കൊച്ചി : കരിമണൽ ഖനന കമ്പനിയായ സി.എം.ആർ.എല്ലിൽ നിന്ന് സേവനങ്ങളൊന്നും നൽകാതെ വൻതുക കൈപ്പറ്റിയെന്ന ആദായനികുതി തർക്കപരിഹാര ബോർഡിൻ്റയും എൻഫോഴ്സ്മെൻ്റ് ഡയറക്ടറേറ്റിൻ്റെയും (ഇ.ഡി) കണ്ടെത്തലുകളെ തുടർന്ന് ഉയർന്ന മാസപ്പടി വിവാദം മുൻ മുഖ്യമന്ത്രി പിണറായി വിജയൻ,മകൾ വീണ, മരുമകൻ മുഹമ്മദ് റിയാസ് എന്നിവരെ നിയമക്കുരുക്കിലാക്കുന്നു.
രാഷ്ട്രീയ നേതാക്കൾക്ക് കൈക്കൂലി നൽകിയെന്ന ആരോപണത്തിലും, ഹവാല ഇടപാടുകളിലൂടെ പണം കൈമാറിയെന്ന കണ്ടെത്തലുകളിലും തുടർനടപടി വേണമെന്നാവശ്യപ്പെട്ട് ഇ.ഡി സംസ്ഥാന സർക്കാരിന് കത്ത് നൽകുകയായിരുന്നു. ഈ കത്തിൽ അന്വേഷണം നടത്തുന്നതിന് നിയമതടസ്സമില്ലെന്ന് അഡ്വക്കറ്റ് ജനറലിന്റെ നിയമോപദേശം ലഭിച്ചതോടെയാണ്, ക്രൈംബ്രാഞ്ച് എഡിജിപിയുടെ നേതൃത്വത്തിൽ പ്രത്യേക അന്വേഷണ സംഘത്തെ നിയോഗിച്ച് പ്രാഥമിക അന്വേഷണം നടത്താൻ സർക്കാർ ഉത്തരവിട്ടത്.
കേന്ദ്ര ഏജൻസിയായ ഇ.ഡി നല്കിയ വിവരങ്ങളുടെ അടിസ്ഥാനത്തിൽ പ്രതിപക്ഷ നേതാക്കൾക്കെതിരെ കേസെടുക്കുന്നതിനെ രാഷ്ട്രീയ പ്രതികാര നടപടിയായും രാഷ്ട്രീയ ഗൂഢാലോചനയായും ചിത്രീകരിച്ചായിരിക്കും സി.പി.എം പ്രതിരോധിക്കുക. അന്വേഷണം രാഷ്ട്രീയപ്രേരിതമാണെന്നും, പ്രതിപക്ഷത്തെ ഇല്ലായ്മ ചെയ്യാനും നേതാക്കളുടെ പ്രതിച്ഛായ തകർക്കാനും ഭരണപക്ഷം കേന്ദ്ര ഏജൻസികളെയും സംസ്ഥാന സംവിധാനങ്ങളെയും ദുരുപയോഗം ചെയ്യുകയാണെന്നും സി.പി.എം ചൂണ്ടിക്കാണിക്കും.
സേവനം നൽകിയതിനാണ് തുക ഈടാക്കിയതെന്ന വീണാ വിജയന്റെ മുൻ നിലപാടും, രാഷ്ട്രീയ സഹായം ചെയ്തിട്ടില്ലെന്ന പാർട്ടി നിലപാടും ഉയർത്തിക്കാട്ടി ഈ വിഷയത്തെ ജനമധ്യത്തിൽ രാഷ്ട്രീയമായി നേരിടാനായിരിക്കും സി.പി.എം ശ്രമിക്കുക.
