്തിൽ നിന്നാണ്. 2006-ൽ വിഎസ് സർക്കാർ അധികാരത്തിൽ വരുമ്പോൾ പിഡബ്ല്യുഡി സെക്രട്ടറി ആയിരുന്നു. 2006 അവസാനിക്കും മുമ്പ് അഴിമതി ആരോപണത്തെത്തുടർന്ന് വകുപ്പിൽ നിന്ന് മാറ്റി. വിജിലൻസ് അന്വേഷണവും പ്രഖ്യാപിച്ചു. ഏതാനും മാസങ്ങൾക്കുള്ളിൽ എ.കെ. ആൻ്റ =ണിയുടെ കേന്ദ്ര പ്രതിരോധ സർവീസിലേക്ക് മാറി.

എന്തിനായിരുന്നു നടപടി? കേരളത്തിൽ ലോകബാങ്കിൻ്റെ കെ.എസ്.ടി.പി പദ്ധതിയിൽ റോഡ് പ്രൊജക്ടിന്റെ ഒരു ഭാഗം ഏറ്റെടുത്തിരുന്ന മലേഷ്യൻ കമ്പനിയായ പതിബെല്ലിന്റെ കേരളത്തിന്റെ ചുമതലക്കാരൻ ആയിരുന്ന ലീ ബിൻ സീൻ എന്ന എഞ്ചിനീയർ നവംബറിൽ കോലാലംപൂരിൽ വച്ച് ആത്മഹത്യ ചെയ്തു.

ആത്മഹത്യാ കുറുപ്പിൽ കേരളത്തിലെ പിഡബ്ല്യുഡി ഉദ്യോഗസ്ഥരുടെ അഴിമതി, കെടുകാര്യസ്ഥത എന്നിവയെക്കുറിച്ച് വിശദമായി എഴുതിയിരുന്നു. ഗ്യാനേഷ് കുമാർ ആയിരുന്നു പേരെടുത്ത് പരാമർശിക്കപ്പെട്ടവരിൽ പ്രധാനി. കൈക്കൂലി ആവശ്യപ്പെട്ടെന്നും ആ കുറുപ്പിൽ ഉണ്ടായിരുന്നു. തുടർന്നാണ് വിജിലൻസ് അന്വേഷണവും സ്ഥലംമാറ്റവും നടന്നത്.

216 കോടി രൂപയുടെ ടെണ്ടർ ആയിരുന്നു. പക്ഷേ, ഭൂമി ഏറ്റെടുക്കുന്നതിനു വലിയ കാലതാമസമുണ്ടായി. അങ്ങനെ പദ്ധതി ഇഴഞ്ഞു നീങ്ങുകയായിരുന്നു. ആകെ 70 കോടി രൂപയുടെ ബില്ലുകളേ മാറിയിരുന്നുള്ളൂ. 13 കോടി രൂപയുടെ ബില്ല് പെന്റിംഗിലും. കാലതാമസത്തിനു കാരണം പതിബെല്ലാണെന്ന് പിഡബ്ല്യുഡി. അല്ലാ, സ്ഥലം കൈമാറിക്കിട്ടാത്തതുകൊണ്ടാണെന്ന് പതിബെൽ. കൈമാറി നൽകിയ ഭാഗങ്ങളിൽപ്പോലും പണി നടത്തിയില്ലെന്ന് പിഡബ്ല്യുഡി. പക്ഷേ, കരാർ പ്രകാരമുള്ള നഷ്ടപരിഹാരത്തിന് വകുപ്പ് ഒരു നോട്ടീസും നൽകിയില്ല.

അതേസമയം, പതിബെൽ കൃത്യമായി ഓരോ വീഴ്ചയ്ക്കും പിഡബ്ല്യുഡിക്ക് നോട്ടീസ് നൽകിയിരുന്നു. അതുകൊണ്ട് ആർബിട്രേഷൻ വരുമ്പോൾ സർക്കാർ തോൽക്കുമെന്നും വ്യക്തമായിരുന്നു. ഇതൊരു പതിവ് പരിപാടിയായിരുന്നു. ഇതിനു പുറമേയാണ് പണം നൽകുന്നതിനുള്ള കാലതാമസവും കുത്തിത്തിരിപ്പുകളും. ഇതിൽ മനംനൊന്താണ് ലീ ബിൻ സീൻ ആത്മഹത്യ ചെയ്തത്.