നിയമവശങ്ങളിലേക്ക് കടക്കുമ്പോൾ, അഴിമതി നിരോധന നിയമപ്രകാരവും പൊതുപ്രവർത്തകർ മൂന്നാം കക്ഷി വഴി കൈക്കൂലി വാങ്ങിയെന്ന ആരോപണത്തിലും പ്രാഥമിക അന്വേഷണം സാധ്യമാണെന്ന് നിയമ വിദഗ്ധർ വ്യക്തമാക്കുന്നു. എന്നാൽ, ലളിതകുമാരി കേസ് ഉൾപ്പെടെയുള്ള സുപ്രീം കോടതി വിധികളുടെ അടിസ്ഥാനത്തിൽ ഒരു പൊതുപ്രവർത്തകനെതിരെ കേസ് രജിസ്റ്റർ ചെയ്യുന്നതിന് മുൻപ് വസ്തുതാപരമായ പ്രാഥമിക അന്വേഷണം നിർബന്ധമാണ്.
ക്രൈംബ്രാഞ്ച് നിലവിൽ രജിസ്റ്റർ ചെയ്തിരിക്കുന്നത് എഫ്.ഐ.ആറിന് മുന്നോടിയായുള്ള പ്രിലിമിനറി എൻക്വയറിയായതിനാൽ നിയമപരമായി ഇതിന് ഭദ്രതയുണ്ട്.പിണറായി വിജയനും കുടുംബത്തിനും ഇതിനെതിരെയുള്ള പ്രധാന നിയമവഴികൾ ഹൈക്കോടതിയെയും സുപ്രീം കോടതിയെയും സമീപിക്കുക എന്നതാണ്.
രാഷ്ട്രീയ കാരണങ്ങളാൽ എടുത്ത അന്വേഷണ ഉത്തരവും ഇ.ഡിയുടെ കത്തിന്റെ അടിസ്ഥാനത്തിലുള്ള പ്രൊസീഡിങ്സും റദ്ദാക്കണമെന്ന് ആവശ്യപ്പെട്ട് ആർട്ടിക്കിൾ 226 പ്രകാരം ഹൈക്കോടതിയിൽ ഹർജി നൽകാൻ സാധിക്കും. അഴിമതി നിരോധന നിയമത്തിലെ സെക്ഷൻ 17A പ്രകാരം മുൻകൂർ അനുമതിയില്ലാതെ അന്വേഷണം നടത്തുന്നതിനെ ചോദ്യം ചെയ്യാനും, എഫ്.ഐ.ആർ രജിസ്റ്റർ ചെയ്യുന്ന ഘട്ടമെത്തിയാൽ ക്വാഷിങ് ഹർജിയുമായി കോടതിയെ സമീപിക്കാനും പ്രതിഭാഗത്തിന് അവകാശമുണ്ട്.
ഭരണമുന്നണിയും സർക്കാരും വിഷയം വളരെ തന്ത്രപരമായിരിക്കും കൈകാര്യം ചെയ്യുക. നിയമപരമായി, കേസ് പിന്നീട് കോടതികളിൽ തള്ളിപ്പോകാതിരിക്കാൻ അഡ്വക്കറ്റ് ജനറലിന്റെ നിയമോപദേശത്തിന്റെ അടിസ്ഥാനത്തിൽ കൃത്യമായ നടപടിക്രമങ്ങൾ പാലിച്ചാണ് മുന്നോട്ട് പോകുന്നത്.
സി.ബി.ഐ അന്വേഷണം ഒഴിവാക്കാനും, അന്വേഷണത്തിന്റെ നിയന്ത്രണം സംസ്ഥാന ഏജൻസിയിൽ തന്നെ നിലനിർത്താനുമാണ് ക്രൈംബ്രാഞ്ച് എസ്.ഐ.ടിക്ക് കേസ് വിട്ടത്. രാഷ്ട്രീയമായി, പ്രതിപക്ഷത്തിന് മേൽ സമ്മർദ്ദം ചെലുത്താനും, അതേസമയം നിയമപരമായ നടപടികൾ മാത്രമാണ് നടത്തുന്നതെന്ന് വരുത്തിത്തീർക്കാനും സർക്കാരിന് ഇത് അവസരമൊരുക്കും.