2007-ൽ അവസാനം സർക്കാർ 35 കോടി രൂപ നഷ്ടപരിഹാരം നൽകേണ്ടിവന്നു. പെന്റിംഗ് ബില്ലും, ബാക്കി പണി തീർക്കാൻ 215 കോടി രൂപയുടെ പുതുക്കിയ എസ്റ്റിമേറ്റും അംഗീകരിച്ചു. അങ്ങനെ 216 കോടി രൂപയുടെ പദ്ധതി പൂർത്തിയാകാൻ ചുരുങ്ങിയത് 330 കോടിയെങ്കിലും വേണ്ടിവന്നു. ഒരു എഞ്ചിനീയറുടെ ആത്മഹത്യയും.

കേന്ദ്ര പ്രതിരോധ വകുപ്പിലേക്ക് സ്ഥലംമാറിപ്പോയ ഗ്യാനേഷ് കുമാറാകട്ടെ യുഡിഎഫ് സർക്കാർ അധികാരത്തിൽ വന്നപ്പോൾ 2012-ൽ കേരള ഹൗസിലെ റസിഡന്‍റ് കമ്മീഷണറായി. 2016-ൽ പിണറായി വിജയൻ സർക്കാർ അധികാരത്തിൽ വന്നപ്പോൾ ഗ്യാനേഷ് കേന്ദ്ര സർക്കാരിന്റെ കശ്മീർ വകുപ്പിലേക്ക് മാറി. അവിടെ അദ്ദേഹത്തിൻ്റെ കാർമ്മികത്വത്തിലാണ് ഒരു സംസ്ഥാനത്തെ വെട്ടിപ്പൊളിച്ച് ഇല്ലാതാക്കി ബിജെപി ഭരണം കൊണ്ടുവന്നത്.

ഇതോടെ അമിത് ഷായുടെ മാനസപുത്രനായി എന്നുവേണം കരുതാൻ. രാമജന്മ ഭൂമി ക്ഷേത്ര ട്രസ്റ്റിൻ്റെ സൂത്രധാരനും ഗ്യാനേഷ് കുമാർ ആയിരുന്നു. പൊതുഫണ്ടിൻ്റെ പൊതുസംഭാവനയുടെയും അടിസ്ഥാനത്തിലുള്ള ക്ഷേത്രം ഒരു സ്വകാര്യ ട്രസ്റ്റായി മാറ്റുന്നതിനുള്ള തന്ത്രം മെനഞ്ഞത് ഇദ്ദേഹമാണെന്നാണ് അഭ്യൂഹം.

ഇതിൻ്റെയൊക്കെ പ്രത്യുപകാരമായിരുന്നു 2025-ൽ മുഖ്യ തെരഞ്ഞെടുപ്പ് കമ്മീഷണറായുള്ള നിയമനം. സുപ്രിം കോടതി നിർദ്ദേശ പ്രകാരം ചീഫ് ജസ്റ്റിസ്, പ്രധാനമന്ത്രി, പ്രതിപക്ഷ നേതാവ് എന്നിവരടങ്ങിയ സമിതിയാണ് മുഖ്യ തെരഞ്ഞെടുപ്പ് കമ്മീഷണറെ തെരഞ്ഞെടുക്കേണ്ടത്. എന്നാൽ നിയമഭേദഗതിയിലൂടെ ചീഫ് ജസ്റ്റിസിനു പകരം പ്രധാനമന്ത്രി നാമനിർദേശിക്കുന്ന കേന്ദ്ര കാബിനറ്റ് മന്ത്രി അടങ്ങുന്ന സമിതി രൂപീകരിച്ചുകൊണ്ടാണ് ഗ്യാനേഷ് കുമാറിനെ മുഖ്യ തെരഞ്ഞെടുപ്പ് കമ്മീഷണറായി നിയമിച്ചത്.

ഇത് സംബന്ധിച്ച് കേസ് ഇപ്പോഴും നടക്കുകയാണ്. എന്നാൽ ഗ്യാനേഷ് കുമാർ തന്നെ ഏൽപ്പിച്ച ദൗത്യം അഭംഗുരം നടപ്പാക്കിക്കൊണ്ടിരിക്കുകയാണ്. സുപ്രിം കോടതി ഇതിനെല്ലാം മാപ്പുസാക്ഷിയായി മാറിയിരിക്കുകയാണ്.